mi(sual).com

(Niminah Krismas ruai kan theh tawh a, an sawi chul ram fan ni ianga thinlai hnim ruihin Pisa ka kai a ngai si.. )

Zing tian bawhar a lo pau va…
Khum lum nuam takah inthawlh hlun mah ila mutthilh zai reng ka rel thei lo. Ngai teh, tlai lama kan ei tur vawk an khawng ngek ruai ruai takah chuan mu reng turin taimakna reng ka nei lo va. Khur hlawh hlawka tho chhuakin, Lifebouy sahbawn sen ngeiin hmai ka’n phih pawk pawk a; thingpui sen inin, zochhang ban ka’n thial pawng pawng a. Hmanhmawh takin zaikhawmna in lamah ka tlan dawr dawr thin.

Krismas football tournament
Veng hmawra awm tih takah, zaikhawmna in ka thlen ve meuh chuan thiante’n fatu-ho an lo kil bial laih tawh a. Kan venga vawk kawchhung hai thiam ber chuan vawk zangthal huanga an zalh kawchhung a lo zen mawlh mawlh a. Mipa naupang nghahhlelh ber mai, vawk phing ngei mai chu a rawn phawrchhuak ta.

Keini’n a rang a rangin kan la a. A zun la chambang kan leihbuak hnu chuan, YMA thlanlung bula lung dawhsanah chuan kan vaw phek tak thlawrh thlawrh a. Kan vaw fan tawk ta maw tihah, vawk zun hing tha ngher nghawr kan leihbuak kim lem loh chu, thlasik hmui rep khi-chat nen chuktuahin, pedak thumal hre miah lovin biang teh ur ur khawpin kan han ham puar ta a.

Kan nel/ngamtlak te inah kan lut a. Rap chungah minute sawm vel kan han khai te te a; a ro tan ta maw tihah la thlain kan ham puar tha te te a. Tlang chhipa khelmual kan nei chhunah kan inkhel nasa thin. Kan ball a keh hma leh tournament a tawp hma a ni mai. Vawk phing hnun a ro that loh phei chuan a hnun khan a buk rit phian thin si a, han pet ila, a kal dik mawh thin khawp mai.

Ruai theh mawlh kha
Tlai dar thum a’n pelh meuh kha chuan zaikhawm pawh an zai tui tawh em em a. Chaw nghei paw’n zai mah se, tlaivar an tlin tho awm mang e tih khawpin an thawm ngaihthlak a nuam. Nula leh tlangval chaw khawnin in tinah an lut kual a. Chaw ei dar an han vuak meuh chuan zaikhawmna in kawtah kan inhawrkhawm nuai nuai tawh a. Zaikhawm ho lah an thawm a tha tual tual bawk si.

Khai le, fatuin zaikhawmna kawtzawlah changel hnah an phah tan a. Chaw an chhung khu vung vung a. A laiah vawksa sawhchiar an hlui zet chuan ngai teh; chil hi a put mai a ni lo, a liamin a luang liam zawih zawih a ni ber mai. Chaw hlui an han peihfel meuh chuan, zaikhawmna in pawh a reh nghal duak a. Chhungkuaa kil duh te, mahni thiante nena kil duh te, a remchang ang anga insiam remin insumkarna nei lek lovin ruai kan theh thin a nih kha.

Ruai nawn
Kohhran a hlim changin, ruai kan nawn fo va. Chutih rualin kohhhran pakhat an hlim kum a awm a, ruai an nawn thin. Kohhran dangin ruai an nawn tlai chuan thian tha te an hlu thin a nia aw. Ruai an thehna mual sirah kan thu a. Kan thiante chaw ei kham tho mai tur chuan, an thum theih tawk vawksa thumin mual sir lamah an rawn tlan vawn vawn a. Keini’n ruai an theh chhung zawnga kan lo nghak tawh nen, an thum khat ringawt chu kan kham mai thin si lo. An vei nawn sek thin. Hetiang tho hian, keini paw’n kan thiante ruai theh ve lo an awm chuan kan ti ve tho bawk.

Ti daih te’ng..
Hringnun hi a mak ka ti thin. Kan tawn khat deuh leh thil vang deuh te hi kan hlut mai emaw ni le? Vawksa buh chiar aia tui tak tak ka ei ta fo va, mahse thingtlanga Krismas ruai tluka tui ka tih leh ka nghahhlelh thin ang kha ka tawng ngai ta lo. Nunhlui ngaiin lung a leng fo. Kum khata Krismas thuamhnaw thar vawikhawt kan neih inbel kan chak em em thin a nih kha. Tunah erawh hun dangah pawh thuamhnaw thar ka nei fo va, inbel ka nghahhlelh dan erawh naupan laia thuamhnaw thar ka inbel chakna nen tehkhin chi rual a ni si lo.

Engpawh ni se, kan huntawn apiang hi hlut thiam ila. Hun kal tawha kan thiltih that te hre rengin a tha zawk zel tih tumin, kan tihsual erawh siamthain hringnun malsawmtlak neih tum ila; min tlantu Isua Krista nun enin, hma i sawn zel ang u.

Similar Posts:

• Kan khuaa krismas
• Ruai i theh ang aw.
• Ruai theh
• Thinlaia’n a thar leh thin
• Lainattu Nei Phalo, Chanhaite Tuam hlawmtu Davida Team te Home ah Kristmas Ruai ka va theh ve a

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, December 26th, 2012 at 9:24 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.