mi(sual).com

Kum khat leh a chanve zet chu mi(sual).com hi ka lo luhchilh ve ta a. Tun hi vawi 150 (Za nu-fa) ka post na alo ni ve ta reng mai. Mi(sual).com hi Ringtu nun nen hian inanna tak a nei hian ka’n hre tlat pek a. Mithar fel deuh an rawn lut a, Post thar an rawn ti char char a, mahse, han chin alo nei thin a. Comment te pawh kan han ti deuh hluai a, reh leh vang vang chang a awm thin. Tha thlah miah lova, kal deuh pat thei kan vang ang reng khawp mai. Admin ho tak pawh hi tunlai chu an reh ang reng khawp mai.
Kristian nun pawh hi hetiang deuh hi ani a, kan han Piangthar tir chu, kan phur surh mai a, hrilh theih apiang hrilh kan chak a, Kohhran Upa leh Pastor-te kan han hmu ro deuh viau a, kal deuh pur pur leh, rik deuh buan buan kan duh thin. Amaherawhchu, nikhua a lo rei a, chauh leh ro kan tina leh viau thin. Thenkhat erawhchu, rihluai lem lo, Sheldon-I te ang deuh a, mahni rawngbawlna hria a, tuktin a, “Tuk chhuah nuam vek u” rawn ti thei reng te, Chhana anga Thla kipa thlakhat chhunga thil thleng pawimawh rawn tichhuak ziah thei te, Tuaisiala anga Thlakip Fiamthu rawn tichhuak thin te, Pu HVa anga Mizorama an rawn chhuah lai tih loh chu, phai lai em em nei lem lo te an awm bawk a ni.
Kristian nun hi Thlawhtheihna thlawhchhuah dan letling(opposite) chiah hi ani e’ an ti thin a. Thlawhtheihna chu, Pilot tello chuan amah mai chuan eng han ti thei ani lem lo a. Mahse, Pilot-in a han tinung ta a, a che tual tual a, a tlan tan ta a, a tlan chak tial tial a, a tawpah phei chuan, a thlawk ta fur fur mai thin a ni. Nimahsela, Kristian Nun erawhchu, Pianthar tirhah kan han thlawk fur fur a, chutah, kan han thlawk hniam a, kan thlawk muang tial tial a, kan chapona leh indahsanna te ahan reh tial tial a, leiah kan tlan a, kan tlan zawi tial tial a, Sana ban angin zawi raih, mahse chak fur fur emaw, kal hlei theilo khawpa muan lai nei siloin an kal ta bak bak thin a ni.
Tunge tih inhre tawn lemlo, mahni inringtawk tak theuha kana wm lai hian, kan tawng huaiin, kan inhnial huai deuh emni aw? A tih theih a, kan inhriat chian tial tial hnu hian, kan inhnialin kan inkhak hreh ta deuh emni aw? A tih theih bawk. Aryan-a hi inthup thiam ber anih hmelin ka hria a, midangte hi chu, alo hre tawk kana wm zel a, kan han inhmuh hnuah ngat phei chuan, inhnial pung pung kha a nuam hnai tawh chiah thin lo. Chutiang ang bawk chuan, Kristian nunah pawh hian, Kan hriatchian leh kan bula awm rengte hi vei kan daih an awl duh khawp mai. La hmuh ngai loh leh khual khua amite va vei daih emaw, Pathian thu sawi pawh hmel hriat lohte hnenah chauh sawi tur emaw ti kan awm thin. Mahni chhungkuaa chenpui te, thian thate hnenah hlei hlei hian Pathin thu pawh hi sawi tam tur a ni reng si a.
Ringtu nunah chuan:-
Hneha ram la turin Tlawm hmasak a ngai a(Matt 5:39; I Korinth 15:57)
Nung turin Thih hmasak phawt a ngai (Johana 12:23,25)
Nunna humhim turin kan hloh hmasak phawt a ngai (Matt.10:39, Luka 17:33)
Thil va nei tur chuan, kan pek hmasak phawt a ngai (Thufingte 11:23,25)
Roreltu ni thei tur chuan, midangte rawngbawlsaktu nih hmasak phawt a ngai (Luka 12:42-44)
Mifing nitur chuan, mite ngaih a mi a nih hmasak phawt a ngai (I Korinth 3:18)
Chawimawia awm tur chuan, inngaihtlawm hmasak phawt a ngai (Matt.18:4, 23:12)
Hmasa ber nih duh chuan, Hnuhnung ber nih hmasak ngam a ngai (Marka 9:35, Matt.20:26)
Sunday hman nuam vek u le.

Similar Posts:

• Lazydog’s “KRISTIAN RAM ANI SI A”
• Tial Tial
• A nuam ringawt!
• PHENGPHEHLEP
• Thlawhtheihna

Recent Posts:

• Health minister bàn turin CM ngen
• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan
• KOHHRAN PAWL HRANG HRANG LEH AN DINHMUN TLANGPUI

This entry was posted on Sunday, January 20th, 2013 at 7:59 am and is filed under Lifestyle, Religion. You can follow any responses to this entry through the RSS 2.0 feed. You can leave a response, or trackback from your own site.