April 2013, Mizo(ram) Diary

May 6th, 2013 8:13 am by chhana

1st. Monday: Ni 17.4.2013-a neih tur Chakma Autonomous District Council (CADC) General Election 2013 atan hming pekluhna ni hnuhnung ber a ni a. He inthlan chuh tur hian Indian National Congress (INC) candidate mi 20 te, Mizo National Front (MNF) candidate mi 20 leh Independent candidate mi 9 ten hming an pe lut a ni.

2nd. Tuesday: Presbyterian Church of India (PCI) buatsaih, Two Day Regional Workshop on Disaster Management, Synod Conference Centre, Sikulpuikawn Aizawl a huaihawt chu Chief Minister Pu Lal Thanhawla’n a hawng. Chief Minister chuan “Khuarel chhiatna hi mihring ten dang theilo mah ila, alo hmachhawn dan te, chhanchhuah hna te leh chhiatrupna lo thlen a, lo inrelbawl dan zir lawk a (disaster management), kan thiam chuan nunna leh bungrua tam tak kan hum thei a ni,” a ti. Hawnna inkhawm hi Rev. S.I. Iawphniaw, Moderator, PCI in a kaihruai a. He hunah hian thupui 3 – ‘Concept of Disaster and Types of Disaster in N.E. India ; an overview’ te, ‘Disaster ; It’s Causes, Effects and Carbon Trading’ tih leh ‘ Role and Function of the Local Community in Disaster Management’tih te zirhona neih a ni ang a. Mithiam, Resource Persons Dr. Lalrokima Chenkual, ATI, Aizawl, Satyajit Das, Chief Zonal Officer, CASA, Kolkata leh Dr. Robert S Halliday, Co-ordination, Synfo, Mizoram P.C. Synod ten zirtirna an pe ang. Workshop a tel tur hian Mizoram chhung atang bakah Meghalaya leh Manipur atang te in chhimtu an rawn tel a ni.

3rd. Wednesday: 17th April, 2013-a Chakma Autonomous District Council (CADC) inthlanpui nei turah mi 49-in nomination an file a; vawiina inhnuhdawhna hun hawn laiin Chinta Kumar, Independent, DAMDEP Constituency leh Somoti Ranjan Chakma, Independent, JARULDUBASORA Constituency-te chu an inhnuk dawk a ni.

4th. Thursday: Mizoram Legislative Assembly Budget session, March ni 12 atanga tan chu zawhfel a ni a, tih tur ruahmante tih zawh a nih hnu in Speaker, R. Romawia chuan Rokunga hla, “Ro min rel sak ang che tih” a chhiar chhuah hnuah tiam chin awm lovin a ti tawp ta a ni. Session chhung hian Starred Question hmuh zawng zawng 165 chhanna hmuh a ni a; heng zinga 95 hi House chhunga chhan a ni. Un-starred question 45 chhan a niin Private Mem bers Resolution 3 House a sawihova pawm a ni bawk. Kum 2013-2014 atan Budget a Minister hrang hrangte Demand chu sawihova pawmpui a ni. Sum hman phalna Appropriation Bill- 3 bakah bill dang, Taxation Minister Zodintluanga putluh, the Mizoram Entertainment Tax Bill, 2013-te, Revenue Minister JH Rothuama putluh, The Mizoram Land Revenue Bill, 2013, Home Minister R. Lalzirliana putluh, The Mizoram Fire Service Bill, 2013 te, AH & Vety Minister, Nihar Kanti Chakma putluh The Mizoram Slaughter Bill, 2013 te pass an ni. Education Minister Lalsawtna putluh, Mahatma Gandhi University Bill, 2013 chu sawiho a nih hnuah a changtu Minister duh dan angin Select Committee thlir zui turin dah a ni. ZNP member K. Liantlianga putluh , dan dinglai siam thatna tur ‘The Mizoram Ceilling On Government Guarantees (Amend-ment) Bill, 2013’ chu sawiho a nih hnuah hnawl a ni. Tun tum session-ah hian rorel nan darkar 75 leh minute 6 hman a ni.

5th. Friday: Lt.Col. ZS Zuala chu Parliamentary Secretary atan lak luh a ni a, Pu Haukhum Hauzel pawh State Planning Board Member-Secretary atan lak luh a ni bawk. Chief Minister Office Conference Room-a inkhawm buatsaihah CM, Pu Lal Thanhawla’n Aizawl South II Bialtu MLA, Lt. Col. ZS Zuala chu Parliamentary Secretary atan rinawmna thu tiamtirin a la lut a, hemi hnu hian Chief Secretary hlui, Pu Haukhum Hauzel chu Mizoram Planning Board Member Secretary atan rinawmna thu a tiamtir bawk. He inkhawm hi Chief Secretary, Pi L. Tochhongi’n a kaihruai a, sorkar-in Parliamentary Secretary atana Lt. Col. ZS Zuala a ruatna leh Planning Board Member Secretary atana Pu Haukhum Hauzel a ruatna lehkha a chhiar chhuak hmasa a, hemi hnu hian thu tiam tira lak luh anni. Parliamentary Secretary leh Planning Board Member Secretary atana Lt. Col. ZS Zuala leh Pu Haukhum Hauzel-te lak luh inkhawmah hian Minister, Parliamentary Secretary leh MLA-te an kal tha hle a, eptu MLA zingah Pu C. Ramhluna, Pu PP Thawlla, Pu Lalthansanga leh Pu K. Liantlinga te pawh an tel a ni.

6th. Saturday: Pu C Lalchawiliana, Pu Roluahpuia leh Pu Lalrotluanga te ram vak tur a kal te chuan, Darkhai peng leh Tiau kawng inkar muala an kal laiin lei atanga sang vak lovah thil var thlawk an hmua. A tirah chuan sarang thlawk vel niin an ngai a, a hmutu ten sawi danin thlangra aia a len ngei an ring a ni, he thil an hmuh hi foot 1 vela hniamah thil var dang tereuhte, a khaina hmuh tham si loh in a thlunzawm nia ngaihtheih a ni a. He thil var hi a lan fiah loh a piangin a senin tower chunga eng sen ang deuh hian a eng thin a, a chang chuan darthlalang a in phet ang hian a entute hi a en khalh thin a, tla mai tura an ngaìh laiin Tiau dung zuiin a thlawk zel a, zawi zawi in khawchhak lam pana inher chho zelin, an mit tlin tawk an thlir niin an sawi a ni. Heng a hmutute hi Ngur khua a an VC hlui te an ni. An hmuh dan nia an sawi a in an thup avangin a mak hle a ni.

7th. Sunday: Law Minister Pu Lalsawta chu Chief Ministers of States and Chief Justices of High Courts, Joint Conference, New Delhi a neihah Chief Minister aiawhin a tel a. He conference-ah hian thu pawimawh tam tak rel leh sawiho a ni a. Hetah hian Pu Lalsawta chuan chak zawka Judicial System Mizoram a kalpui a nih theih nan leh Mizoram in High Court hrang a rang thei ang bera neih a nih theihna turin theih tawpin hma a la a ni.

8th. Monday: Tunhnaia sak zawh tak Rural Slaughter House, Mualpui ami chu Chief Minister Pu Lal Thawnhawla’n a hawng. Slaughter House thar hawnna inkhawm-ah hian AH & Vety. Minister Pu Nihar Kanti Chakma chu Khualzahawm niin Revenue Minister Pu J.H.Rothuama; Law Commission Chairman Pu R. Lalrinawma; Parliamentary Secretary H. Zothangliana; Parliamentary Secretary Col.ZS Zuala; MLA Pu K.Lalrinthanga; CM nupui Pi Lal Riliani bakah Ex-Dy. Speaker Pu R.L.Valla te pawh an tel a ni. Rural Slaughter House, Mualpui hi NABARD tanpuina Cheng nuai 412/- hmangin ni 29.8.2011 atanga sak tan niin ni 19.3.2013-ah commisioned fel a ni. He Slaughter House danglam bikna chu khawl hmang leh Mizo ten kut hmanga sa talh kan tih dan thin ang tho a tih theih ve ve turin he hmun hi ruahman a ni a. A rualin ran 8 darkar khata chhungin talh leh sawngbawl thei tura khawl te hi duan a ni a, tuna training nei mek satalhtuten an thiam nal hunah phei chuan darkar khat-ah 10 chuang talh thei tura beisei a ni. Na hre lo leh hrehawm tuar reilo thei ang ber turin ran te hi talh thin a ni dawn a ni. He Rural Slaughter House, Mualpui ah hian ran talh atanga bawlhhlawh leh ningnawi chhuak nitin 1000 kg. sawngbawlna hmun ‘Effluent Treatment Plant’ a awm a; sa kawchhung felfai leh thianghlim zawka sawngbawlna hmun ‘Trippery’ pawh awm bawk a ni. Ran talh tur lo thlunkhawm lailawkna hmun ‘Cattle Reception’ te, ran talh an nih hma darkar 24 tal an chawlh hahdam lailawkna hmun ‘Lairage’ pawh sak nghal a ni.

9th. Tuesday: ITI Aizawl-a world class Automobile Trade dinna tura TATA Motors leh Mizoram sorkar thawh dun na tur chungchangah Chief Minister Pu Lal Thanhawla leh TATA Motors Company hotute- Pu Shridhar P.Joshi, Consultant Adviser, Pune leh Pu Sanjoy Sarkar, Manager, Customer Support, Guwahati te chu Chief Minister office ah an inkawm a. Aizawl ITI hmuna world class Automobile Trade din tura TATA Motors company in ruahmanna a siam te an thlir ho. TATA Motors company hian Corporate Social Responsibility hnuaiah he project atana training na hmanraw pawimawh an rawn tum tur zingah TATA Motors ho engine leh khawl neih te bakah khawvela company lian leh rintlak, Castrol, Fleetguard, Bosch leh ZF ho khawl tha ber ber te an rawn bun thei dawn a. Training na hmanrua an rawn tum tur hi vaibelchhe 2 chuang man a ni. He project din nan hian ram 6000 sq.ft laia zau ITI Aizawl ram atanga pek tur a nih avangin Automobile Trade bakah item dang eng emaw zat pawh belh chhah tura ruahman a ni. Chief Minister Pu Lal Thanhawla chuan, “Mizo thalai te company lian a thawk tura ram chhung leh ram pawn thleng an pen chhuah theih nan TATA Motors ten hmanraw changtlung tak nen training centre an rawn buatsaih pui theih chuan Mizoram sorkar chuan lawm takin a pawm ang,” tiin TATA Motors te nena thawh ho chu tha a tih thu a sawi a. A tul anga bawhzui turin officer pawimawh te a hriattir nghal bawk a ni. He inkawmna ah hian Labour & Employment Minister Pu Lalrinliana leh State Planning Board Member SEcretary Pu P.L.Thanga te pawh an tel a ni.

10th. Wednesday: Pi Vanhnuaithangi, mi tam zawk in Taikheri ti a kan hriat lar chu Darlawng khua (Tlungvel bul) ah zunthlum natna avangin a boral.

11th. Thursday: Mizoram Sawrkara Finance Department hnuaia Fiscal Management Unit (FMU) chuan Department hrang hrang aiawhte kokhawmin an Department hnuaia hnathawk te theuh chanchin kimchang computer-a dah luhna atan FMU hmalakna in ‘Employee Data Collection Tool’, Deloitte Touche Tohmatsu Limited (DTTL)-in an siam hman dan chungchangah inrawnkhawmna neih a ni a. He Workshop ah hian Pu Lalringliana, Addl. Secretary, Finance Department leh FMU Programme Director ni bawk chuan Mizoram Fiscal Policy hnuaia peng hrang hrang – Tax & Non Tax Revenue Reforms, Debt Management, Public Expenditure Reforms, Service Improvement in Health & Education Sector, Education Reforms leh Public Sector Enterprises Reforms hnuaia a hmalak dan te a sawi a. Fiscal Policy leh Fiscal Reforms hian sawrkar department zawng zawng a kaihhnawih avangin thawhhona tha neih a tul thu a sawi lang bawk a ni. Pu Nilanjan Bose, Senior Manager, DTTL chuan Employee Data Collection Tool chungchanga presentation pe in, a hman dan zirtirna leh a hrilhfiahna hun a hmang a. Employee Data Collection Tool atanga sawkar hnathawkte chanchin lakkhawm atangin Payroll software siam anih leh dawn a ni. Fiscal Reforms (sumpai inrelbawlna tihchangtlun) atan hian Mizoram Sawkar chuan Asian Development Bank atangin US 100 million dollars loan a la a, he loan za zelah 90 chu Sawrkar laipui in a rulh tur niin za zelah 10 chauh hi Mizoram Sawrkar in a rulh tur a ni ve thung. Kum 2009 atanga khan Fiscal Reforms hi kalpui a nih tawh a ni. Health care scheme te, Mizoram sawrkar leiba rulh te leh Education Department hnuaia VRS Scheme te hi Fiscal Reforms hnuaia hmalakna langsar pawimawh tak tak te an ni.

12th. Friday: Rampum huapin IGNOU 26th Convocation hman a ni a, a lawmna hmunpui ber New Delhi-ah India President Pu Pranab Mukherjee chuan Khuallian chan changin he hun hi a hmanpui a ni. Mizoramah pawh CYMA Hall, Tuikhuahtlang-ah Khual Zahawm Minister of State Pu P.C.Lalthlanliana chuan IGNOU Regional Centre, Aizawl atanga zirlai hlawhtling te hnenah Certificate a sem a ni.
Khual Zahawm Pu P.C.Lalthanliana chuan IGNOU hian mi harsa leh hnuaihnung zawkte tan an banphak turin zirna changtlung tak a buatsaih avang hian khawvel puma University ropui ber ni hiala a ngaih thu a sawi.
IGNOU hnuaiah hian zirlai maktaduai 3 chuang an awm mek a, programme 400 chuang kalpui mek niin ram hmun hrang hrangah Regional Centre 67 a awm a ni. Kumin IGNOU Convocation-ah hian Mizoram atangin zirlai 545 te hnenah degree/certificate leh Diploma hrang hrang hlan a ni a. Rampum huapa zirlai ti tha, Gold Medal dawng pha, Aizawl Regional Centre atangin a vawi khatna atan mi 2 an tel ve a. Chungte chu – Dr. Lallianzuali Fanai (Diploma in Women Empowerment & Development) leh Pi H.Lallianmawii (Diploma in Elementary Education) te an ni.

13th. Saturday: State Bank or India, Electrict Branch leh Ramhlun Branch-te chu Lok Sabha MP Pu CL Ruala leh Finance Minister H.Liansailovate’n an hawng. Electrict Branch hi Mizoramah 30-na a nia; Ramhlun Branch hi 31-na a ni.

14th. Sunday: The Diciples Society inkhawmpui vawi 16-na chu Sihphir Venglai Presbyterian Kohhran Biak Inah neih a ni a; Speaker atan Synod Revival Speaker Upa R.Vanlalzauva chu hman a niin a ni hian ‘Tunge a ni mi tih?’ (Mt. 16:15) tih thupuia hmangin sermon tum thum a thlak a ni. The Diciples Society hi kan ram thalaite zingah Kristian nun nghet nei hleithei lova harsatna kan tawh leh thin avangte, zu leh drugs, mipat hmeichhiatna hman khawloh leh suahsualna dang chi hrang hrangin min chim reng bawng avangte’n chhungkua leh Kohhran pawn lamah thalaite enkawlna leh kaihhruai na fel buatsaih tul tihna a awm avangin Synod Revival Speaker Upa R.Vanlalzauva leh mi thahnemngai 2nd. Feb. 1998 a an din a ni. Diciples Society hi sorkar-a registration fel tak nei a ni a; kumtin inkhawmpui hi neih thin aniin hruaitute pawh thlan thar zel a ni a; tun tum inkhawmpuiah pawh hian chairman atan Upa Lalhuapzauva thlan a ni. Diciples Society hi Dawrpui Church Complex-a office nei anni.

15th. Monday: East Tuipui bialtu MLA Pu B.Lalthlengliana chu Aizawl Civil Hospital-ah Kal (Kidney) nâ avangin a thi a, kum 66-a upa a ni. Pu B.Lalthlengliana hi Pathianni chawhma dar 11 vel khan Civil Hospital-ah dahluh a ni a, Pathianni zan dar 7:00 vel aṭang khan a dinhmun ṭhalo zualin, ICU ah dah a ni a, hetiang hi a lo thleng ta mai a ni. Hun engemawchen chu natna hrang hrangin a tlakbuak avangin a insawisel fo ṭhin a, tun Assembly Budget Session neih hnuhnun ber erawh chu ṭha takin ala tel thei a, Doctor te sawidan in a kal a ṭha vak tawhlo a, hei bakah hian Malaria PF hrik hmuh ni bawkin, natna dang pawh a nei neuh neuh bawk. Pu Lalthlengliana hi kum 1947 April ni 20-ah Mizoram khaw chhak Farkawn khuaah a piang a, a nupui Chawngpari nen fa 6 an nei a ni. Zirna lamah MA (Hist) leh MA (Pol.sc) niin, hun engemawchen College-ah zirtirtu hna a thawh hnuah kum 1986 October ni 15-ah MNF party a zawm a, MNF Gen Hqrs ah nihna hrang hrang a chelh zui a, kum 1993 MLA inthlanpuiah MNF party ticketin Sateek bialah thlantlin a ni a, kum 1998-ah pawh a bial ngai aṭanga tling lehin MNF Ministry-ah Minister of State atan lakluh a ni. Higher & Technical Education leh Sport Department te a enkawl a, Kum 2003 MLA inthlan puiah a bial ngai aṭanga thlantlin leh niin Minister a ni leh a. Land Revenue & Settlement leh Fisheries Department te a enkawl a, Kum 2008 inthlanah East Tuipui bialah MNF ticket a thlantlin leh a ni.

16th. Tuesday: Kumin February ni 18 zing a Dampa Tiger Reserve Forest a hnathawk mi 5 rubotute zing a mi 1, Lochiram Reang chu Mizoram police te leh Tripura police tangkawp ten an man.

17th. Wednesday: CADC election neih zawh takah chuan voter 25694 awm zingah vote
23739 a tla a; vote 92.39% vote a tlain a tla tha thawkhat hle. Kamalanagar “N” biala Kamalanagar-II-ah vote tla tha berin he bialah hian voter 1263 ah 1083 in vote an thlak a ni.

18th. Thursday: Facebook-a Mizote hmai timawk thei thlalak che thei leh thei lo chi theh darh a nih dan chhui ngenin Mizo Students’ Union-in Aizawl SP hnenah FIR an thehlut. MSU hian an FIR hi Aizawl SP, Pu LR Dingliana Sailo hnenah an thehlut a, an FIR-ah chuan social network site pakhat, Facebook-ah tunlai hian Mizo-te tihmingchhe thei thlalak leh video theh darh mek nia sawiin, ‘Mizo timualpho thei thlalak avang hian state pawna Mizo zirlai leh hnathawkte’n hmuhsit leh zuam an tawh phah thei a ni,’ an ti a, hetiang thlalak theh darh chingte hi zawng chhuak turin an ngen a ni. Aizawl SP chuan, heng mite zawn chhuah kawnga thawhpuiah MSU chu a sawm nghal a, Police lam atang pawhin hetiang thil that lohzia hi inzirtir tul a tih thu a sawi.

19th. Friday: Chakma Autonomous District Council inthlannaa vote tla chhiar zawh takah Congress chuan he District Council-a seat awm zawng zawng 20 zinga 17 la-in hneh takin sorkar a siam thei a, MNF-in seat 3 a la a, Independent-ten seat lak an nei lo a ni. He Autonomous District Council-a Chief Executive Member ni lai, Pu Kali Kumar Tongchongya chu Fultuli bialah thlan tlin nawn leh a ni a, vote 522 a hmu a, a khingpui MNF candidate Sumir Tongchongya chu vote 116-in a hneh a ni. MLA ni lai, Pu Nirupam Chakma erawh chu a dinna, Madirasor bialah a tling zo ta lo va, MNF Candidate, Indralal Chakma-in vote 14-in a hneh a ni. Longpuighat-ah chuan Congress Candidate Chitra Kumar chuan vote 523 hmu-in MNF Candidate, Lokhi Dhan Chakma chu vote 1-in a hneh a, inhnehna tlem ber a niin Parva biala Congress candidate, Mohan Chakma chuan vote 1,062 hmu-in a khingpui MNF Candidate chu vote 688-in a hneh a, hei hi he inthlannaa inhnehna nasa ber a nit hung.

20th. Saturday: Vanglaini editor, K.Sapdanga lehkhabu ziah, ‘A new idea’ tih chu I & PR Auditorium-ah Gandhi Memorial High School Champhai, Headmaster hlui Thanseia’n a tlangzarh. He lehkhabu hi Mizoram hmasawnna tur kawng hrang hranga thlirna leh rawtnate tarlanna a ni.

21st. Sunday: UPC(NEI) Gen. Cofn. Aizawl Vaivakawn Joint YMA Field-a Ningani zan atanga tan chu a tiak a, Rev. P. Chunga North East India Gen.Superintendent Pension chu an thlah nghalin Executive Committee chuan a aiawh tur Rev VL Dika Sailo a ruat. Rorelnaah hian UPC kohhran kalphung tihdanglamna tur, NE India hnuaia District 11-te’n mahni pual chanchinbu an neih theuh chu chanchinbu pakhat chauh nei tawh tura thutlukna an siam bakah kohhran thawktute hlawh siamtu Pay Commission pawh District hrang hrangin nei lovin Pay Commission pakhat intawm vek turin thutlukna an siam a. District huap inkhawmpui palai atan Pastor bial Secretary leh Treasurer te telh thar tur leh Tualchhung kohhran Sunday School Superintendent chu Director tia thlak turin an kohhran dan an siamtha bawk a ni. He inkhawmpuia Speaker Brother Brian Norman, USA chuan inkhawm apiangin Pathian thuchah a sawi a, thlarau thianghlim an dawn theih nan uar takin thu a sawiin a zirtir thin a, kohhran miten thlarau lam ruai hlim takin an kil thin ani. Conference neih chhung hian North East India huap Department lian pathuam 1) Sunday School Department 2) Pentecostal Youth Department leh Mission Department ten Conference rorel an nei nghal a ni.

22nd. Monday: Tuikhurhlu bul Forest Plantation bulah Nano Car MZ-01/H-7804 chu chesualin kawngthlangah a tlanliam a, a hmunah mi pakhat, Pu Ngurbiakzuala (41) s/o Bialzauva, Chaltlang Tourist Lodge mual a boral. He motor hi Tuirini a sangha man haw lam anni. Motor-ah hian a khalhtu nen mi 5 an chuanga; motor hi ft 15 vel a luma, midang 4 te chu hliam na em em an awm lo. Motor hi Pu Lalrinmawia Chaltlang ta a ni a, ama’n a khalh nghal a, hetiang vanduaina rapthlak tak hi an tawk ta a ni.

23rd. Tuesday: Tuirialah Lalrinsanga (Sangtea) kum 34 chuan amah hringtunu, Pi Lailianchhungi (Chhungbawihi) kum 67 mi chu a chhipah bawngtuthlawhin a vua a, ka chhawn lohvin Pi Chhungbawihi hi a boral. Pi Chhungbawihi leh a fa te hi Tuirialah kum 6 vel an awm ve tawh a, khawchhak lam atanga rawn pem thla an ni. Pi Chhungbawihi fanu te chuan pasal neiin hmun dangah an awm darh san tawha, a fapa tlangval Sangtea nen chauha hmeithai an ni. Sangtea hi zu in nasa tak thin a ni a; tun hnaia zu a nghei tak a vanga rilru buai thiltih a nih hmel

24th. Wednesday: April 23,2013 khan Sakawrtuichhun mi Rochhunga leh Lalringlianate chu Phunchawng rawlthar pathuminan sawisa a; he pawi khawihnaah hian Lalringliana (47) S/o Biaktluangi chu a hliam tuar lovin a boral nghe nghe. He pawikhawihna duhlohna lantir nan hian Sakawrtuichhun khawtlang lungawi lo te chuan Phunchawng kaltlang kawngpui (national highway) hi an dang a, Mizoram police ten a hmunah kalchilh nghalin tun dinhmun ah chuan buaina lian tham chhuak ala awm lo a ni. Mipui te innekchetna ah hian Sakawrtuichhun veng pa Vanlalsiama chuan hliam a tuar a, damdawiin panpui nghal a ni.

25th. Thursday: World Malaria Day a ni a; State Vector Borne Diseases Control Programme (SVBDCP) leh Christian Medical Association of India (CMAI) buatsaihin Health Directorate Conference Hall, Dintharah Health Minister Pu Lalrinliana Sailo hovin an hmang. He program-ah hian Dr Rohmingthana, Jt. Director (Family Welfare) chu Chairman niin Dr F Lallianhlira, Jt. Director (Malaria) chuan Mizorama Malaria dinhmun a sawi a. Kumin January – March thla chhungin Sikserh vanga thi mi 2 an awm tawh thu te, thisen exam 20147 atangin mi 767 ah Malaria hrik hmuh anih thu te, heta mi 709 te chu Malaria PF an nih thu tea tarlang a. April thla hi Sikserh Do Thla (Anti-Malaria Month) a puan a nih thu leh sikserh laka inven leh inrin a pawimawhzia a sawi bawk. World Malaria Day hi World Health Organisation chuan kum 2007 atangin a hmang tan a. Mizoramah chuan kum 2010 atang khan hman tan a ni. World Malaria Day kaltlanga WHO in a tum chu Malaria laka invenna leh dona kawnga investment leh political commitment thuk zawk neih theih nan a buatsaih a ni. Hemi bakah ram hrang hranga mithiamte leh donor-te inhmukhawmin, an tawnhriatte, thiamna tharte leh hmalakdan tur tha berte sawi hova in chhawmdawl turin hun an hmang thin. WHO atanga data hmuhtheih chinah kum 2011 a khawvel huapa Malaria natna vei chu mi 86,84,85,568 an ni a, Uganda ah vei an tam ber awm in mi 1,18,24,484 zetin Malaria an vei a, India chu rank 18 na niin mi 13,10,367 in Malaria an vei a ni. Malaria avanga thi hi khawvelah 1,06,820 an awm a, Republic of Congo ah thihna tam berin mi 23,748 an thi a, India chu 23 na niin Malaria vangin mi 753 an thi a ni.

26th. Friday: 25th. Thursday a tan tak Mizoram Hmeichhe Insuihkhawm Pawl (MHIP) General Assembly Vawi-19 na Vanapa hall a neih chu a tiak ta a; he hunah hian kum 2013 – 2015 chhung atana hruaitu thar an thlang a, boruak sang tak karah Pi Lalthlamuani, A & C Minister Pu PC Zoramsangliana nupui chu thlan tlin a ni a, Vice President ah Dr. Thanpuii, Gen. Secretary ah Saipuii, Asst. Secretary ah F.Lalramliani, Treasurer ah Vanlalhriati leh Fin. Secretary ah Lalengkimi te thlan an ni.

27th. Saturday: World Veterinary Day, kum tina April thla Inrinni hnuhnung bera hman thin chu Mizoramah pawh State Veterinary Hospital-ah hman a ni a, hemi puala inkhawm hi State Vety Council Registrar, Dr Saingura Sailo-in a kaihruai a ni. He inkhawmah hian Vety Jt Director, Dr P.Lalbiakliana leh Director hlui, Dr L.Hrahsel chuan Vety Doctor leh Field Assistant-ten an ei zawnna an hriat chian a tul thu leh, ran damlo enkawlnaah pawh mipui rawngbawltu an nihzia an inhriat thar lehzual a tul thu an sawi. World Veterinary Day hi khawvel pum huapa thupui neia hman a ni a, kumina thupui atan “Ven himna atana damdawi pek” tih hman a ni. He thupui hmang hian Mizoram chhungah a thlawna ran hri venna pek leh a entirna hawn nghal a ni a, Mizorama District khawpui tinah he ni hman a ni bawk.

28th. Sunday: 25th. Thursday a tan tak IKK Thalai Inkhawmpui Mamit Hmarveng Kohhran Biak In a neih chu a tiak ta a ; an thurel zingah Kohhran Thurin leh inenkawl dan Branch tina in zirtirna neih chungchangte, inkaihhruaina dan siam chungchang leh Finance campaign neihte a tel a. Kum 2013-2014 Budget atan Rs. 4,00,000/- an pawm a; nakkum Gen. Conference chu Chhim bial ah nghah a ni dawn a ni. Isua Krita Kohhran Thalai Pawl ah hian member 2750 an awm a, Bial 15 leh Branch 70 an awm mek a ni. IKK Thalai Inkhawmpuiah hian Mizoram chhung leh ram pawn atangin palai 800 chuang an kal a ni.

29th. Monday: Vaphai khua in Saikhumphai bawka in awm zawng zawng 40 vel an hal vek a, Biak In 3 leh Police chenna in luahlai leh Aganwadi centre tih loh an hal vek a, Police nen an nawrnaah hliam tuar mi 4-5 vel an awm. Vaphai khua hian hunrei tawh tak atang khan Saikhumphai a cheng te hi insawn turin an nawr tawh a, Guahati High Court lama khin a ni a, Court in Saikhumphai lam thiam a chantir niawma an hriat tak vanga khawtlang anga chechhuak mai a ni. Saikhumphaiah hian Burma lam atanga lo chhuk deuh vek an cheng a, a tirah bawk anga khawsa in, hun a kal deuh a, khua angin an awm ta a, sorkar pawhin khua anga pawmin Vaphai khua chuan an duh lo hle a, an ram chhunga khaw hran awm an duh loh vang hian hun rei tawh tak atang khan an inkarah buaina a awm deuh reng a, tun hi a lo thleng ta a ni.

30th. Tuesday: Mizorama Village Council te intawhkhawmna hun Mizoram V/C Assembly chu Vanapa Hall-ah buatsaih a ni a, he Assembly hi LAD changtu Minister Pu P.C. Lalthanliana’n a hmanpui a ni. Pu P.C. Lalthanliana chuan Mizorama Village Council member zawng zawngte leh Sawrkar thawhhona a that avangin leh mipui rawngbawlna kawnga an tawiawm that avangin an zavaia chhunga lawmthu a sawi. Assembly hi hi Pu Lalchhuanawma, President, Aizawl District V/C Association chuan kaihruaiin, hunserh Rev. P.L. Biakchhawna’n a hmang a. Pu Lawmkima’n inlawmna thuchhah a sawi a, Pu R. D. Lawmkima, Treasurer, Aizawl District V/C Association in lawmthu a sawiin hun a khar a ni. He hunah hian President, Lunglei District V/C Association pawhin thu a sawi a ni. Mizoram dung leh vang atanga Village Council hruaitute kalkhawm chuan Mizoram pum huap Village Council Association din chu tha tiin hemi atan hian hmalak nise tih an rel bawk a ni.