Archive for January, 2013

Pu Lalsangliana kan chan ta (Cowboy Bu Sudden-a Mizo tawng a letlingtu)

Monday, January 28th, 2013

Sangliana

Mizo thalai te zinga 70s 80s chho vel a lar lutuk mai thin Cowboy phawirang Suddena bu, leh Cowboy bu Dollar series te leh novel ngaihnawm lutuk mai The Count Of Monte Cristo tih vel thiam lutuk mai leh ngainawm tak mai a Mizofa te tana Mizo tawnga lo let thin tu Pu Lalsangliana Kulikawn chu vawin January ni 28, 2013 hian Kulikawn thlanmualah vui liam a ni ta.

Pu Lalsangliana ni Dr H.K. Thanglura(L)leh Pi D.C. Kimi(L) te inkarah an fa 6 zinga a 3na ni in 29th December 1934 khan Durtlang damdawiinah a lo piang a. A mah hi lehkha thiamthei tak ni in St Edmunds College Shillong atangin BA a passed chhuak a. Kum 1958-59 khan Govt.Mizo High School ah zirtirtu hna te thawk in hemi hnu hian eizawnna dang dap in motor workshop te a siam a. 1958 khan a nupui Pi Varhmingliani(L), Rev Dr Vanlalnghaka farnu hen innei in fa 7 an nei a. Amah hi khawtlanga mi inhmang tak mai ni in Kulikawn veng chhungah YMA leh VDP lamah te hruaitu nihna lo chelh reng thin ni in halpuah hal khap rawt chhuak a ti hlawhtling tute zing ami a ni.
(more…)

Mizoram tsunami

Monday, January 28th, 2013

* Khawihthlûk.
* Kasauti.
* Ruotmawi.
* Sailova.

* Bematuale.
* Chiahpuam.
* Kal mai teh.
* Phûl lem.

* Swine & Bird Flu.
* Korean Film.
* RV & Zawlaidi.
* NLUP.

* Haiden-rial over.
* Awke.
* Paliana.
* Mombati.

Zonunmawi leh Chi-seh lam

Monday, January 28th, 2013

Thingtlang bawk!
Nia, thingtlang chungchang bawk sawi mai loh chuan sawi tur dang hre hek lo i. Nimin chu, duh aia hmaa ka harh avangin ka phur thuta, Trekkerboy te paw’n an tih thin kha tiin kein ka kal ve chiam mai a. Darkar hnih vel ka kal chuan, ka chau chhe hle lawi si. Tlangval that zek zawk lai, mahni tawka ei leh in intuituah ve emaw ka intih laiin, thingtlang naupang ka nih lai kha ka lo tluk reng reng lo hi a lo ni a. Nunhlui min ngaihtuah tir ta daih!

Mamawh lamna – Leitlangpui
Kan venga dawr awm chhun khan kuhva leh naupang lawm tlem an zuar a ni mai a. Chu pawh, kar khata Lunglei an kal loh hlauh chuan thil zawrh an nghei titih thin. Kan khua atangin Lunglei khawpui hi kilometer 20 vel chauh a nih avangin langin chawhmeh ilo zuar pahin chhungkaw mamawh kan lei mai thin. Khang hunlai khan kan nu leh pa te kha an lo va in-fit tak em!

Rit phur lo pawha kar-kawng/zo-kawng kal hahthlak tawh nak alaiin, zing khawvar hmain meichher chhiin kan khua an chhuahsan a. Ramri (kan khua atang kilometer 4 vel) an thlenin khua a en tan tawh thin avangin meichher an dahtha a. Kan khaw thenawm atangin motor kawngpui khu tak mai paltlangin Leitlangpui chu an han lut a. An chawhmeh zawrh tur: chakai, hruizik, hmarcha-hring, sangha, ladt., ken te an hralh zawh te te chuan, chhungkaw mamawh chini, chi, alu, dal, khawnvartui, ladt., an lei te te a. Tlai hlau takin kan veng lam pan bawkin an haw leh nal nal thin a. Unau hmel hai velah kan veng an lo lut leh mai thin. Fur ruahtui tlak lain gat phei chuan, vangvat zuk thiphungin an rawn thleng thin.

Zonunmawi
Chhungtinte’n kartin chawhmeh zawrh tur an nei ngai vek bik lova. Thil zawrh tur nei lem lova Lunglei han kal ve ngawt chu thingtlang mi tan chuan a tih chi lem lo. Tichuan, Lungleia kal tur te kha chu an kal dawn zanah an ngamtlak deuh te’n thil lei tur an rawn thawn ngei a. Ka pa hi tlawmngai ve thei tak leh, mi te ngamtlak a ni bawk a. Lunglei a kal tawh hi chuan kan chhungkaw mamawh aiin, midangte mamawh hi a phur tam zawk fo. Chhang tui tak tak, mi chhungkua-in thawn chang phei chuan naupanga thuchang, kan ei chak ve thin khawp mai. Ka pa a lo thleng tih an hriat vel leh ‘kan lawm lutuk e’ tiin an haw leh mai thin. Kan it thlawn fo. ;-)
(more…)

Nghilh har chuang ka di

Sunday, January 27th, 2013

(As told to the author by MJ)

Kan bul tanna a ho ang bawkin, kan tawpna pawh a ho bawk. Mahse, he ka hringnuna hmangaihna mel lung min lo phun sak tawhtu hi nghilh a har em em lawi a. Ka tum a, ka bei a, ka tuar bawk a. Ni lo, ni lul love, an lo thar leh thin. He ka thinlung ram tuma la tlawh pawh ngai lohna ram lo dai dar hmasa bertu hi, kei ka tan chuan nghilh har chuang ka di a ni si a.

Scotland Of The East tia an koh thin Shillong chu 10 Degree Celcius vawtin a nghaisak mek lai a ni a, karkhat hnuah chuan ka zirna ka zawh tawh avangin ka chhuahsan a hun dawn ta si a. Ka la tem ngai lova, ka tawnhriat hmasak ber a nih bawk avangin, hmangaihna ka la na em ka hre lova, ka la na lo em ka hre hek lo. Shillong ka chhuahsan dawn ta tak tak erawh chuan, eng emaw min mawlh tlattu awm hian ka inhre tlat lawi a. Martin Luther Christian University, Campus ka chhuahsan a hun ta tak tak a, ka liam thlenga min bye bye lawm lawm laite kha thamral lo mitthlaah an lo thar leh thin. National Highway 44A ah 60 km/hr a hmelhriat loh kara kan tlan lai khan, hmangaihna hmanga bual ka ni tih ka inhre chhuak ta.

Lenna vangkhua hmun lo ta na na na chu, kan inngai mai a ni lo, lung hi a leng vawng vawng a ni ber. Ka tih ngam ngai loh tur leh ka tih tur pawh a ka rin loh chu ka tih a ngai ta hial a, ka chhungte hnenah engkim ka hrilh tlang a tul ta. Pasal atan pawh ka duh a, ka ring em em a, ka tan engkima ka engkim a nihna hi nghilh a harna chhan a ni hial reng a ni. A chhungte pawh zak chung chungin ka hmu vek tawh a, ka chhungte hnenah pawh ka inhmelhriat tir tawh bawk. Mahse, vawiina he nun khawhar leh natna hi ka chan an lo ni ta a ni!!
(more…)

Chalfilh Constituency Bye-Election tur i thlir ang u hmiang!

Sunday, January 27th, 2013

February ni 23-a Chalfilh Bye Election lo awm tur hi a ngaihnawm tan ta hle mai! Bye-Election dang zawng zawng aiin a ngaihnawm zawk hial awm e. A chhan chu term tawp dawn a ni tawh a, he inthlan hian General Election lo awm tura Party tinte dinhmun a hril thui hle tura ngaih a ni. MPC, ZNP leh BJP-in an candidate tur an tichiang tawh a, MPCC leh MNF-in an la tichiang lo thung a. He party lian pahnihte hi inthlan tingaihnawmtu tur an ni. He inthlana tling lote chu pute lamah an mark a that vak a rinawm si loh va, General Election-ah an chuang nalh thei tlat. Hei hi a tingaihnawm zualtu tur pakhat a ni. February ni 6 thleng khi nomination file hun a ni a, a ngaihnawm telh telh ang! Party tinte an thlir zau ila.

Mizo National Front (MNF):
Anni hian candidate tur an la ti chiang lo va, hmanni lawka MPC atanga lo lut Lalvenhima Hmar leh Laltlinkima Fanai te hi rin kai an ni. Lalvenhima Hmar hi rin kai zawk a nih avangin han chip ta deuh bik ila. Amah hi Suangpuilawn khaw chhuak a ni a, inthlan hmasaah khan UDA atanga dingin vote 500 chuang hret chauhvin Pu Chawngtinthanga a hneh lo a nih kha. Tunah hian party lian zawk behchhanin a rawn ding chhuak ta se, eng nge a an ang? Chalfilh Constituency huam chhunga voters ngah ber, Sesawng Group MNF te chuan Lalvenhima an duh loh thu an puang nghal pang mai! Chuti a nih si chuan Phullen leh Phuaibuang tlangdung lam atang hian candidate an awm hmel si a, Khawruhlian bakah Suangpuilawn leh a chhehvelah bak vote an hmuh that a beiseiawm loh! Congress lamin Sesawng khaw chhuak Pu C. Lalruata an vawrh chhuah phei chuan Sesawngah vote a hmu mangin a rinawm loh va. Chutih laiin a thawm nei lian ber a ni lawi si. Hnam feelings nasatna hmun a ni a, Hmar tamna hmun a nih avangin advantage a nei viauin a rinawm. Amah vawrh chhuak lovin Pu TKA hi lo ding ta sela, an pu berin a thlem luh a nih hmel bawk si a, ticket a chan tak si loh chuan â takin a che duh ngeiin a rinawm. Hemi avang hian candidate tur puan hma hi a tha ber lo maithei. Pu TKA pawh hi Luangpawn lampang chhuak a nih hmel bawk a, a tu zawk zawka pawh hi ding thut thei an ni. February ni 6 i lo nghak chawt phawt teh ang u.
(more…)

A hming ‘Maka’(Lawi-si a) – (Sunday Pual).

Sunday, January 27th, 2013

Zawlnei Isaia khan Lal Isua Krista nihphung tur alo sawilawkte zingah khan, “A hming Maka” tih kha a awm mauh mai a, amak teh ngawt viauin alang naa, han chhut chian chuan alo sawi lawk dik zet mai a. Khai mah aw :-
1. Isua khan Thlalera ni 40 zet chaw ngheia riltam em em chungin a rawngbawlna bul a tan a, Mahse, ‘Nunna Chhang’ a ni lawi si.
2. Isua khan he khawvela a rawngbawlna kha Tuihal em em chungin a hmang tawp a; Nimahsela, amah ngei chu ‘Nunna Tui’, mihring thinlunga chatuana chik reng tur chu a ni lawi si.
3. Isua chu a Kraws put zolovin, Chauvin a tlu a; Nimahsela, amah ngei chu phurrit phur leh rilru hahte tan ‘Chawlhna’ ani lawi si.
4. Isua kha Ramhuai zawl anga puh ani a; Nimahsela, Ramhuaite a hnawtchhuak lawi si.
5. Isua kha a tap a; Nimahsela, amah ngei chu mite mittui hruk hul saktu ani lawi si.
6. Isua kha Dar tangka 30 leka hralh ani a; Nimahsela, He khawvel hi a chhandam lawi si.
7. Isua kha Beram talh tur anga Golgotha lam pana hruai ani a; Nimahsela, amah ngei chu ‘Berampu tha’ chu ani lawi si.
8. Isua kha tihhlum niin, a thi a; Nimahsela, Thihna hnehtu ani lawi si.
9. Isua khan Chhiahhlawh a nei miah silova, “Ka Pu (Master) tia koh a hlawh fo lawi si.
10. Isua khan Sikul leh College te kalin, eng degree mah a nei hauh silova; Nimahsela, “Zirtirtu” tia koh ani lawi si. (more…)

Mipa chu MIPA! Hmeichhia chu THIL.. :)

Saturday, January 26th, 2013

Mak ve mai mai chu han ti ringawt ila, mahse a makna pawh a awm chuanglo a :) . Hmeichhia chu thil (Motor, Computer, Fridge, Cooking Gas. etc..) ang an ni. :P

Nupa tam tak inthen nachhan leh an inthen in hmeichhe zawk thiamloh an chantir bur thin nachhan hi Mipa in hmeichhia chu ‘thil’ ang anni tih an hriatloh vang a ni. Motor tawng deuh pawh lei mah la, fai tak leh duat taka, tha taka i enkawla, a thalo lai te a thar a i thlak chuan Motor tha tak leh mawi takah a chhuak thei a ni. Mahse Motor thar, nalh leh chak tak pawh lei mah la i enkawl uluk lo a, i tihfai peihloh chuan reilo teah Motor chhia leh hmanthlak lohah a chhuak ang. I computer chu rei tak i hman duh chuan duat taka i enkawl a ngai, chutiang bawk chuan i thil neih zawng zawng chu duat taka i enkawl chuan thil tangkai leh hmanthlak ni in, kum tam tak pawh i hmang thei ang. Thil chu a enkawltu/neitu zir a ni.

Hmeichhia chu THIL ang an ni tih hre reng thin i la (thinrim fe fe an tam ang chu :) ), Thil chu kan chei chuan a mawi a, kan cheiloh chuan a mawi chuanglo. Hmeichhia pawh an inchei chuan an mawi a, an inchei loh chuan an mawi hran chuanglo..:) ”A nupui chu a sual lutuk a” tih emaw ” A nupui chuan a pasal engah mah a ngailo” tih te pawh hi kei chuan an pasal thiamloh zawkah ka ngai thin. Ngati nge? A ‘thil’ chu a enkawl thiamlo a ni mai lawm.. ‘Thil’ chu a that chuan a neitu vang, a chhiat pawn a neitu vang.. :)

Bus chuan ka uak!

Saturday, January 26th, 2013

Hmanni chu bus-ah ka chuang a, ka bulah hian vaipa pa lian pui hi a thu a, a hnapkhir a kheuh mual mual a; ka uak ru tuarh tuarh a! A hnapkhir kheuh chu a hrual mum a, a pen per a, bus thutna ban a’n vuan nghal chat a! Duhtawk ta mai lo chuan a kheuh leh a, chutiang chuan a ti a ti ta mai a. Ka va han ten tak em aw…!

Chuta tang chuan bus-a chuan hi nuam ka ti ta lo riau mai a; a vawn ban te ka vawn dawn apiangin ka hre chhuak ta ziah mai leh nghal a. Ka vawn hmain kut tenawm tak tak engzatin nge lo vuan ang tih te ka ngaihtuah ta thin a. City bus ngat phei chu mi chitin chitang chuanna a ni si a, mi invawngfel leh thianghlim tak takte chu awm ve bawk thin mah se tawp tak tak an awm reng a. Nitin bus an sil si lo, an sil chang lahin a chhung lam an tifai ngai em em thin bawk si lo va, ka tenchhiat a zual ta em em mai a ni.

Fainaah tan i la thar ang u. Mi zinga hnapkhir kheuh mual mual te hi i ching tawh lo hram ang u. Hetiang hi Mizo zingah pawh kan la tam tlat. A tenawm a, pumpui tha vak lo phei chu luak a pawt a, uak tuar tuar palh a hlauhawm thin.

Hawh u, i fai ang u.

Ui rinawm Capitan.

Saturday, January 26th, 2013

Hei hi ka Fb thian ten an Like azarah ka lo hmu ve a, rilru a khawih khawp mai. Argentina a Miguel Guzman-a fapa Damien-a chu a rawlthar chhuah birthday present atan German Shepherd Dog tha tak mai kum 2006 khan Pek a ni a. A pa Miguel Guzman-a zawk chuan duat takin a enkawl thin a ni.

Vanduaithlak takin Pu Miguel Guzman-a chu a kum leh mai 2007 chuan a thi ta hlauh mai a. An ui chu ina hnutchhiahin Thlanmualah an phum ta a ni.

Ina an han haw chuan, an ui ‘Capitan’ tia an koh chu an hmu ta reng reng lo mai a, a bo ta daih mai a ni. Sunday alo nih chuan, Pu Miguel-a nupuite chuan an pa thlan chu an va tlawh a, chutah chuan thil mak an va hmu ta! An uipa Capitan-a chu apu Miguel-a thlan chungah chuan alo bawk hle hle mai hi alo ni a, api te ahan hmuh chuan a bauh a, lungchhe taka tap ve niawm tak hian a u vel ruai a ni.
(more…)

In ek mawi siak thu

Saturday, January 26th, 2013

Hmanlai hian lal ropui tak mai Akbar-a hi a awm a. A lalram a zau in thil a ti thei hle mai a. Akbar-a chuan khawnbawl upa fing tak mai Birbal-a a nei a. A fing in rorel a thiam a, Akbar-a pawhin a hmingthan pui in a chhuang em em thin a.

Nikhat chu, Akbar-a chuan Birbal-a aia fing nih a duh ta a. Birbal-a ngaihtuah chhuah theih ni miahlo tura a rin ‘IN EK MAWI SIAK’ ah a cho ta tlat mai a. Birbal-a chuan chu cho na chu a pawm ta a. A tuk zing a in ek mawi siak tur chuan an in then ta a. Chu thu chuan Akbar-a ram zau tak pawh chu a luahkhat ta nghal a.

Chumi tlai chuan lal Akbar-a chuan a ek mawi nan chawhmeh chi hrang hrang, Artui te, sa chi hrang hrang te, leh chawhmeh tui tak tak mai a ei teuh mai a. A chawhmeh tui tak avang chuan a ek pawh chu a mawi hle in a ring a. Tichuan,”Naktuk zing ah chuan mi zawng zawng in Birbal-a aia ka fin zawk thu hi an hria ang a, min ngaisang lehzual sauh ang,” ti rilru chung chuan tui takin a mu ta a. Birbal-a erawh chuan ngun taka a ngaihtuah hnu in ei tur chikhat chauh a ei ta a.

A tuk zing ah chuan mi tam tak chu Lal leh Birbal-a in ek mawi siak en tur chuan lal in tual ah chuan an lo kalkhawm ta a. Akbar-a chu intithei tak chuan a e hmasa ta a. A ek chu mawi hle tura a ngaih laiin a thil ei pawlh hnem lutuk avang chuan rawng chi hrang nalh lo zet hian a e tial ta ruai mai a. Birbala chu a e ve ta a. Mawi takin a e eng(yellow) ta pial mai a. Tichuan Birbal-a ek zawk chu mawi zawk a thlan a ni ta a.
(more…)