mi(sual).com

Part I Hetah
……..A pawnfen par hmaah chuan thu ka tiam ta a- ‘Ka phak tawkin ka nu hi ka cheimawi reng tawh dawn a ni. A mawina hi ka mawina ani tih ka hrereng tawh ang’ tiin……

Ka nu enkawlna hnuaiah chuan thing delhloh, lung delhloh lovin kan unau chuan kan thanglian ve zel a. Ka nu min zirtirna avangin retheihna ruamah pawh hlim taka awm dan kan thiam a, kan unauvin hlim takin Pathian hla sa-in kan zai ho thap thap thin a. Kum 9 ka nih chuan ka nu chuan Pathian rawngbawl tura kohna a dawng ta tlat mai. A fate min ngaihtuahna avang chuan kohna a dawn pawh chu a hai der lui tlat a. Chutah tak chuan thil mak a thleng ta, kan unau chuan kan damlo a, kei phei chu thih ngamin ka na hial a. Rei tak enkawl ngaiin ka awm nghe nghe a. Kan unau hian kan damloh reng rengin damdawiin pan ai chuan ka nu’n kan lu chunga kut nghat a min tawngtai sak hi kan thlamuanpui zawk a, kan dam pui thin. Tlem a ka dam deuh hnu chuan ka nu chuan rawngbawl tura Pathian kohna a dawn thu chu kan unau chuan min hrilh ta a. Ka u-te chuan, “A nu, Pathian kohna che chu i ti puitling ngei tur a ni, keini chu kan ngaihtuah awmloh. Pathianin min veng reng dawn alawm, kal ngei ngei ang che” an ti tliar tliar a. Ka nu chuan mittui tla zawih zawih chungin a fate chu a mal te te in min tawngtai a, Pathian awmpuina leh venhimna kan tan min dilsak theuh a.

Tichuan, ka nu chuan Kohhran lehkha la in, a unaunu leh a pasal leh a cousin-te nen chuan Pathian kohna ti puitling tur chuan min ngaihtuahna avanga mittui tla zawih zawih chung chuan an chhuak ta a. Mizoram khaw hrang hrangah rawngbawlna an nei a, an rawngbawlna pawh Pathian hnathawhin a hlawhtling hle mai. Zu ngawl vei leh ruihhlo ngai, ka nu rawngbawlna atanga Pathian hmu a, tun thleng a Pathian rawngbawltu hlawhtling tak pawh an awm zui nawk a. Chungte chuan vawiin ni thleng hian min rawn la tlawhin, kan in hi inpui ah an rawn hmang thin. Ka nu hian khaw hnih thum a rawngbawlna a neih hnuin inah an lo haw zawk a, kan mamawh zualpui a tih hnuah hmun danga rawngbawl turin an chhuak leh thin. Pathian a inpuang zel a Burma ram thlengin an rawngbawlna chu a alh chhoh zel avangin rei tak chhung chu min thang san ta nghe nghe a.

Ka nu’n rawngbawl a min chhuahsan dawn reng reng hian pawisa min hnutchhiah tur a nei tlem thei hle a. Buhfai leh chawhmeh dah rei theih chi a lei sa teuh a, a pawisa fai chuan cheng zahnih/thum chiah min hnutchhiah tur a nei thin a. Ka nu rawngbawl hlan chuan kan unau chuan rethei takin kan lo khawsa a, buhfai leh chawhmeh kan neihsa te chu a zo tawh hnu chuan tlai sikul bana ka u-te bazar a in sale-na a an hlawh chhun chhun chuan buhfai leh khawnvartui kan lei thin a. Chaw-ah chuan tui kan chawm a, chi kan al bawk a, tui ti takin kan ei thin. Thil mak deuh mai chu khatih lai khan kan ka-ah khan chaw a tui chawm mai mai kha bawnghnute rim a nam tlat a, a tui ti em em in kan ei thin a ni. A chang chuan kan kawmthlang a kawlbahra hnah-te kha ka u te chuan an zuk sik a, an bai a, behlawi bai ang chiah hian tui kan ti thin. Pathian hnathawh kan chungah a lang a, ka nu zin hlan chuan kan unau chuan kan hrisel em em a, kan na ngailo, ei tha ei ang maiin kan thau mum kang mai a ni. Mahse, kei chu naupang ber tih takah ka nu kha ka ngai thin khawp mai. Tlai tin hian ka nu chu a lo haw tak mialin tiin kan chhak lam tlang chu ka thlir a, mi lo inzui haw diah diah te chu ka nu-te an nih ka lo beisei thin a, mahse, mi nu leh pate an lo ni leh si thin. A ruk hian ka biangah mittui hi a luang ngiai ngiai zel a, ka u-te bulah ka lunglen zia ka ti lang ngam bik silo.

Ka nu chuan kum 1 leh a chanve an rawn haw a, rawngbawl a min chhuahsan hnu chuan Pathian-in chawlh a pe a, an lo haw ve ta a. Khami tuma kan hlim zia kha aw! Ka nu chuan mittui tla zawih zawih in a fate chu min kuah khawm a, lawm avangin kan nufa chuan kan tap a.

Ka nu hi lehkhathiam chu a nilo nang a, zirna ngaisang mi tak a ni a. A fate hian retheih vanga sikul kan chawlhsan mai hi a phallo em em a. Mahse, ka u-te upa lam pahnih hi lehkha lam ti mi vaklo an ni bawk a pawl kua an zir laiin ka nu phallo chungin sikul an chawlhsan ta nghe nghe a. Kei hi lehkhathiam thei tak ka nih avangin ka chhungte chuan ka lakah beiseina an nei sang hle a. Pawl sarih ka pass hnu chuan Boarding a min dah an duh ve a. Kan retheih em avang chuan kan tlinlo chiang sa si a. Tichuan, ka u-te pahnih chu kan chhungte inah an awm a, an awmna te chuan kei chu Boarding-ah min dah ta a ni. Ka u-te kha an hah thei em em, an awmna ah khan ka tan chhun zan zawmin hna an thawk thin. Nula tan tir tan chuan mi ina awm chu a zahthlakin, hmusit taka tawng khum pawh an tawng nasa hle a. Mahse, kei an nau chuan khawvelah ka u-te tluka ngaihsan ka neilo, ka tana an tawrh nasat zia leh mi thinrim hmaisa an tawn nasat zia kha ka hre reng thin.

Boarding a ka awm lai hian thlatin fee bakah mamawh kan ngah em em mai si a, ka u-te awmna chhungkua chuan thlatin fee min tum sak mahse, ka mamawh dang min phuhruk tur leh ka unaute mamawh phuhruk tur chuan a hma aia rim zawkin ka nu chuan hna a thawk a. Veng hrang hrangah chawhmeh phur chhuakin a vak kual thin a. A chawhmeh zawrh a zawh hma loh chu a lo haw thei silo a, riltam takin a vak kual thin. Mi ngilnei deuhte’n thingpui an lo pek changte hian a lawm thei hle a, tlai lam chhung inkhawmna-ah amah tanpuitute tan chuan malsawmna dilin a tawngtai sak ngei ngei thin.

Visingting Day lo thlen-te kha kan tan chuan a hreawm thin ngawt mai. Kan Boarding awmna kha a hla em em a, mihausa fa vek awmpui ka ni si a, an chhungte kha chu motor nalh tak tak nen an lo tlan thleng zung zung a, an ei senloh khawpa tam ei tur tuihnai chitin reng an rawn ken thin a. Kei chu ka chhungte lo thlen hma loh chu dormitory ah ka lo awm thin a, bang awng atang ka chhungte lo thlen hun tur tlumtea thlir takin ka lo thlir ru thin. Ke ringawt a rawn kal thleng thin ka chhungte chu in kan hun tawp dawn lamah pawr fap mai hian an lo thleng a, ka lawm thin zia kha aw. Ei tur tamtak lo ken tur an nei ve ngailo a, chow plate khat an rawn pack tir leh ka mamawh min lo pek baka an mitmenga min hmangaihna leh thlakhlelhna ka hmuh tluka thil hlu a awm ngailo.

Retheihna fahrin ni mah ila ka tun dinhmun thleng tura hmangaih leh duat taka min enkawltu, ka tana an nun zawng zawng hlan ngamtu, nu leh laizawnte ka nei hi khawvela mi hausa ber ka ni a, midang tumah ka awt bik lo ve.

Similar Posts:

• Rawngbawlna hlen
• Eng ang rawngbawltu nge i nih ve le?
• Pu Chawilien rawngbawlna
• Zoram politics ah I ram lo thleng rawh se!
• A sawm che!

Recent Posts:

• Parliamentary Secretary thar hna chanpual
• MSU-in MPSC exam a boycott dawn
• Trinamool Party hmangin zoram thar i siam ang u
• ZU
• March 2013, Mizo(ram) Diary

This entry was posted on Wednesday, April 3rd, 2013 at 1:36 pm and is filed under Luangliam, Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.