mi(sual).com

~Lalrosanga B Fanchun

I thih champha a lo thlen hian ka ngai che a, ka ngai zual che Ka pa.

Ahmasa in I mi ngaihdamna ka dil e Kapa, I fapa ka nihna ang a ka enkawl theihloh vang che leh kan zinga I awmlai a hahdam tak leh nuamsa taka ka dah theihloh vang che in. Na tak, khumbeta I damloh lai khan ka hmel hmuh leh ka enkawl I mamawh in I beisei viau thin ang ti raw! Mahse a nachang ka hriatloh vang leh ka zirna vangin I bul hnaiha nangma enkawlin ka awm theiloh vang khan tun thlengin ka inthiam theilo a sin! Khawngaih takin min ngaidam mawlh ang che aw Ka pa..

Aizawl Damdawi Ina I awmlai khan mahni a Zun leh Ek pawh thiar theilo kha I ni a, kei I thisen a chhuak I fapa in I Zun leh Ek thian lo a, midang in an tihfai sak thin lai te khan hreawm I ti awm kapa, khatianga damlo natak chunga inthlahrung taka I awm tur ka ngaihtuah chang te hian ka Mittui a tla fo thin a sin! Mi inkiltawih, inthlahrung thei tak leh tlawmngai tak I nih kha ka hrechiang em che a.

Ka  tet/naupan deuh lai a, min velh chang te khan ‘ka thatna tur’ tih hrelo in ka haw thin che a, kan In te kha achhiat bik em a vangin a hlutna hrelo in ka lo zahpui em em thin. Eiruk sum tello a nangma thawhchhuah ngei a I din leh sak tih kha ngaihtuahna chang ka lo hrelo a ni. I thiante’n Politician ho be tha a, eiruk sum leh eng eng emaw Loan in In lian pui pui leh tha tak tak an sak lai pawh a, politician tlawn buai duhlo a In leh Lo chhe taka min khawsak pui vang te khan leh Dik taka In leh Lo, chhungkua din a, mahni phak tawk chauha nun pui minlo tum tih hrelo in a^ ka ti thin che a, Ka haw em em thin che. Khang tianga In chhe taka min chenpui kha keini ai in hreawm I ti zawk ang tih rinna ka lo nei ngailo reng reng. Kei mahni vanga hreawm tuar vek I lo ni si a maw!.

Mahse tunah chuan ka hrethiam ta! I mi enkawlna zawng zawng ah khan ka lawm a, engmah sawiselna tur che ka hrelo. Ka duh emaw duhloh emaw Hun leh Ni te chuan upa lamah min hruai chho ve zela, ka hriat, ka chhiar leh ka tawn te pawh a tam tial tial a, chu ka hriatna te chuan I hlutna min hriattir tam tulh tulh a lo nih hi! I fapa ka nih hi ka lawm a, Nang kher kapa I lo nih hi chu mi vannei tawpkhawk ah ka inngai. Piang nawn leh dawn pawh ni I la, I fapa a pian leh ngei ka duh Kapa.

Chuan maw Kapa ‘Monday’ a lo thleng chho tura min phut ka lo thlen theihlohna chhan kha chu maw ka lo thlen chhoh hnu khan ka thusawi min ngaihthlak sak thei ni la chuan engkim kha ka hrilh vek ang che nga, I mi ngenna ka tih hlawhtlin loh kha min dem ka ringlo, min khawngaihin min lainat viau ang. Mahse ka thusawi ngaithla tur pawhin I lei taksa khan hriatna a nei tawh silo. Baihvai takin harsatna ka tawh te hrilhtur neilo in ka awm a sin! Biak eih theih I ni tawh bawk silo.. Nakinah Vanramah kan inhmuh hunah chuan Duat takin min pawm leh ang a, chumi hunah chuan ka thiamthu leh harsatna ka tawh te zawng zawng ka la hrilh vek dawn che nia aw Kapa.

Kapa I hun a tawi em a ni tiraw! Nang minlak sak a vang hian Pathian hnenah pawh ka vui thin, ka tanghma ka hai vang leh I thlazar hnuaia awm kha ka khamloh lutuk vang te pawh a niang e! Mahse khawvel natna leh lungngaihna ten hmun anchan tawhlohna hmunah I awm tawh tih ka hriatna te chuan ka khawharna chhawk zangkhailo mahse ka lungngaihna te chu a hnem thin. Ka ngai thei lutuk che Kapa. Kanu pawhin a ngai thei lutuk che a khawhar tak leh lungleng takin sina awm thin! A chang phei chuan angaih em vang che hian a rilru kimlo deuh te hian ka hre thin. Nang pawhin Kanu hi lo ngai ve thin rawh aw..

Chuan maw Kapa I thu minchah ‘’Unau inhmangaih takin lo awm ula, U leh nau karah engthil mah lo inba suh u, a nei zawkin a neilo zawk chu a thlawnin in inpe tur a ni’’ I tih kha ka zawm tlat dawn tih minlo hriatsak la, Chuan nangma hriat reng nan kan unau za in Kum tir(h) atang khan pawisa ka theihtawk theuh kan khawl a, kum tawp December thla ah veng chhunga rethei leh khawsak harsa ve tak ten Christmas hlim zawka an hman theihnan I hming in kan pawisa khawlkhawm chu kan hlan thin ang tih pawh minlo hriat sak bawk dawn nia aw Kapa.

He khawvelah I taksa chu awm tawhlo mahse I mi kalsan tak I chhungte rilru ah chuan kumkhua chatuanin I awm reng tawh ang. Thlamuang takin chawl taw hang che aw Kapa mangtha le!.

Chhiartu duhtak he ka ziah hi Mittui nena ka ziah a ni a, a thu remkhawm leh hawrawp diklo lai te a awm chuan khawngaih takin min hrethiam hram dawn nia. Chuan ka chah duh che chu : Nu leh Pa I la neih chuan hmangaih tak leh duat takin enkawl hram ang che. Eng ang pawhin sual mah la, I Nu leh Pa I zaha, I hmangaih phawt chuan malsawmna I dawng hrim hrim ang he khawvelah hian… Chuan fa nei tawh, Nu leh Pa tan : Sum leh pai tam tak pawh I fate kha hnutchhiah mah la, an la hmang zo ang. Mahse nungchang mawi tak I fate I rochun/hnutchhiah chuan engtikah mah a ral tawhlo ang.

Kapa damloh lai a thisen  min peksak tu leh buaipui tu : Aizawl MSO (Mara students Organization). Kapa damlo awmpui thintu: Mapuia, Merini, Kanuliani, F. Lallian(L) leh Aizawla kan chhungte zawng zawng chungah ka lawm tak zet. Sum neih chhun  pawh uilo a Kapa Damdawi leinana hmangtu leh engtik lai pawha min buaipui tu Pahmo Hlychho (Meisavaih) chunga ka lawmna pawh a dai tawhlo ang.  Kan chunga inthatna hi engtikah mah kei ni chuan kan rul senglo ang che u.  Mahse Pathianin malsawmna na sa tak a pe ngei ang che u tih hi kan tawngtaina a ni e.

Similar Posts:

• CM ui bo chungchang bawk kha
• Kelchal mangman
• Sweet and Touching story !!!
• Nangman min chelh zawk rawh
• ‘Tupawh’ {Sunday Pual}

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Tuesday, October 23rd, 2012 at 6:12 am and is filed under Obituary. You can follow any responses to this entry through the RSS 2.0 feed. You can leave a response, or trackback from your own site.