Panlai Nun – Sikni eng leh zanthiang khaw vawt

November 15th, 2012 4:00 pm by Dr Mahminga Sailo

Khua a vawt tan a, lunglentu pawh a vawt lam hlir a ni ta mai..

Lungleng kan kiu vawng vawng…
Fur ruahtui a hulin, thlasik a intan chho a. Sik leh sa pawh duhthusamin a nuam. Kan thianzaho chuan chhungte tana kan tangkai ve theihna tiin tuahthing pu turin kan inzui chhuak a. Ngai teh, siahthing zar che vel kara sikni eng mawiin min bih zoh zoh te, chhai D zawnga ama hming chawi ngeia zaivawr tukhumvilik lo hram te, ralkhata tawllawt lo tukuruk loh loh bakah, ral lehlam maia nula leh tlangval thingphur niawm tak te’n thing an sat ri kauh kauh te nen lam chuan lentupui khawhar tur an hnem a. U-a-ma a hnaih tawh avangin, nu leh pate bula kan sak ngam loh lengzem hlate pawh chuan kan lung a len tawh bik lova. Rilrua Bethlehem bawngin ngaihtuah chungin Krismas hla kan hriat te sain kan awrawl tawp tawpin kan zai rawng rawng thin.

Zawngtah lo ang aw
Ramhnuai pilril deuha han vah chuan, zawngtah rah tha tak tak hmuh chang a awm a. Thing lawn thei deuh te an han lawn sap sap a. A rah thatna zar kha a remchang laiah an han tukthla a. Keini lei lam sipai chuan zawngtah zar sahthlak atangin zawngtah chu kan lo khawnkhawm thung a. Inzat thlapin kan insem thin. Thing pu paha zawngtah han ah haw ngei kha chuan chhungte chungah pawh hmai a uang ve thin a nia.

Saihlum business
Thingtlanga chen chuan hunawl a tam bawk a. Sikul chawlh a nih tawh chuan sava vehin hun kan hmang fo. Ka u chiah hian sava veh a peihin nikhatah sava 7/8 te a perh thlak thin avangin min awl titih a. Chuvangin kei chuan saihlum business ka buaipui deuh ber. Middle sikul kan kallai vel phei kha chuan, vartianah hlumso sawk turin kan tho va. Kawmchar/leikapuiah khur deuh hlawk hlawk pahin saihlum kan han hrual a. vawiinah engzatman nge ka hralh ang aw tiin phur takin ka’n hrual a. Naupang a thuchang, pawisa duhthawh laia ka u’n ka saihlum hrual sa a’n rut thin kha ka ui deuh thin a. Ani lah chuan, ka sava perhthlak I ei ve lo mai ang, a tih tawh kha chuan chhan ngaihna a vang thin bawk si.

Saihlum phoro sa thlap, 100 zel kha Rs, khatin min leisak thin a. Pawl nga ka nih kumin, saihlum ka hrual man ringawt kha Rs. 80 vel chu ka khawl ve tlat a ni. Rs. 1 leh Rs 2 note hlui deuh deuh ka kawl ve nual hman. Chuvangin saihlum hi ka rualpui zingah chuan a hrual tam ber pawl chu ka nih ngei ka ring.

Meipui chhem ang.
Zanriah kan ei zawh chuan tlangchhipa khelmual ka neih ve chhunah kan inhawrkhawm a. Thuamhnaw lum tha inbel tur kan neih loh avangin, thlasik laia pawnto tur chuan meilum ai tur kan mamawh. Tichuan le, zan thla eng hnuaiah, mual sira daprap, phelsep leh hnawmhnawk dang hal theih tur chu kan han fawmkhawm tan a. Hnawmhnawk khawnkhawm tam tam kha naupang fel kan ni mai a. Mual kil zinga kan nel berte in atangin meichher kan va chhi chhuak a. Hnawmhnawk kan fawmkhawm chu tiangkhawmin kan hal hluah thin.

Mei kan ai lum hnu chuan inbihruksiak turin pawl hnihah kan inthen a. Mi thenkhat biru kil lutuk kan hmuh zawh tak loh phei chu, kan hawsan chang a awm fo mai. A then theihai buk kungah te an biru a, thenkhat mi huan mawngah te. Mahse, rul chuk emaw, che sual ta emaw an awm tak kha ka hre miah lo.

Phur thuta chhunzawm atan…

16 Responses to “Panlai Nun – Sikni eng leh zanthiang khaw vawt”

1
lr hlonchhing Says:
November 15th, 2012 at 4:11 pm
Chh1ar 1la

Report this comment
2
XaiA Says:
November 15th, 2012 at 4:19 pm
Thing put,sava veh kan ching hle.tuichawi hi thlasik lai chuan ka mawhphurh na!!!!
Thlasik vawt tawk a inchhuih lah khaa hit mup a, a na hriat hmain an var hlaih a,an sen leh tiam tiam a,a na dawn tihkha kan hre reng bawk si…a pun duh zek lehnghal a….= kan bal thei tihna!!!

Report this comment
3
lr hlonchhing Says:
November 15th, 2012 at 4:22 pm
Sanghatin mawng thlawn hlawk khawp a, bomb han tih puah kha a nuam. Plate te reuhte a insiam nghal zel reuhva.

Report this comment
4
sheldon Says:
November 15th, 2012 at 4:45 pm
Khaw awmdan hrim hrim pawh hi a lunglenthlak ruih tawh mai. Mahminga chu naupan lai chanchin sawi tur i hre tam bik ee. Kei chu sawi tur ka hre tlem khawp, ka naupan lai in ka at viau ka ring…hehehe

Perhpawng kua kan lai thin ngei mai a. Inkhual lem kha ka hrat khawp. Vawk in ruak te kha inlem ah kan hmang a, a lo hygiene lo thei rem rem khawp.

Report this comment
5
Dr Mahminga Sailo Says:
November 15th, 2012 at 5:02 pm
@ Xaia.. Ke zungpui chhuih khi, ngaihtuah ringawt paw’n, mawng a za..

@ lr… Halpuah/bomb kan han hal a, Ka hal.. kan han ti ngei aah(h)..

@ sheldon… Mi(sual) vang hian ka inpuang reng dawn a nih hmel. Ka ziak tawh lovang ka’n ti ren rawn a, ka ziak leh thin…

Perhpawng kan lai a, an rauhsan tawh a ni ngei ang chu. Mahse, kan u te’n min hrilh thin kha kan hrechhawng ve zel a. A laitu ai maha perhpawng hmu chak naupang khan min bawr tuau tuau thin si. Beisei sang tak chunga kan laih hnuah, perhpawng a awm loh hlauh chuan, Tunge a lulamah lo awm? A hawlphum (meihawlah a chang) daih alawm kan han ti ngei aaa(h). Perhpawng kaw-lulama an thut tak avanga meihawl a chan daih na chhan tur a awm der si lo va..

Report this comment
6
H.Vangchhia Says:
November 15th, 2012 at 5:37 pm
Mak ka tih ve angreng mai chu, Chhimtuipui hrul a zawngṭah ho saw a ni. Ramhnuai hnimbuk kar a awm e tilo chuan an phak miah lo tlat. Ṭahlim an awm chuang lo, ṭahlim ang maiin an tui em em vek mai lehnghal a!

Report this comment
7
tetea_pachuau Says:
November 15th, 2012 at 5:46 pm
mahminga hi a la nau pang ltk th ka hre chhuak toh a,,ka oi toh vak lo,,,lolz… ngaihnawm khop mai..

Report this comment
8
Dr Mahminga Sailo Says:
November 15th, 2012 at 5:50 pm
@ H.Vangchhia… Kan vengah pawh khan, vantlangina zawngtah tui bik an tih kha a awm ve tlat a sin.

Tin, pi leh pu te’n an sawi dik ve deuh chu, zawngtah kung atang tla hi a dam mawh khawp an ti. Engtinnge an tih kha, mi ka puak tawh ka thlauh mai mai lo va, ka thlauh tawh erawh damchuak an awm ngailo tiin zawngtah kung thusawi ang an sawi thin kha..

@ tetea_pachuau… Ka young-zia hi an hre duh tlat lo va..

Report this comment
9
H.Vangchhia Says:
November 15th, 2012 at 6:07 pm
Dr Mahminga Sailo , zawngṭah a tel tho bawk a, semi-OT lawks

Ratu khua a, Pu Sangpara nupui khian nau a awl mai mai. Zawngṭah kungah a lawn a, zawngṭah khu a hawlh thla vel a. NBakin deuhah chuan ring fe hian a rawn au chhuak a, “Sangpar, tui lo lum rawh u, nau ka vei ania,” a rawn ti ani awm e. Thingkung a ṭang chuan rang takin a rawn zit thla a, thingkung bulah chuan nau a hring a, a mah chuan a rawn pawm chho va!

Report this comment
10
kiddo Says:
November 15th, 2012 at 6:22 pm
#9.. Pu Sangpara nupui chu va pui rem rem ve le .. Ni e, thlasik a lo nih hi chuan nunhlui ngaihawm tak tak te kha keini thingtlanga lo khawsa tawh thin tan chuan a va han ngaihawm zual thin em…

Report this comment
11
Dr Mahminga Sailo Says:
November 15th, 2012 at 7:07 pm
Pu Sangpara nupui chu(h), a va’n awlsam tak ve..
Thusawitu pakhat paw’n, Evi khan Eden huan lai tak ami thei kha ei lo se’ng chuan, hmeichhia pawh hian, na tuar lovin hritlang hnap tawlh ang mai hian nau an nei mai tur a nia, a ti.

Report this comment
12
Lamji Says:
November 15th, 2012 at 11:39 pm
Zawngtah-bilhbawlawk-faght te pawk kha a nawm kha.

Report this comment
13
Lamji Says:
November 15th, 2012 at 11:41 pm
*fight*

Report this comment
14
Awmtea Khiangte Says:
November 16th, 2012 at 11:16 am
Chhunzawm leh thuai teh aaaaa

Report this comment
15
Dr Mahminga Sailo Says:
November 16th, 2012 at 11:49 am
@ Lamji… Zawngtah partevu tla zawng ringawta zing khawvawta kan tho thin te kha aw, a hunlai kha chuan rilru kaptu ber kha a ni ve si…

Report this comment
16
Jovenez Says:
November 16th, 2012 at 2:45 pm
ka nopanlai ka ngai

Report this comment