Hmanni chu Facebook an tih teh fo ah hian ka lut ve chhin a, group pakhatah tute emaw inneih chungchang vel an lo post a, a post thupui tak ai khan a tawngkam hman- Monu, Mopa/Mo neitu tih vel lai kha an khel nasa ta mai a, ka va hmuh ve meuh phei chuan an lo sawi tam hman viau tawh a ni.
Innei an awm hian a hmeichhia zawk hi ‘Mo’ kan ti a, hetah hi chuan kan lungrual tlang viau niin a lang, a mipa lam sawi na’n Mopa tih hi thenkhatin kan hmang a, thenkhatin dik thei loin an hria a, Mo neitu tih hi dik zawk leh Mizotawng zawk niin an sawi bawk. Tun thleng hian ngaihdan phir a la awm ta a nih hi.
Tam takin Mopa/Monu tih hi Mizotawng diklo nia kan hriat chhan chu, ‘Monu a nih te chuan hmeichhe nu(mother of the bride) a ni dawn a, Mopa a nih te chuan a pa(Father of the bride) a ni daih dawn a sin’ tih hi a ni. Hetiang ngaihdan neitute hian Chingpirinu hi mother of Chingpiri a ni lo tih chu an hre tho awm si a.
Monu leh Mopa a kan buai chhan ber chu Mizotawng ziahzawm leh zawm loh tur kan hriat loh em vang a ni. Monu tia kan ziahzawm hian ‘chumi nu’ tih lampang a kawk thei lo a, Mopa kan tih hian ‘Chumi pa’ tih a kawk hek lo. Monu leh Mo nu hre hrang lo te, Mopa leh Mo pa hre hrang lote kan tam em vang hian kan buai thin a ni.
Mo neitu tih chungchang khi lo thlir leh lawk ila. Heihi Mizotawng thiam tam zawkin dik nia an hriat a ni a, kan Mizotawng bible-ah pawh hetiang hian a inziak a, JF.Laldailova pawhin a dictionary-ah groom tih chu Mo neitu tiin a letling a ni; Mahse bible letlingtute’n khitianga an lehlin vang mai leh kan mithiam hmasain a tihdan a nih vang hian a dik thlap e tihna a ni bik dawn em ni? JF-a vek hian bride tih chu Mo tia dah loin Monu/ Mo tur tiin a dah ve leh tlat bawk.
Innei an awm hian Mo neitu diktak zawk chu nupui neitu pa(nupui neitupa niloin) hi a ni. Pu Sanga fapa Mawia’n nupui a neih chuan Mo neitu chu Pu Sanga a ni. Mawia te an inneih hian amah Mawia ni loin Pu Sanga zawk hian Mo a nei a ni; Chuvangin Mo neitu chu Pu Sanga tihna a nih chu.
Mizo chhungkuaah tlangvain nupui a neih chuan chhungkaw pa berin emaw, chhungkuaa hotu berin emaw ‘Mo ka nei,’ a ti thin a, chhungkaw member dang hoin ‘Mo kan nei’ an ti thin. Nupui neitu ber hian ‘Mo ka nei’ ti ve ta se kan nuih a za ngawt ang.
Kan hriat tur chu kan tawng hi thang lai a ni a, a thang zel a, hma a sawn zel bawk a ni. Kan mithiam hmasate’n an thiam miah loh leh an hriat miah loh hi mithiam ni em em lo hian kan hriain kan thiam teuh tawh ang tih hi thil chiang a ni. Chuvangin tuna kan sawi lai chungchangah pawh hian nupui neitu hi Mopa ti ila, a nupui hi Mo emaw, Monu emaw ti ila tun hmaa an lo tih dan a ni chiah lo a nih pawhin tawng hmang dik ni tho siin kan tawngin hma a sawn tihna a ni mai; Amaherawhchu kan Mizotawng type kan uluk deuh loh a ‘Mo pa/ Mo nu’ te kan tih mai chuan a awmzia a dang leh daih si ang.
Ka ngaihdan leh hriatdan ka’n ziak ve ta chiam a, ka lo diklo chhiava a nih leh a dik zawk hria te’n han ziak ve se, kan inzir chho zel ang chu.
Similar Posts:
- Mo Leh Monu Nge Mo Neitu Leh Mopa?
- Kristian nge Khristian?
- Karbi Inneih na ah ka tel ve a.
- Mizotawng ziak dan
- Lesbian Inneihna! Kan hlim tlang vek e!
March 2nd, 2013 at 10:02 pm
Hawh u, i lo chhiar mai ang u.
Report this comment
March 2nd, 2013 at 10:59 pm
Post tupa i ngaihdan hi a diklo chhia va ah kei chuan ka ngai miah lo. A dik full tawp ah ka ngai a, ka thlawp full e.
Report this comment
March 2nd, 2013 at 10:59 pm
Ni e, ti hian chhiar ila, i comment chho zel ang u khai
Report this comment
March 3rd, 2013 at 1:03 am
makpa chhungkhung a awm hi mo til nei an ti…
tlanchhe nghal…
Report this comment
March 3rd, 2013 at 2:40 am
Makpa zangkang a?
Ngaihdan dik lo chhia va ani ka ti lo, #2 khi ka thlawp e.
Report this comment
March 3rd, 2013 at 2:45 am
Mo tih hi feminine gender a nih tawh sa avangin mopa tih leh monu tih hi a dik lo. Thiannu te, thianpa te erawh chu kan ti thei a; ‘thian’ tih ringawt hi chu common gender a nih avangin masculine gender leh feminine gender-a siam turin ‘pa’ leh ‘nu’ hi kan belh mai zel. Mo erawh hi chu amah hrim hrim hi feminine gender a nih tawh sa avangin ‘nu’ emaw ‘pa’ emaw belh hranpa a ngai tawh lo. Mo tih tawp mai tur. Tuman thiannunu emaw, thiannupa emaw kan tih ngai loh hi. Thiannunu tih leh thiannupa tih chu monu leh mopa tih nen hian a dik loh dan a inang reng. Moneitu chung changah pawh hian hriat dik tawk loh a awm fo. I sawi dan hi chu K. Zawla sawi dan a niin ka hria a; mo va neitu tak kha chu a pasala pa a ni ti ang zawngin a sawiin ka hria. Hei pawh hi a dik chiah lo; Kan pi leh pute khan an fapate nupui kha,”Ka mo,” ti lovin,”Ka famo,” an ti zawk thin. Daughter-in-law pawh hi JF Laldailova dictionary-ah chuan ‘famo’ tiin a indah ve tho bawk. Nupui neitu (a pasal)-a pa kha moneitu (ziah zawmin compound noun angin kan hmang ta sa sa ka ziah zawm ve ta zel mai) ni lovin ‘famo neitu’ a ni zawk. Ka pi te thianho ti ti ka ngaihthlak pawhin ‘famo a hrawn thei lo’ tih tawngkam hi an hmang ka hre tawh.
Report this comment
March 3rd, 2013 at 9:31 am
Le, comment chhunzawm zel ila…
Report this comment
March 3rd, 2013 at 11:04 am
#6 mo chu feminine gender ni ngei e, mahse mopa kan tih khan masculine gender ah kan chantir ang a, mo opposite a ni mai a lawm.
Report this comment
March 3rd, 2013 at 11:48 am
I ngaihdan ka tawmpui che, mo tih leh monu tih hi hman kawp pawi ka ti lo, monu (ziakzawm) tih hi a dikohna a awmlo bawk. Mizo tawng tluang pangaiah chuan feminine leh masculine gender sawina hi thumal inep chiahin kan hmang thin- pa tih leh nu tih hmangin. Chuan mopa tih duhlo leh “mo neitu” tih duh zawk tam tak hian hmanlai tihdan leh upate tawngkam chhawm duh ni awm takin tang na ve viau mahse tawngkam dang tam takah an chhawm sengin an hmang “dik” seng tak tak chuanglo.
Tunlai context-a her rem theih thumal tam tak kan neia, a awmzia kan fiah tlan tho chuan enge kherkhiap vak a tulna? tawng mawilo leh dengkhawng pawh ni nghal lo chuan. Hei hi alawm kan tawng hausak theihlohna chu, duhloh leh hnawl kan ngah lutuka.
Report this comment
March 3rd, 2013 at 12:20 pm
Mo tih hrim hrim hi feminine gender anga kan hman sa tawh avangin ‘mopa’ emaw ‘monu’ emaw tih leh hranpa a ngai tawh lo. “Mo lawmnaah ka kal,” kan tih pawh hian hmeichhia zawk zel a kawk. Mo thahna, mo kawr etc-ah pawh hian hmeichhe lam zel sawina atan kan hmang thin. Tunhnua kan tih monu, mopa tak avang hian a dik ka ti chuang lo. A hmaa lu met pawh tunah chuan sam met an ti tlangpui tawh a, a dik phah chuang lo ang deuh hi a ni e. Fate kan lo nei ve ta a nih a, kan fapatena nupui an neih hunah pawh an nupuite kha,”Kan mo,” ti lovin, “Kan famo,” tih zel tur. Tawng chher thar chu a awm thei na meuh mai; mahse a awmsa tichhe zawnga tawng chher thar kher zel hi a tulna a awm lo..
Report this comment
March 3rd, 2013 at 12:24 pm
ulawng zamsuh. Ingaih dan hi a dik a ni.
Fa mo ka neih huntur chu, ka fapa in mo a neih hun ah chauh a thleng ang. Ka fapa in nupui a neih hun ah,
mo ka nei ve chauhvang. Zohnahthlak tawngdang hi ka thiam kual e duah a. Hualngo tlang dung, Zahau tlangdung ah khian, ka lo khaw sa ve hrep tawh.
Thlantlang lamlam thlengthleng in, ka fang ve viau tawh a.
Heng tawng chithum te hian, monu mopa an ti vek.
Nangni ho hi chuan in huatthu suh ah, Mizo tawng chikhat Lusei tawng bak thiam in nei ngut in ka ringlo che u. Kan synod mi thiam rual hovin, Lalpa TIH tih a,
TIH awm zia hrilhfiah an tum a, an sawi phuailuai tulh tulh zawk hial a nih kha. Chu vangin, Mizo tawng kalphung a, thu dik zawk kan in chuh dawn a nih chuan,
kan Zohnahthlak dangten eng tin nge an hman ve tih hi
kan zawngin, kan hre hmasa phawt tur ani ang.
C. Chhuanvawra leh khabu hnuhnung ber ah pawh khan,
mitthi ziahdan chungchang ah khan, kan Zohnahthlak tam zawk ten, mithi ti in an ziak vek lai a, kei ni’n
mitthi ti a kan ziah hi a diklo a ni ang a tih hial a ni.
Report this comment
March 3rd, 2013 at 12:33 pm
#9 comment-ah pawh hian Mizo tawng ziah dan dik loha ziah a awm nual mai. ‘Diklohna’ pawh hi ‘dik lohna’ tih ni ta se, ‘diklo’ pawh hi ‘dik lo’ tih tur a ni ang. ‘Pangai’ pawh hi a a thatchhe ziah dan tlat, ‘pangngai’ tih mai tur a ni. ‘Mahse’ pawh hi hetah hi chuan ‘mah se’ tih tur a ni ang. ‘Mahse’ leh ‘mah se’ hmanna hi chu a inang lo. ‘Chuanglo’ pawh hi ziah zawm loh tur; ‘chuang lo’ tih mai tur. ‘Enge’ pawh hi ‘eng nge’ tih zel tur. ‘Mawilo’ pawh hi ‘mawi lo’ tih tur. ‘Theihlohna’ leh ‘duhloh’ pawh hi ‘theih lohna’ leh ‘duh loh’ tiin ziah zel tur.
(Pil bo hman)…
Report this comment
March 3rd, 2013 at 12:46 pm
Post tupa ulawng sawi khi ka thlawpin ka pawmpui thlap e. Monu Mopa tia ziah leh sawi hi ka pawmdan nghet ve tak a ni.
Report this comment
March 3rd, 2013 at 12:47 pm
Sihtea chu ‘fa mo’ awmzia i la hre lo a ni ang maw? Tawng chu ka thiam hnem vak lo, tuna ka tawng hman lai hi ka thiam ve chawr chawr a ni. ‘Fa mo’ hmang hi chu tuna kan tawng ang hmang zingah pawh upa chin deuh tawh hian an la hmang zauh zauh. Zo hnahthlak hnam hrang hrang tawng thiam kual duah avang khan tuna kan tawng hman lai mek hi teh chi a ni pawhin ka hre ber lo. British English-a a dik leh dik lo sawi dawna American English lo rawn daih ang vel a ni thei tlat. I comment-ah phei khi chuan ziah dan dik lova ziah a tam lutuk a, chhiar a har leh zual. Mahse thinrim awih loh..hehe
Report this comment
March 3rd, 2013 at 1:04 pm
Mizo tawng ziak dan dik (tlemtê) i tarlan khian a chhânna dik tak chu a tifiah hlein ka hria. Ka hrethiam ta e.
Report this comment
March 3rd, 2013 at 1:34 pm
#10-a mi khi ‘mo thlahna’ tih zawk tur. Ka lo ziah sual a nih khi.
Report this comment
March 3rd, 2013 at 2:47 pm
Comment 12-na khian inti duh khirh fekfawn sakhat tlat chungin tihsual fahrah te te a nei nual mai- ziah dan (written law tih a kawk daih thei) ni lovin ziahdan (way of writing) tihtur, “dik loha ziah’ ni lovin “dik lova ziah” emaw “dik loa ziah” tih tur, #14 ah zohnahthlak pawh zo hnahthlak i ti khut khuta, zialo em mai.
I rawn sawisel thenkhat, diklo (dik lo), chuanglo (chuang lo), mawilo (mawi lo) tihte khi ka hmandan a dik zawk (lohna, noun, anga sawi dawn erawh chuan a dan a dang thung). Entirnan, “A thusawi kha dik lo ti in awm em?’ tih leh “A thusawi kha diklo in ti em?”, tihah hian a awmzia a dang daih. “I puan kha a mawilo ka ti”, “Mawi lo tihsak ve mai thin la”, an thilsawi hian kawh dang ve ve a nei. A mawi ka tih thu nilovin a “mawilo” ka tih thu sawi ka duha, dik ka tih thu ni lovin “diklo” ka tih thu sawi ka tum avang a ni. Hrethiam em?. ‘Eng nge’ tih pawh hi “a eng nge a var?” emaw tih nen a hmanna a inan theih avangin “enge” tih hian a felfai zawk em em a ni. Chuvangin kan ‘confused’ lohnan ka hmanna ‘context’ angah hi chuan ziahzawm hi a pawilo zawk
Mah se leh pangai erawh ka ti diklo zawk, i ti dik.
Report this comment
March 3rd, 2013 at 2:51 pm
Terema, mizotawng dik hman i duhna leh i thiamna chu ka ngaisang khawp mai che; amaherawhchu hemi chungchangah hi chuan dik tho siin tawng kan ti hmasawn thei a ni. Lu met/dam met tih nen chuan a inang chiah lo. Tin, sawi dang, dik thei ve ve tho hi a awm a ni. Fa mo i tih pawh khi a dik chiah tho a, mahse fa mo hman vek theih a ni bik tlat lo; nupui neitu unaute tan chuan fa mo ni loin mo ringawt a ni leh tlat thung a sin. (phone atagin ka type a, a buai deuh nuaih maithei)
Report this comment
March 3rd, 2013 at 3:07 pm
#17, Dan hi Mizo tawngah hian suffix a nihna ka hre lova, kan ziak hrang zel tawh a ni. Hriat dan, duh dan, pawm dan etc anga hman zel a ni tawh tihte hi i hre ve lo a ni ang maw? Lo pawh hi suffix angin kan hmang ngai lo. Damlo angah erawh hi chuan hmang la chuan ka hre thiam a. Zo hnahthlak ka tih pawh hi a dik lohna ka hre tlat lo. ‘Eng tizia nge? Engati nge? Enga tan nge?’ etc zawng zawngah hian ‘eng… nge’ hian a tawp zel ang. Mizo tawng thiam pangngai tak chuan ‘eng nge?’ an ti zel ang. ‘Enge’ ti chu an vang pharh ang. ‘I puan kha a mawi lo ka ti’ tih zel tur.
Report this comment
March 3rd, 2013 at 3:13 pm
@Terema Chhakchhuak, a thluk na
dah dan hi a buaithlak ka ti hle a.
Bak ah mobile phei hi chuan ziah dik ai in, ziah hmaih a awl zawk bawk si a.
Tun a i tawng hman lai hi, Sailo ho hmang a kan rawn export a ni a.
Nang ni lam in, za a sawm hnih vel
hnam dang tawng in lo rawi bawk a.
Ti chuan kan tawng hian, a lo hau sak phah hle a, a lawm awm khawp mai.
Tin, hei hi kan hriat tlan ka duh hle.
Mi in, tun a Mizo tawng kan tih tak hi
thiam leh thiam lo va an hman hian,
Mizo e maw ka ti che a? Mizo i ni nang nge? ti a, in deu sawh a in hmu sit hi, kan sim vat a ngai. Kei phei chuan, he kan tawng mi in thiam lo
chung chung a an hman hian, ka nuih zat phal ngai lo. A chhan pawh he tawng hi, Zohnahthlak dang te hian
thiam thuai thuai se tih ka duh vang a ni. Kei in, mo ka nei a. Ka fa pa in,
nu pui a nei thung. Ka fanu thar chu
mi in, an ti ti khaw chang sawi na ah,
a fa mo ti in an duh chuan an sawi thei a. Kei chuan, mi hnen ah sawi ve dawn i la, ka fa mo ka ti phal lo
a mawi lo bawk. Ka monu hi chu a fel vet vet a ni a ka ti ang.
Report this comment
March 3rd, 2013 at 3:55 pm
#19, suffix a nihna leh nih lohna a awm reng a ni. A hnuaia sentence-te hi en teh-
“I ziahdan kha a tha ka ti hle mai” (I like your way of writing- suffix- noun)
“I ziah dan kha a tha ka ti” (I like the way you write- passive voice- adjective)
Chutiangin “pawmdan”, “rindan”, “duhdan” tihte hi noun vek annih avangin ziahzawm tur an ni. Entirnan, “Ka pawmdan hi a tha ka ti tawk e”, tih leh “Ka pawm dan turah lo buai suh”, tihte hi an sawi tum leh hmanna hmun leh hun a dang. A hmasa zawk hi thil awmchiang tawh emaw hriatchian tawh chunga a rilru puthmang (i.e., a pawmdan) anih laiin a hnuhnung zawk hi chu thil kal lai (his or her way of accepting/embracing it) a ni, verb angin kan sawi thei ang. Tin, “Ka duh dan chuan” tih leh “Ka duhdan in hre duh em?” tih pawh an inanglo leh bawk. A hmasa zawk hi a “duhdan” awmsa (noun) anih laiin a hnuhnung zawk hi chuan a duh dan kalhmang taka kha ala sawi dawn chauh.
“Lo” leh “dan” Mizo tawnga suffix-a hman hi do bur aiin a dik zawkna hmuh thiam a tha; chu chu ka “ngaihdan” a ni, ka bialpa ka “ngaih dan” ni lovin, peAcE
Report this comment
March 3rd, 2013 at 4:03 pm
Comment #21- Tin, “Ka duh dan chuan” tih leh “Ka duhdan in hre duh em?” tih pawh an inanglo leh bawk. A hmasa zawk hi a “duhdan” awmsa (noun) anih laiin a hnuhnung zawk hi chuan a duh dan kalhmang taka kha ala sawi dawn chauh.
Ka tihsual lawk- a hmasa zawkah hian a duh dan kalhmang tak ala sawi dawn chauh laiin a hnuhnung zawk hi chu a “duhdan” awmsa (noun)sawina a ni- tih zawk tur a ni.
Report this comment
March 3rd, 2013 at 4:06 pm
Charie, i sawifiah thiam hle mai
Report this comment
March 3rd, 2013 at 4:24 pm
I teh dan a zir a ni ang chu. Mahse ka’n ti talh teh ang. Heti ang chi-ah hi chuan (Hetiang tih ang hian ziah tawh loh tur an ti) ziah zawm leh zawm loh hian a danglamna a kawk teh chiam pawhin ka hre lo. “I ziah dan kha a tha ka ti,” tih ve zawk mai tur. Hetah hian ‘I ziah dan’ hi noun phrase a ni tlat. “I ziahdan kha a tha ka ti,” tih phei chu a dik meuh tawh lo. Dan hi ‘ngaihdan’-ah erawh hi chuan kan la ziak zawm a, a chhan chu ‘ngaih’ tih ringawt hian awmze mumal tak he thuah hi chuan a nei lem lo atin ni. Ngaihtuah leh suangtuah pawh hi ‘tuah’ hi suffix ni lo mah se a mahin ‘ngaih’ leh ‘suang’ tih ringawt hian awmze mumal tak a neih phak loh avangin ‘ngaihtuah, suangtuah’ kan la ti zel a ni. A dang zawng zawngah hi chuan dan hi kan ziak hrang vek tawh. “I puan kha a mawi lo ka ti” tih pawh hi a dik meuh bik em le? “I puan kha a mawi ka ti lo” tih zawk awm tak a ni. Kan thianpa jeans kekawr khup tet kha a mawi ka ti viau a; mahse inkhawmnaa hak atan chuan a ‘mawi lo’ ka ti khawp mai. (A jeans erawh kha chu a mawi ka ti lo hran lo, a mawi ka ti ve tho).
Report this comment
March 3rd, 2013 at 4:43 pm
Suffix ni tur chuan amah chauha awmze mumal tak nei phak lo a ni tlangpui. Suffix leh prefix hi chu Mizo tawngah chuan a maha mal din thei lo, part of speech pawh nei hran lo hi a ni thin. Compound noun erawh a awm nual. Ngaihtuah, suangtuah etc pawh hi compound noun a ni mai. Kan suffix neih zawng zawng hi han en la, i hre mai ang. Suffix-a siam tur chuan awmze pangngai amahin a nei ngai lo tlangpui. A behna thu erawh a tidanglam thin. prefix ‘ti’ pawh hi intransitive verb hmaa i dah chuan ‘tikal, tivui’ tia i hman chuan a behna main verb(intransitive verb) kha transitive verb-ah a siam mai zel. ‘Tir’ te pawh hian a behna kha intransitive verb a nih chuan transitive verb-ah a siam leh mai zel (kaltir, muttir, zuntir etc). ‘San’ pawh hian a behna kha intransitive verb a nih chuan transitive verb-ah a siam leh mai a, ‘kalsan, mutsan etc’. ‘Na’ pawh hian a behna thu kha noun-ah a siam thin. Sawi thui tawh lo mai ang. ‘Awm’ pawh hian a behna thu kha adjective of quality-ah a siam leh mai zel (duhawm, nelawm etc). Sawi thui tawh lo mai ila; mahse ‘dan’ erawh hi chu amah pawhin awmze nei thei a nih avangin suffix a ni ve pha tawh lo. Tunah phei chuan engtik lai pawha suffix-a an hman thin ‘ho’ pawh hi noun bikah lo chuan ziah hran zel tawh tur, adverb anga hman theih a nihna hmunah chuan ziah hran zel tawh zawk tur an ti tawh hial a ni awm e. ‘Kan thianho’ kan tih theih laiin ‘Kan kalho’ erawh chu tih tawh loh tur, ‘kan kal ho’ tih tawh zawk tur an ti tawh a ni awm e. Dan phei hi chu ziah hran ngei ngei tawh zawk tur a ni. Amaha awmze nei hran a nih avangin..
Report this comment
March 3rd, 2013 at 5:53 pm
I rawn sawi tha viau naa, min hmin thei khawp chhanna ka hmulo tlat :). A chhan chu “an ti” tih i behchhan zel vang leh i tawngkam thenkhatah nangmah leh nangmah i inbakkaih vangin. Tute nge “an” tiha i refer khi ni reng reng?!.
Dan tih hi amaha thu awmze nei anih avang tak hian Mizo tawng bik atan chuan kan thusawi tum azirin suffix anga hman a tul chang a awm thin zawk a ni, kan chhawr duh dan a zirin amahin independent meaning a neiin a nei kherlo thei, entirnan- “British mi te chuan ziakloh dan an nei”, tih leh “Ziak rawh ti mah se ka ziahloh dan (adv) tur chu”.(comment #17 en bawk la). A hnuhnung zawkah hian “dan” hian amahin awmzia a neilo, a thu hmasa zawk sawi uarna mai a ni.
Kan thusawi lai atang thumal dang “tuah/awm etc” hman ngaihnaah te i rawn pakai zela, a chauhthubarawh tlat. I point i sawifiah chiang thei tlat lo. Parts of speech chungchang kan sawi hian Mizo leh saptawng hi a inang chiah chiah thei lova, kan hman dan kalphung (custom, usage leh logic) pawh a dang hle tih hriat tur.
Entirnan, saptawnga compound noun an hmanna chu thumal pahnih anmahni lakhrana awmze nei ve ve thumal khat anga an zawm hian a ni- police+man= policeman, cow+boy=cowboy etc, suangtuah (suang+tuah) leh ngaihtuah (ngaih+tuah) tih hi lakhrana awmze mumal neilo ve ve an ni i ti bawk si a, compound noun an ni thei dawn em ni?. Chuan,”I puan a mawilo ka ti,” tih aiah, “I tawngkam a mawilo ka ti” tih hian a fiah zawk mahna le. Suffix chu amaha awmze neilo ngei ni se i duha, “lo” pawh hi amaha awmze neilo ania, suffix ah i pawm leh mang si lo
Report this comment
March 3rd, 2013 at 6:34 pm
Monu a nih chuan a opposite chu mopa ni ve mai se a rem fu lo maw, mizotawngah chuan mo neitu tih hi tawng dik chu nia, mahse tawng hi chu hun a zirin her rem zel hi a tha mai.
Tleirawl tih pawh hmanlai chuan hmeichhe sawi nan chauh hman thin a nia, tunah chuan mipa leh hmeichhe sawi nana hman a ni tawh a.
Report this comment
March 3rd, 2013 at 6:40 pm
‘Lo’ hian a mahin awmzia a nei lo i tih chuan adverb a ni tih i hre lo tihna a ni tal ang ka ti! Parts of speech hran nei chu suffix-ah an hmang ngai lo ka tih mawlh mawlh khi. “I tawngkam a mawi lo ka ti,” chu i ti thei na meuh mai. A chhan chu ka sawi tawh ang khian a ni. ‘Mawi lo’ tih hi chu ngeiawm rawngkai a ni zawk mah a, awm ang lo sawina lam a kawk zawk mah. “I puan a mawi ka ti lo” tih leh “I puan a mawi lo ka ti” tih chu inang lo tak a ni. Biak ina sahdah hmuam hi a ‘mawi lo’ ka ti. Sahdah hmuamtu nula erawh kha chu a mawiin a nalh ka ti khawp mai. A puan bih erawh kha chu a mawi ka ti vak lo (A puan bih erawh kha chu a ‘mawi lo’ ka ti ni lovin, biak ina puan bih hrim hrim hi chu a mawi ka ti thung). ‘An’ ka tih khi chu Mizo Language Committee an ni a, an lehkhabu erawh chu ka nei lo thung. ‘Ziak rawh ti mah se ka ziah loh dan tur chu’ tihah hian ‘dan’ hi adverb (emphatic adverb) a nih avangin suffix a ni thei chuang lo. ‘Lo’ pawh hi adverb tho a ni a, suffix a nihna chhan tur a awm lem lo. Ngaihtuah leh ngaihruat tih te, ngaihdan tihtea ‘ngaih’ erawh hi chu ‘ngaih’ tih ringawt hian awmze fumfe tak a neih loh avang hian thumal dang belhin compound word angin kan hmang thin. ‘Ruat, dan, tuah’ te hi suffix a ni miau si lova. Dan hi a maha awmze nei hran a nih avang leh part of speech nei hran a nih avang hian a hranga ziah mai tur a ni. Suffix a nihna lai tur a awm lo. Gentleman leh policeman etc vela ‘man’ an hman avang hian woman-a ‘man’ hi suffix a nih phah chuang lo ang deuh hi a ni e. ‘Ka duh dan chuan’ tih leh ‘ka duhdan in hre duh em?’ tih entirna i rawn peka ‘dan’ pawh khi pakhat zawk khi chu ‘adverb’ a ni a, a pakhat zawk khi chu ‘noun’ a nih khi. Chu vang chuan, “Ka duh dan chuan…’ emaw, “Ka duh dan in hre duh em?” tih zawk mai tur a ni. Dan hmasa zawk hi adverb a nih laiin dan hnuhnung zawk hi chu ‘noun’ a ni a, ziah zawm a tulna a awm lo. Suffix-a tan chuan ‘lo’ leh ‘dan’ hi an la pawm lo zel chu a nih hi. ‘Ho’ pawh hi suffix anga an hman vek thin laiin tunah chuan adverb a nihna an mang chiang tawh a, plural siamna atana noun-a suffix anga an hman bak chu suffix-ah an hmang tawh ngai lo.
Report this comment
March 3rd, 2013 at 7:07 pm
monu, mopa tih lanna ah hi chuan SA free a awm duh tlangpui te ka tia…
tiang ang tawng zirna ni pah thei paws hi a hlu ka ti… dah mai a
Report this comment
March 3rd, 2013 at 7:25 pm
#28 Noun anih vanga ziak zawm ka ni reng a ni. Tlemin i comment a chingchivet deuh hleka, fiah zawkin ka lo chhiar tha ang. Ziahzawm tur leh turloh hi Mizo tawngah hian hriathran a har takzeta, tih dik vek sen pawh a har hle, a hman remchan dan (convenience) leh a hmanna hmun (context) mila ziah hi a felfaia, a duhawm ber mai.
Monu/mopa chungchangah chuan a thu bul (word origin) chu “mo” tih hi a ni a. Mo tih tawngkam lo chhuahna leh hman tanna hi ka hre lova; mahse “mo” tihin a kawh tum chu pasal nei hlim, emaw pasal nei hmeichhia tihna a ni phawt maia. Sap tawnga “bride” tih nen hian intluk angin kan ngai a ni. Mo neitu chu “bridegroom” a ni leh maia. Mahse bride tih leh bridegroom tih hi inneih hunlaia a inneia te sawi nan chauhva hman an ni a. Kum 4/5 hnuah a pasala pa khan, “She’s my bride”, a ti reng lovang, “She’s my daughter-in-law”, a ti mai ang. Mipa pawh kha bridegroom a ni reng tawh chuanglo.
Rawtna ka neih chu inneih hunlai hian monu leh mopa (bride and bridegroom) tiin sawi/ko ve ta mai ila, a hnu zelah chuan a pasala inah hmeichhia kha “mo” (kan hnam dan angin) a ni tawh maia, inneih hunlai angin “monu” a ni reng tawh chuanglo. Mopa pawh alo rei hnu chuan mo neitu tiin sawi mai ila. Feminine gender “monu” tih a awm laia a khingpui “mopa” tih a awm ve khan mizo tawng a ti changtlung daih zawk lo maw.
Report this comment
March 3rd, 2013 at 8:03 pm
Noun a nih avang hian a nia suffix a ni thei lo ka tihna chhan tak chu. Parts of speech nei hran chu ziah hran zel tur a ni. Mi ho ve tak kan Sir pakhat hian zirlaiho zin tur hi min ho dawn a, ho nei mang si lo hotu-a inngai tlat kan class captain hian zinna vela inlak hotu a chak tawh khawp mai. Kei chu kal ho dul dul ang chi leh heti anga han chhuah ho dul dul hi ka peih ve loh avangin room-a lo tawm mai mai ka thlang ta zawk a ni. Ho ringawt pawh hi heta tang hian suffix leh parts speech nei hran chu kan ziah hran zel hi. A tira ‘ho’ khi adjective a nih avangin ‘miho’ tih ai chuan ‘mi ho’ tih mai kha a dik zawk a, ‘zirlai’ erawh hi chu noun a nih avang leh plurala siam a ngaih avangin ‘zirlaiho’ tiin plural suffix ‘ho’ hi kan hmang leh a. ‘min ho’ tiha ‘ho’ erawh hi chu transitive verb a nih avangin a hranga ziah a ngai leh thung a, ‘ho’ pakhat erawh hi chu noun a nih avangin a hrangin ka ziak leh a, ho pakhat erawh hi chu ‘tu’ belhin noun kan siam leh thung a, ‘kal ho’ tiha ‘ho’ erawh hi chu ‘adverb’ a nih leh avangin suffix ni lovin kan ziak hrang leh a,’chhuah ho’ tiha ‘ho’ pawh hi adverb a nih avangin kan ziak hrang leh mai a ni. Suffix a nih lohna lai chu part of speech hran nei lova a awm chiah khan a ni. Part of speech nei hrang apiang chu kan ziak hrang zel tih chu hei hian a entir a ni. Kan OT mah mah tawh e. Duh tawk rih dawn teh ang.
Mizote hian ‘mo’ tih thu mal chiah hi kan nei thin a, ‘moneitu’ erawh hi chu Bible kan neih atanga a letlingtutena an phuah a ni. Mo leh moneitu chungchanga inhnialna hi chu a chhuak mawh viau nangin mopa leh monu tih duh lo hi an tam zawk ang upaho zingah chuan. Tleirawl leh rawlthar erawh hi chu hmanlaia an hman dan chuan ‘tleirawl’ hi mipa leh hmeichhe sawina atan an hmang kawp ve ve thin a, putar thenkhat pawhin an first love te hi, “Ka tleirawl chhuahpui,” an ti thin a, ngaihzawng hmasa berte hi ‘tleirawl chhuahpui’ tiin an sawi thin. Hetah pawh hian tunhnu hian kan inhnial mai mai thin niin a lang. Mo leh mo neitu erawh hi chu bridegroom sawina ang chi hi Mizo tena kan neih ve miau loh avangin kan phuah chawp ta a, chu chu kan ring chhawm ta zel a ni. Hman tumah khan Pu Rozama Chawngthu hian ‘Mo leh mak’ tih hi a rawt a, Mizo tawng min zirtir thintu mah ni se la ka pawm lo khawp mai. Mo leh mak tih chu tuman kan hmang ta lo a nih hi. Kei chuan mo leh moneitu tih mai zel hi a tha ka ti.
Report this comment
March 3rd, 2013 at 8:39 pm
^ Ka thlawp e. I milem ziah chu mawi hle mai. Keini pawh kan zirtirtuin ziakmawi min zirtir thin. Lem ziak hun hi nuam ka ti hle. Ziak mawi ziah erawh ka thiam lem lo thin khawp mai. Mo chu feminine gender ni e.
tren tren
Report this comment
March 3rd, 2013 at 8:52 pm
Nih leh mipa leh mipa lo innei ta se emaw hmeichhia leh hmeichhia lo innei ta se engti anga sawi tur nge ni ta ang le? Mo / Monu / Mopa / Mo neitu?.. (OT lutuk lo’ng chu maw)
Report this comment
March 3rd, 2013 at 9:34 pm
Chemtatrawta kha la awm se chuan,
tun ai hian a hot ang maw le.
Report this comment
March 4th, 2013 at 2:10 pm
He post hi ka thlawp. Kei pawhin ka lo rawt ve tawh ṭhin a.
A thu hrimin hman laia kan pipute ṭawng hman dan leh thil tih ṭhin dan kha Mizoṭawng dik leh Mizo thil tih dan awm chhun a ni chuang kher lo. Tun lai Mizote pawh hi hman lai Mizote aiin Mizo kan nihna a dal/tlem bik chuang lo a. Hman lai mite aiin thil kan hre zau-in khawvel finnaah pawh kan sang zawk fe tawh a. Chuavangin tawng hman dan leh thil tih danah pawh dik zawk leh ṭha zawk hriat thar tam tak kan nei a. Chung chu kan tawng leh cuture tihhausak nan kan hmang ṭangkai zel zawk tur a ni. Hman laia an tih dan ang a nih loh vanga dik lo-a ngaih tlat hi chu thil atthlak lam a ni mah mah.
Report this comment
March 4th, 2013 at 2:34 pm
Terema leh Charie, in comment a hlu khawp mai. Post topic pawn lam in sawite pawh khi thil tangkai leh zir tham fe a ni e, a lawmawm khawp mai.
Report this comment
March 4th, 2013 at 6:07 pm
ulawng, thank you, mahse Charie ni lovin Charice ti ve tawh la
Report this comment
March 4th, 2013 at 6:21 pm
Mo neitu.
Report this comment
March 4th, 2013 at 7:23 pm
#37 hahhaha, a nih tak khi, sorry
Report this comment
March 4th, 2013 at 7:39 pm
Monu/Mopa,
Monu pa/Mopa pa ni mai
Report this comment
March 4th, 2013 at 11:12 pm
Moneitu tih kual duah hi chu a buaithlak mai mai, “mopa” tih mai hi a awlsam.
Report this comment
March 5th, 2013 at 11:05 am
‘Tawng hi a thang lai a ni a’ tih khi a dik khawp mai. Hmana kan sawi dan thin pawh bansan kan nei ta nual. Inthlahrung lovin monu, mopa, monu thian, mopa thian tih hi hmang zel mai ila. Inneihnia kan thupuan buai nuaih thinte hi a zia deuh mahna.
Post tha tak a ni. Komen chhiar ka hlawkpui.
Report this comment
November 1st, 2013 at 1:16 pm
Monu Mopa tih hi chu kan tunlai tawngkam a ni a, Mo leh moneitu hi kan pi leh pute tawngkam a ni e. Mizo tawng dik tak hi buaipui tham a ni tih in comment ho atang hian a lang chiang ta uar mai. “slang’ kan hmang tam ta lutuk hi kan tawng ti ho va ti khawlo zo tu ni berin ka hria.
(sawi ve thiam chiah lo comment)
Report this comment