mi(sual).com

A thupui hi ti khian ka dah tawl mai a, thupui dang han dah mai tur ka hre  si lo va,a pawi lo tura kan ngai ngawt. Queen hla Bohemian Rhapsody hi lo tarlan ka tum ber chu a ni a, an hla thu hi lo chinglet ve chhin ka tum a,amaherawhchu pianpui tawngte a ni lo a, dik lo leh felhlel tamtak te pawh a awm ang tih hre sain he hla ropui tak,awmze thuk tak nei hi inthlahrung tak chungin ka lo post ve chhin tawp mai a ni.

Music-ah kan tui emaw tui lo emaw Queen hi hre lo kan awm kher awm love, a hre lo pawhin an hla chu khawi hmunah emaw engtik hunah emaw vawi khat tal chu kan ngaithla tawhin a rinawm. An vocalist Freddie Mercury hian a hlaah hian a nun a a thil tawn emaw ama nun ‘reflect’-na a awm thin a. Chu chu tuna ka lo tarlan turah pawh hian a awm a, Queen Documentary Film en tawh chuan kan hmu tawh ngei ang a, kan hre tawh ngei ang.

An hun lai, an lar lai na na na kha chuan khawvel Music Industry kha an thunun tiin sawi ila kan sawi sual kher lo vang. An nun chhungril leh harsatna tawn hre lo tan chuan an nun kha a nawm hmel a, tawn ve a chakawm bawk. Amaherawhchu, a tak takah chuan an band kha zu leh drugs a buai an nih mai bakah amah freddie-a kha mawngkawhur a ni a. Mahse, sap ho makna em em mai chu vawiin ni thleng hian an chanchin tha lo zawng zawng hre chungin an la ngaisang a, an hla chul thei lovin an la tuaihnum reng a, mi tamtak nunah hmun zau tak ala luah tlat fo a nih hi.

He hla ‘Bohemian Rhapsody’ rawn pianchhuah hma hian lar em em chungin an nun an chen nasat luatah sum lamah nasa takin an tlachhia (Bankrupt)a,  recording tihna tur tak ngial pawh nei lovin an awm bakah he hla sei tak, minute 6 ngawt pawh mai hi produce saktu hmu zo lovin rei tak an awm a, a hnuah producer pakhat risk la a produce sak turin  an ngen chhuak thei hram chauh a ni.

Sawi tak angin Freddie-a hi nun uluk lo tak, zu, drugs leh hmeichhiat leh mipatna bakah mipat mipatna thlenga nun chen a ni a. Chutiang vanga he hla hi lo piang chhuak ta niin a chanchin chhui tute chuan an sawi. A hla hi inthlahrung tak chungin sawi fiah thiam loh lai kalsan chung bawkin hetiang hian Zo tawngin han dah chhuak chhin ila:

‘Hei hi em ni thu tak chu, hei hi em ni suangtuahna khawvel chu?

Meng ula, en ta che u. Thu tak chu hei hi a ni;ka nun hi leimin nasa tak chuan a vur zawh tak hi. Thu tak chu thup theih a ni lo. Mi khawngaihthlak tak ka ni. Mahse, khawngaihna ka dil lo, ka mamawh hek lo. Ruihna tur ka neih chuan a tawk, eng dang ka ngai bik lo. Khawvel te chu ral leh mai mai tur a lawm…….

Ka nu, syringe hmangin muangchangin ka in that mek a nih hi. Syringe hi ka hmet a, ka thi ta riai riai e. Nu, nun lah chu a intan dawn chauh mai si a tiraw? Mahse, ka dah bo ta. Nu, ka lo kir lo a nih pawhin engahmah ngai lovin lo awm phawt mai la, hma lam panin kal zel phawt mai teh, i mittui tih tlak tuma ti ka ni bik lo a nia.

A tlai ta. A tlai lutuk ta……ka hnungzang ruh te a kham , ka taksa te ana zo ta. In zavaiin mangtha vek ule, ka kal a hun ta….thu tak chu ka hmachhawn a hun ta…Nu, ka va hreh em….pian loh law law hi ka va chak em…..

Nu, ka hlau a ni…..ka hlau takzet a ni. Tumah hian min hmangaih ve tak tak lo em ni? Mahse, chu ngaithla teh, tawngtaina thawm chu “Thlah ula kal tir mai teh u, mipa naupang khawngaihthlak tak, chhungkaw rethei tak atanga lo sei lian mai a nih kha” tiin an au a. Mahse, a chak zawk leh a thuneitu zawk chuan” A teuh lo mai, a teuh lo mai, kan chhuah dawn lo” tiin a chhawn ut ut mai. Hmelma pa hian kan tan hian hmun a lo buatsaih lawk bik em ni ang le?

“Min sawisak hrep hnuah ka hmaiah chil an chhak leh si bawk ang maw? Min hmangaih ber tu ni awm taka min tuam hlawm hnuah thi mai turin min hnutchhiah ang maw? ka chhuak ang, ka chhuak tur a ni” tiin an au a.

Mahse…. a sawt ta lo. Engmah a sawt ta lo. Ka lut thuk tawh lutuk. Tunah chuan thli chhiain hnahthel a chhem len mai mai ang chauh ka ni ta...tiin a nun khawhar, hrehawm leh beidawnthlak tak chu he hlaah hian a puangchhuak ta niin an sawi thin.

Amah freddie-a ber hi a thih tawh miau avangin he hla thu ina a sawi tum leh sawi ber hi a hriattheih tawh lo va. Mahse, khang hun laia an nun en chuan he hla lo pianchhuah dan hi a chhan dang puh tur a vang hle. Ruihhlo vanga Freddie-a nun ang,nun khawhar, hrehawm leh beidawnthlak nei hi tam tak kan awm ngei ang. Mahse, Khawvela thil mak em em mai chu hmang sual tawh tam tak an awm chungin thenkhat chu thiante, unau emaw nu leh pate ngei ngei pawh ruihhlo vanga harsatna tawk tawh mi tam tak an awm chung pawha harhchhuah nachang hre loa, ruihhlo khawvela kan inbarh lut zut zut reng mai hi amak tak zet a ni.

Anni chuah lo, heng mi lar, kan ngaihsan te nun hi a awhawma ,a nawm hmel a, a chakawm em em a ni. Amaherawhchu, heng nawmsakna piah lamah hian harsatna leh manganna nasa tak a in phum ru a, chu chu kan Bible-in Solomona chanchin hmangin anni pian hma hian min zirtir a lo tum daih tawh.

Tin, an hlawhtlinna hi thawhrimna nena sual chhuah a nia. Film a kan lo hmuh- a nuam lai leh an incheina maksak tak tak te hi chu a hralh kalna tur chauh a ni. An thawhrimna leh tumruhna copy si lo hian kan hmuh phak chin an kawr, an tihdan leh an nun dan ringawt lo copy ve ngawt hi a fuh ber lo thei a, kal sualna a ni thei a ni tih hriat a tha hle.

KA LAWM E.

Similar Posts:

• Zonet Lookalike videos
• Queen singer thar!
• Ruihhlo do… Heti zawng hian…
• SRS tih tawp a ni ta
• Ka thiannu kha..

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, December 18th, 2012 at 6:27 am and is filed under More than words, Music and lyrics. You can follow any responses to this entry through the RSS 2.0 feed. You can leave a response, or trackback from your own site.