Tanpuina

December 10th, 2012 5:00 pm by bawngpu

Chu hmeichhe naupang tân chuan chu thlaksik khaw vawh zan chu ava huhphurhawm leh tak êm! Tlai nikawl liam chauh mahse zing khawvar hun chu nghakhle tak a ni. Zan dang ang bawkin a pa zurui rawn haw chuan a ngaitein a nu lakah chuan thinurna tur bâk chu engmah a rawn hmu lo leh a. Hun khirh tak a intan leh dawn tih chu hai rual a ni lo.

Kristian lo chhungkua an ni a, sakhaw dang pawh an bel hek lo. An in chhungah chuan Pathian thu reng reng a leng lova, a lam pawh an lam chhin ngai eih lo. Retheihna in ro a rel a, chu chuan sual lamah a hnûk lût a. Chu chhungkua chuan zingkar an pa hna kal hma inbeng mang lova hun an hman bak chu hun hlimawm sawitur an nei teh chiam lo.

Tlai khat pa ber rawn haw chuan an nu chu a ngaitein a tâwng leh hrep a. An fanu hmeichhe naupang chuan pindan lehlam atang chuan a lo thlir reng a. A pa thinrim chu a sosâng hle a, a nu lahin, “Ngawi tâng e” a ti bik si lo. Chutia boruak a chhiat zel takah chuan a pa chuan silai a chuh a an nu chu a kap ta mai a. Kâ pawh chhawn lovin a chatthla zui ta mai a. Hmeichhe naupang, âwmnêm ve tak kum 8 mi lek tân chuan inrawlh chu sawi loh, a ri a tah takngial pawh a ngam awm si loh. A pa inthiam lo, beidawng chu amah leh amah a in kâp ve ta nghal mai a. Hmeichhe naupang unau pawh nei lo, mahni chhia leh tha hriatna pawh la hmangthiam lovin zan khata tawn atân chuan a rapthlak dan tur zia chu ngaihtuah zui ngam chi pawh a ni lo. Chhuat laia a nu leh pa ruang thal reng thlir tlawk tlawk mai loh chu tih tur dang a vân ta ve ang.

Chhûngkhat laina tâl chu nei se a a tân zia tak a awm tur, a nei der bawk si lo. An thenawm khawvengte chuan lainat hle mahse an tih theih a tam lo. Nu chham Rûn chauh lo chu atân dam khawchhuah ngaihna dang rêng a awm ta lo.

Tichuan amah lainatute chuan Nu Chham Rûnah chuan an hruai ta a. Chu Nu Chham Rûn chu chulai Kohhran tâ chu a ni a, a enkawltute pawh chuan an lo lainat hle a, duat takin an enkawl ta a.

Chawlhni hmasa ber alo thlen chuan Sande Sikul-ah a enkawltunu chuan a hruai a. An Sande Sikul zirtirtu chuan naupang ho chu zirlai an zir zawh chuan zawhnate a zawt a. Nakinah chuan an zirtirtu chuan Isua lemziah hi a rawn lek chhuak a. Tû lem nge tih an hria nge hre lo a zawt ta a. Chu hmeichhe naupangtê chu a rawn ding ta nalh mai. An zirtirtu chuan, “Lemziaha mi hi enge a hming?” tiin a zawt a, Napuang chuan a chhang thei tlat lo. “A nih leh eng a tinge i din, a hming i hriat si lo chuan?” tiin a zawt leh a. Chu hmeichhe napuangtê chuan, “Tunge a nih ka hre lo, mahse kan nu leh pate an boral zan khan he mi hian min pawm a, ka bulah a awm reng a ni” tiin a chhang a.

He hmeichhe naupangtê, chan chhe tak hi tanpui leh thlamuanna ngaiin tumah a pun hauh lo, tanpui a ngaihzia pawh a inhrethiam phak kher lovang. Mahse Lal Isua chuan a mamawh a hria a, tanpui a ngaihna zawnah a hun takah a tanpui ta mai a ni.

Krismas a hnai leh ta hle mai. He hun hi intanpui tawn leh mi thilpekte pekna hun atân kan hmang fo thin a, kan la hmang zel dawn niin a lang. Mihring kan in ang lo, kan khawsakphung pawh a intlau a ni thei e. Mahse tute pawh hian harsatna hrang hrang kan nei vek, a zâwn pawh a in ang lovang.

Mihringte hi inmamawh tawn vek kan ni. Ho lam deuha kan ngaih pawh midang tân chuan thil hlu, an kumkhaw sawi a tling thei. Chibai ringawt pawhin kum tam inhuatna a tihreh thei. He hun lawmawm tak kan thlen turah hian midangte kawng khat tal a i lo tanpui ve theih nan Krismas chibai tha ber ka bûk a che.