mi(sual).com

A hmasa berin heng movie hmuhnawm tak tak, man chawia kan en phak reng reng loh turte min en tir thei tu ‘torrent’ hnenah lawmthu awm se! Post khat bawk a, nikum (2012) a ka film hmuhnawm te ka rawn share ve mai mai ang che u, a hnuaia ka rawn tarlan te khu tam tak chuan in en tawh furin ka ring a, tin, ka lo la en loh hmuhnawm tak tak pawh in hria ang, in lo share ve dawn nia.

Underworld: Awakening
Changtute : Kate Beckinsale, Stephen Rae, Michael Ealy.

Underworld film series pathum chhuak tawh (Underworld, Evolution, Rise of the Lycans) te chhunzawmna a nia, hei pawh hi a hma a film te ang bawkin a hmuhnawm leh pek khawp mai. Twilight vela an vampire ai chuan underworld a vampire te chu an hlauhawm deuh zawk!

The Vow
Changtute : Channing Tatum, Rachel McAdams.

Love stoy film hmingtang, The notebook (2004) a achangtunu channa leh Dear John (2010) a achangtupa te chan dunna ani a, heng movie 2 te ai hian The Vow hi a nepna ka hre lo.

Wrath of the Titans
Changtute : Sam Worthington, Liam Neeson

Greek mythology danglam tak ngaina tan chuan he movie hi chu en loh phal chi ani lo. Hindu ho pathian mak tak tak, awihawm loh zet zeta i chuan Zeus, Perseus, hades, Poseidon, etc te vel chungchang hi chu a awihawm bik riau a, a movie a en pawh a nuam.

The Dictator
Changtute : Sacha Baron Cohen, Anna Farrs.

He movie hi vawi li ka en tawh a, ka en hnuhnung apiangah a hma aiin ka nui nasa zel zuk nia! Lal borat-a a chang nuihzatthlak pangngai leh pek a, in la en loh chuan hei hi chu en ngei ngei chi.

Prometheus
Changtute : Naoomi Rapace, Charlize Theron, Michael Fassbender

Kum 2012 sci-fi movie ah chuan hmuhnawm ka tih ber pawl ani, a story hi a ‘real’ riau, mihringin a siamtute zawnchhuah a tum dan chanchin ani. Tin, hetianga van boruak mak danglam tak tak hi hmuh a nuam hranpa ve hrim hrim bawk.

Brave
Changtute : Kelly Macdonald, Billy Connolly, Emma Thompson.

Animation hmuhnawm ti tan chuan he movie hi a entlak khawp ang le, a changtunu character te hi a duhawm reuh hi ka’n ti khawpah!

Ted
Changtute : Mark Wahlberg, Mila Kunis.

Mark Wahlberg-a channa a nih a vang khan action turah beisei ngawt suh, I ti sual ang. Nangmah chauhin en pawh ni la I nui chhuak uarh uarh ang tih ka tiam a che!

People Like Us
Changtute : Chris Pine, Elizabeth Banks, Michelle Pfeiffer, Olivia Wilde.

2012 drama movie ah chuan a hmuhnawm pawl tak ani ang, mi pakhatin a hriat ngai miah loh a unaunu a hmuhchhuah a, an inzawmkhawm leh dan vel ani. A changtute pawh ka theuneu love.

Ice Age : Continental Drift.
Changtute : Ray Romano, Denis Leary, John Leguizamo.

Zep lovah chuan Ice Age series hmasa pathum te kha a tluk lovin ka hria, mahse animation dang nena khaikhin chuan la dah sang vet vet tak ka ni.

The Dark Knight Rises
Changtute : Christian Bale, Anne Hathaway, Michael Caine.

Christian Bale te, Christopher Nolan te leh Michael Caine te inkawp hi chuan Khawnglung Run pawh siam se an hlawhtling thovang tih vel ani. The Dark Knight (2008) khan $ 1 billion chuang a la lut tawh a, kha movie chhunzawmna pawh hian $1billion chuang bawk a la lut leh thei hian director Christopher Nolan a turu buru zia a tilang chiang hle in ka hria.

Total Recall
Changtute : Colin Farrel, Kate Beckinsale, Jessica Biel.

Mithiamte sawi dan chuan nakinah Nuclear war avangin khawvel chenna hmun tak tak hi chenna tlak lohvin ala awm anga, chutih hunah chuan mihring la dam te chuan chenna tur inchuhin an la indo ang, he movie pawh hi hetiang behchhana siam ani.

Lawless
Changtute : Shia Labeouf, Tom Hardy, Mia Wosikowska

Tunlai cowboy lampang ani ber ang chu, True Story behchhana siam ani a, unau pa tak tak pathum chanchin tarlanna ani.

The Expendables 2
Changtute : Rambo, Arnold, Van-damme, Jet Li, Chuck Noris, Bruce Willis leh action hero lar zawng zawng!

A changtute khi en la, eng lampang nge tih I hrethiam mai ang! Action kara a mawi tawka nuihna tur awm zeuh zeuh te khan a ti hmuhnawm zual.

Trouble with the curve
Changtute : Clint Eastwood, Justin Timberlake, Amy Adams.

Drama movie hi ka ngaina lutuk lo na a hei hi chu hmuhnawm ka ti ve reuh khawp mai, a changtute an chang thiam a niang e.

Looper
Changtute : Joseph Gordon-Levitt, Bruce Willis, Emily Blunt.

Sci-fi lampang ka ngainat vang hrim hrim nge ka hre law, he movie pawh hi ka en tui khawp mai. Time travel hi a la awm theih tak tak ka rin vang te pawh ani mahna le.

Skyfall
Changtute : Daniel Craig, Judi Dench, Javier Bardem.

James Bond movie hi chu sawi tam vak a ngai awm love, he movie hian $1 billion chuang a la lut tih chu sawi tel hram ang.

The Hobbit : An unexpected Journey
Changtute : Martin Freeman, Ian Mackellen, Richard Armitage.

The Lord of the Rings fan tan chuan he movie hi chu hmuhnawm tih loh chi ani lo, hobbit pakhatin dwarves ho ram lak let leh tur a puihna chanchin ani a, tin he movie hi a chhunzawmna kumin kum tawp lama chhuak tur hi kumin a ka movie nghahhlelh ber pawl ani.

Similar Posts:

• Ka Korean Movie hnuhnawm tih te:
• Movie database
• Ponyo & Totoro
• Ngaihtuahna ki kawi!
• Basic Instinct 2 – Film Chhe Ber!

Recent Posts:

• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :

This entry was posted on Wednesday, January 9th, 2013 at 12:31 pm and is filed under Movies and Videos. You can follow any responses to this entry through the RSS 2.0 feed. You can leave a response, or trackback from your own site.