Sahmulphah thla ni sawm leh pathum, kan Lalpa kum, sanghnih leh sawm pahnih khan khawvela ka game ngaihnat ber, Vaivawm a Kawkkawitu(Umpire) hna chu, bowler ball vawm dan tur batsman hrilhna ‘Right Arm Over’ (a ni ta in ka hria) tia au in ka thawk tan ve ta.
World Record siam :
Vaivawm khawvelah hian world record siam an tam tawh hle a. Heng a khel ho bakah hian a kawkkawitu zingah pawh hian world record siam pawh an awm nual tawh awm e. Kei pawh hian Vaivawmah world record ka siam ve niin ka hria a. Chu ka world record siam chu a dangdai ve khawp mai. Kum 2008 October thla khan Cricket Association of Mizoram in Umpire exam an conduct tum in ka exam ve daih tawh a. A hma lam in Clinic an siamah te pawh ka kal ve zak zak a. Practical tih hun in ka kal ve ta lova, kawkkawitu puitling chu ka ni ve ta rih lova. Hmun dangah kan han awm bo san leh daih zui nen practical chu ka exam lo ta tluang zel a. Mahse, tun kum chu “khawnge ka game ngaihnat ber a ni bawk a, a khelh te kan thiam ve lo bawk a” tiin umpiring lam a kal kan rilruk thar leh hnuhnawh a.
Ka exam atanga kum li a liam hnu in practical tih ka han dil thar leh a. Practical exam ka dil hnu thla hnih vel a liam hnu chuan practical (exam) chu ka nei ta chauh a ni. Practical ka exam ka tih kherna chhan pawh ka kawhkawih dawn hian, Tournament Secretary khan “i phar kan hmu duh a nia” a ti kher a, a hnu leha match pawh min phar tir leh ta sia, ka pass ni ah ka in ngai ve hmak. Written exam leh practical exam inkar hlat ber ka nih chu ka ring a, vaivawm khawvel a World Record a nih hial ka ring a ni.
“Kan duh zawng tak a lawm”:
A dik tak chuan World Record siam tum hrim hrim a nghak pawh ka ni bik lova. Kum 2008a ka exam pawh kha vairam atanga ka haw lai a nia, practical ti tura ka in lan tak loh hnu khan vai rampur lamah kan awm bo leh daih avangin han tih zui leh ka tum hran lova. Tin, lo ti pawh ni ila kan phar zui tak tak hman dawn loh avangin ka tum zui vak lova. Kumin a Vaivawm tournament a awm dawn an tih khan lehkha te thawnin umpire lama inhman ka tum thu ka han sawi ve luam a. Min lo dawng sawngtu khan “E khai nangni ang a khel lo hi a lawm le kan duh le, kan rawn ko dawn che nia” tiin tawngkam tha takin kan in mangtha a.
Mahse, koh ka ni mai bik lo. Ka lehkha te an lo dah tha deuh mai mai a, tournament lai pawhin an hruaitu ka be leh a, a ni pawhin “E a khel lo hi a lawm kan duh” ti a min thlah in min ko lo chuan tournament hmasa chu an khel zo leh ta mai a. Phone call ka dawn mai hi ka beiseina a rei tawh hle a. Ka lehkhathawn hnu atang phei kha chuan ka phone a no hriat loh a miss call ka dawn hian Vaivawm lampang in min lo call na a nih ringin ka call let ve ziah a, mahse mi dang an lo ni ziah a, phur mang lo hian kan in be lum lam leh ziah thin a. An duh zawng tak ni si khan remchang a awm mai thei bik lova, Mahse, a tawp a tawpah chuan sawmna aw mawi tak dawngin kawkkawitu hna chu ka thawk ve ta nge nge a.
Beidawn na karaah:
Taksa hrisel lohna neiin, pumna avangin ni khat lai mai ka mut ve ren rawn a. Ziaawm lam ka pan tawh viau na in kan ‘Group Nite’ zan pawhin ka la inkhawm peih meuh lova. Kan group nite hi hman ropui kan tum ve hle a, Group meet-ah Champion kan nih lawm nghal tur a ni a. Chu mi atan chuan ‘Lapaw Chini’ kan group rawng ngat mai kan order a, mahse intihhlim zan te a nia taksa nuam mang lo chuan ka tel peih lo deuh avangin inah ka awm a. Chu mi zan inkhawm lai chuan phone call ka dawng a, a tuk a cricket umpire tura ka hman leh hman loh min lo zawt khauh mai a.
A dik tak chuan ka pumna pawha la reh fel lo na in ka chak tawh lutuk a ka aw ringawt mai. Chu mi zan pawh chuan a hma lamin kan nau pakhat in thawhlehni tan a hman em an ti tia sawi avangin ka beisei ru reng a. Aw zangkhai vah mai a, a tuk a kawkkawi tur a tan ka hman leh hman loh min zawh khan ka aw lo phal thlawt lo a ni. Ka natna pawh ka hre reng a, ka ding ni tur hi kan thian za ho chaw eikhawm kan tum ni a ni a. Mahse, ka aw lo phal tlawt lo a ni. Phone call ka dawn zawh chiah hian Ignatia, Vaivawm lam ka sangawizawn pui, keimah aia Vaivawm lawm zawka ka hriat chhun chu ka hre chhuak vawng vawng mai. He ka thu ziak pawh hi a hlimpui leh dawn tih chu ka hre reng mai a.
Ram pum thil chu ngainep rual a ni love:
Inkhelhna hmun hi Mizoram a College tha ber a ngaih, Pachhunga University College Ground-ah a ni a. He College hi leilung pian tir ata ka la rap lo sim sim. Ma-ni-lo-mah-a in lak Academician ve nak a laiin Mizoram college tha ber compound chu Vaivawm avangin ka lut hmasa ta ber a nih chu. Chawhma chauh kawhkawi tum kha kan pu te mit ka tlung nge mi dang hamtur tur an hmu lo zawk ni chawhnu lam pawh tlawmngai mai ta che an ti a vangin experience nei vak lo kawkkawitu thar lam chuan First division match pawh chu kan kawkkawi leh ta a ni kha, a lawmawm he mai.
Mi tam tak chuan Vaivawm a umpire nih chu a ho an ti hle in ka ring a, a tournament level leh a khelna en phei chuan nui te lam lam a ti za hial ang. Mahse, kan Chief Minister hlui pakhatin “Kei nin hmeltha lo ti lo mah ila, ram pum miss a an thlan miau chuan a sawi nep theih lo reng reng” a tih ang khan . Eng ang pawhin ngaisang lo mahse la, state khat umpire chu a sawi nep thei lo reng reng a. Chubakah khawvela Cricket Board hausa ber a Associate member ni thei khawp a umpire nih chu a nep thei lo sim sim a ni.
Kawkkawitu hna ka thawk ve thei hi ka misualpui dang te pawh hian min lawmpui ve ngei ka ring tlat a. Hei tun tum ka thuziak chu a masala pawh a awm mang lo, ka taksa lam a chau ve deuh a, rilru lam pawh a effect a nih hi. Pathian zara kan dam chuan a tam zawkin he thu in chhiar lai mek hian kei chu Vaivawm ka lo kawk kawi leh tawh ngei ang le….
Similar Posts:
- Protest Day-ah Exam!
- World Record hming tur hi
- Ka insum zo ta ngang lo
- Vaivawm : Ka thinrimna leh tawh.
- Run 50, not out
November 16th, 2012 at 6:38 am
awi ziak thiam tawp, ka nui vur vur mai
vaivawm chu ka va hmu chak em aw!!
Ka lawmpui hle mai che
Report this comment
November 16th, 2012 at 7:38 am
Tukchhuah nuam vek u le
Report this comment
November 16th, 2012 at 7:42 am
Michhe eizawn a hun leh ta, kan tla chhuak ang e hairehai. Chhunṭha te, mangṭha te ka buk a che u. (teh duah chuan) hairehai
Report this comment
November 16th, 2012 at 8:52 am
Ka lawmpui che.. Chhiar pawh nuam khawp mai.. Fair lo deuh khan kawkkawi lo la aw..
Report this comment
November 16th, 2012 at 9:57 am
Ka lawmpui che. Mahni chak zawng leh duh zawng tak ti thei a awm tluk a hlu a awm lo ve…
Report this comment
November 16th, 2012 at 10:16 am
Ka lawmpui a che, K’u Chhingte..
Sir Chhingtea i ni ta reng mai.. 
Report this comment
November 16th, 2012 at 11:11 am
A nuam awm vaiiii…sawi ngaihna pawh awm lau…la la la la.
Naupan lai ekchhuak ang deuh in lungte I hum ve tat reng dawn ani maw.
Anyway, CONGRATS!
Report this comment
November 16th, 2012 at 11:34 am
Ka lawmpui lutuk che
Mahni tui zawng taka ei in han zawng hi chu ka fak khawp mai che u
Report this comment
November 16th, 2012 at 12:09 pm
E khai Chhingte ka tan chanchin ngaihnawm tak a va ni chiang em! Nimin khan kawmpinu lam kha Ahmedabadah Sehwag-a khan a ngam sawk sawk viau mai a. Ka lo hrechhuak che alawm. ‘Eng tikah nge ni ang Lalpa?’ tih ang deuh khan ‘Eng tikah nge Chhingtea hian kawmpinu kan sawpzi dan hi a lo post ang aw..’ ka lo ti deuh vawng vawng a. Mahse hei, a aia lawmawm leh hlu zawk i lo post reng mai.
Kawkkawitu ti-a umpire hming mizotawnga i dah khi a va han fuh cher cher tak em aw! ‘SAWMNA DUHAWM’ i tih pawh khi keimah tihloh chuan an hriatthiam pui kher lo maithei che a ni…a lawmawm tak zet. RECORD break dan mawlh khi a awmzia, ngaihtuah a tithui…ngawi rawh nakinah international i ham hunah wikepedia tingaihnawm ala ni dawn alawm…
Cricket umpire nih hi rilru leh taksa putlin a ngaihzia mai chu aw…a DECISIVE bawk si. Concentrate ngai bawk si. Darkar khat han din ringawt pawh hi darkar khat lei laih nen a inhen rengin ka hre mai thin…
Ka buai a tunlai hi mahse i thuziak kher kher hi chu ka pumbilh vek. A ngaihnawm thin hle mai…
I pharkual hun chuan bowler inthlahdah deuh an awm thin a, hau hmiah zel rawh(game tension sang tak a nih loh chuan a pawi lem lo ang, ka ring). A tira tha taka vawm mahse a hnu lawka zuai leh mai – mizo bowler an awm nual thin a nia. Captain-in a hauh loh phei chuan hau hmiah rawh anih loh tal pawn fuih mawlh mawlh rawh. Chuan mizote hi Cricket khawvelah kan than a lo sang zel anga khuavel kan CHHING ngei ang…
Report this comment
November 16th, 2012 at 3:36 pm
Mahni tuina taka i hlawhtling hi mi vannei i va ni chiang em!
‘hrim hrim’ tih aia ‘sim sim’ tih i hmang tlat hi avan ‘hairehai’ reuh ve
Report this comment
November 16th, 2012 at 7:17 pm
Ka chhiarchhuak ve ta chiah a, kan lawmpui thar leh teh ang che. Diktak chuan vaivawm hi i tui em mai a, engemaw tak chu i phu ani.
Report this comment
November 16th, 2012 at 7:39 pm
Thiante u, ka post ka vil hman lova, a vil thei tur a ka rin ber, Ignatia lah a lo buai ve bawk nen. min lawmpui avangin ka lawm tak zet zet a. Chanchn sawi tur ka ngah khawp mai. Mahse Vawiin tlai chu buai dawbawl in ka buai a, ka sawi duah lo mai ang e. Min hrethiaam teh u…..
Report this comment
November 16th, 2012 at 8:01 pm
Report this comment
November 16th, 2012 at 8:28 pm
Kumpinu lo zin pawh ka uksak hman thlawt lo a ni e. An khelh khel hian lo khel teh se, State khat Kawkkawitu ka ni ve miau a, ka en hman rih lo a ni e. Kan kawhkawi hun leh an khelh hun a in ang miau si a….Phur tak leh ka kawhkawi thu chu ka la rawn ziah dawn nia…
Report this comment
November 16th, 2012 at 9:15 pm
e khai a…
….a va ropuiin a va ngaihnawm ve Chdl, hei zet chu i Lungleng kurtai leh thingpui sen hang nen ngeia lawm chi a nih hi… 
Report this comment
November 17th, 2012 at 11:54 am
Chhingte, chawisana i awm hun leh kawmpinu lam sawp an nih hun hi a va inhmeh tak em aw… An follow-on dawn chiang mai.
I phar lai ka hmu chak hle mai… Billy Bowden ai pawhin i zei dawn tih ka hre reng mai…
Report this comment
November 17th, 2012 at 7:17 pm
Ignatia, Tun tum chu Kumpinu lo zin pawh ka lo chhawn peih lo, buai namen in kan buai a, a pawi ka ti khawp mai. Tun tum chu lo ziak mai teh, en pawh ka la en hman lo… ka lo comment ve dawn nia.
Report this comment
November 18th, 2012 at 1:32 pm
E khai hei Chhingte nimin chawhnu khan inti hman takin follow-on ka en ve e ka tia. Mahse ka en hian kan mi leh sate hi an zam nge mawni an che tha thei tlat lo pek a. Wicket hlauh miah lovin run 110 an tlin der mawle inkhelh tihtawp a nih khan. Mahse a hnuhnawm ka ti. Umesh Yadava’n first over a vawm zawh chiah khan Ojha kha Vanlaldhoni khan a vawm tir nghal mawle… Kawmpinu vengtute te’n fimkhur mang khenga an talhtum an lek kha hmuhnawm ka ti… an hlauthawng ve nasa a ni.
Mahse duh aiin Alastair Cook kha a che tha. Vawiinah phei chuan 120+ a tlin der tawh mawle. Mahse batsman pangngai chu an out zo ta. Innings khat lekin kan hneh theih ka lo inring ta vel a nih hi.
Mawhphurhna pawimawh tak – ‘Kawmpuni kan vangkhuaa sawp(match dangah pawh kan sawp zel ang)’ tih report ziak tura min pek khi ka tan thil huphurhawm tak, mahse tihmakmawh a va ni teh lul em. Ngun takin ka lo thlithlai ange. Kawkkawitu i ni tawh bik si a i thu hi ka awih lo ngam tawh si lo a. Ka lo ti mai a niang chu. Mahse nangmah tho hian han ziak leh la a ngaihnawm dawn a sin le…
Report this comment
November 18th, 2012 at 4:05 pm
Ignatia ,an chak ngei turah ngai ila.ka va chhiar tawh tak em….ka lo their reng e
Report this comment
November 18th, 2012 at 7:36 pm
CHhingte Pu Cook-a mai mai pawh kan vawm hlum theih loh chu le. A la ding teu mai hei…naktukah a la thawk leh dawn zui. Run 10 chu an tlin ve ta phawt mai a. Mahse wicket hi pakhat zawk zawk a down vaih chuan an chhe nghal a ni mai. Beiseina nung nei ang aw…
Report this comment
November 21st, 2012 at 10:40 pm
Report this comment