mi(sual).com

Zaithiam pawh an che chhe ve fo…
Dik chiah, zaithiam lar tak tak pawh an che chhe ve tho a, kei a kara zaithiam lo lehnghal che chhia hi zak tur ka ni em ni? Hnai lo ve, mahse ka uang lem lo. Zai erawh ka ngaina ve phian, thiam mang si lo hian! Ka hetih vang hi a ni ang e, ka zai hnua hnar hmuh lawrh lawrh chang te neiin, mahnia ka ngaihtuah let chang paw’n, ka zak nawn fo. A then a zar chauh sawi ang hmiang..

Take the girl tonight
College kan kal laiin, krismas laia kan exam thin avangin, November thla tawp lamah advance takin Advance Christmas kan hmang thin. Tum khat chu, speaker atan Revd. Chuauthuama kan sawm a, kan inpuahchah ve nasa hle.

Zaithiam thenkhat induh avang leh thu ka awi vangin a ngai tein zai ka hruai a. Speaker koh dawna hla kan sak tur, inkhawm hruaitu’n a thlan sual pek a. Pu Chuauthuama chu thusawi inpeih takin dawhsan hmaah a ding a; kei lah phur taka hla hruaiin, jingle bells, jingle bells tiin thiam ang tawka solfa vai pahin (solfa ka vai thiam tak tak pawh ka hre law) zai ka hruai a. Kan sa chho zel a, take the girl tonight.. te sa zelin kan sa zo ve mai a.

Inkhawm bana ka thian te’n speaker sawm dawna kan hla sak leh ka hmaa ding Pu Chuaua nen a inmil vak lo tih min hrilh a. Pu Chuaua hmaa take the girl tonight tia phur taka i’n zai kha chu(h) tiin min hrilh a. Tlai khawhnuah zak ang tak, za lo ang reng takin ka nui. Ka ngaihtuah let hian, zai ka hruai laia ka phur ang tho khan, tunah pawh hian ka chhungrila zahna inphum hi a phur ve chawk..

Carry you candle
College kal lai bawk a ni a. Dipawali lawm tumin kan buai luih luih a. Kan thian thenkhat insawm phur chuan Dipawali – festival of light atan carry your candle hi a inhmeh, sa rawh min ti a. Thuawih takin vawi hnih khat vel kan en zawk a. Ka’n sa ve leh mai bawk a.

Ngai teh., there is a candle, in every soul ka’n tih te chuan kan Dean-te chuan a nia kut lo beng phur ni. Mahse maw, a thunawn ka’n thleng chiah chu, a key a lo sang lutuk niin, inches tlemtea feet 6 tling lo tana sak phak rual a ni hlei nem! Ka’n au tial tak tak mai chu(h), zahthlak ve tak a ni.

Always
Hei phei phei. Kawng engkim zo ve peh pawh tak ka nih avangin Bonjovi hla te hi ka ngaithla tam tehchiam lo va. College week-ah zai intihsiaka tel turin ka hming an pe lut ngawt a. Zingah inkhelh hmain ka hla sak tur chu ngaithla chawpin ka’n zir dawn a, keini ang dangawk deuh tan chuan a lo har deuh. Hmm, tlaiah kan zir mai dawn nia tiin ka inkhelsan a. Tlaiah chuan zirna hman a awm leh ta lo.

Tin he ti hi a ni a, tlaia auditorium kan luh fel chuan, solo competition-a zai hmasa ber turin… tiin ka hming an lam ta mai. Hla ziak, vawikhat pawh ka sak chhuah theih loh kengin stage-ah ka va ding a. Ka thianpa’n keyboard-in min remsak a. Ka’n sa tan a, mipuiin kut an beng nghal. Aw mawi lungrun tak maia Always and I’ll be there ka’n ti chho phei chu ka zaithiam vang nge, ka hla sak an duh vang ka hre lo, min rawn zawm ta dual dual a. Ka zir lai aia confi zawkin changhnihna ka’n thleng a, a thu ka thiam ta miah lo. Kei aiin mipuiin an sa thiam ta zawk si, ka thawk lawka stage atangin ka’n tlanchhuak daih mai a(h). Kut ben mai an duh tawk nang, a rikin an ri chel chul mai.

Kumsul vei khua a lo thalin
Kar hmasa mai khan, kan lawinaa kohhran music & sound sub-committee member-te inkhawmnaa zai tura tih kan ni a. Hla zirna hun awm hek lo. Zaipawl hla zir pahin vawi hnih khat kan sa a, kei phei chu nulain phone-a min biak buai sek a vangin ka zir tlem khawp.

Inkhawmnaah zai tura kan ding chu, guiter min hnawn ringawt pek a. Guiter tum tura ka rin lah instrument dang buaipuiin a thu hmak si. Mahse, hemi tum hi chuan thuhma ka sawi a, ka va’n sawi fuh teh reng.

Zai turin ding a, kohhran mipuiin min en thap tihah; kristian hla bu en reng chungin kum sul vei khua a lo thalin ti ta lo chuan, kumsul liam hnu kan nun ngaihlai tho leh thin tiin ka’n tan ngawt pek a. Ka thian te an ngawi thap! Mak titawkin ka bula mi ka va en a. Zawi sapin, a ni lo zawk I la a rawn ti mai chu(h), fiamthu ka thawh miah lova, mipui an nuih nasat ber tum a ni mai thei.

Similar Posts:

• Lung ti leng Tuarpuii leh Suntea
• Mizo ṭawng ṭhenkhat
• Ka pa thlahnan “Angelten an awmpui” tih hi.
• Idol Desy ka va rim a…
• Thiante u, enge in ngaih ve dan?

Recent Posts:

• How to locate your misplaced Android phone
• KUT HNATHAWKTU TE TANA HAMTHATNA
• Mizoram Electric Power Dinhmun Leh Hmalakna Te:
• YMA
• Hringnun thim lam

This entry was posted on Friday, December 21st, 2012 at 2:22 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.