KA RILA RAH MAW I LO NIH!

December 5th, 2012 5:52 am by Mama sherlow

Kimkim-i chuan ka kut chu nghet takin a vuan a,a hmai chu mittui in abual huh vek bawk a,hnem ngaihna reng ka hre tawh lo a ni.Ka thianpa Rokima vuina hun serh pawh chu a tawp ta a.Thluak cancer a nei tih hi a thih hnu chiah a ka hriat ve a ni.A fanu hi a kal san ala hun lo asin mawle.Engtin nge zua tel lova hringnun a hman chhoh ve ang,naupang mai ala ni asin.Mahse aduh vang reng a ni lo,a duh vang renga cancer a ni hek lo.A thih hmaa a fanu ahmangaih zia thu min hrilh te kha a thinlungin a hmangaih tak tak ani tih a chiang reng si a.He khawvel natna te chuan thihna kut vawtin tuam mahse he lei hringnun hrehawm tak chu a mangtha a tul ta si a ni.

Kimkim-i chu ka pawm a,a hmel ka han en a ka va han lainat tak em!Hlim hmelpu lo mahse a hmel a duhawmna chuan a hmelthatzia a ti lang chiang a.Naupang kum 6 mi lek la ni mahse a puitlingin a fing em em bawk a ni.A biang a hmangaihna mittui luang chuan mi tamtak thinlungah khawngaihna leh lainatna apian tir a,fahrah mai ni tur chuan ka la phal hauh lo a ni.A hringtunu ngei pawh hmu hman lovin he khawvel eng hi a rawn rap ve a,mahse zuapan mual a liamsan leh ta si.Vanduaina hi atan chuan a nitin chaw ang lek a ni.

Kimkimi pa lehkhathawn min hnuchhiah chu ka jacket atang ka phawrh a,ka chiar nawn leh a.Ka rilru a ti buai ve hle a ni.Eng vanga a fanu enkawl seilian tur hian kei min thlan tak le.Chhung leh khat laina a nei ve lo em ni?,nie,laina hnai a nei lo tih chu kei tluka hre chiangtu an awm lovang.Mahse,nupui ka la nei bawk si lo tlangval satliah ve mai ka la ni si.Ka enkawl duh loh vang ni hauh lovin ka zuam lo mai zawk a ni.Kimkim-i tui taka a muhil lai chu ka thlir vawng vawng ringawta,a hmel lainatawm tak mai chuan ka thinlungah mawhphurhna min pe a,ka thianpa thuchah hlen tur chuan thu ka intiam ta a ni.

Kar khat a liam meuh chuan Kimkim-i hmel pawh a eng sawt tawh hle mai a,a hma aiin a tawng ve duh tawh bawk a.Mi tawng tlem thin tak ni mahse a mi ngainat te bulah chuan a tawng duhin a tawngka chhuak a puitling em em mai a,hei hi ka mitah chuan a duhawmna lai ber a ni tlat…..

Nikhat chu he ti hian min zawt a,”a pa kha a rawn let tawh loh ang tiraw ?”ka chhanna nghakin ka mit ah ngun takin min en renga.Kei chuan,”ai let tawh lovang,vanram ah a awm tawh a chu vang chuan a mah i theihnghilh hma chuan i thinlungah khan a awm reng ang,…”ka ti a.”A pa ang hian nakinah ka la thi ve ang tiraw?”tiin min zawt leh a.”Nang chu ila thi dawn lo,i thi dawn lo reng reng”tiin ka chhang a,chhan ngaihna vak ka hre lo a ni.He naupang hian hringnun awmzia a hria a,thihna hi enge anih a hre chiang ve tlat.A nun khawhar tak hnem tur hian ka thei ang tawkin ka thlem a,thil ka lei sak a,naupang intihhlimna ah ka hruai a,mahse a hlim chuang lo.A pa a ngai takzet a,a bula awm a thlahlel ngawih ngawih a ni.

Hun a lo kal zela,sikul a chawlhsanna a rei tawh em a vangin a khawharna te pawh a zia deuh mahna tiin sikul chu ka zawm tir leh a.Zing tinin ka hna a ka kal hmain sikul ah ka thlah a,an ban hun awm angah ka lam leh mai thin a ni.Pafa ang maiin zing leh tlaiah kan inthlahin kan inzui haw tuktin mai a.Pafa anga min ngaitu tam tak an awm ve bawk a,kan hmelah inan na lai tam tak kan neih thu te an sawi hial a ni.Ka tel lo chuan sikul kal pawh a hreh tan tawh ngawih ngawih a,keipawn a hmel hmu lo a hun hman hrehawm ka ti tan tawh hle a ni.Kha ka naute-i kha engtin nge a awm ang aw?,a khua a har ang em?Aril te a tam ang em?zirtirtute lawm loh zawngin a lo awm ang em?..tih vel chuan ka ngaihtuahna a ti buai thin hle a ni.Tunah chuan ka tan hian a va han hlu chung chuang em!.Mi te angin nupui fanau nei ve lo mah ila;ka tan chuan fanu duhawm tak ang ani ve tlat.Mi te angin unau pianpui nei ve lo mah ila ka thinlungah chuan ka nau neih chhun a ni miau asin.A pa ni lo mah ila a pa ang khan min ngaina ve tawh asin. A hmaa apa vanga khawhara tap thin kha tunah chuan keimah vangin a khua a har a,apa tel lova tlei thei lo kha tunah chuan ka tel lovin atlei thei tawh meuh lo a ni..,……

Kum a liam zung zung a.Kimkim-i birthday pawh kan lo hnaih leh ta reng mai,naktuk mai a ni tawh.A birthday gift tur buaipuia ka vah hrep hnuin gift tura ka duh ang ka hmu hlauh a,Kimkim-i pawh kum 14 a tlinna tur a ni bawka a hlimin a phur ve em em bawk a ni.Ka gift lei nen chuan lungawi inti takin ka haw a,naktuk thleng vat vat se tíin keipawn ka lo nghakhlel ve tawh em em a ni….

Kawngkhar chu ka han hawng a,inchhung chu a reh thiap mai a.Khawi ah nge maw a awm le tiin present chu thuthlengah ka dah a,kimkim-i chu ka ko a,mahse min chhang lo reng reng.Pindan ah chuan ka han lut a,kimkim-i chu chuat lai ah chuan thaw hlawp hlawpin a lo let reng mai.Ka pawm vat a,ka auh reng a hre thei lo,a mit a sen vek a,a thawk nasat lutuk avang chuan a chauin a zawi vek bawk a ni.A ngaihna reng ka va han hre lo em,damdawi In ah ka tlan pui nghal a,Pathian hnenah Ka naute-i hi ti lam leh rawh tiin ka tawngtai mawlh mawlh a ni.Doctor ten luh ve an phal loh avang chuan pawnah beiseinain ka lo nghak fan fan a.Aw!! a va han vanduaithlak thin tak em.A pa ang natna kha chu ni lul suh se a tuar ve hi ka phal lo a ni.

Ni thum lai nikhaw hre lovin a awm tawh a,a harh leh hun nghakin beiseina nen ka theih ang tawkin Pathian hnenah ka tawngtai a,mahse a chhanna reng ka hmu si lo.Zah pawh dawn lo chuan Doctor chu a office ah ka luh chilh hmiah a,”ka pu, ka nau natna hi min hrilh thei em?A dam leh thei ang em,min han hrilh teh?”ka ti a.Doctor chuan,”Ngawi teh! Thil zawh hmasak duh che ka nei a.Kimkimi pa hi Rokima ani tih i chiang che em?Chuti anih si chuan hei hi han bih chiang teh,he lehkha ah hian chiang takin i hmu ang”tiin lehkha chu min pe a.Chu lehkha ka chhiar zawh hnu pawh chuan awi har ka la ti ngang a ni.Kimkimi hi adopt maw!?….A ni thei lo,dawt a niang,ka thianpa fanu ngei kha a ni.Mahse thudik chu ka thianpa fa ani lova a nupui fa a ni bawk hek lo a ni.Ngatinge Rokima khan a fa anih loh thu min hrilh mai lo le?Mahse ka dem ngawt love.

Kimkimi bana Heart beat Monitor an vuah chu a rawn ri ker ker a.A kal muang tial tial a,ka hlauhthawn deuh a vang doctor te chu ka ko vata.Doctor te chuan darkar chanve dawn lai chu chhan tumin an thei ang tawkin an bei a,mahse engmah a sawt chuang lo.Ka rei!!!….An chhan thei ta lo.A mar phu a tawp hmak a,a taksa chu akhawng vek bawk a ni.A kut vawt tak chu ka vuan a,harh turin ka au lawm lawm a,mahse ka auh reng a hre thei tawh si lo.He khawvel tah leh lungngaihna hi hnuchhawnin natna reng awm tawh lohna ah apa hnung zuiin min kal san ta a ni.

HLA HRILTU…..
“”Ram nitla ngai lo chatuana
engah chuan,
Aw chutah hmangaih kal ta
te an leng e;
Zaiin an fak an Tlantu
Lalnunnema, Chatuanin fak hla reng an
chawlh tir dawn lo”

Aw a va han mawi tak em!Chu hla chu kan sa tlut tlut a,muttui tah leh lungngaih awm tawh loh na chatuan In a kal ve chu min ti chak ngawih ngawih a ni.He khawvela a tawp nan kimkimi chu ngai leh tap chungin kan vui liam ta a ni.

Mabiaki chuan ka tap lai chu min thlir reng a.A hmel ka hmuh lohna a rei tawh bawk a,a danglam chak hle mai.A biangah mittui a luang a,ka chunga sawi duh nei niawm takin ka mitah min en reng bawk a.A hmel atang chuan a lungchhe ve hle ani tih a hriat theih.Tu emaw ni hian hla vak lo atang hian a rawn ko a,a zui ve nghal daih a.A hmel hmuh tur reng a awm tawh lo.A hnu lawkah tu emaw hian lehkhathawn min rawn pe a,lehkha chu ka phawrh a,ka han en a,ti hian a inziak a -

U mam,

kan in hmuh lohna a rei ta hle mai.I lakah sawi tur tam tak ka nei a,mahse tunah chuan engkim a danglam zo ta.I natna cancer avanga i taksa chauh tawh zia ka hmuh khan ka va han khawngaih tak che em.I rilru ka ti nat zia kha tun thlengin ka la in hua a ni.Min hmangaihzia ka hriat khan hmangaih tlak ka nih loh zia ka in hria a,thih hi ka chak ngawih ngawih a,mahse ka thei si lo a ni.

Aw le,ka sawi tum ber zawka chu nang nena kan inngaihzawn kha ka chhung ten an rem ti lo em em a,a chhan chu i fa ka pai vang a ni.Nang nen inneih phei chu an rem ti lo bur.Duh thlan tur reng ka nei bawk si lo,mahse ka hmangaih tlat si che a ni.Tichuan nang theihnghilh mai loh chu duh thlan tur ka nei ta si lo.Thenna biahthu ka hlan lai che khan ka mittui hi a far ve nasa asin.Hun a lo kal zela tichuan fa chu ka hring ta a,mahse ka chhungte tan huatna thlentu a nih dawn ai chuan tiin midangin a duat taka an enkawl kha ka thlang ta zawk a ni.Min ngaidam ang che aw!…..

Tichuan,a hnu lawkah ka chhungte duh ang ngei mai pasalah ka nei a,mahse ka hlim chuang lo.Nang leh kan fanu chauh lo chuan ka thinlung hi an luah thei mawlh lo.I thianpa Rokima chungah khan ka van han lawm tak em,Kan fanu chunga a thil tih te kha ka dam chhungin ka rul seng lovang. Kimkimi tih hming hi keima phuah sak ani tih hre miah lo mahla kan fanu duat taka ilo enkawl kha ka va han lawm tak em…mam,kimkimi hi kan fanu a ni a,kan rila rah ngei ani asin!.Tuna he thu ka hrilh avang che hian min ngaidam mawlh ang che.Ka hmangaih tak zet che u asin.He khawvel ah hi chuan inngaiin inthen mah ila pialral ah chuan engmah rengin min then tawh lo ang……..A tawpna atan,lo in enkawl tha ang che aw…Mangtha.

Mabiaki.

******************************THE END***************************