mi(sual).com

Ramchhana(Zoramchhana) chu tlangval fel tak, pian inphut tawk pangnngai, mi taima leh rinawm tak, tlawmngai thei leh midang te tih buai hreh mi, mi rilru tha, mahni intodelh tum ran mai, thawh hreh engmah neilo, Pathian tih mi tak a ni a. Collage ah te kal ve in inhlawhfa chawpin Aizawl ah mi inhnuai luahin thingtlang atangin lehkha zir in a awm ve a. A chhungten pawisa an thawn ngai lova, amah chu a rem rem thawkin a inhlawhfa pah a, ama mamawh chu a taima bawka a intodelh ve em em a ni.

Chutia mahni a in luah ta chu a thianpa an khua ami tho Zonuna(Zonunsanga) chuan a rawn fin ve a. Ani hi chu a mizia a dang daih mai. A chhungten pawisa an thawn renga, hna a thawk ve ngai lo va, tin, class kal tur hian a chhuak ve ziah a, a kal tak tak ngai lem hlei lo va. Laptop leh mobile phone nen hian a inchhawp a zan rei tak tak thleng a meng a, zingah tlai tawk ah a thova Ramchhana ei rawng bawl sa chu a ei ve leh tawp zela. Mahse Ramchhana chu pa rilru tha tak mai anih avangin engmah a sawisel ngai lo. Chutianga mi pahnih mize inanglo lutuk chuan zankhat thilthu ah an nun khua her danglam bawih tur an tawng dawn tih reng reng an hre phak ngai bik lo.

Sawi tawh ang khan Zonuna zawk chu thatchhe ve tak mai, chhungte thawhchhuah ringa khawsa lian chi, mahni engmah ni si lo, mi inhnuai luah a thawhchhuah nei mang silo a hawi changkai ve hrep chi hi ani a. A lehkha zir ve pawh hi a chhungten zir rawh an tih vang mai mai a zir ve tawp hi a ni a. Tum mumal leh nih chak em em pawh amah chuan a nei lo. A inchei zuar a, a then ve mai mai ani. Tlangval pahnih awm dun ta chu ngaihzawng te pawh an nei ve a. An hmeichhe kawp duhzawng pawh a inanglo kher mai. Ramchhana bialnu chu an awmna veng ami Nunmawii ani a, chhungkaw pangngai tak, anu leh pa pawh kohhrana inhmang tak mi fel tak chhungkua ami ani a. Amah chu nula hmelchhelo tak, inchei pangngai thlarh mai, hlim hmel pu sarh reng mai, zahawm khap mai nelawm tho si zuamawm si loh, Pathian tih mi vengkhat nula fel leh an chhuan vawr ve a ni. Zonuna hi chuan ngaizawng bulfuk em em anei lova a rem rem hi a kawp lawr vel mai mai a, ama sawi dan takah, “hmeichhia te chu a hrang hrang hmeh chhuah mai mai tur” hi a ti fiamthu mai mai thin. Tuna a kawp lai ve deuh pawh hi veng dang ami, englai pawh a lo leng rawh a tih chuan hman reng, inti no tak mai, inchei parh tawk, eng ang chhungkua nge tih pawh hriat hleihtheih loh, pawisa nei thei zet, a rem rem ti thei, a rem rem kawp thei a tul chuan biakinah pawh/party na ah pawh lam nghek thei, lirthei nen a phurh chhuah awlsam tak; pawisak nei miah lo a ni.

Tichuan chung mi inanglo tak tak pali te chu an in kawm khawm ve thin ani. Nikhat chu Ramchhana birthday ani a, an thian ho pali chuan chaw an ei khawm ve a, an ri ve laih laih mai a. An in luahna pa Pu Tluanga, patha satliah ve tawp, inkhawm huna inkhawm, hna thawh hun a thawk ve leh tawp mi pawi sawi lo ngaihdan engmah pawh nei hranpa lo, nupui ngam lo ve tak leh a nupui Pi Zauvi, a hming pu zo tak mai zau tak mai, engkim, political party, kohhran hmeichhia atanga MHIP thlenga in rawlh vek, tawngkam tha tak mai, mahse mi rel te pawisa miah lo, contract tenau leh supply vel hmu thei tak leh pasal te zahpah lo ve tak, mahse mi hmuh a be tha hluak si chuan an nupa in an rawn tel pui bawk a. Zan dar 7 pelhah chuan an ei kham a. An chaw eikham an han intifel zo chu thingpui te an han in ho leh te te a. Chutia an thut khawm lai chuan ani thawm azawnga thawm rapthlak leh hriat nuamlo ber mai chu an hriat tak ni.

An awmna veng hi veng mawng lam deuh a ni a, thlanmual pawh an hlat vak lo va. Chutia thingpui no an dawm far a, engengemaw an titi ho lai chuan veng chhak lam atang chuan ‘mangang aw rawl’ em em mai, mipa aw nge hmeichhe aw anih hriachian theih si loh hian “MIN CHHAN RU, CHHAN TLAK KA LA AWM EEE” a rawn ti thla ta vawn vawn mai. An ni ho ti ti lai chu an tawp rual thawt mai. Ani en thap mai a. Aw chu a rawn au thla lauh lauh mai a, a then chuan a thlawk ni ten an hria a, a then in a rawn tlan thla ni ten an hre bawk a, “MIN CHHAN RU,CHHAN TLAK KA LA AWM E” a rawn ti thla zel a, thlanmual kawng lam ah chuan a liam thla ta. Tumah chechang reng an awm lo va, hmeichhe ho leh Zonuna phei chuan an hlauh hmel nasa mai. Han che tur pawh hi an awm lova an hawi ka hau mai a, an meng phawk hra mai a. Chu aw lah chu chhan tu ngai tih hriat ngawih ngawih hian a au thla lauh lauh mai a,an thenawm te ho pawh chu tumah chechang an awm lo, a then te chuan tukverh ah te an dak a an hawi kual vak vak bawk a. Chutah Ramchhana chu pindanah a tlan lut a, torchlight leh chempui ava la a, midang ho hnenah chuan “tikhan lo awm ru” a ti a a tlan chhuak a tanpuingai aw liam thlak na lamah thlanmual lam ah chuan a tlan liam ve ta nghal a.

An in lamah chuan Pu Tluanga pawh chu Ramchhana tlan na lam ah chuan tlan ve mai a lo tum ve mek a, mahse midang ho chu a telo va an awm ngamloh avangin a kal ve talo va. Tunge ni ang, engatinge ni ang, THLA AI nge mihring nge RAMHUAI lampang em ni ang, Ramchhana hi ava lo huai in ava lo tlawmngai ve tih vel chu an sawi khawm laih laih a..Rei vaklo hnu ah chuan Ramchhana chu a rawn let leh ta hlawl mai. A hmelah leh mitmeng ah chuan pawi ti hmel deuh hi a lang thei a. Enge ni chanchin, tunge, engthil nge, i zuk hmu em, chhan tlak chu alo la awm em? Zawhna chihrang hrang an lo zawt nghal sap sap mai.

Ramchhana’n a umzui tih hria in an thenawm te pawh an rawn lut khawm tak tak a. Tichuan Ramchhana chuan a thil hmuh chu ti hian a sawi ta a. “Amah chu ka zuk hmu a, chhan tlak chu a lo la awm a, mahse a chau tawh khawp mai. A thi lek lek tawh a, keimah ringawt chuan engmah ka ti thei lo va, kan zavaia kan tanrual a kan thawh chhuah tlan loh chuan mi pahnih khat ringawt in a chhan chi ani tawh lo. Kan tlai tep tawh, hmanhmawh angai. A thih hman chuan tihngaina a awm tawh lovang”, a ti ta mai a. Midang awm ve ho chuan “eng na nge? Tunge a hming i zawt em?” an lo ti sap sap a. Ramchhana chuan “Zawt e, a hming leh natna chu maw ‘MIZORAM’ ania ‘RAM NATNA’ a vei mek a. Nang leh kei ina tuna kan chhan loh chuan CHHAN TLAK A AWM LO TEP TAWH” a ti ta mai a.

Similar Posts:

• Look East Policy ?
• Chakma te an vul zel angem?
• Divination Feat ramchhana
• Sazu
• Thlan laih Privatise ang

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, February 1st, 2013 at 11:53 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.