mi(sual).com

Cyberstalker kan tihte chu- thlalak/video intih danglam sak (morphing) chingte, internet kaltlang a in tih mualpho chingte, inpuhchhiatna thuthawn chingte, mobile phone hmanga invau chingte, pawisa/thil dang pe tura invau chingte hi kan tarlan theih langsar zual an ni.

Hmanni chu hmeichhe pakhat hian tap pur chungin min lo phone a, mi pakhat hian a thlalakah rapthlak tak taka a comment thu leh dawt hmanga a tih mualpho nasat zia thu min hrilh a. Ka thiam ang tawk tawkin thurawn ka lo pe a, tih dan turte ka hrilh bawk a. Engtinnge hma a lak zel chu ka hre zui ta lemlo. Tunlai chu ka friendlist a hmeichhe thenkhat chuan post ah hian cyberstalker huangtau tak an tawn thu hi an rawn post ka hmu a. Ka hmeichhiatpuite ka experience atang thil pakhat hrilh hriat che u ka duh a ni.

Nikum khan kei pawhin cyberstalker huangtau leh chimawm zet mai ka tawng a, ka laka a thil phut chu tihhlawhtlin sak ka tumlo hrim hrim a. Nasa takin min vau in, min tih thaih a. Cybercrime lama kan mithiamte be rawn vatin, hma kan la ho ta a. Kha pa khan kei nilo hmeichhe dang tamtak pawh a lo vau in, a lo ti mualpho tawh thin tih kan hriat belh zel a. FIR ka thehlut a, kan Police leh cybercrime lama mi chhuanawm tak tak te chuan reilote chhungin min man sak ta vat nghe nghe a ni. Kha pa kha a khawngaihthlak awm ngawt mai, ka hma a hmeichhiate anga awm nem turah min ngai niin ka hria, mahse, hmeichhe luhlul leh sual tak min tawn avangin Jail bang a zut a ngaih phah ta a ni.

Hmeichhiate u, ka chah duh che u chu hetiang thil in tawn hian chiai mai lovin, hlau lova bei let tura in puahchah turin ka chah duh che u a ni. Hetiang misual in tawng anih chuan hetiang hian hma la ang che:-

1) A thil phut leh ngiatte kha mualpho i hlauh vang ringawtin i ti hlawhtling tur a ni lo.

2) Mualpho hlauh avangin block nghal mai suh. I block avang khan a sim phah dawnlo a, hmeichhe dang (a bikin tleirawl awmnem zawkte) lakah a che leh tho dawn a ni.

3) A vau che a, a tih thaih che a, a ti mualpho ta sa sa che a, i lakah chet tir zel rawh. I dikna chu a tawpah a lang chhuak dawn tho tho tih hria ang che.

4)A chetlakna a piang (Internet emaw, phone a ni emaw) chimawm/uchuak taka in laka an rawn chetna reng reng kha evidence turin lo dah tha (print screen) hmak hmak ula. A ti mualpho che anih pawn a tih mualpho na che kha dahtha hmasa lo chuan delete suh ang che.

5) Phone lama vauna in tawh pawhin, in phone-a voice recorder kha lo hmang tangkai hmiah ula. A vauna leh tih thaihna che zawng zawng kha record vek ang che.

6) A rawn la che zui zel a nih chuan heng evidence i neih zawng zawng nen hian i duh chuan amah kha i vau let thei a, mi dawihzep tak anih chuan i lakah a tlawm ngei ang.

7) Hlau lova a che zui zel a nih chuan i awmna atanga Police Station hnai berah FIR thehlut la, kan Cybercrime mi chhuanvawr-te leh kan Plolice chak tak te hian reilote-ah an man chhuah sak thuai ang che.

Thubuai neih hlauh vang ringawt a misualte huangtau taka kan chettir a, kan enliam mai hian kan ramah sual a ti pungin, pawisawilo tamtakin an tawrh phah thei tih hria la, i dikna chanvo humhalh tura DAN i hma-a a inchhawp reng lai hian misual do turin i ke pen chhuak hreh suh ang che.

Similar Posts:

• Min lo tanpui teh u
• Sex Video kawl chuan paih vek tur : Police
• Phone thar ka lei ve a
• Mobile-phone hman dan dukdak lo
• Leaked!!

Recent Posts:

• Health minister bàn turin CM ngen
• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan
• KOHHRAN PAWL HRANG HRANG LEH AN DINHMUN TLANGPUI

This entry was posted on Friday, April 5th, 2013 at 5:00 pm and is filed under Advice. You can follow any responses to this entry through the RSS 2.0 feed. You can leave a response, or trackback from your own site.