mi(sual).com

By Dr Jeremy V Pachuau (a phalna nen thlap)

Mitam zawk chuan tukin Vanglaini ah kan lo chhiar hlawm in ka ring. Khuh damdawi overdose chungchang a front page ah an rawn ziah mai bakah kan Health Minister hialin damdawi zuartute fimkhur turin a chah hial a nih kha….Nia hemi chungchang hi kan hriat chian lehzual a tha a ka hriat avangin tlem kan tarlang ve ang e….

Tun hnai, thla 2 thum vela ka experience leh case history Casualty ka duty lai a ka lo hmuh te han tarlang ve phawt ila…

1) Dec.23.2012 ni khan tlai 2:30 PM vel hian tlangval kum 32 mi vel hmanhmawh takin unconcious in Casualty ah an rawn zawn lutut a, Theih anga rangin ka zuk en nghal a, kan en chuan a lo thi fel der tawh a, a hmui leh a kut hmawr te a duk vek tawh…A thian te kan zawh chuan drugs chu a ti ve zeuh2 thin a ni awm e, tin zu / zawlaidi hi a in thin bawk tih min hrilh..An sawi dan chuan “chhunah Zawlaidi tlem kan in a, kan mu zal lawk a ti a, darkar 2 hnu ah, kan han kaitho dawn a a tho thei ta lo a, kan rawn hruai ta a ni” an ti…A zia lo hle mai, Casualty register ah chuan “BROUGHT DEAD” tih in kan enter ta ringawt a ni…

2) Dec.27.2012 zan dar 7 velah nula kum 23 mi, unconcious in an rawn hruai leh a, rang taka kan check chuan, a natna lan danah No.4 Overdose nen a in ang chiah a, a mit naute chu pin hmawr bawk tiah lek ( Pin point pupils ) tiah lek a nia, deeply unconcious in a awm bawk, No.4 thahna damdawi Inj Naloxone 400mg 2 amp in kan han chiu a, Oxygen te pe in, darkar chanve hnu vel chuan a rawn harh tha ve leh mai.. A chhungte kan zawh chuan drugs a tih ngai loh thu min hrilh a, tlai chaw erawh a thiante nen an ei ho thu min hrilh, tin kei pawn a tih ka ring lo….ka lo ngaihdan ah chuan a thian te nen an in kawm vel na ah misual tu in emaw a cold drinks in turah drugs a pawlh a nih ka ring a, a chhung te pawh fimkhur turin kan in chah zui…chuan dam tak chuan Pathian zarah kan in thlah ta a…

3) Jan.2.2013 zan dar 11 velah Casualty ah hmeichhe naupang kum 13 mi lek unconcious in an rawn hruai leh a, rang taka kan han check chuan a chung a mi ang chiah khian No.4 Overdose ang chiah bawkin a awm a, a thahna ten kan han chiu a kan han enthlak chuan minute 15 velah a rawn harh ve leh mai..a chhung te hnenah pawh a chunga ka chah angin ka chah leh a, naupang lah chu drugs a inchiu thin a nih hmel bawk si loh…

4) Jan.4.2013 kha Casualty ah zan dar9:00PM atanga duty tur ka ni a, Dar 9:00PM a kava thleng chu ka luh rual in hmeichhe tleirawl kum 17 mi, unconcious in an rawn hruai leh a, ka jacket pawh phelh hman lovin, ka va thlak tur doctor nen chuan kan buaipui ta char char a, hei phei chu damdawiina ka staff te nau a lo ni bawk nen, a lo duk nasa tawh a, a awm kan han ngaihthlak chuan a ri bawrh2 bawk si, Endotracheal Intubation ( Plastic pipe kha a thawkna dawt a tangin a chuap ah kan zuk thun a ).. Tui / chil etc unconcious lai khan a lo hak nasa hman khop mai, kan han hip chhuak a, Oxygen te kan pe a, a that deuh hnu chuan, Khawl hmanga thawk tir turin ICU ah ka dah chho ta a ni…Zing dar nga velah a pa a rawn chhuk a, an harh that tawh thu leh lawmthu te min rawn hrilh a, kei pawh ka thaw huai…Tin, keima tawn kher loh pawn ka thian dang te pawn an lo experience ve nual a ni, admit ngai khawp pawh an awm nual.

5) Jan.9.2013 – Nizan Casualty ah ka night leh a, tukin dar 8:00AM vel khan khitiang OD ang bawk khi nula kum 20 mi unconscious in an rawn hruai leh a, a buaithlak khawp mai, Aizawl hospital hrang hrangah a thahna Inj Naloxone kha Nazareth in ampule 1 chiah an nei sia, Endotracheal Intubation ka ti nghal a, a chuap a aspirate a ngai reng sia, A BP a drop bawk nen, darkar 3 vel kan inbuaipui hnu chuan a rawn harh e… A thiante lah chuan engmah an sawi duh si lo.. Nimin tlaiah a thiannu te inah chuan chaw a ei a ni awm e.. Tunah Casualty ah observation a dah mek a ni…

Khing a chunga mi te kan sawi duah na chhan chu Vanglaini a in ziak te nen pawn a ngaihbel theih tlat si a ni, a vanduai ten an thih pui a, a vannei ten an thih pui thelh hi, khuh damdawi, lar tak, mitin pawn kan hre awm e, Doctor prescribtion tel lo pawh a lei theih Syr. RESPIRA – D, leh ZAWLAIDI an ruih pawlh vang a ni…

SYR. RESPIRA – D bottle 1 + ZAWLAIDI um 1 = OVERDOSE

* ENGE RESPIRA – D CHU???

He khuh damdawi hi awmna a tan te kan chawh nasa a, khuh damdawi tha tak a ni…
 

** ENGE RESPIRA – D AH CHUAN AWM???

Respira – D hi damdawi chihnih in pawlh a ni, a khuh damdawi a tak zawk chu DEXTROMETORPHAN HYDROBROMIDE a ni, a hman na tur a hman chuan damdawi tha tak a ni, a dang chu CHLORPHENERAMINE MALAETE a ni, hei chu anti-histaminic ( allergy damdawi ang deuh) a ni.
 

*** A NIH RESPIRA – D (a dose aia tam deih a in) leh ZAWLAIDI chu ?????

Kan hre vek anga, damdawi reng reng hian side effect a nei tih kan hre awm e, Dextrometorphan Hydrobromide pawh a side effect common chu, allergy, thak, vual, nguai,mutchhuak etc….. Chutih rualin Damdawi leh damdawi thenkhat ei pawlh hian ‘TUR’ ( poison ) ang in a thawk thei tih hriat a tha…..
 

Tuna ka sawi duh bik chu leh he case, OD a chhan hriat loh, mu hlum etc…tunlai an tam em vang a ni….

Lehkhabu hrang hrang a ka chhiar leh internet atanga ka google atang ten ka hmuh dan ka rawn ziak a ni. Respira – D a Dextrometorphan hi a mak khawp mai, grape lam atanga siam juice nen hrim2 a lo in hal em em a ni, a dose sang deuh a in phei chuan. A chunga kan sawi RESPIRA – D khi a dose tam ( e.g um 1 ) lo in ta se, a hnu ah ZAWLAIDI ( Grape juice hrim2 ) kan in chuan, Dextrometorphan kha thin ah a in siam dang tur? ( metabolised ) tur enzyme chi 1 CytochromeP450 a dang ( inhibit ) tlat a, chuvangin, dextrometorphan kha thin chhuahsan mai lo in, thin ah a in khawl khawm ta teuh a chutih laiin, grape tui in thifim tur pawh a let fe in a rei avangin min an lo OVERDOSE ta mai thin a ni…

Chuvangin, Respira – D kher lo poh, Dextrometorphan awmna, khuh damdawi e.g Ascoril – D, Coscopin – D etcc… ei lai te i nih chuan grape tui lam awmna in tel loh a tha…

A tawp ber a tan kan hriat theuh tur, a bikin nu leh pa te, kan fa tleirawl te te te hi kan bulah an la pangchang viau a ni mai thei, mahse pawnlamah chuan, a tha lam ai chuan “thil” han ruih chakna an nei ve thin a, an che sual mai in, an nunna thlengin an chan mai ang tih a hlauhawm hle a ni.

KA LAWM E…

Similar Posts:

• Breaking News: Lammual ah innawr!
• “Bang ziakin a, Zawlaidi, ziakin a”
• Krismas nang nen
• Damloh Dawi, Zawl-loh-eye-dee
• Zawlaidi factory moving to R.V.

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Tuesday, January 15th, 2013 at 3:47 pm and is filed under Health, Information. You can follow any responses to this entry through the RSS 2.0 feed. You can leave a response, or trackback from your own site.