mi(sual).com

‘Engvanginnge Jona kha a thin a rim’ tih zawhna kha kan mithiamte’n heti hian an chhang:

Jerusalem chhiat tur thu leh Israel fate Pathianin a hrem tur thu hi vawi hnih lai a lo sawi tawha.An sual an sima an pianthar avangin hrem lohvin an chhuak zela.Chuvangchuan mite’n zawlnei suak leh dawt sawi hratah an puha.Chu mi avangchuan Ninevi-ah pawh kal duh tawh lovin Pathian tlan bo san a tum kha a nia.A hnuah Ninevi-ah khan va kalin tihchhiat an nih tur thu kha a va puang ngeia.Mahse a khaw mipuite sual sima an lo pianthar avangin Lalpa’n a hrem leh ta lova, “A thusawi chu dawt mai a chang leh ta,” tiin mipuite khan an ringin a inngai tlat maia.A rilru a hrehawm em ema,a zaka,a thin a rim bawk a ni.A thu puan lawkte a lo thleng leh ta thin si lova.

Mahse Lalpa chu zahngaithei Pathian, khawngaihnaa khat a ni sia. Ama lama kirte chu ngaidamin thil tha lo tih tumte lakah pawh a rilru a lamlet fo sia.

Jona thawnthu tlem

Lalpa Pathian chuan Jona hnenah chuan, “Ninevi mipuite sualna chu a nasa zet mai.Ruk ruk,tualthah leh inpawngneknate chuan tiam chin a pel ta.Ninevi khua chu tihchhiat a nih tur thu va puang rawh.” tiin a tira.Nimahsela Jona chu tihian a inngaihtuaha, “Israel fate hremna tur thu leh Jerusalem chhiat tur thu sawi turin Lalpa Pathianin tum hnih lai min tir tawha.Mahse mipuite chuan an sual an sima an pianthar zel avangin a ni chuan a ngaidam leh mai thina.

“Chuvangchuan mipuite chuan ‘zawlnei suak’dawtsawi hratah an puh tawha.inevi khuaah pawh hian va kal leh ta pawh ni ila;an chhiat tur thu va puang leh mah ila;an pianthar leh si chuan Lalpa chuan a ngaidamin a zuah leh tho dawn sia,mahni inchhung lum atanga khawlai zawng zawng thlenin mite ngaihah ka hmingchhe lutuk tawh dawna.Chuvangin Lalpa Pathianin ti tura min tih hi ka ti dawn lo.Ka ti thei lo.A hmuh phak lohna hmunah ka biru zawk ang,”tin.

Tuchuan Jona chu tuipui kam,lawngchawlhna hmunah chuan a va kala.Lawng pu hnenah chuan, “Tarsis pan tur engtikahnge a chhuah dawn?” tiin a va zawta.A ni chuan, “Niminpiah khan a chhuak daih tawha.A lo let leh hun i nghah a ngai dawn a ni,” tiin a lo chhang a.

Jona chu lungngaiin a rilru a hnual rawih maia.Nimahsela Lalpa Pathian chuan Tarsis lawng chu thlipui nasatat hmangin a rawn let tir leh ta hlauh maia. “Tunah chuan ka thil ruahman chu a hlawhtling ngei dawn e,” tiin hlim takin lawngah chuan a lawn kai ve taa.Tichuan lawng chu Tarsis lam pan bawk chuan a tawlhchhuak leh ta a.

Nimahsela hun rei lo teah thlipui a lo tleh leha.An chuanna bulte chu rawn phulin lawngte chu a insawi ta lui lui maia.An piah lawka lawngte chu tui fawn chuan a ti buai ve hauh si lova.An kal dan pangngai rengin an kal mai sia.An ngaih chu a tha lo em em maia. “Pathian thinurna kan tuar a ni ngei ang,” tia in ngaihtuahin lawng pute leh a chhunga chuang mi chi hrang hrangte chuan, “Sakhaw hrang hrang biaa mahni pathian nei theuh kan ni bawka.Kan pathiah theuhte hnenah i tawngtai vek ang u,” an tia.Tichuan mahni pathian theuh chu biain an tawngtai ta hlawm a.

Jona erawh chu lawng chhungril berah engmah hre lovin a lo muhil bawrh bawrh maia.Lawng Captain-in a hmuh chuan, “Thihna hlimkawr ruama kan awm laiin leh kan pathian theuhte hnena zahngaihna kan dil laiin engtinnge i lo muthilh veng veng theih bik chu le,eng minge i niha?Eng hnam nge i nih?’ tiin a zawta.Jona chuan, “Juda ka ni,”ti chauhvin a chhanga.Lawng Captain chuan, “Juda maw i niha?”tia lawm lutuka zawt pah chungin, ‘Chu Pathian nung leh thiltithei, kei ngei pawhin a chanchin ka lo hriat ve tawh betute zinga mi i lo nih hlauh chu le!!! Khawngaihin i Pathian hnenah chuan tawmgtai teh khai. A ni chuan, “Thil mak a rawn thlen mai thei a sin,”tiin a tur ta sek sek mai a.

Jona chuan, “Chutiang thil chu a theih lohvang.Lalpa Pathian chu ka chungah a thin a rim tlat sia.Tuipuia min paihthlak ngawt loh chuan thli leh tui fawn hi a bang lovang,” tiin a chhanga.Mahse a thusawi chu a awih mai lova.’Tungeni a mawhphurte tia ngaihtuahin’ thum an vawr taa.Tichuan an thum vawr chu Jona chungah chuan a tla ta chat maia. “Tunah chuan kha Juda pa thusawi kha a dik ka ring ta,”tiin “Tuipuiah chuan i theh thla phawt mai ang u,amah avanga kan vaia kan tawrh vek ai chuan,” tiin an inhrilh hlawm a.

Nimahsela an lawng Captain chuan, “Nawi teh u,chuti maia mihring nunna hlu laksak tur chuan thu an pawtchat hma lutuk ngai lo.Kawng dang pawh a la awm zawk maithei asin.Lawnga thil awm zawng zawng hi thehthla vek ila;tuchuan lawng pawh a zan phah mahna,” tiin rawtna a siama.Tichuan a thu ang chuan lawng chhunga bungraw awm zawn zawng chu an thehthla ta veka.Amaherawhchu lawng chuan a zan phah lova;thli a thleh nep phah lova;tui fawn a kiam phah hek lo.

A ni chuan, “Tuipuia min paihthlak hma chuan tui fawn a kiang lovang’ ka tih kha in hre tawh lovemni?” tiin a hrilh leh hlawma.Tichuan an vai chuan Jona tuipuia thehthlak chu an remti tlang taa. An man beta, an zawna, tuipuiah chuan an han zawn hnaia a khupin tui a dai ta tihah chuan tui fawn chu a reh deuh duka.An la chho leh taa.Mahse tui fawn a rawn san leh avang chuan an chiah leha. A kawng chen a thlen chuan tui fawn chu a reh leh duk maia.Tichuan Jona chu an khai chho leh thina.Mahse rei loteah a hma aia nasa zawka tui a lo fawn leh zel si avangin a vawithumnaah chuan tuipui thuk takah chuan an thlak ta nge ngea.

Jona sangha pum chhungah

Tuipuia an thlak veleh chuan sangha lian tak mai chuan Jona chu a lo dawlh ta maia.Mahse Lalpa zawlnei Jona chu tih natin a awm lova.Sangha pum chhungah chuan lunghlu eng em em mai hi a lo awma.Chu chuan a chhung zawng zawng chu a en vek bakah pawn lamte pawh a en tlang theia.Sangha mit chu Jona chuan tukverh ang hmangin tuipui chhunga thil awm zawng zawng chu a hmu thei a.

Thawklehkhatah sangha chu a lo khura.A lo tap chhuak ta phawng maia. “Jona,pawi ka ti lutuk.I tawpna ni a thleng dawn ta sia,”tiin.Jona chuan, “A nihleh engatinge i tah ve kherni?Engatinge hlauva i khurh chiam?”tiin a zawta.Sangha chuan , “Tuipui chhunga sangha zawng zawngte lal Leviathan chuan min rawn pan hnai meka.Kan pahnih hian min dawlh ngei dawn a ni,”tiin a chhanga. “Chu Leviathan bulah chuan min han hruai the.A ni chuan min zuah duh mahna,”tiin Jona chuan a hrilh a.

Tichuan Leviathan chu an va hnaiha. “I khawsak dan en thlithlai turin ka rawn pan che a ni,”tiin Jona chuan Leviathan chu a va biaa.A ni chuan, “Eng i tihna nge?”tiin a lo zawta.Jona chuan, “Nang hi a ni Lalpa Pathianin mithate chaw atana a la hman tur chu ni,”tiin a hrilha.Chuveleh Leviathan chu hlau baklengin a tlanchhe ta nghal a.

“I nunna ka chhanhim sak che avangin tui chung thuk ber leh hmun tlawh atana tha ber berte min fan pui tur a ni,” tiin Jona chuan a awmna sangha chu a biaa.A ni chuan, “Tehreng mai.Mahse chu mi hmain Leviathan nena in inbiaka in thusawi kha min hrilh ve phawt rawh,” tiin a ngiata.Jona’n a hrilh hnu chuan tuipui chhung hmun hrang hrang chu an fang kual ta a.

Jona chu sangha pum chhungah chuan ni thum leh zan thum a awma. Mahse Lalpa hnenah chuan a la tawngtai miah lova.Chuvangchuan Lalpa Pathian chuan , “Thil tha hlir ka tih saka,a nunna ka zuah sak bawka, chutichung pawh chuan lawmthu sawiin emaw ka hnenah a la tawngtai hauh lo mai.Sangha dang pum chhungah ka dah the ang.Tichuan nuam takin a awm tawh lovanga;a tawngtai tawh ngei ngei ang,” tiin Jona chu sangha dang a lem tir ta daih a.

Chu sangha pum chhung chu a tein a chep em em maia.A thim khup mai bawka.A nuam lo em em mai sia.Tichuan Jona chhua hlauhnain a lo khat taa.Tichuan hetiang hian a tawngtai ta a:

Ka hrehawmna avangin Lalpa chu ka kova,
Ani’n mi chhanga.
Seol kawchhung atangin ka auva,
Nangin ka aw i hriaa.
Thuk takah,tuifinriat chhungrilah chuan nangin mi paihluta,
Tui tamtak chu ka veli a awma.
I tui fawn leh i tui infawk zawng zawngte chuan mi vur zela,
Tin,i mit hmuh ata paihchhuah ka nia.
“Nimahsela i Biak In thianghlim lam ka hawi leh ang,”ka tia.
Tuite chuan ka nunna chenin mi hual vela,
Tui thuk tak chu ka velin a awma,
Hnimte chuan ka lu a tuam vel a ni.
Tlang bul tawp retahte chuan ka kal chhuka,
Lei chuan kumkhua atan a kalhnate chuan mi khar khuma.
Amaherawhchu nangin aw Lalpa ka Pathian,khuarkhurum ata chu ka nunna i la chhuak a ni.
Ka nunna ka kawchhunga a chauh lai chuan,
Lalpa chu ka hre renga.
Ka tawngtainate chu i Biak In thianghlimah i hnen a lo thleng a ni.
Thil lawilo dawt mai mai ngaihsaktute chuan
Anmahni ngilneihna chu an hawisan a ni.
Kei erawh chuan lawmthu sawina aw nen i hnenah inthawina ka hlan anga,
Thu ka tiam tawh chu ka hlen ang.
Chhandamna chu Lalpa ta a ni,”(Jona 2:2-9)tiin.Chuveleh a dawlhtu sangha hnenah chuan Lalpa Pathian chuan khawmuala law chhuak turin a hrilha.Tichuan Jona chu khawmualah a lo awm leh taa.Tichuan Lalpa Pathian tirh angin Ninevi khuaah chuan a va kal ta a ni.
Ninevi khaw lenzia

“Ninevi khua chu khaw lian leh ropui tak mai a nia.A khaw tawp atanga a tawp lehlam chu ni sawmli kan a ni.Chu khuaah chuan bazar 12-a awma, Chung bazar tinah chuan nitin chawhrualin mi 12’000 an kal bera.Veng tinin kawtthler 12-a neia.In tinah mi 12-vel awm anga chhut a ni.Tin,an khaw lalpa chu Aigupta lal Pharo-a kha a nia. “Ninevi-ah hian lalah a tang ta a ni,”an ti.Lalpa’n Israel fate a hruaichhuah dan chiang taka hretu leh Lalpa Pathian thiltihtheihziate,a huat zawng a hrem dante chiang taka hre tu a nih avangin khatia Jona’n hrem tur thu a puan kha a hlau em ema.Sai ip puan sinin chaw a nghei nghal ta rup rupa.A khaw mipuite pawh kha chaw ngheia piangthar turin a hrilh nghe nghe a ni,” an ti.

source: Juda-te lehkhabu pakhat ka chhiar

Similar Posts:

• Jona Leh Ringlo Mite {Sunday Pual}
• Jona Hun Hnuhnung {Sunday Pual}
• Jona Kha Engah Nge A Tlânbo? {Sunday Pual}
• Jona Vang Emni Ninevi Khua Kha An Sim? {Sunday Pual}
• Jona – Nghapuiin a dawlh thei em ???..

Recent Posts:

• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release

This entry was posted on Sunday, January 6th, 2013 at 2:37 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.