Mihring dang ang thovin he khawvel hmeichhiain a hring a. Amah chu ropuina leh thiltihtheihna zawng zawng neitu a ni a, a nihna ang takin he khawvelah lo kal se chuan mi pangngai mai a ni thei lova, hmuh hmaih chi a ni lul lovang. Mahse mi pangngai nih a thlang miau si.
Mihring a ni a, tisa leh thisen a nei a. Lungngai thei, hrehawm hria, hlim thei, riltam thei a ni. Mihring pangngai angin a nuin thla 9 chhung a pai a, a hring a. Nausen a ni a, naupang a ni a, tleirawl a ni a, puitling a ni a. Mihring pangngai taksain a paltlang zawng zawng chu a paltlang ve vek a ni.
Mihring dang ang bawkin mo lawmnaah a kal a, lusunna inah a kal a, ruaithehnaah pawh a kal zel a. Mi dang ang bawkin a inchei a, midang ei leh in ang a ei bawk a.
Chutiang mihring pangngai, he khawvel mite aia danglamna nei lo chu a hun laia mite pawhin an hrethiam lova. A hmaa kal Baptistu Johana chuan mihring pangngaite angin a eiin a in lova, mahse a hun laia mite chuan an hrethiam lo, “Ramhuai zawl a nih hi” an ti a. Mahse, he mihring fapa, mihring famkim leh mihring pangngai hi a lo kal ve a, mihring dangte angin a eiin a in a, an hrethiam chuang lo. “En teh u, chaw heh mi, uain heh mi, chhiahkhawntute leh mi sualte thian saw,” (Mat. 11:16-19) an ti leh tho va!
Ni, chu mihring pangngai chu Messia a ni ang tih rin ngaihna a awm lova. Chhandamtu lo piang tur hre lawktu khawchhak mi fingte pawhin mi pangngaite zinga zawn chi-ah an ruat lova, Lal leh mi ropuite zingah an zawng a, an hmu lo.
Khawvel chhandamtu tur a nih miau avangin mak tak leh danglam taka lo piangin, khawvel dan leh kalphung pangngai pawh zawh lem lovin rawn piang mahse a ngaihthiamawm tehlul nen, mi pangngai dang ang thovin Khualbuk a chang zo lova. Lal ropui ber chu a rem remna hmun hmunah, he khawvel dan, mihring nihphunga a pian hun a nih tawh avangin a piang ve tawp mai a ni!
Chu mihring fapa chuan a pa hnathawk a pui thin a. Thingrem siamtu fapa a ni a, tumahin ropui leh danglam bik a nih an hre lo. ‘Nazareth atangin thil tha a chhuak ngai em ni?’ an tih khum mai mai a ni.
Chu mihring pangngai chu mihring dang ang thova nung chung siin, sualna leh bawlhhlawhna a nei lova. Chu chuan mi pangngai nun dana nung a, he khawvel mihring dangte ang bawka awm chung hian a Kristian theih a, sual tel lovin mi pangngai a nih theih tih a lantir.
Ropui taka lawm a, nundan phung pangngai piah lam pela Lal Isua piancham lawmtuten an hmuh thelh fo va. Nunphung pangngai leh kalphung pangngai zawmtu LAL a nih hre lovin, danglam leh maksak taka a pian hun lawm kher duhna thinlung kan pu thin.
Mi pangngai Isua hi ropui taka inbuatsaihin kan zawng rei ta. Kumin chu nunphung pangngai tak chungin, mi pangngai leh thil kalphung pangngai zingah i zawng ve chhin teh ang u. Kan hmu mial maithei a sin.
Similar Posts:
- Isua Pathian a ni lo
- Krismas Thuchah
- Kristian sakhua leh Mizo hnam sakhua danglamna
- Nazaret Isua hi tu nge ni?
- Isua Birthday…..
December 22nd, 2012 at 12:28 pm
post tha pangngai tak a ni..
Report this comment
December 22nd, 2012 at 7:04 pm
Berampute zawnna hmunah khan a awm a, mifingte zawnna hmunah pawh khan a awm, mahse, Heroda zawnna hmunah kha chuan a awm ve lo.
Khawiahnge nang i zawn ve?
Report this comment
December 22nd, 2012 at 7:27 pm
Ani ngawt tak asin. Kan Lal Isua kha tlawm takin mihring ang in a lo piang a. Keini ho hian kan en khum thin khawp ang.
A piancham kan lawm dan atang reng mai hian a hriat ani. Ropui leh hlimhlawp nasa thei ang ber hian hmuh kan tum a ni si a. Kan tisual nasa ani.
Report this comment
December 23rd, 2012 at 12:16 am
Dinhmun sang chelh lo lakah A piang a. Thingtlang khuaah seilianin, kum 30 anih hma zawng mitiri hna A thawk a. Chumi hnu kum thum chhung chu Pathian thusawi fahrah ve tak, awmna nghet nei lova vak vak A ni a. Lehkhabu pawh A ziak ve lo. Public office pawh A nei ve ngai hek lo. Chhungkua A din lova, in pawh A sa/nei hek lo. Zirna sang, college te pawh A kal ve lova, A pianna atangin mel 200 A pel hauh lo bawk.
Kum 33 chauh A nihin vantlang, a chungah an lungawi lova. A thiante chuan an phatsan ta a.
Hmuhsitna hmunah hruaiin, nuihzabur-ah an siam a. A thih dawn chuan a tihlumtute chuan a thuamhnaw chungah thum an vawr a, he khawvel a a neih chhun inchuhin.
A thih chuan thlan hawh chawpah phum A ni a.
Kum 2000 a liam ta, khawvel mihringte min chiah hneh bertu a ni ta. Khawvel sipai ropui awm tawh zawng zawngte, lawng lian tuifinriat a kal tawh zawng zawng te, ram rorelna awm tawh zawng zawng te, lal thuthleng a rorel tawh zawng zawng te dah khawm hian He Mihring tluk a mihring nun khawihtu hi an awm ngai lo.
Lal Isu, I ropui ngei e.
Report this comment
December 23rd, 2012 at 12:53 am
^ Amen!
Report this comment
December 23rd, 2012 at 7:02 am
Report this comment
December 28th, 2012 at 9:29 pm
Dik khawp mai, fapa tlanbo pawh chutiangin I zawng suh ang u, a/ka thusawi erawh ring rawh u. Tichuan, chatuan in in dam anga, chatuan nunna in nei ang.
Ka hmaa kal E. G. White thu pawh in (Khawvel mi ten in) dawng sawng tawh lova, tunah en teh u, fapa tlanbo chu a rawn kal mek e.
Khawvel tawpna, khawvel tawp hmaa hun hnuhnungber chhiar tranna chu!
Report this comment
December 30th, 2012 at 2:55 pm
[…] nuam in sa hlawm niang aaaa hikhik Ka bolog ami ka rawn post tren tren leh mai auh. A hmasa in Mi Pangai Isua tih in lo chhiar hlawm tawh ka ring. Chuta ka comment pawh: ’Dik khawp mai, fapa tlanbo […]
Report this comment