mi(sual).com

Thuhmahruai

A rei veleh ta deuh. Kum 2008 Tomir thla chho kha a ni ta-in ka hria. Aizawl veng pakhata Cyber Café-ah thil ka zawnna lamah he site hi ka hmu ta hlauh mai a. Thuziak leh comment ka chhiar ve ta zeuh zeuh a. A hnu-ah phei chuan ka in-register ve ta hial a. Café-ah tihtur ka neih apiangin he site-ah hian ka lut ve ziah a. Comment leh post lamte ka hnutchhiah ve zeuh zeuh thin. Mahse regular taka misual nih erawh a har fu.

Tuna ka awmnaa ka chhuk hnu hian ka hming pangngai hmangin ka in register tha leh a. Mahse duh aiin miin min lo hre tam deuh a. Nuam ka ti chiah loa. Tin, chubakah facebook vela kan inhriat tak sup sup hnu khan misual nihna diktak – inhnial deuh fak fak SPIRIT kha a bo tlatin ka hria a. Nick thar nen ka in register tha leh ta a. Huaisen takin ka’n comment ve pang pang thin mai kha chu Pu HVa-te pawh an tlanchhe nasa thin a nih kha…

Inzirna hmun tha tak a ni

Misual.com ka luh tak tak hma hian ziak zawm tur leh tur loh hi examnaah a nih loh chuan ka ngaipawimawh ngai em em loa. Mahse helaiah mizotawng duhdah taka ziah kha remtih a lo ni hauh lo mai. Mizotawng ziak dan chauh ni lo, mizotawng thiam hrim hrim an lo awm teuh mai a. Hriatloh karin mizotawng ziak dan chu ka lo zir reng mai. Hmun danga mi thuziak ka chhiar pawhin an ziah dik leh dikloh ka lo en ve ziah tawh zel mai a. Mizotawnga science zirlaibu siam ka tum bawk a ka lo tangkaipui viau dawn a ni. A lawmawm khawp mai.

Pathian thu lam pawh hi

Evangelical Union background nei sa ka ni a. Bible Study hi kan nei fo a, chutah chuan textual criticism lam kan awn deuh berin ka hria. Mahse helaiah a aia sang zawk – higher criticism ang chi zawngin post a awm fo mai a. A tirah phei chuan ka duh lo thin viau mai a. Mahse tunhnu hian keimah hian ka hlawkpui a ni tih ka inhre ta. Mahse ka liberal deuh ta em tih erawh ka inzawt fo thin.

Mi hnial kha a lo nuam e

Tunge an nih leh enge an tih thin tih pawh hriat miah loh han hnial kha a lo nuam ve thin khawp mai. Ka uang ve vak ngai loa mahse kum chungchang – insawi upat leh a chhehvelah hi chuan ka uang peih ve thin khawp mai. Mi pawh hian hmaichhanah pawh hian tak tak emaw an ti fo thin. Ka uan thin avangin vawi enge maw zat chu facebook lamah thenkhatte’n min lo umzui ve tawh bawk a. ‘Ka fa rual lek I ni a’ tiin min lo nawr tawh thin mai a…nuam ka ti lo thin khawp mai. Chu aimah chuan inhnial pangngai avanga in umzui kha hreawm ka ti thin. Khmai hunlai vel khan kan MI ang tih hi ka hlau thin teh a nia.

Misual.com hi ka hlimpui thin hle a chutih rual chuan ka nunah beidawnna lian ber leh thil duhawmlo ber thlenna pawh a ni tho mai bawk. Nunphung ka zirchianna hi a lo hlu ngei mai!

Sawi nuam ka tih topic-te

Pathian thu awih chungchanga teh tlakloh ber leh buk zang ber ni tur si hian Pathian thu lam hawi hrim hrim hi chu ka ngaina em em mai zel a. Ka hman loh pawhin ka hman veleh ka chhiar chhuak hram hram thin. Topic dang leh chu Science leh a kaihnawih hi a ni leh a. Mi thiam tak tak an awm a ni tih hre reng mah ila an ngawih tlat thin avangin a phur fal pawlah ka tang leh thin. Mathematics phei chu Houdini hian a hnehsawh hle a, India rama JRF NET number 1 ni thei ngat kha a ni. Chu chauh a ni lo, khawvel puma Mathematics thiamna ram France lama PhD ti thei, timek a ni bawk. Mahse a ngawih tlat zel avangin keimah bawkin ka lo ti leh thin a. Mahse a nawlpui tana pawimawh lo chu ka sawi ngai lem lovin ka inhria. Tin, mizo history lam hi ka tet laiin ka chhiar nasat avangin ka topic hot tak zing ami a ni a. A bik takin Chhim lam history, Christian context ang chi kha ka tui leh zual. Tin, ka duh leh em em dang pakhat chu minority lam humhalh kha a ni a. A bik takin Chakma leh Bru kha ka chhan thei hle. Kum tamtak lo chenchilh tawh ka nih avang leh kistian tarmit ka vuah tlat thin avang khan ka lo tan em em mai thin a ni. Tin, sports lamah chuan vaivawm mawlh kha sawi nuam ka ti thin hle a. Chhingtea lalak pawh vawivawm report ziak ka insawi ba tih ka hre reng. Ka ziak tawh mahse test match hnuhnung ber – Nagpur ami kha ka lo en hman miah loa. Khami kha ziah tel ngei ka duh si a ka dah ta reng a. Nakinah ba rulh dan kan dap tawh mai a niang chu. A hrim hrim ani chu Mizo Billy Bowden a ni tawh alawm le…:)

32 runs, out

Ka post hi Chhingte-a angin 50 chu a kai ve tep tawh a. Mahse a hmaa ho te te ka post thinte tiam lovin 32 zet chu a lo ni ve ta reng mai. Kei chuan ka peih changin changin, ka rilru-a luh chang, hman changin post ka lo siam mai thin. Rin aiin fielding a tight tha a, run vuak chhuah a har thin khawp mai. Mahse hei over 20 cricket angah chuan run 30 hlap kai chu tha ve tak a nit ho mai. Mahse attacking pawh ka khel ve loa tin ka defensive bawk si loa ka out ta dawn ta tlat mai. Harsha Bhogle khan ka out dan hi lo hmu sela SOFT DISMISAL tiin a comment ka ring khawp mai. Ravi Shastri phei chuan ‘He is playing like a king’ min tih hial pawh ka ring tho a ni.

Misual.com ka bye bye ve dawn ta e

Lrpa khan ngawi rengin misual.com hi a lo bansan daih mai a. Enge maw tal thu han hnutchhiah ve sela kan phuisuih leh zual tur a nia. Ani kha mahi line-ah mithiam, rawn tlak tak a ni. Mahse kei chuan misual.com chawlhsan hi ka kumthar resolution a nih thu ka lo ziak hram ang e. Campus-ah ‘Eng nga?’ tih pui tur pawh awm miah lohnaah hian hman changa han misual kha a lo nuam thin hle mai. Mahse a chang chuan ka hun hi a lo ei hek lek lek thin. Tih tawh loh chu ti lo ve tak ka nihna avangte pawh a ni mai thei…ngun taka ka ngaihtuah hnu-in chawlh hmak ka duh ta a ni.

A tawp bera ka sawi ve duh, kan hlawkpui tura ka ngaih chu – thil reng reng hi thlirna tlang hran hran atang hian thlir thin ila. Mahse keimahni hian ngaihdan fumfe tak – principle nghet tak erawh nei thung ila a tha-in ka hria. Tin, issue eng pawh hi version hrang hrang hmangin zir phawt ila chuan ngaihdan siam ta ila a zia-awm duh khawp mai.

Similar Posts:

• Run 50, not out
• Ka thiam ve ta!
• Chanchinbua chhuah hi
• mi(sual) in a zahawmna a hloh tan??
• To the misualdotcommers – II

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, December 24th, 2012 at 11:43 am and is filed under Luangliam, Opinion. You can follow any responses to this entry through the RSS 2.0 feed. You can leave a response, or trackback from your own site.