KAN HLIAM CHHAR KHA AW!!!

February 16th, 2013 10:02 am by BigDaddy Hmahmatea

A la chatthla chiah lo lehnghal…

Kum te a lo tam a, a dai a han dai zau na na na hi chuan thil tawn te pawh hi a lo tam ve nge nge thin a. Mizoram hmun hrang hrang leh Vai ram lamah te zin kualin, khawi khawi emaw hi kan fang kual ve zut a. Ram kal, lui kal tih te hi a eng kap a, a eng man tak tak mang silo hian kan hrat ve phian lehnghal a, kan lui han kal ve te lah hi a hmun a eitur zanriak buhfai man hu man te chu a teuhlo mai a ‘mit-lawk’ takngial pawh man lova kutbenga haw chang hi a tam zawk mah a. Vawikhat pawh ka thiante pathum nen lui kan kal ve a. Bomb(gelatin) box khat vel kan keng a, lenkhang, khang-pui lehnghal a thar hlak pali zar tur kan lei bawk a. Silai leh a mu nen kan thawk rip ve nasa mai pek a, zan li kan riak a chhungtlem vawikhat hmeh ang liam liam han insem tur em pawh kan hawn lo…Chutiang ang vela hlawhtling khat chu kan ni ve a, mhase kan sim chuang lo.

Ram kal leh lui kal vel hi nuam hi kan ti ve hrim hrim bawk a, hunawl neih tlan deuh hi chuan kan in rawt phur a, kan ri hluiai a kan thawk chhuak ve leh mai thina…chauh thu-ba-rawh ah, ‘ ram boruak hrim hrim hi a nuam. Tumah awh tur leh tumah min awt tu tur an awm lo a, boruak a thianghlim …..’ te hi kan ti kual leh mai mai thin. Hetiang a kan thian hova kan ram chhuahna ah hian alawm ka ngaihtuahna , ka thil thilr dan engkim mai min sawi danglam darh khawp tur thil rapthlak ka /kan hmuh tak na chu.

Khami tum kan ramvak tur kha chu nidanga kan lo hlawhchham fo tawh thin avangin hlawhchham leh mai mai kan tum lo nasa mai, silai nen, len nen, bomb nen kan thawk rip lehpek nasa mai. Khawilai mi tupa kuthlei tuar lo sa hliam chau lampang kan tawnfuh loh pawhin ulawng nufa tal chu kan man tur a ni hrim hrim tih rilru pu ran chungin kan thawk chuak ve a ni a. Eng he-hu mah ni lo mahila ramvahna tur leh lui kalna tur lam hi chu kan hre tha viau thin a. Tu pa hlauhawm sawi in emaw thianho pathum chauh a ramkal chu pakhat a chetsual palh a zualko a ngaih in emaw, ruang lo awmpui a ngaih in emaw a nuam duh lo tih denchhenin rual deuh hak in panga lai kan kal a, phur chen chen a riak thei turin zanriak buhfai pawh thahnem tawk tak kan keng bawk a.

Kan phur tlang bawk a chawhnu tlang herah chuan kan tum ram lam chu kan thleng thuak a ni tawh a. Luipui dung zawhin a kamah kan kal thla zel a. Dar 5 vel bawrah chuan kan riahbuk sual tumna hmun chu kan thlen hman ngei kan in beisei a. Chutia phur taka lui kam hrula ti ti khawchang sawi pah a kan kal zel lai chuan kan hmalam hlam sawm bawr velah chuan mipakhat hi a lo let reng mai a. Kan phu chiang hlawm kher mai. Kan thianpa pakhat phei chuan a silai a lo kau hmanhmawh pek a. Kan ding deuh thap a, kan in en he haw hlawm a. Chutah muangchangin kan pan phei ta a.

Chutia rampalailenga luipui kama lo let ta reng chu, a tamchhawl nge ni anga, tawhsual a tawk, ala dam ang nge a lo thi fel der tawh zawk ang. Alo thi tawh reng anih chuan kut tuar te anih phei chuan a hmu hmasa ber tute kan ni dawn si a, case an han file ngei anga, kan va la buai dawn em…tih te leh thil dang dang rilruah a lo lut zut zut mai a. Miin an han hre pung anga, chutah mitthlaah chanchinbu mi te, police lukum sen khum pianpui tawngkamtha nei miah lo te, khawtlang hruaitu inti viak tha tak tak te, lockup te, LPS, Pu Vana leh a pawlte ho te, thenawm pitar te, lock-up chaw alu leh dal fi deuh relh rulh te, bialtu MLA te, kan kohhran upa ho te an lo lang zut zut mai. Chu mi lo let reng awmna chu kan thleng phei ta.

Bawkkhup, ting-tawm deuh hian kawisawi tak hian tiauphovah chuan a lo let ngat mai a. A khawih hmasaber tu ni pawh a chakawm loh kher mai. Chutah chiang takin kan han en a, thawk chu a lo la thaw a, nikhua erawh a hre lo thung. Amah ah chuan hliam eng engeawni hi a lo awm nual mai a, thenkhat te phei chu enkawl vat loh chuan thih pui tham hial khawpa hliam nat hmel te hi a lo ni hlawm a. Amah chu kan han enchianga, tunhma chuan pa sa tha ve tak thin, mahni tawkah pawh kei ka ni inti thei ve khawp tura pa sa tha a ni thin tih chu a pumrua leh a pian enin hai rual a ni lo. Mahse a tun dinhmunah chuan chawkaw puar hmu lo, khawngaihna leh hmangaihna tel miah lo leh a tana tha tur duhsakna tel miah lova enkawl tih hi a hriat ngawih mai a.

A lo enkawl thin tu te chu a fa te nge a tu te nge, a laichin hnai te nge tih lam chu kan hre hauh lo a mahse amah han en reng reng chuan hmangaihna, duhsakna nena enkawl a nilo tih chu a hriat ngawih ngawih mai a ni. Chulai hmuna chutia thichhawnga hliampui tuara a lo leh reng nachhan pawh chu, amah chu tute emaw chuan dimlo baksakin an sawisa hrep a, thi mahse pawi an ti miahlo tih hi ahriat ngawih ngawih mai a. Chulai hmunah chuan rei tawk tak chu thichhawngin a lo let reng tawh a ni tih hi a rin theih nghal mai bawk a. Chulai hmun thleng thenga hruai thei tu chu tu dang nilovin ama lam hnai tak te leh a mi hriatchian, a nel em em te, lungmuang taka a zui ngam te annih chu a rin theih nghal mai bawk a. Tin kawnglakah te tharuma han in hnuh luihna hnuhma te a awm hranpa loh bawk avangin chulai hmun thleng chuan a sawisa tute chu ngaih tha takin a zui tih chu a rin hriat theih deuh nghal mai bawk a.

A hliam te chu kan han en fel a, amah lah chu a biak theih tawh bawk si lohva. Mahse uluk taka kan han en chuan a hliam te chu enkawl that chuan ala dam thei a ni tih leh amah pawh chu duat tak leh hmangaih taka enkawla, eitur tha, chaw tha, a taksa ngeih zawng te pek chuan a la chak tha leh thei a ni tih pawh chu ahriat mai bawk a. Ro kan rel laih laih a, engtia tih tur chi nge ni ang tih te, engtinnge kan zawn haw ang tih te, kan sawi ho laih laih a. Chutih lai tak chuan amah chu a rawn rum deuh tiah tiah a, chutah mangang em em tih hriat tak mai hian, “ Min sawisa tawh suh uuuu….min chhan ruuuuu..chan tlak ka la awm eeee… Ka tu ka fa te vek in nih kha… engatinge hetianga min sawisak tak vak vak mai….” A rawn ti chuak ta lawm lawm mai a… Keini chuan. “Ekhai!! hlau reng reng suh, tuman an sawisa tawh dawn hleinem che..hei kan tanpui dawn che alawm, inlamah kan zawn haw che anga damdawiinah kan dah che anga i dam chuak leh vat mai ang…,” tiin kan lo tawng thlamuana…chutih lai chuan amah chu nikhaw hrelovin a lo awm leh hman tawh a.

Tichuan a zawn hawna tur ‘hlang’ te klan thiante thenkhatin an lo siam chhungin, tunge anih a , khawi venga awm nge, tunge a chhungte tih hriat theihna tur engemaw tal a thawmhnaw ipte velah chuan a awm mial lo maw tiin kan lo dap kual vek a. A kekawr ipte pakhatah chuan wallet zawr tak mai a chunga pawisa tlem awm leh identification card niawm tak awm hi a lo awm hlauh mai a. Tichuan a ID card chu kan han enchianga a hming lo inziak kan han hmu chiah chu mak kan ti in kan phu nasa hlawm kher mai. Amah chu kan mi hriatchian em em, kan lo ngaihsak vak ngai reng reng lo hi a lo ni reng mai a.

A ID card ah chuan a a hming inziahna zawnah chuan NAME: MIZORAM tih hi fiah tawhin a lo in ziak kuau mai a…………

*I ram, kan ram MIZORAM hian hliam a tuar a, a boral lek lek tawh a, mahse chhan tlak a la awm a. Chu a hliam enkawl a, tuam dam a, chan chhuak tur chuan nang leh kei lo chu midang an awm chuang lo… I RAM LEH HNAM TAN HIAN ENGE I TIH VE DAWN LE…..????

BigDaddy Hmahmatea

(R.Lalhmangaiha)

Kulikawn