mi(sual).com

Sukte hnam Pau Cin Hau hi kum 1859 ah Tedim ah a piang a. A pa chu Khan Lian a ni. Naupang pangngai ve mai ni in a thiante nen ramhnuaiah Sial leh Kel te an veng thin a ni. Tlem a lo len ve deuh hnu ah apa chuan Mualbem ah raldo dan bakah Teizang tawng zir turin a tir a. Mualbem atangin Tedim ah a kir leh hun chuan lo lam hnathawkin a pa a pui thin a ni. Nundan pangngaia hlim taka a awm lai chuan Tedim tihchhiat a nih tur thu hrilhlawkna a dawng ta tlat mai. Pathian chu a mumang ah in lar in thusawi chhuah tur te a pe thin a ni. Tumah in an awih bawk si loh avangin ti hian hla in a phuah ta hial a ni:

Thang van a zal Sian za mang aw,
Tong dam khaak heem in za’ng e.
Pupa’pat loh khua van nuai-ah,
Sian tong dam sin thu hi e.

Translation:
Thangvan sang chung nung bera Pathian
Anka neem chu bengin ka hria
Pi leh pu hriat ngailoh vanhnuai leichinah
Pathian aw ngei a ni e

Hun a lo kal zel a, a sawi lawk angin British ho in Chin Hills rawn la in Tedim khua pawh an hal ta reng a ni. Pau Cin Hau leh a chhungte pawh chu Tedim hmar lam mel nga vela hla Lailui ah an pem ta a. Pau Cin Hau hnenah chuan Pathian a inlar chhunzawm zel a. Puanchhuah tur thil tam tak a hriat tir mahse tuman an awih si lo. Tichuan khumbet in kum 15 chhung zet a damlo ta a. Khatia reitak a damloh chhung khan mumang leh mitthla in Pathian nen an inbe thin a ni.

A vision pakhat ah chuan hmunzawl nuam deuh mai ah hian mi tamtak an awmkhawm a. Mi chi ten reng; hausa leh rethei mi lian leh mite an ni. Chung mipui awmkhawmna ah chuan Pau Cin Hau chu a va kal a. Van atanga hrui pakhat rawn uai thla chu a hmu ta a. Mi tam takte chu hrui hmanga lawn chhoh an tum a. Mahse, tumah an lawn chho thei tlat lo mai. Chuveleh Pau Cin Hau chu Pathian tanpuina dilin a tawngtai a, a lawn chho thei ta a ni. A han lawn chhoh chuan van chhawng sawmthum lai mai leh Pathian awmna chu a hmu thei ta a. A awmna ngai ah chuan a chhukthla leh ta a. Hruizen leihnuai lama uaithla chu a hmu ve leh ta. Leihnuai thuah sawmli vel a hmu a. Chu hrui hmang chuan a awmna ngai ah a lawnchho ve leh a. Kha hrui khan a invet a, a ma’ san zawng let hnih vel lai mai hi a lo nia. Hetia a vision hmuh hi ti hian hla in a phuah ta a.

Zan ciang zal mang thang van tuang va tung tang e,
Za lu’n sum tual lum sang e.
Banzai hiam sun, sei no gual aw,
Meelmuh pian in dang sang e.

Translation:
Ka mumang lamah thangvansang ka han thleng a
Pathian kawttual ka han hmuh hian
Kut rawn chhun ni engmawi tak chu
Aw a va ropui tak em!

Pathian chuan Pau Cin Hau hnenah chuan rangkachak leh tangkarua a siam in mawi tak tak mihring nunna a tihdanglam theihzia entir nan a hmuh tir a. Chung in mawi tak tak te chu a indawt te te in a entir a. A enzawh hmasak apiang chu a lo bo ve zel a. Chulai karah chuan mithen khat in thah tum in pakhat, pahnih, pathum tiin an lo tin a. Mahse Pau Cin Hau a’n tlu rawh a han tih chuan a sawi ang ngei chuan an tlu zel mai. Chuan Sakawr chhiar sen loh lungphur ama’ awmna lam hawia kal a hmu ta a. A awmna an lo thlen hnu chuan mit a hmuh phak chin ah an tlan let vang vang hlawm a ni. Chuan vaivut leh chhum zing karah chuan an pilbo ta daih mai a. Zofa zawng zawng hlawm khatah om khawm in an bo leh diak a. Chutiang bawkin sapho pawh hlawm nga a in dawt in an rawn inlan a ni. Chuan an bo leh vek zel a ni. Chung zinga pakhat chuan amah hi a en duh loh avangin a hmaiah a hnek ta a. Amaherawh chu Pasian(Pathian) chuan chung mite chu darthlalang a thil en ang in a lan tir a ni. Mi tamtak an pilbo hnu ah a chuang bang a han chhiar a, sawm leh pakhat chauh an la awm a. He a thil hmuh hian ni khat lai mai a awh a ni. Chumi hnu ah chuan nikhua a rawn hre ve leh ta a.

A vision pakhat lehah chuan phaizawl zautak maiah mi tamtak an pungkhawm a. Chung lam atangin Pasian(Pathian) chu a rawn lang ta a ni. Amah tilawm tute lamah chuan Ni eng tle deuh ang hian a kalkual vel a. Pau Cin Hau chuan tap chungin mipuite hnenah chuan Pathian thupek kan zawm tur a ni a ti a. Mahse tuman en ngam lovin hnuai lamah an kun tlat mai a. Pasian chuan Pau Cin Hau chu ko in mihring nunna hian changpat pawh a tluk lo, nimahsela ka thupek te in zawm chuan in tan a tha ang. Ka thupek zawm lo chu hrem an ni ang a ti a. Chuvangin min be rawh a ti a, Pau Cin Hau chuan engvang in nge ka biak ang che ti in a zawt a. Ani chuan kei chu Pathian lei leh van leh nileh thla siamtu ka ni. Mihring leh rannung siamtu ka ni. Dam lo te tidamtu ka ni tiin a chhang a. Pau Cin Hau chuan tihian hla a phuah ta a:

Tung thangvan ah, a sang sawn ah,
Sian zua pa meel in mu’ng e
Sim lei thangvan kal ah e,
A bawl lo mi om lo e

Translation:
Chungthangvan sang ber a awm
Pathian hmel ka hmu a
Vanhnuai khuavel ah
A siam loh reng an awm lo

A vision dang lehah chuan Pathian chu rawn langin Pau Cin Hau hnenah tun atanga kum 8 ral hma chu nunna nei a te ber atanga a lian ber thleng in in that tur a ni lo tiin thu a pe a. Pathian thupek ang chuan kum 8 chhung chu engmah a that lo reng bawk a. Kum 8 a ral hnu chuan Pathian chuan Pau Cin Hau hnenah chuan Dawi nena kan intiamna kan puitlin tawh e. Hemi kum 8 chhung hian rannung that lo turin kan insum hram hram a. Mahse anmahni Dawi chuan mihring min tihlum nasa em em a ni. Chuvangin anmahni Dawi hnenah in inthawi tawh tur a ni lo a ti a. Chuta tang chuan inthawi an lo tlem tial tial a a tawpah phei chuan inthawi an bansan ta a ni. Pau Cin Hau chuan tihian hla a phuah leh a:

Sian mang in tong dam hong khak e,
Zin tawh na khen in ci e.
Pupa khan a lung a gimna,
Sian in leen puan bang paai e.

Translation:
Lalpa’n thu min hriat tir a
Ramhuai nen a then tur in
Pi leh pu atanga lungngaihna
Pathianin sirah puan ang a hnawl ta

Khatia Pau Cin Hau kum 15 chhung zet khum beta a om lai khan vawikhat chu Lailui ah vision a nei a. Pathian chu van atanga rawn chhuk thla in Pau Cin Hau hnenah chuan ziak leh chhiar zir rawh tiin lehkhabu a pe a. Pathian chuan lungte lakhawm in rem dan chi hrang hrang in a remkhawm a. Pau Cin Hau hnenah chuan ka tih ang in i ti ve thiam ang em tiin a zawt a. Ani chuan aw thiam dawn lawm ni tiina chhang a. A han ti chu a thiam ve mai a, Pathian chuan lehkhabu a pe ta a ni. Khatia vision a neih hnu chuan ziak leh chhiar hi a rilru ah a lian ta em em mai a. A chhun a zan in hawrawp siam chhuah tumin a ngaihtuahna a hmang a ni. A tawpah chuan thil rikdan hrang hrangte symbol hmang in a han ziakchhuak ta a. Khang a symbol hmanho kha hawrawp ah a lo chang ta a ni. Hawrawp chi hrang hrang 1050 lai a siam thiam ta a ni. Thluksei leh awki hniam leh sang chhinchhiahna hawrawp te a siam belh zel a, chu chu ‘dawng tawina’ tiin a vuah nghe nghe. Tiang chuan ri chi hrang hrang hi symbol hmangin a dah vek a mite a zir tir thin a ni. Ama lehkha hmuhchuah hi chi hrang parukah then a ni chungte chu:

(1) Ibu
(2) Min bu
(3) Dong len bu
(4) Lun sia bu
(5) Tha tuk bu
(6) Thuamzong bu

Mi tamtak chuan he a hawrawp hmuhchhuah hi zir in an thiam hma em em a ni. Amah Pau Cin Hau ngei pawh in a vision, a mumang leh a zirtirna hrang hrang te he hawrawp hmang hian a record thlap a ni. Mitam tak chuan lungphun ziah nan te an hmang bawk. Pau Cin Hau a rindan tawmpui tute awmna khua ah chuan Sang(sikul) an din a lehkha an inzirtir thin a ni. Biak in te pawh sak a ni bawk. Khaw tin ah Pau Cin Hau chuan Laisang a ruat a chu chu tunlai a Pastor kan tih ang hi a ni mai awm e. Pau Cin Hau hnungzui tute a hlawm a koh nan Pawlpi tih a ni. Kar khatah vawi khat an inkhawm ziah thin a ni. Damlo an awm chuan an va tawngtaisak thin a ni. Khatih lai khan mithi an awm in a ruang chu rei tak tak an dah thin. Pau Cin Hau chuan khatia rei tak ruang dah hi tha a ti lo a ni. A lo berah a nithumni ah vui thin turin a zirtir a ni.

Pau Cin Hau rindan tawmpui tute hi “Lawki” an inti a. Tedim leh a chheh vel ah an darh ve zel a ni. Hmanlai chuan Tedim bial zawng zawng hi chutiang Lawiki chu an ni. Stevenson(1943) chhinchhiah dan chuan Zanniat hnam leh Falam bial 27% pawh Lawki an ni bawk. Pau Cin Hau rinna hi Mizoram leh Manipur ah pawh a darh ve hman a ni awm e. Pau Cin Hau hi 28th December, 1948 khan a thi a ni. Pau Cin Hau pawlte hi tun thleng in an la awm zel a. Anmahni ngaihah chuan Isua hi Israel te tana lo kal ni in keini zo mi(Zo people) tan a lo kal chu Pau Cin Hau a ni e an ti. Pau Cin Hau a hawrawp pawh chhawmnun zel niin tunah chuan chuan Computer ah hman theih in a awm tawh nghe nghe. Sap khristian missionary te Zogam ah hian rawn lut lo chu nise Pau Cin Hau hawrawp hi tun aia nasa in kan hman a rinawm.

Similar Posts:

• Hmasang Zomi Hawrawp
• Planet Shaker ten Tedim ah rawngbawlna nei
• ‘NG’ chungchang
• ZTF Fonts Collection
• Ng Chungchang

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Tuesday, May 7th, 2013 at 8:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.