Tumkhat Tel Aviv atanga Mumbai pana thlawhnaa kan chuan laiin kan thlawhna chu thlipuiin min nuai ta mai. Air Hostess ho chuan a hlauhawm loh thu an sawi chunga life jacket hman dan an sawi takah chuan thil ri hlekah pawh ka meng tang hru tawh mai. Beiseina sang tak nen ka tawngtai a; a hnu reilo teah a reh ve ta mai. Mak ka tiin ka lawm hle.
Hetianga harsatna kan tawh a, kan tawngtaia, chhana kan lo awm chiah hian, “Lalpan kan tawngtaina a ngaithla thin. Kan dil apiang erawh a aw mai ngai lo. A changin ‘nghak rawh’ a ti a, A changin ‘heti chuan ni love” a ti bawk thin. Kan tan a thil tha a ruat zawk vangin. Pathian khawtlaina hi min hnawlna a ni lova; kan tawngtainate a ngaithla thin a ni. Kan harsatna engkim a hre vek a; ni tina kan lungkham em em pawh a hria a ni. A tanpuina chu a rawn thleng mek a ni. Hringnuna kan mangannate a thlir reng a. A hnen kan pan lehna hmanruaah a hmang a ni. Ani chu a rinawm a ni tih i hmu ang. I harsat leh mangan lai ber pawh khan i tan thil tha ber a lo ruat diam tawh asin!
Kristiante nunah hian tawngtaina chungchang hi sawi uar tawk a awm thei lo. A chhan chu van hawnna chabi a nih vangin. Kan thlarau nuna Pathian hnathawh theihna thlentu a ni a, tawngtaina chuan Thlarau Thianghlim thiltihtheihna chawk thovin Bible thute chu ruh chhunga meiling inkhung ang mai in a ti nung a. Ruh chuktuah thlenga kangin Isua Krista’n a taka min awmpuinate min hriatchiantir thin a ni. Tawngtaina chuan nunna, thlarau leh rilru a tilawm a; Pathian duhzawng hre thei tur leh zawm thei turin kan mit a ti meng a; min tichak bawk a ni. Tawngtaina chuan tlang sawn theihna mai nilovin kan duhna a tichak a; kan ngaihtuahnate Lalpa a nghatin sual leh setana hnathawh do let theihna khawngaihna min neihtir a ni.
Thinlunga rinhlelhna, sual zep ruk, Pathian duhzawng ngaihpawimawh lohna leh Pathian thupek pawisak lohnate hian tawngtaina hi chhanin a awmtir lo thei a, thinlung zawng zawnga tawngtai, lungsi taka tawngtai, tih chunga awngtai, dil ngat ngat, beidawng lova tawngtai, Isua hminga tawngtai, ring chunga tawngtai, tihtak zeta tawngtai, huaisen taka tawngtai, Pathian duhdana awngtai leh thlarauva tawngtainate hian chhanin kan awm thung dawn a ni.
“Engkim in tawngtaia in dil apiang chu hmu tawhah inngai ula; tichuan in hmu ang” (Mar 11:24) tih kan Bible-ah kan hmu a, chuvangin, ring chunga kan tawngtai phawt chuan chhanin kan awm dawn a ni.
Similar Posts:
- Awmze nei lo TAWNGTAINA
- TAWNGTAINA
- Tawngtaina awmze nei lo.
- Lal tawngtaina kan tih hi
- Tawngtaina…awmze nei lo…(chhunzawmna..phur leh thut pek a lawm maw le)
(Y)
March 8th, 2013 at 2:14 am
A ni khawp mai. Chuan kan thil dil turah pawh hian fimkhur a ngaiin ka hria, kan hmuh loh tur chiang sa ang hi chu dil mah ila kan ringhlel leh thova kan hmu lo leh nge nge zel.. hairehai!
Report this comment
March 8th, 2013 at 11:19 am
Ziak tha leh hle mai Pu chhana chu. Tui deuha tawngtai chang a awm a, tawngtai theih mang der loh chang te a awm bawk a. Tawngtai dawna taksa leh rilru uluk taka inbuatsaih hi a pawimawh hle.
Report this comment
March 8th, 2013 at 12:26 pm
A dik hle mai…
Ka tawngtai tam leh khat deuh hian, ka nun a khawih danglam khawpin ka hre thin…
Report this comment
March 10th, 2013 at 3:42 am
…setana hnathawh do let theihna khawngaihna min neihtir a ni. – hei ka va man lo ve, khawngaihna tih tak khi. ?
Thlaraua trawngtrai tih hi, hriatloh trawng ah te ngaihpalh a hlauhawm hle.
Ziak thiam hle mai, ziaktu thiam
Report this comment