mi(sual).com

Hun engemaw chhung chu kan pi leh pute tuma awp loh in anmahni in ro an inrel a. Hnamdang thuhnuaia an awm loh bakah chhiah pawh an pe ngai lem lo. Amaherawhchu British ho lo lut in ram an rawn zauh zel a. Kum 1824 ah Burma khawthlang lampang zawng an la thei a. Kum 1852 ah chuan Kawlram chanve an awp bet thei ta. Kum 1885ah Kawlram pum an thuhnuaiah an dah tawh a ni. Kum 1888 December thla ah General George White-a ho in Chin Hills lak tum in nasa takin an bei a. Kan pi leh pute pawh in theihtawp chhuah in an lo do let ve ngei a ni. Mahse an ralthuam hman a in changkan hleih em avangion an tang rei thei ta lo a. A tawp ah chuan British thuhnuaiah an in tu lut ta a ni. Kum 1896 ah Chin Hills Regulation Act an ziak a. Chumi hmang chuan Governor of Burma in Chin Hills hi direct in a awp ta hmiah mai.

British ho in Chin Hills a ro an han rel chiah chu mipui duhdan ngaihsak lem lo hle. Kum 1907 ah British sawrkar chuan mipui rawn miah lovin Feudal Chief an ruat ta hmiah mai. Chung Feudal Chief te chu Chhiah khawn theihna bakah thuneihna dang pawh an petel nghe nghe. Feudal Chief te chuan mipui chungah chhiahte khawn in an thuneihna an lan tir ta a. Chung hun laia Feudal Chief te chu an Lal em mai ringawt mai a ni. Chu tak chu mipui duhdan a ni lo a. A lo pian chhan British rorelna vang a nih an hai bik si lo. Chuvangin British chungah an lungawi lo a an ho em em mai a ni. Chuvang chuan Chin Hills atanga British hnawhchhuah tum in kum 1928 February ni 20 ah Chin Hills Union Organization(CHUO), Hlingzung, Mindat Township ah a lo ding ta. Hei hi Chin Hills a Political Organization hmasa ber a ni. Chin Hills Union Khawmpui hmasa ber kum 1932 September ni 29 ah Ware khua ah an nei a. Hetah hian Education, Health, Economics lam leh adangte sawiho a ni.

Kum 1939 a Zirlaiho helna avangin zalen duhna rilru a rawn lian chho hle. Burma rama awm hnamdangte nena intluktlan tumin Chin ho pawh in tan an la ve a. Pawlte din in hruaitu te an thlang a, an hruaitu ten British sawrkar hnenah dilna thenkhat an siam a, chungte chu:

1. Chin Hills in hmundang ang bawka in awpna lamah hlawkna an neih theih nan
2. Chin Hills  in awpna ah Chinho duhdan mila Dan siam turin
3. Education, Health leh Economics lama hmasawn theihna turin
4. Chin Hills huam chhunga school te a rang thei ang bera cheitha turin
5. Sakhaw lam zalen na turin
6. Chin Hills ah kalkawngtha a rang lama siam turin
7. Chin Hills leh Kawlphai zalen taka in kalpawh theih nan
8. Chinho te hnamdangte nen an intluktlan theih nan
9. Burma in Independent a hmuh veleh Chin Hills pawhin an hmuh ve nghal theihna tur in

Chin ho dilna chu 20^th February 1938 ah sawrkar in ngun taka ngaihtuah chungin sawihona an nei a. He an thil sawihona ah hian sawrkar hnathawk mi 300 vel an va kalkhawm thei a. Sawihona an neih zawhah Chinho dilna pek mai theih a nilo tih British sawrkar hian a sawi a ni. Pek a hnekin an organization tihtawpsak an tum ta zawk a. Hruaitute pawh Politics lam kaihhnawih a inrawlh tawh lo turin thu an pe a ni. Chin Hills Union Organization hruaitute Politics lama an inrawlh tawh lohna turin sawrkar hna lian tak tak pek an tiam a ni.Nimahsela hruaitute chuan an lo duh hauh lo mai a. Chuvang chuan Sawrkar pawh in Chin Hills Union Organization hi sawrkar phalloh organization ah an chhinchhiah ta a ni.

Chin Hills Union Organization sawrkar phalloh a lo nih tak avangin Sawrkar chuan hruaitute an man ta a. Mipui lah in British duhlohna Kanpalet ah an lantir avangin kha hmun a Sawrkar thuneitute chu hlau in an tlanchhe hial a ni. Heng vel avang hian sawrkar hnathawk mi 36 chuan an hna atanga banna lehkha an thehlut hial a ni. 13rd December, 1946  ah hnam hrangte leh Kawlram inthian thatna a awm theihna turin meeting an nei a. Chutatang chuan Commission hrang hrang a lo awm belh ta a ni. A kum leh 1947 ah Kawl leh Chin inthian that nan Chin Myanmar Friendship, Htilin ah March ni 4 – 6 chhung awh an hmang leh a. Hemi kuma Aung San- Atlee Agreement an ziah khan Chin ho pawh in beiseina sang tak nen February 12,1947 khan General Aung San-a nen Panglong, Shan state ah Agreement an sign ve a ni. Chung Agreement avang chuan kum 1948 January ni 4 ah British chuan Burma chu Zalenna a pe ta a. Mipui duhdan angin Chin Hills Enquiry Commission, Member 3 awmna pawh 5^th February, 1948 ah din a ni nghe nghe. He Commission hian February 12 – 23, 1948 inkar hian mipui ngaihdan Opinion Poll lakna an nei a. Chuta tang chuan inawpna Dan siam leh Feudal King Compensation pek tha an tit a a ni.

Burma ram in zalenna a hmuh hnu kum 1949 a ziah Dan Pui ah chuan Parliament chhawng hnih a awm a. Chin ho pawh in Parliament hnuai zawkah chuan palai an tirh a lo ngai ta a. State dangte angin Lal leh bial awptute kan thlan tir mai dawn em ni tih ngaihdan a lo awm a. Chung vel tichiang tur chuan February 12- 22,1948 ah Chin National Conference , Falam ah an nei a ni. Hei hi Chin hnampum huap khawmpui hmasa ber a ni nghe nghe. Conference a ni hnihna ah Tedim bial Palai Pu Thang Khaw Kai(Tuithang Khua) chuan rawtna  a siam a. Lal te hian mipui chungah diklo takin ro an rel a ni. Chhiah an khawn a, hlawh nei lovin puak kan phur  bawk a. Chuvangin Lal in min awp dan ni tawh lovin mipui duhdan in kan inawp tawh tur a ni a ti a. Chu rawtna chu Falam Palai Pu Chung Mang(Lailun khua) leh Kanpalet Palai Pu Thang Muang ten an thlawp nghal a. Mipui vote an han lak chuan mi 5000 zinga 7 chauh in  hnial in adang 4993 chuan an pawmpui a ni. Chuvang chuan chu rawtna chu pawm a ni ve nghal a ni.

Khawmpui thurel angin Lalte thuneihna titawp in Compensation pawh cheng 500,000 pek an ni. Pawisa chu an lal dan indawt in 70,000; 20,000; 1,000 leh 100 tea sem a ni.Chuta tang chuan hun rei tak an lo tawrh tawh inawpbehna, chiah lakna leh Kuli phurh lak ata an zalen ta. Zomi hnampum huap khawmpui hmasa a nih bakah British duhdan a inawpna lak ata tal chhuaka mipui duhdan hman tanna bul a ni. October 1, 1950 ah Chin State thunei tute chuan February ni 20 hi National Day ni turin thuthlukna an siam ta a ni. A kum leh February ni 20, 1951 ah Chin National Day hmasa ber Mindat khua ah lawm a ni. He hunah hian Burma Prime Minister pawh tel ve in ani hian President lawmpuina  Message pawh a chhiarchhuahsak a ni. President bakah Minister dangte pawh in lawmpuina an thawn nual bawk.

Chin tih thumal hi Kawl tawng  a ni a’bawm” tihna a ni.Kan pi leh pu ten Bawm hmang a thil an phurh thin avangin Kawlho in” Hei, Bawm phurpa” ti in an ko thin. Chumi kal zel avang chuan Chin tih hming kan lo puta a ni. Hnamdang in kan pi leh pute an lo hriat hmasakna a ni ber mai. Mahse zofate hi Chin kan ni lo. Hnamdang in min kohna duhawm lemlo tak a ni zawk. Inhmuhsitna tawngkam a ni lek lek zawk mah a ni. Zohnahthlak hnam hrang hrang tawngah hian Chin tih thumal hian awmzia meaning a nei lo. Chuvangin Chin hi kan hnam hming diktak a ni lo tih a chiang a ni. A nihna takah chuan Chin intih hi tumah in an duh tawh lo a ni. Burma zohnahthlak “R” Group heng Hakha, Falam etc. ten Lai kan ni an ti tawh. Zohnahthlak “G” Group heng Sihzang, Teizang, Zou etc ten Zomi kan ni e an tithung. Chin National Day pawh Laiho chuan “Lai Miphun Ni” an tia, Zomiho chuan “Zomi Nam Ni” an ti thung. He ni hi Zofate tan chuan ni pawimawh tak a ni. India sawrkar leh Mizo National Front(MNF) inremna ni anih bakah Vaiphei hla phuah thiam Pu Rokunga piancham a ni bawk. Kumtin February ni 20 a lo thlen hian khawvel hmun hrang hrangah Zofa ten National Day hi an lawm thin a ni.Duh thusamah chuan Zo hnam zawng zawng huap tur in  Mizoram sawrkar pawh hian he ni hi Zo National Day ah puang se a tha hle ang.

Similar Posts:

• 2010 Chin National Day speech by Salai Pa Hmun
• Burma Ram Vanglai leh Mizo te
• India/Burma a bet reng tur kan ni lo
• Ngaihtuah a ti thui mang e!
• Arbawm awmna apiang Mizoram: MP Hminga

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Wednesday, January 16th, 2013 at 6:00 am and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.