Mizorama kan sangha neih len ber leh kan pi leh pu te thawnthu pawha lang Thaichhawninu chanchin hi a ngaihnawm a. Sangha tui tak ni lem lo mah se man ve hrim hrim hi kan chak tlang chu a ni awm e. A chanchin hi chu a hrechiang zawkte sawi turah dah ta ila. Engtin nge an man thin tih lam hi ka lo hriat ve dan kan phawrh ve ange.
Kum enge maw zat liam ta khan Mizoram leh Manipur inrina, Tuivai lui bulah khian hnathawkin kum khat zet ka han awm ve a. Thaichhawninu hi an man nasa thin khawp mai. Tumkhata an man hnem ber ka hriat chu 45 zet a ni. An man zinga lian ber phei chu sum 6 a lian, kg 60 chuang lai mai zuk ni a.
A man dan hi chi hrang hrang a awm a. Sangha tlangvuaka man hi kan hriat lar pawl a nih hmel. Tlawng velah chuan tuithal(cossbow) hmawr, a zum lo lamah hruifei tak an thlunga, chu chuan tuichhungah an zuk kap a, an hnuk chhuak mai thin.
TUIVAIA AN MAN DAN: Thaichhawninu man tur chuan mi 20 dawnte hi an thawk chhuak thin a. Jelatine (bomb), Parachute hrui, lenpui etc te hi a manna hmanrua an ken thinte chu a ni.
Thaichhawninu hi li thuk takah lo chuan an awm ngai meuh loh avangin tui thiam tak hruai tel ngei angai. Li-ah chuan tui tarmit vuah chungin tuithiam chu a’n lut a. Thaichhawninu a zuk hmuh hlauh chuan, a lo chhuah hnuah a lenzawng milin jelatine an han tel khawm a. Sum 2 vela lian anih chuan Jelatine tlawn hnih vel a tawk viau, Sum li vela lianah chuan tlawn thum/tlawn li vel an hmang tlangpui.
Tichuan, Jelatine telkhawm chu a fuse sei tawk an vuah hnuah, pumah mi pathum velin an han chuanpui ta a. Thaichhawninu awmna chung zawn velah pum chu tidingin jelatine chu an han dep kai ta a, Jelatine deh kaisa chu tuiah chuan a’n luhpui ta vang vang mai a, Thaichhawninu awmna a zuk thlen chuan amah hnaih thei ang ber, a pum hnuaiah emaw a pangparh hnuaiah te jelatine chu a zuk dah a (Thaichhawninu hi sangha zaidam leh huai tak a ni a, mihring a bula an zuk luh pawh hian a lo tlanchhe ngai lem lo) Tichuan, a zawh veleh a rawn chhuak leh vang vang a, pumah lawnin rang takin bomb puah hun nghak turin vaukam lam an pan ta thin.
(more…)
)
)
