mi(sual).com

February ni 23-a Chalfilh Bye Election lo awm tur hi a ngaihnawm tan ta hle mai! Bye-Election dang zawng zawng aiin a ngaihnawm zawk hial awm e. A chhan chu term tawp dawn a ni tawh a, he inthlan hian General Election lo awm tura Party tinte dinhmun a hril thui hle tura ngaih a ni. MPC, ZNP leh BJP-in an candidate tur an tichiang tawh a, MPCC leh MNF-in an la tichiang lo thung a. He party lian pahnihte hi inthlan tingaihnawmtu tur an ni. He inthlana tling lote chu pute lamah an mark a that vak a rinawm si loh va, General Election-ah an chuang nalh thei tlat. Hei hi a tingaihnawm zualtu tur pakhat a ni. February ni 6 thleng khi nomination file hun a ni a, a ngaihnawm telh telh ang! Party tinte an thlir zau ila.

Mizo National Front (MNF):
Anni hian candidate tur an la ti chiang lo va, hmanni lawka MPC atanga lo lut Lalvenhima Hmar leh Laltlinkima Fanai te hi rin kai an ni. Lalvenhima Hmar hi rin kai zawk a nih avangin han chip ta deuh bik ila. Amah hi Suangpuilawn khaw chhuak a ni a, inthlan hmasaah khan UDA atanga dingin vote 500 chuang hret chauhvin Pu Chawngtinthanga a hneh lo a nih kha. Tunah hian party lian zawk behchhanin a rawn ding chhuak ta se, eng nge a an ang? Chalfilh Constituency huam chhunga voters ngah ber, Sesawng Group MNF te chuan Lalvenhima an duh loh thu an puang nghal pang mai! Chuti a nih si chuan Phullen leh Phuaibuang tlangdung lam atang hian candidate an awm hmel si a, Khawruhlian bakah Suangpuilawn leh a chhehvelah bak vote an hmuh that a beiseiawm loh! Congress lamin Sesawng khaw chhuak Pu C. Lalruata an vawrh chhuah phei chuan Sesawngah vote a hmu mangin a rinawm loh va. Chutih laiin a thawm nei lian ber a ni lawi si. Hnam feelings nasatna hmun a ni a, Hmar tamna hmun a nih avangin advantage a nei viauin a rinawm. Amah vawrh chhuak lovin Pu TKA hi lo ding ta sela, an pu berin a thlem luh a nih hmel bawk si a, ticket a chan tak si loh chuan â takin a che duh ngeiin a rinawm. Hemi avang hian candidate tur puan hma hi a tha ber lo maithei. Pu TKA pawh hi Luangpawn lampang chhuak a nih hmel bawk a, a tu zawk zawka pawh hi ding thut thei an ni. February ni 6 i lo nghak chawt phawt teh ang u.

Mizoram Pradesh Congress Committee (MPCC):
Rorel lai party an ni a, bye election-ah hian tling tura ngaih an ni tlangpui a; mahse, tun tum erawh chutiang ngawtah a ngaih theih hauh loh. Tun thlengin a party lian berin candidate an la puang ngam lo va, an chiri ve deuh pawh a ni mahna, HPC thawhpuiah an sawm tih thawm a ri tlat; ama’rawhchu, an sawrkar lo chet tawhna avangin Hmar mipuiin an thlawp a rinawm lem loh. Anni party atang hian Phuaibuang khaw chhuak Pu J. Lalchhanhima leh Sesawng khaw chhuak Pu C. Lalruata hi rin kai an ni a, Pu C. Lalruata hi a âwm zawka ngaih a ni. Pu J. Lalchhanhima hi hmanni lawk khan SA a nihna atangin a bang a, hei hian sawi a titamin Congress candidate a nih mai ring an tam hle. Ani hi han ding ta se…i’n ti phawt teh ang. Phuaibuang lamah chuan vote a hmu tha dawn tih a chiang sa a, amaherawhchu, Phullen lam atangin independent-a Pu R. Lalrohlua a din dawn avangin a duh ang zãn vote a hmu thei kher lo vang. Suangpuilawn tlangdung leh Khawruhlian lamah chuan Lalvenhima Hmar a ngam dawn hauh lo va, Sesawng lamah pawh Pu C. Lalruata vuipui tam tak an awm dawn avangin vote a hmuh that a rinawm chiah loh. Term hmasaa Pu Lalvenhima Hmar-in Pu Chawngtinthanga a hneh loh chhan chu Phuaibuang lam vote vang nia sawi a ni a; an vote a hlãwm viaua ngaih a ni. Chutih rualin an khaw pa MLA nihna hi Phuaibuang lam hian chhawr vak lo niin an insawi a, chu chuan tun inthlan hi a nghawng thei ang em? A hre chiangtu tam takte’n ‘Lalchhanhima SA mai mai’ an lo ti fo bawk si a; chuvang chuan Congress hian tlin ngei an duh chuan Pu C. Lalruata bûk a rit zawk lo thei lo. Chutih rualin a hna meuh a lo bansan phah avangin Pu J. Lalchhanhima’n party ticket a chan loh chuan a awm hle hle hauh lo vang. Anni party pawh duhtawk ta phawt mai ila.

Zoram Nationalist Party (ZNP) & Mizo Peoples Conference (MPC):
Anni party pahnih hi khaikhawm mai ila. Inthlan hmasaa lo tangho tawh an ni a, tuna a hranga candidate an nei ve ve hian a vaw chhe ve ve thei tlat a, inthlan hmasa an tluk a rinawm loh. ZNP Candidate Pu C. Lalchhandama hi a chanchin han sawi thui vak tur ka hre rih lo va, tling tura beisei ber a ni lo tih erawh han hre hmasa phawt ila. Chutih rualin Suangpuilawn lam hi an len vena a ni tih hriat a tha ang. MPC lam hian an party President Pu Lalhmangaiha an rawn thawh chhuak ta ruau mai! A huaisenthlak a, chutih rualin bial chhung mite tan thil lawmawm tak a ni. Kum dangah hian Chalfilh/Suangpuilawn Bial-ah hian party-a mi challang dah an ni ngai lo va, a chhe vawm khawm ang hialin an lo sawi tawh thin. Chutih laia MPC-in an President an rawn vawrh chhuaka hi thil lawmawm tak a ni a, kawngro a su thui viau maithei. Inthlan apiang hian MPC hian vote sing chuang a hmu ve ziah a, PC ruh tak tak tam tak an la awm vang niin a ngaih theih a. Suangpuilawn bial a nih lai pawh khan MPC chu rorel lai party pawhin an hneh ngai loh kha an ni thin a. Bial siam rem a nih chiah khan MPC chuan tun hma an pha thei ta lo. Hei hian a lantir chu, Suangpuilawn tlangdungah la tha viau mah se, an rin luh thar (Entirnan, Khawruhlian, Sesawng, Buhban, Sihfa…etc.)-ah an tha lo a ni tih hi. Pu Lalhmangaiha hian hmachhawp tha tak tak a nei a, mahse, a hun duh rei chi, thla 8 chhung leka zawh mai theih loh chi a ni deuh vek a. Inthlanpui hmaa tih fel hman chi a awm lo vek angah a ngaih theih a, chuvangin a au hla hian kawngro a su em emin a rinawm loh. Chutih rualin vote hmu chhe ber a ni lovang tih erawh a chiang a ni.

Independent…etc:
Independent-in Pu R. Lalrohlua hi a ding dawn tih a chiang tawh a, ani hi Phullen khaw mi niin a nu leh pate pawh Phullen-ah an la awm a, Aizawl-ah hnathawhna avangin a nupui fanaute nen in an luah mek a; bial chhuak mai ni lovin bial chhung mi tih ngam a ni. Tun hmain zirlai pawl lamah a lo inhmang tawh thin a, tunah pawh hian khaw hrang hranga zirlaite a kawi khawm thiam riau va, politics game a thiam viau chuan party lian dangte inhruipawhna karah a rawn dawk chhuak thei tlat a ni. Zirlaite’n thawm an neih lena ‘bial chhuak mai ni lo bial chhung mi ngei’ ti zawnga PR an siam fo si chuan kawngro a su thui thei viauvin a rinawm. Zirlai pawl vungna khua, Phullen, Sihfa, Buhban leh a chhehvelah vote a hui nualin a rinawm a; Vanbawng lal leh Phullen lal hi unau an ni a, hei hian tun thlengin a khaw pahnih te-ah inkungkaihna nghet tak a neihtir a. Chuvang chuan, Lalvenhima Hmar a din loh chuan Suangpuilawn tlangdung lamah vote a hmu nualin a rinawm bawk. BJP candidate Pu J. Ramkinlova erawh a tling lo turah ngai phawt ang.

Bye Election-ah hian rorel lai hi tling tura ngaih an ni thin a, mahse, tun tumah erawh chutianga ngaih theih a ni hauh lo. Congress hi an tlin loh vaih chuan an tlachhe hle tawhah a ngaih theih ang a, MNF an tling lo a nih chuan Chalfilh Constituency-ah an dingchang ngai tawh lovang tih hi huai takin a sawi ngam tlat. MNF leh Congress an tlin loh chuan bial danga MPC leh ZNP dinhmun a vawrh sang viauvin ka ring. Chutih rualin ‘kan party candidate a nih chuan êk pawh ni se’ tih lampang kha a awm vak tawh lo tih hria ila.

Tling tura rin ka la nei thiam lo va, vote tur lah ka la hre hek lo. Chutih rual chuan, vote a inrualkhai viau ka ring. Thla khat han nghak leh ila, he post hi kan chhiar leh dawn a nia.

(Kan admin-te’n POLL te han siam se, mipui rindan pawh hriat a chakawm e)

Similar Posts:

• Chalfilh Bial Bye Election vote chhiar a ni dawn ta!
• MLA kan ning hma
• HPC ‘D’ ten VC candidate an vau
• ELECTION REFORM
• LADC Gen. Election Result kimchang

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, January 27th, 2013 at 8:59 am and is filed under Event, Mizoram, Opinion, Politics. You can follow any responses to this entry through the RSS 2.0 feed. You can leave a response, or trackback from your own site.