“Kumkhuain Hlim takin an awmdun ta” ti a tih tawp theih ni se.

November 21st, 2012 10:00 pm by RZA

Ni a liama, thla a rala, Kum a vei thin; mahse hriatrengna erawh chuan min chenchilha, ngaihtuahna hlimawmte chuan min phatsan ve ngai lo. Hlimna leh lawmna vawi duai lo nei tawhin, lungngaihna tuipuiah hian pil lek lek khawpin lo hleuh ve tawh mah ila, kha ni kha ka tan ni bik, ni hlimawm ber a ni chianga, mahse kha a vang bawk khan lungngaihna chirdup hian min chimpil tumin min hual reng lawi si, hlimna leh lungngaihna hi penkhat kardan ai pawhin a lo inhnaih zawk a nih dawn hi!

Reilo te emaw tih chhungin kum hnih dawn lai a vei ve ta reng mai, kim lo inti taka hringnun ka hman laiin, Chandamtu pian thla a nih a vanga zirna In an khara, kan inah, mihringte hmangaihna dawnga, hmangaih tur mamawh em em a ka thinlung chawl lova, ka taksa a chawlh hahdam veng veng laiin, rin ngai loh leh beisei loh reng reng lam a tangin, thu thinthawng, hlimna a vanga thin ti thawngtu ka tawng ve mial mai.

Number chauh a tangin thu tawi te ka dawnga, chu number chu vawiin a, ka number roh ber, ngaihnat ber a ni chhun zawm ta. Ka thu dawn chu thu ho te mai a ni, tanpui dilna mai a ni; darkar zet ka insiam hnuah kan intiamna sikulpuikawn lam ka pana, chutah chuan a ni, vawi khat hmuhnaah hmangaihna a piang thei a ni tih chiang taka keimah ngeiin ka finfiah tak chu. Angel tluk tho thanga hmuhnawm, thatnaina a khuang tuam, duhawmnain a cheibawl han hmuh meuh chuan khaw dang hawi a har ngei mai le! Hetiang a hmeltha hi an lo piang thei a ni maw! Kum kha leh chen kha khawiah nge a loin thuhruk bik le, tih ka rilruah a lo lang nghal kha a mak ti lul lo, a chhan chu a tha em a lawm.

Kan tih tur chu kan ti tan ta, chhungril takah ka khura, ka tih tur ka hamhaiha, sawi thiam loh zahnain min man tlat peka, ka thil tih pawh ka ti tha hlei thei meuh lo. Zahna kha chu thukhat, a thianghlim leh duhawm lutuk kha ka hlau ni te in ka hre ta, kei valupa tih rual zet tawh hi kha tleirawl duhawmi vang khan ka mualpho lova cha chu a ni ber mai e. Thih ka hlauh vang leh ka dawi zep em em vang chu a ni hau bik lo, keimahah hmangaihna a lo pian tak zawk vang a ni.

Darkar fe hnuah kan tih tur kan ti zo va, phone hmangin kan inkawm zuia, ngamlo, zak leh hreh chungchungin, a mah ka hmangaihnain min nawr thluk miau a vangin, ka hmangaih thu chu hrilh lo thei ka ni ta lo. Ka hmangaih a ni tih ka hrilh a tanga reilo te-ah min duh ve thu min han hrilh let ve kha chu ka hlimna khan van a tawnga, kha aia hlimni reng reng ka la nei lova, ka neih pawh ka ring leh tawh lo, kei tlangval tawmkai lo, hmelah vangtlang hnuai lam, thiamna leh hausakna chhuan tur reng reng nei lo, khawvel nunrawnnain khum sawmhnih chuang fe a lo sawisak tawh, Lusun tawrhna Laipui muin thinlung na leh chuang tur reng reng awm lo khawpa a chinchauh, ka rah chichauh awh ve mai tan chuan a ropui a ni mai lo, thil mak vawr tawp a ni. Amah avang hian Pathian that zia leh a malsawmna hlut zia ka tem ta!

Hmangaihna avangin kan inhre chiang zela, ka tleirawl hmelthai chu hmelah mai rual a khum lo, duhawmna lamah chuan tehkhin tur an awm lo va, an veng nula fel an sawi a piangin a hmasa berah sawi loh thiang a ni lo. A rilru thatna leh tluang lutuk hi, sawi thiam mai bak a ni tlat, a taka a bula awma fiah chi a ni. Amahah hian lerna hian hmun a chang lo va, chapona leh mahni inchhuanna renng reng a lan tir ngai lo. Vawi tam, chu pangpar mawi chu tlangval tam takin an tana par tir tumin an lo bei tawh thin a, mawi tak, thiam takin a lo peh hel thin; chu ngei chu ka tan a para, par mawi ber a ni. Rose par hling nei lo a awm lo, a nih chuan, a ni chu Lotus par a ni ngei ang le, Rose aia kan rampang par hlu zawk a ni si a.

Ka hmangaih, ka duati, ka tawn ni kha, hnial rual loh, phat rual lovin ni duhawmber a ni reng a, nimahse kan inkara buaina chhumpui a lo zin chang hian, kha ni duhawm ber ngei kha, ni anchedawng a chang dawn a ni tih ka hre thin a, kha ni khan min ti hlima, mahse min ti hlau thawng hle bawk si thin. Khawvel hi zawng a lo mak a ni, hmangaihna thawnthu chu kan ziak dun tawh a, kan hmangaihna thawn thu hi Lasi thawnthu ianga “ Kumkhuain Hlim takin an awmdun ta” ti a tih tawp theih ni se ka va ti lul em.