mi(sual).com

Tuk dang ang bawkin hma takah tho in tap chhak a ka nu thingpui sen hang lo dawm pawh chu ngaihsak lo in kawm chhak a ka thian Thanga te in lam pan chuan sairawkherh nen chuan ka tlan chhuak nghal a. Ka thianpa chu lo tho tawhin tap chhakah zan lama kan saihlum hrual sa chu a lo thir belah chuan a lo chhuang mek a.

Enga mah hma chuan “Vawiin chu Kurung ruam a tlaizawng par maw kan chan dawn?” ka’n ti thla rawk a. Kan khua a sikul a awm ve lem loh avangin keini naupang tan chuan chhun a sava veh chu kan hna a ni mai a. Kan nu leh pa ten hah thi kul tai a kawl a ni chhuak chhiar a hna an thawh chu kan hmabak a ni tih reng eng helh lo in ni kan hmang liam ve thin a.

Ka nu chuan “Chaw kan ei dawn lo haw thuai rawh” ti a a rawn auh avangin ka saihlum chanpual ak chuan ka tlan haw hnak hnak a. Chutia thlamuang taka tukthuan kan ei lai chuan kan kawmthlang pa chu hmanhmawh bak lengin, thaw hlawp hlawp in a rawn lut a. “Ih ih ih…” a thaw hlawp hlawp a, a sawi tum pawh chu a sawi hlei thei lo a. Ka pa chuan, “Sanga pa enge ni ta? Muangchang in le!” a lo ti a.

Chutah chuan a ni chuan “Khaw thenawm te a nu nau in an rawn chhuak a, kan khua hi hal an tum a ni… police pawhin an dang zo tawh lo a ni e, kan khua an rawn pan mek” a ti bak deuh nuaih a. Ka pa chuan, “Chutiang ngawt a ni thei lo ang, sawrkar thu chhuak kan nghak mek hi maw?” a lo ban chap a. Kan ngawi thap mai a. Ka bulah chuan ka nau, hmeichhe naupang tualchai rual chuan thlaphan hmel takin thenawmpa chu a lo melh kiau a.

Thu thang mai ni lo in a tak a ni tih chu khawlai a nu nau tap thawm leh tlan phili ri ah chuan kan hre thuai a. Keini ai a khaw lian zawk an nih miau avangin kei pawh ral kai rual dawn mah ni i la hlauhna in ka thau ah min man a. Ka nu leh pa te chu thlamuan an ngai a ni tih hre mah i la, kawtthler thawmah chuan min rawn beih tum tu te chuan kawt chhuah an rawn hnaih hle tawh tih a hriat avangin kan hak lai zawng nen ka pa chuan ka nau chu a chawi lawk a, tlan chhuah a rual ta a. Kan chaw ei lai pawh ei zo hman lo chuan ka nu nen chuan hak lai zawng nen ka pa chu kan um zui ve nghal ta a.

A khua chuan kan mangang em em a. Kan khuah TV pakhat a awm ve a, video a kan lo hmuh thin leh kan hriat dan ang chuan hetiang a khaw in run hi kan pi leh pu te hunlai ah lo chuan an ti ngai lo tih kha kan lo hriat ve dan a ni a. Kan khua atang a ral hla vak lo chu ka pianna khua, mi ram mah nise ka pianna khua ni miau mai chu a lang reng mai a. Thawm a rawn hnaih zel avang chuan ramri kan tum chuan kan tlan ta hlawp hlawp mai a.

Ka han hawi let chu khaw tawntirh lam chu a khu vuah vuah mai a. Ka pa chuan min kaih lawp pahin, “Kan khua an hal a nih saw” a ti a. Kei chuan a chhan awm reng reng ka hrethiam pha lo a. Haw haw thawm a rin tak em avang chuan keini pawh tlan chhe zui ngam lo in ram ri ah chuan hnim buk karah kan biru ta tham a. Het atang hian kan khua kan lo tih ve, ka hriat tirh atang a ka lo seilen ve na chu sen mei a chang ta zuai zuai mai a. Kei aia naupang zawk te thlabar chu hnem tumin nu leh pa te chuan aw dim si vin ti tih hian an han hrawk a. A khurh hian kan khur zawih zawih mai a ni.

Ni lengin hnimbuk karah kan tawm a, tik e tak e ti ngam hek lo. Kan sepui fur ruah tawrh ngawr ngawr mai a. Tlai lamah chuan thawm a reh tak deuh avangin khaw lam pan ngam si lo chu ramri kan turin kan in buatsaih ta a. Tumahin bungrua chuh hman hek lo i, ral leh lamah beiseina eng a awm lo tih hrereng chungin kan unau ten kan chung a hlei an len miau avangin hreh tak chungin lui kan kan ta a.

Zanah chuan ka nau chu a khua a sik zui ta char char a. Kei pawh hlauhna rilru nen ka muhil thei ta thlawt lo va. Ka pa hnenah chuan ti hian ka zawt ta a.

“Engvangin nge kan in zawng zawng kha an hal vek a?”

“Phalna nei lo in an ramah kan cheng a”

“Nih leh kan unaute i ti thin si a”

“Unau pawh hi ei leh barah chuan kan in huphurh fo a lawm”

“Nih leh kan thenawmpa khan sawrkar in awm phalna min pe a ti si a ”

“Nia, mahse sawrkar chu mipui te siam a nia”

“Nih leh ti nge min venhim si loh?”

Ka pa chuan ka hmuh hlau takin a mittui a hru a, “Nakinah i la hrethiam ve mai ang” tiin ka zawhna neih te chu min khar sak ta a.

Zanah chuan ka muhil thei ta hauh lo mai a. Kan khua a Biak In chiah an hal bang a, Pathian in mitin te min hmangaih thu an sawi thin a. Enga ti nge Pathian hian min ensan ta bik em ni le? Kan khuaah misual tam tak an awm pawh ani thei a, kan kawmchhakpa chuan zu pawh a zuar pawh a ni thei, mahse keimah ni zawng zawng leh kan neih zawng zawng hi min halsak kher le? Naktukah hian engtin nge kan awm ang le?

Kan neih zawng zawng min halral sak vek si a. Ka pa hian tun a kan awmna hi kan ram a ni lo a ti bawk si a. Kan unaute a tih lahin kan neih zawng zawng min halral sak bawk si. Naktuk hi lo thleng lo mai se aw………… Pathian hi awm tak tak se aw……………….. ti in ka let ka let a……………………….

Similar Posts:

• Krismas thilpek
• AFC Qualifier: India 3 – Pakistan 1
• August Fiamthu
• Juai!
• Relin min tlansan !!!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, May 1st, 2013 at 12:02 am and is filed under Fiction, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.