October 2012, Mizo(ram) Diary

November 4th, 2012 3:16 pm by chhana

1st. Monday: Mizo music channel hmasa ber ni turin ‘ROAR! TV’ tih chu The Cofee Place, Zarkawtah hawn a ni ta. ROAR! TV hi Mizo Music Scene leh Mizoram Music Market siamthat na tura lo piang chhuak a ni a; Mizo artist-te leh musician hote chawisan, awmze neia platform mumal tak siam sak, Mizo Music Channel original prog. tha tak pekchhuah leh Mizo thalaite nunphung pawh kawngtha lama zirtir thlengin a tum dawn a ni. A hawnna hun hmannaah hian Mizo zaithiam heng: Mami Varte, Andrue Pachuau, Baby Malsawmtluangi, Prophecy leh Kroashia-te an zai a ni.

2nd. Tuesday: Jodhpur, Rajasthan-ah Mizo hmeichhia pariat chu an thawhna hmun atangin Police ten an man. Thudawn danin Jodhpur a Shastri Nagar a Spa pakhat atangin heng Mizo hmeichhia 8 te hi nawhchizuara puhin man an ni a,vanmahni chuan a hmaa an lo thawhpui tawhte nen inthenin ho hranin an awm a, in itsikna avangin an thawhpui hlui (hnamdang) te chuan an hek niin an sawi nia thu dawn a ni.

3rd. Wednesday: Ethics Comt. chuan Saikuti hall Lungleiah ‘Rorelna dik’ tih thupuia hmangin seminar an buatsaih a; Chief Minister leh mi pawimawh dang engemawzatin an hmanpui. Seminar hi hun hniha then a niin chawhma lamah Ethics Comt. Chairman Rev.C.Rosiama’n paper ‘Rorelna dik-Bible-in a zirtir dan’ tih ngaihthlaka sawiho a niin chawhnu lamah Rev.C.Lalsangliana paper buatsaih ‘Rorelna dik-Mizoramah’ tih ngaihthlaka sawiho leh a ni bawk.

4th. Thursday: Mizoram People Forum (MPF) chuan Vanapa Hall-ah Annual General Meeting vawi rukna an hmang a, ‘Kum 2013 inthlanpui atana inbuatsaihna leh rorelna dik kalpui dan tur’ tih thupui an sawiho nghal. MPF Annual General Meeting chawhma inkhawm MPF President, Rev. Thangzauva’n a kaihruai a; MPF Secretary, Dr Lalbiakmawia Ngente leh Finance Secretary, PC Lalmawia ten report an pe a ni. Chawhnu inkhawm chu MPF Sr. Vice President, Rev. Lalzuithanga’n a kaihruai a; MPF General Secretary, Upa Lalramthanga’n thupui ‘Kum 2013 inthlanpui atana inbuatsaihna leh rorelna dik kalpui dan tur’ tih a sawi a, sawiho nghal a ni bawk. MPF-ah hian kohhran paruk – Presbyterian, Catholic, LIKBK, ECM, EFCI leh Methodist te, tlawmngai pawl panga – YMA, MHIP, MUP, YLA leh MTP (Saiha)-te an tel mek a; kum 2012-13 atana an budget chu Rs. 6,38,000/- a ni a, kum 2013-14 atana an budget chu Rs. 7,50,000/- a ni.

5th. Friday: Chanmari-Chaltlang kawngpui chhakah September 1, 2012 zana a minna laiah bawk khan tum hnih ngawt mai lei a rawn min thla leh a; kawngpaui a hnawh chiang leh hle. Kawngthlang lamah erawh a tla tlang lo hlauh thung. Leimin avang hian kawng chhak lam, Laipuitlanga in hmáwr tawng ber, R Lalbeiseia in luahtu chhungkua palite chu an inthiar chhuak a, leimin hian Ramdinthara vawk-in a hnâwl tel avangin, vawk pathum an thi.

6th. Saturday: Bethlehem Vengthlangah lei a min avangin, C Laithanga in ban pathum a inkhai a, hei vang hian in luahtu – B Vanlalvuana te chhungkua leh Vanlalzuala te chhungkua an inthiar chhuak. Leimin hian a thlanga lei (bridge) a tichhia a, electric ban pakhat a hnâwl tel bakah, vawk-in pakhat a hnawl tel a ni. Leimin avanga inthiar chhuak chhungkuate bungrua chu an thenawm leh hmun remchangah dah rih a ni.

7th. Sunday: 5th. Friday a tan tak Baptist Church of Mizoram hnuaia pastor bial hrang hrangte bial inkhawmpui neih chu a tiak ta. Inkhawmpui hi remchan zawkna avangin bial thenkhat chuan tunkar chho khian an hmang thung dawn a ni.

8th. Monday: Sorkar laipuiin eirawngbawlna gas dealer-te hlep tur zat bur khata Rs 11.42/- a a tihsan avangin Mizoramah pawh gas man tihsan a ni a; showroom a bur khat Rs 403/- ni thin chu Rs 408/- a tih san a ni. Khawlaia gas semna hmun a hralhna rate chu Rs 425/- atangin Rs 432/- ah tihsan a ni a; Aizawl khaw bul vel, khawdanga hralhna tur chu Aizawla a punna rate ang zel a la siamrem tur a ni ang.

9th. Tuesday: Hlimen-a PHE pipe lian, milimetre 250 panga rutute nia hriat, Hlimen Local Council member pahnih – Pachhunga (43) s/o Romawia [L] leh C Lalhmingthanga [45] s/o C Lianzuala te leh, a leitute – Lalramliana (60) s/o Laia [L] leh Lalhminghlua [27] s/o Lalhmangaiha, Hlimen ve vete chu police-te’n an man. Thu dawn danin, Pachhunga leh C.Lalhmingthanga te hian pipe lian panga hi kg. khatah Rs. 15 hisápin Lalramliana leh Lalhminghlua te hnenah an hralh a; a leitute hian thir chhia leikhawma hralh leh thintu, Biakremmawia [47] s/o C Lalhlira, Edenthar Veng hnenah Rs. 10,000-in an ve leh a ni. Biakremmawia chuan Mizoram ISPAT Industries hnenah a hralh tawh bawk

10th. Wednesday: World Mental Health Day vawi 20-na a ni a, he ni pual hian Volunteers for Community Mental Health (VOLCOMH) chuan Vanapa Hall-ah inkhawm an buatsaih a, Chief Minister Lal Thanhawla’n a hmanpui. Kumina World Mental Health Day thupui chu ‘Depression – A global crisis’ tih a ni. He hunah hian kum 2011 chhungin Mizoramah rilru ná vanga mahni intihlum mipa 38 leh hmeichhia 15 an awm thu a tarlan a ni.

11th. Thursday: JCB accident hmun hniha thlengah heng: JCB Operator Ramdinthar (24) h/o Lalfakawmi, Sesawng, JCB Operator Mozir Uddin (18), JCB handymen Nasim Udin (18) Karimganj v eve leh leiminin a dan avanga ding Aizawl-Kawrthah sumo driver Lalrinsiama, Kawrthahte hian an nunna hlu tak an chan.

12th. Friday: Pu Kapmwaia (70) Saichal khua chu a tupa (A fanu fapa) Lalsena kum 18 mi chuan sanghal an channaah a kap palh a, Pu Kapmawia hi ka chhawn lohin a hmunah a thi. Pu Kapmawia leh a tupa Lalsena te hian khan an khaw dai hnai Saichal atanga chhim lam km 2 velah sanghal changin an ram vak dun a, Pu Kapmawia hnimkara a awm chu Lalsena hian sanghal emaw tiin a kap a, Pu Kapmawia lu bawrah silaimu hian fuhin ka chhawn lohin Pu Kapkmawia hi a hmunah a boral. Saichal khua hi Saitual leh Hliappui inkar, Saitual atanga km 21 a hla-a awm a ni.

13th. Saturday: Sorkar laipuia Human Resource Development (HRD) Minister, Kapil Sibal chuan Lengpui rama National Institute of Technology (NIT), Mizoram dinna tur lungphùm a phúm. Kapil Sibal chuan, “NIT-Mizoram hi khawvela technology institute tha ber el phâk, world class-a siam a ni ang,” a ti. HRD Minister chuan, NIT-Mizoram dinna tura Lengpui khawtlangin ram an pe chu lawmawm a tih thu sawiin, bul tan thuai a nih tur thu a sawi a, “A satu tur atan rintlak leh belhchian dâwl, public sector organisation atangin a ni ang,” a ti. NIT-Mizoram lungphùm phùmna inkhawm hi Lengpui YMA Hall-ah neih a ni a, Lok Sabha MP, CL Ruala, NIT-Mizoram Board of Governors Chairman, K.Ravi Kumar leh Mizoram Higher & Technical Education Minister Lalsawta te pawhin thu an sawi. Inkhawmah hian Mizoram sorkara mi pawimawh engemaw zat an tel a, NIT zirlai leh faculty-te an tel bawk. Union Minister hi HRD Addl Secretary, Ameeta Sharma-i’n a rawn tawiawm bawk a ni.

14th. Sunday: 10th. Wednesday a tan tak Mizoram Presbyterian Synod hnuaia inkhawmpui lian ber dawttu, Prebytery Inkhawmpui, hmun hrang hranga neih chu a tiak a; Presbytery thenkhata Mizoram Synod then rawtna lut chu pass a ni a, Synod Inkhawmpuia kal zel tura tih a ni. Presbytery hrang hrangte thu pass zingah hian, Presbyterian Church of India Regional Assembly thuneihna siam that a, Mizoram Synod then rawtna te; Mizoram leilung humhalh leh enkawlna kawngah Synod-in nasa zawkin hma la rawh se tih te; Mizorama Chanchin Tha thlen ní chu March 15, 1891-a sawn rawtna te; kum 2013-a Mizoram Legialative Assembly inthlan awm turah inthlanna thianghlim leh felfai a awm theih nan ram pum huapa tawngtairual buatsaihte a tel. Heng bakah hian, Synod Hospital-a hman tur, Magnetic Resonance Imaging (MRI) khawl lei dan kawng Synod-in zawng rawh se tih te; kohhran dinhmun enin Mizoram Synod chhungah Presbytery siam belh tawh rih loh ni rawh se tih te; rinawmna inzirtir kawngah Synod-in hma la rawh se, tihte a tel bawk. Presbytery Inkhawmpui-ah hian kohhran upa thlan tharte nemngheh anni bawk.

15th. Monday: Driver, Nirmal Sinha (38) s/o Demaroi Sinha, Silchar, truck AS-01 DD-2733 khalhtu chu a motor khalha chuang hmeichhe laka a chet mawi loh avangin Kolasib police-te’n an man. Motor hi Silchar lam atanga lokal niin, Mizo nupa an chuang tel a; mipa zawk a mutthilh hlanin an nu chu driver Nirmal Sinha chuan khawih a lo tum a ni. Thil thleng chhungchang hi Kolasib an thlenin police hnenah an hrilh a, driver chu police leh Kolasib mite’n an man ta a ni.

16th. Tuesday: Mizoram Polytechnic, Lungleia zirlaite chuan an zirna in thawm that leh zirtirtu hmun ruak awmte hnawh khah phûtin tiamchin awm loin lungawi lohna an lantir. Mizoram Polytechnic, Lunglei zirlaite’n lungawi lohna an lantir hi Polytechnic SU leh MZP headquarters, Lunglei huaihawta neih a ni a; an thil phûtte chu – practical tihna hmanrua chhe lutuk thlak a, changtlung zawka Polytechnic thuam te, institution building thawm that te, zirtirtu leh thawktu dang post hrang hrang ruak 27 hnawhkhahte a ni. Lunglei MZP leh Polytechnic zirlaite hian an thil phûtte hi October 12, 2012 hma ngeia tihhlawhtlinsak turin sorkar hnenah ngennaa n lo thehlut tawh a; October 12 thlengin sorkar atangin thawm an la hriat loh avangin, lungawi lohna hi an lantir ta a ni. Lunglei Polytechnic zirlaite’n lungawi lohna an lantirnaah hian thawktute kal tur an dang a, buaina lian tham chhuak erawh a awm lo hlauh.

17th. Wednesday: Lengpui Airport-a security duty-te’n Tryber Singh-a kut atangin pistol an man. Tryber Singh hian pistol hi Kolkata pan tur Jet Airways thlawhna chhungah pâi luh a tum nia sawi a ni. Lengpui Airport security duty-ten thu an zawhfiahnaah Tryber Singh chuan sipai báng a nih thu leh thlawhnaah pistol pâi luh theih loh a ni tih a hriat loh thu a sawi a, licence pawh a nei tih a sawi. Security-te chuan, pistol chu Rs. 5,000/- chawiin bungraw zingah thawn theih a nih thu an hrilh a, mahse Tryper Singh chuan thawnna tur pawisa a neih loh avangin an hawtir leh a ni.

18th. Thursday: MZP chuan I&PR Auditorium-ah Federal Council sitting an nei a, September 29, 2012-a Vairengte police check gate thlang zawk paltlang tum Assam mi eng emaw zatte lo dangtu Vairengte nu pariatte hnenah chawimawina thuziak leh párthi an hlan nghal. MZP-in chawimawina an hlan Vairengte nuhote chu – Puithangi, Lalsangpuii, Chhingnghilhlovi, Kapzawni, Lalthansangi, Vanram¬mawii, Baby Vanlalzari leh Vanlalliani te an ni.

19th. Friday: Tuithiang Veng mipuite chuan lungawi lohna lantir nan kawng zawh a, an veng mi V Lalramlawma (46) s/o Laiawrha, tun hnaia Chawngte khuaa kut a tawrh tuar loa thi vanga lungawi loh lantirna atan an ti a ni. Thudawn danin ICDS-a 4th Grade hnathawk Pu Lalramlawm (460, Aizawl Tuithiang venga awm thin chu transfer a nih angin April thla vel atang khan Chawngte ICDS-ah a hna a zawm a, amah hi zu lama buai ve thin niin a thiante chuan an sawi. October ni 16 zan dar 10 vel khan a thiante zu in tur a dil a, a khur nasa hle a, a iptea mobile phone pawh phawrh hleitheilo khawpin a khur nasa niin an sawi. A thiante chuan zu pek tur an lo nei mai bik lova, chutia a buai chu zing dar 2:40 vel (Oct ni 17)-ah in atangin a chhuak ta a ni. A kalchhuak ta hi Chakma in pakhatah a lut a, thosilen te a keu a, an ni chuan misualah ngaiin in neitupa chuan, thosilen nen a pawm bet a, a chal velah te pawh a hnek deuh nawk nawk niin an sawi. Chutia an han inpawmbet an han in thlah leh kha, khum atang chuan chhuatah a tla thla a, chiri ang mai hian biak theih lohin a khurin a chilphuan te a tla ta a, biak hleih theih loha a awm takah chuan a luhna in neitu te hian Thana lamah an hrilh ta a ni. Chawngte Police te leh Pu Lalramlawma thiante pahnih Mizo ve ve te chuan va ngaihvenin ICDS complex lamah an la phei a, a harh leh mai an beisei a ni. Nimahsela, Pu Lalramlawma hi nikhawhreloin awm ta reng mai a, a harh mai tak lohah chuan Chawngte dawmdawi inah an la phei leh a, Chawngte Civil Hospital-ah CT Scan te awm loh avangin Doctor-in Lungleiah refer-a, Lunglei lama phurh phei an tum laiin kawng lakah a boral ta a ni. Local Council leh branch YMA-te bultumin Tuithiang Veng mipuite hian an veng atanga Aizawla Chakma House, Hunthar Veng thleng kawng zawh a, Chakma House tuala tharum thawhna tel lo punkhawm a, thil phût an neihte tarlanna lehkha an siam chu Chakma House-a thehluh an tum a ni. Tuithiang Veng mipuite hi police-te’n Bazar Bungkawn thlang, Saron Vengah an lo dang a, thuneitute nen an inbiakrem hnuah phalsak an nih angin, Millennium Centre thleng kawng an zawh a; mipuite an tîn darh hnuah an khawtlang hruaitute’n Chakma Autonomous District Council (CADC) Chief Executive Member hnena thleng tur lehkha an siam chu Chakma House-a CADC sorkar aiawh hnenah an thehlut a ni.Tuithiang LC leh YMA-te lehkhaah chuan, Chawngtea ICDS Project-a thawk, V Lalram¬lawman October 17, nilaini zana mi kut tuara thichhâwnga chhar a ni leh, October 18, Ningani zinga a thi chu ngaihthiam har an tih thu leh an dem thu te, V.Lalramlawma nupui fanaute hnenah zangnadawmna CADC-in Rs. 5,00,000/- tal pek an phût thu te, kutthlaktu leh mawhphurtu dik tak chhuichhuak a, a na thei ang bera hrem an phut thute leh, Chakma Autonomous District Council chhunga Mizote himna ngaihtuah tura CADC member zawng zawngte an phût thute a tel a ni.

20th. Saturday: London Olympic 2012-a boxing a silver medal latu MC Mary Kom chu Eternity Partners chuan chawimawina Rs 6,00,000/- Aijal Club-ah an hlan. Mary Kom hi Manipur lam chhuak a ni a; hetianga kan tlang mi puiin hetiang dinhmun a thleng thei hi a lawmpuiawm takzet a ni. Pasal neiin fa pahnih a nei tawh bawk. Chhangchhe nu ni chunga hetiang dinhmun a thleng thei hi a ngaihsanawm lehzual.

21st. Sunday:India ram pumah September 1, 2011 leh August 31, 2012 inkara India rama police, an duty laia thite sûnna hun hman a ni a, Aizawlah pawh 1st. Bn. MAP parade ground-ah Mizoram DGP, Alok Kumar Verma hoa hman a ni. Police thite sûnna hunah hian DIG (Training), Saizela’n September 1, 2012 leh August 31, 2012 inkara duty laia police thite hming a chhiar chhuak a; kum khat chhung hian state hrang hrang leh force hrang hrangah duty laia thi 566 an awm a, Mizoramah erawh chuan thi an awm lo a ni. Duty laia police thite hming chhiar chhuah a nih hnuah, mi 566-te sûnna hun hmang a ni a; 1st MAP parade ground-a sûnna hun hman zawhah 1st MAP Bn. compound-a duty laia police thite hriatrengna lungphunah DGP hoin police officer-te’n pangpar an dah a ni.

22nd. Monday: Pi Lalawmpuii (Maawmi) (34) w/o Pu Lalthlengliana, Sentlang ami chu an khaw dai Zaihrikawnah behlawi sik tura a kal chu vai bawngchaw phur Raju Shamir Das (15) chuan pawngsual tumin a bei a; Pi Maawmi hian a duhloh avangin he vaipa hian a chem ken laiin na takin a sat a; heng laia kalten an hmuh chuan biak theiha a la awm avangin a chetsual dan hi a la sawi thei a ni. Damdawi in panpui a nih laiin Sihphir ram chhung Sakawrhmuituai zawn vel tlan laiin a hliam tuar lovin a boral. Let pui leh nghal mai lovin Civil Hospital thlen pui tho a niin a ruang hi postmortem nghal a ni. Pi Maawmi hian pasal Pu Lalthlengliana leh a fate naupang te te 4 a kalsan a ni.

23rd. Tuesday: YMA General Conference vawi 67-na chu Kawrtethawvengah tan a ni a; palai 2,000 velin pandal, Hachhek Rûnah palai lawmna inkhawm neih a ni a; Central YMA Assistant Secretary, RL Rindika’n a kaihruai a, Kawrtethawveng Joint YMA President, B Laldinthara’n palai lawmna thu a sawi. Inkhawmah hian bialtu MLA, Parliamentary Secretary Lalrinmawia Ralte, Organising Committee Chairman ni bawkin thu a sawi bawkin CYMA General Secretary, Vanlalruata leh Finance Secretary, J Lalsailova ten report an pe bawk a ni.

24th. Wednesday: Mizorama football lama inelna lian ber tur Mahindra 2wo Whellers Mizoram Premier League chu AR Lammualah tan a ni. He League-a match hmasa berah Luangmual leh Chanmari ta inkhelin 1-1 in an inhnehtawk. Inkhel tan hma hian a hawnna niah fawmin Mizo zaithiam hrang hrangten concert an nei bawk. He League-a an ball hmanah hian ‘Tumpang’ tih ziah a ni,

25th. Thursday: Thingsulthliah tlangval Lalngaihawma (23) s/o Lalrosanga, Thingsulthliah Field Veng chu Armed Veng-a a awmna, a u Sangkima Ist MAP te In ah inawkhluma hmuh a ni a, a bialnu vanga intihlum ngaih a ni. A ruang hi post mortem lohin an khuaah vuiliam nghal a ni.

26th. Friday: Mizoram Law Commission chu Zirtawpni khan an Chairman, R.Lalrinawma, MLA hoin Secretariat Conference Hall-ah an thukhawm a; Mizo rokhawm dan (The Mizoram District (Inheritance of Property) Act, 1956) chungchang an ngaihtuah.

27th. Saturday: Mission veng, Aizawl Hospital bula Taxi ding thin driver-te chu Tlawngah an picnic-a; picnic zinga tel Taxi Driver, Hmingthanchhunga (34), Vaphai khaw chhuak, Model Venga Zirthangkima in luaha khawsa mek chu a tla hlum. Hmingthanchhunga a chesual tih an hriat velah a thiante pahnih chuan chhan tumin tuiah hian an zuangthla ve nghal a, an ni pahnih hi tuiah chuan talbuaiin an tlan zui ve ta a ni. An thianpa chhan tuma tla zui ve ta te pahnih Taxi Driver ve tho, Rinchhunga leh Lalthanpuia te chu thilo aruangin chhanchhuah an ni a, Aizawl Hospital lamah lak chhoh an nih hnuah chhuah tir lehnghal anni.

28th. Sunday: Thuampui BRTF Camp area thlanga cheng Bawngvulh tu Pu Bhola Karki (Gurkhali) fapa, Suraj Karki kum 6 mi chu BRTF camp chhunga a thiante nen an infiam laiin BRTF tuiphur Tank-lorry inher tur ke hnunglam chuan a chil palh hlauh mai a, driver hian ngaihsak lova a kal lehnghal mai avangin khawtlang hruaitute inrawlhin a chiltu driver chu biak a, hliam enkawlna senso te pawh tum ve tura biak duhin an hotute hnenah an dil a; nimahsela, BRTF hotu te hian driver chu hmuh an phal lova, khawtlang hruaitute chu “Helai hi camp chhung a ni a, helai camp chhungah chuan YMA anga rawn inrawlh a rem lovang” tia an lo chhan avangin khawtlang hruitute an lawm lo hle.Buaina a sosang chho zel a, mipui an pung chak hle a, camp chhunga store leh chenna in te chu nasa takin an suasam a; dawr leh motor-te halin dawr thil khawlaia let rem rum a tam hle. Tin, hetiang buaina chhawr tangkai tum misual thenkhat an lo awm a; thil hlu engemawzat chu a kang lo tih hriat siin hmuh tur awmlo a awm nual. Buaina hi a sosan em avangin carfew-te pawh puan hial a ni.

29th. Monday: Phai lam atanga Mualkhang Gas Bottling Plant-a dah tur Gas phur, LPG Gas Tanker chu Kolasib thlen hma Rengte tlangsang, LAD bawlhhlawh paihna bulah a chesualin kawngthlangah metre 30 vel a lum a; a chhehvel hi gas leak rimchhia-a a khah tlat avangin hnaih chilh ngam a ni lova; kawng kalte mei lampang khawih lo turin an inhrilh uluk hle. He LPG bullet chesualah hian thi an awmlo a, driver leh handiman hnamdang ve ve te chu Kolasib Damdawiin pan pui an niin fist-aid pek an nih hnuah vawiin chhun khan damdawiin atangin an chhuak leh nghal.

30th. Tuesday: State Planning Board Vice Chairman, Lalkhama hoin a pisaah vantlang hnena thuneihna pek (communitization leh decentralization) dan tur chungchang ngaihtuah a ni. Communitization leh decentralizationa chungchang zirchiang tura din committee-in Empowerment of Community chung changa draft report a siam chu thlirho a ni a; policy duan chhinin a tum ber chu – thingtlang leh khawpui thenkhata mipuite hnena thuneihna sang zawk pek dan tur a ni. Draft report hi pawm niin, remchang hmasaah ‘sorkara thehluh ni se’ an ti. Meeting-ah hian, khaw tina sikul, health sub-centre, tui, kawlphetha leh kawngte a khaw mipuite’n neitu nihna rilru pu chunga an enkawl theih nan a tul anga thuneihna leh sumte an kuta pek a that a beiseiawm thu sawi lan a ni.

31st. Wednesday: Tuirial dunga sangha mana ram thian zaho mi pali Roluaha (45), K.Pahlira (45), Thapa leh Chhetri Durtlang khua vekte chu Ratu leh Bukpui inkar Tuirial luiah sangha manin ram an riak a, luiah puma an in kar laiin sai kawlhin bei thutin Mizo pahnihte hian nunna an chan. Hemi te thian ho hi kar khat vel sangha manin ram an riak tawh a, sangha pawh kg 50 vel zet chu an rep khawl tawh a ni. An lui kalna Tuirial kam thing leh mau te hi Cachar mi ten sai hmangin an la nasa thei hle a, hmun tamtakah sai rual chhawrin riahbuk an sual a, an sai chhawr te chu zan lamah an chhuah mai thin a, sai rual zingah hian a kawlh fal deuh pakhat tal an awm thin si a, mihring tan an hlauhawm thei hle. Ram kalte beitu Sai sual kan tih mai hi Cachar phai vai ho ina Thing hnuk tura an chhawr zinga mi ani a, hun engemaw lai atang khan a hel tak avangin ramhnuaiah a tlan bo a, mi thlam te ti chhia in an bungrua te pawh a suasam zauh zauh thin a ni. Helai lui dunga ramriak leh ramkal te pawhin an hlau thei hle. Amah chhawrtu a pu pawh hian hlauin a tlan hawsan tawh nghe nghe