mi(sual).com

“Kum zabi sawmhnihnaah khan tunge khawvela thuhriltu lar ber?” tiin inzawt ta ila, “Billy Graham” tiin kan chhang theuh awm e.

Billy Graham hi William Franklin Graham leh Pi Morrow(Nee Coffey) te fapa upa ber ni turin kum 1918 November ni 7 khan North Carolina State a Charlotte khuaah alo piang a ni. Fapa upa ber anih angin, a pa hming hi a chhawm mai a, William Franklin Graham Jr. tia hriat a ni. Charlotte a an chhungkaw Bawng vulhna hmuna hna a thawh thin laiin, ‘Billy’ tia koh tan thin ani a, he hming hi alo pu hlen ta a ni. America President D.D.Eisenhower te, Richard Nixon te Thlarau nun lama kaihruaitu(Spiritual Adviser) ani thin.

Billy Graham-a hian rawlthar nun a rawn tem chhoh tan dawn hian, America(US) ah Zu khap burna dan an hlip ta tlat mai a, Zu a zalenin a tam ta hle mai a, tleirawl tam takin an chhiat phah tan tih a hmuhin, Billy-a pa chuan, a fate chu a ngaihtuah ta hle mai a. Tichuan, tukkhat chu, Billy-a leh a nau Katherine-I te chu room pakhatah a ko lut a, Zu(Beer) a in tir ta a. Billy-a chuan, tui a tilo hle mai a, in harsa a ti khawp mai a. Nimahsela, a pa chuan, an ruih hnap thlengin, luak puat puat khawpin a in luih tir ta a ni. Apa chuan, “In zu in kha tui in ti em? ruih kha nuam in ti em?” tiin a zawt ta khauh mai a. Billy-a chuan, “Ka Pa, a tui ka ti lovin, ruih chu a hrehawm ngei mai, engtinnge maw mite hian hetianga tuilo leh a ruih hrehawm zu hi an in an in a, an nghei theih loh zawk le! Kei chuan, ka dam chhungin ka in leh ngai tawh lovang” a ti ta a, a dam chhungin Zu hi a in leh ta ngai lo a ni.

A rawn rawlthar chhuak chu, a palianin a hmel tha fu mai a, a chak a, a tha a za hle mai bawk a, mi chimawm anga ngaih ani lek lek thin. Amaherawhchu 1934 khan kum 16 mi anih laiin Evangelist Mordecai Ham-a Crusade ah a piangthar ta hlauh mai a, Bible zir alo duh ta a,Florida Bible Institute, Trinity bible institute an tih bawkah chuan, Diploma in Bible Studies chu a zir ve ta a. He College a azir lai hian, ngaihzawng hmangaih leh duh em em mai a chhar ta a, a hming chu Emily Cavanaugh-I a ni. 1937 Thlasik chawlh dawnah chuan lehkha thawnin inneih a duh leh duh loh a zawt ta chawih mai a ni. Emily Cavanaugh chuan, alo inngaihtuah ang a, College an luh leh hunah a chhan tur thu a hrilh ta a. College an luh leh chuan, a neih theih dawn loh thu a hrilh ta mauh mai a. Chu thu a han hriat chuan, Billy-a khawvel chu ruak leh thim vekin, a tawp ni hial hian a hria a, a thlarau nun lam pawhin a tuar em em a ni. Emily Cavanaugh lah chuan, chutih laia Pathian thu thiam lar tan leh Billy-a aia hmalam hun eng daih zawk nia lang, a classmate Charles Massey chu pasalah a nei ta lehnghal a.

1943 khan Wheaton College ah Anthropology lam a zir leh ta a, he hmunah hian, thil pahnih a tawng leh ta a. pakhat chu a zirpuite chuan, Bible hi history bu satliah leh diklo nial nual, Pathian thawkkhum lai leh thawkkhum loh lai te awm niin an sawi thin a, Billy-a chu an nuihsawh viau thin a. Billy-a pawh a buai hle mai a, Zankhuain a Bethel ta a, chuta tang chuan, nghet tak maiin, Bible pumpui hi ‘dik lo thei lo’ ani tih a pawm ta hmiah a, a thlarau nun lam pawh alo chak ta a, a thusawi leh rawngbawlna pawhin awmzia a lo nei(effective) ta hle mai a ni.

Tin, pakhat lehah chuan, China rama Presbyterian Missionary L.Nelson Bell-a fanu Ruth Bell chu a chhar bawk a ni. An induh tawn hle laiin, Ruth Bell-I chuan anu leh pa hnung zuia China rama Missionary-a kal a tum ruh si, Billy-a lah chu Presbyterian chhungkua atanga lopiang, Southern Baptist mi loni ta, nimahse, interdenomination a rawngeawl duh chi alo ni bawk si. Khawilai ram kilkhata missionary anga lo bur ve nget nget ai chuan, America leh Khawvel pum huapa Pathian rawngbawl tura koh niin a inhre tlat bawk si. “China ram kilkhata ka damchhung hun pum khawhral thei ka ni lo” a ti bur mai si. An thu a inhmu thei lawk lova, nimahsela a tawpkhawkah chuan, Ruth-I chu a tlawm zawk ta nge nge a, “Ka mission field chu Billy Grahama leh a fate enkawl hi alo ni dawn ta anih hi” a ti thei ta a ni.

Billy Graham-a hi a lar vanglai khan USA President atan an awt em em mai a, Chuh ve mai tura sawmna pawh a dawng nasa. Nimahsela, a nupui Ruth-I chuan, “Chuh buai duh lo mai rawh, tuman nupui then chu an President tur atan an vote duh tak tak lovang” a ti hmiah mai a ni. Billy Graham-a alar vanglai leh a ropui vanglai khan, Ruth-I leh Emily Cavanaugh-I te hi an intawng fuh leh hlauh mai a. Ruth-I chuan, hlim taka chibai chungin, “Ka Pasalin, kan intawn hmaa inneiha a sawm lai chea I lo duhlo kha ka lawm tak meuh meuh a, hmuh thuai thuai che a, lawmthu hrilh che hi ka nghakhlel tawh teh a sin. I lo neih duh loh avang khan, Khawvela mipa tha ber mai Pasalah ka neih theih phah ta anih hi” tiin lawmthu a hrilh deuh hnap a ni.

Similar Posts:

• Ruth Bell Graham passed away
• Thank You Billy Graham
• Rev.Billy Graham-a Movie
• American evangelist attacks Hinduism
• Just say No!

Recent Posts:

• Kawnpui dai sex video a leakout!
• Ka Zirtirtu
• Zirtirtu Isua{Teachers’ Day Special}.
• TUMAN ZU HI AN CHHUNGKAW IN ATAN AN DUH KA RING LO
• ZONUNMAWI

This entry was posted on Sunday, April 7th, 2013 at 6:38 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.