mi(sual).com

Misual.com ah hian run rate chhe ber pawl ka nih ka ring. Kum 2010 June Ni 29 khan kan naupan laia World Cup kan en ve thin chanchin “Well Cup” tih hmang in Misual.com ah hian bul ka rawn tan ve a. Muangchanga kal bek bek in, thu post sawmngana chu kum hnih hnuah ka puitlin ve hram a, hetiang ti thei tura min hruaitu, Pathian hnenah ka lawm tak zet zet a ni. Ka thuziak phawkphawhraw tak tak min lo chhiar sak a, ka thuziak spelling mistake te min lo sipel sak a, min fuihphur thin tute chungah pawh ka lawm hle bawk a ni. Vaivawm tawngkam takin run 50 ka siam a, ka la out lo zui a nih hi maw….

Ka thu ziah ve thin: Vaivawm leh Ram fan chanchin
Mizo blog lamah pawh Misual.com tluk a vaivawm in hmuna chan tamna hi a awm kher awm love. A dik tak chuan vaivawm lam a khelh dan leh technical deuh deuh rawn comment a, rawn sawi peih te awm mahse la, a hranpa a rawn kur pui peih awm ta lo chu Vaivawm hi min papek deuh chawt ni ber hian ka hria a, ka ta neih ve ta ngawt reng a ni. Vaivawm lam hi tui leh tui lo hian kan in barh nawk nawk a, tuna chuan misualah chuan vaivawm chu a mikhual ta bik lo.

Zin chanchin ngaihnawm deuh a ziak thiam te hi an fakawm ka ti. Ka zin tam lo teh lul nen hian ka zin chanchin hi ziah ve leh khauh hi ka hrat khawp mai a. Hyderabad a Food World vel a thosi hlo leh pheikhawk hrukna ka lei chanchin te, Bareilly a kan thianpa motor ruang kan han hlawm chanchin te, Reng ram ( Tripura) a ka zin chanchin te, ka fu her chanchin leh Kanghmuna ka zin leh lo chanchin thlengin ka ziah ve vak tawh khaw mawle…Travelogue hi chu vaivawm ang chuan ka hnehsawh hauh lova, mi pawh hian min phur pui nep deuh emaw ni ka ti. Mahse, ka zin tam lo na in ka zin chhun chhun chu rawn bel kai zel chu ka tum ang e.

Ka blog ve a nih hi:
Thu hi ka ziak ve zau zauh a, min rawn sawm tawk te pawh an awm ve ta zauh zauh a, mahse ziaktu tia in chhal tak tak tur chuan lehkhabu pawh lungthu kim ka la chhuah miau loh avang hian lehkhaziakmi han in tih ngam chu a har deuh ka ti. Mi thenkhat chuan an thuziak te pholanna bik blog te an nei fir fer a, keima pual hian blog ka nei ve miah lo na in misual.com hi kei chuan ka blog pakhat ah ka ngai a. A tlawhtu pawh an tam zawk in ka hria. In ti thu takin ka thuziak an lo tanbung ziah pawh ka hau ka hau thin a, an tan bung ngam ta vak lova ka lawm hle mai.

Ka tih ngai loh te:
Thu ziak 50 zingah hian Pathian thu lam hi a tel khat khawp tih ka hria a, kan veng changchinbu lamah chuan ka chhuah ve zauh zauh thin tak na a, Sunday Pual tur lam hi chu ka rawn thehchhuak ngai lo khawp mai. Chanchinbu lama ka thuziak thenkhat rawn vawm bei zauh chang ka nei bawk a. Tin, hmangaihna lam rawng kai pawh, tlangval pawnthuah khai lai nih manah ka rawn tel ve leh zeuh zeuh thin kha maw. Mi te hnial tura thu feiki bar rawn lek chhuah hi ka nei vak lovin ka hria a. Hman kum khan Basketball chungchang ka rawn phawrh chhuak zauh a, in helh hlawm em a ka ti zui duh vak lo. A bak chu vaivawm thawnthu sawi paha savun ham puar pet ka khen deuh hi a ni mai awm e. A hminga vairam a lo awm thin ka niha avangin English thu kam khatmah ka chhak chhuak ve lova, Mizo punkhawmna a sap hla lo sak vak ngaisang lo thin ka ni tlat a, a mak lem lo e. Kei zawng coffee tui ti lo, Maggie chhum te ei ngai lo khawpa changkang lo ka ni bawk a, min dem em lo ang chu maw…

50 not out:
(He lai thu hi chu uluk taka chhiar tur a ni a. A hrethiam tur chuan vaivawm dan tlem hriat a ngai bawk ang). Misual.com hi Vaivawm nen tehkhin ila Rahul Dravid ang vel ka nih ka ring a, Dravid pawh hi run siam a hmanhmawh ngai lo. A vaw keuh keuh a, run erawh a siam ve teuh zel. Kei pawh ka bul tanna a rei tawh na in 50 kai chu har tak a ni. Ka mizia en hi chuan Sehwag a te ball vuak ang deuh pawp pawp chi, thil nghak thei lo zet ka ni thung si a ni. Thu ziah kawngah pawh hian spin bowler ang deuh hi ka niin ka hria a. Fast Bowler te chuan an vawm chak a, an vawm na bawk a, chutiang ang bawk a ziak chak/tam tawh leh ziak hriam tak tak an awm a, ka thuziah te hi ngaihnawm tak leh ropui tak ni lo mahse uluk taka ka ziah te an nih avang te, muang changa ziak ve beuh beuh ka nih avang hian spin bowler ang tawk vel ka ni a, mahse ka vawm fuh ve leh zau thin hi maw.
Mi thuziak comment lamah hian ka che rang lova, ka taima lem lo bawk avang hian fielding position-ah chuan third man vela awm tawk ka ni. Slip a awm hi chu ball pawh an khawih zing deuh a, Mid-wicket leh mid off awm phei chu an tlan kual leh deuh pap pap thin. Chutiang chuan mi thenkhat hi chuan an comment zung zung a, duh thawh luat avang a lo overthrow (comment a lo OT) ta te pawh an awm bawk reng a nih hi. Kei chu ka comment peih loh em avang hian third man ve niin ka in hria a ni. Misual team tan vaivawm ka khel ve ta sa sa, run siam tam lo mah ila ka la out tlat lova, muang chang hian in run siam in a sir atang min lo en tu te kut chu ka la rawn ben tir leh ngei ang.

Mangtha le ka nau duh tak…
He misual.com a run 50 vuak chhuah chhung hi a rei ngial mai a. He ka thu ziak rawn vawmbeina atan a ka khawl hman HP Pavillion dv 2000 pawh a lo tar ta. A tuan a fum ta deuh a, a tha thum ta bawk nen he thuziak ka rawn post zawh atang hi chuan tha thar zawk a thawk thei tur, thalai mawng zang zawk Acer in ka thlak tawh thung dawn a. He ka khawl hi active duty atanga chawl tir in decommissioned ka rilruk a. Misual.com ah reserved bench lamah a thu tawh thung dawn a ni…Kum 5 tal tawp rim tak leh hak taka lo thawk tawha ni bawk a chawlh pawh a phu ve tawh reng reng a, Misual.com tukverhah a dak khat tawh dawn avang hian a lung pawh a leng khawp ang le….

Similar Posts:

• Chanchinbua chhuah hi
• The Case for Mizo Wikipedia
• mi(sual).com Thawnthu Tawi Inziahsiak
• 32 Runs, Out
• Puii zûna uai a na ṭhelh!

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, December 21st, 2012 at 12:26 pm and is filed under Luangliam, Whatever. You can follow any responses to this entry through the RSS 2.0 feed. You can leave a response, or trackback from your own site.