mi(sual).com

by A.Thanglura (‘Ka u Thlalian min lo nghak rawh’ atanga lak chhawn )

Ka nute unua zinga an upa ber, Pu Vanchhunga chhakchhuak Fawngtet khan, St. Anthony’s High School, Shillionga lehkha a zir lai khan, heti hian min lo fuih tawh a :- “Beihthatna hi, Finna hnehtu a ni. Dawngdahna hi thiam theih lohna thian chu a ni bawk. Chak taka beih hi hriat theihna a ni a; i thil beih lai chaktir lotu a piang chu, i hmelma, thattu tur che a ni ang. Chuti chuan, zirna chaktir lotu chu, i theih chuan, i thinlung ami chu phiat thla zel la, i tan a sawt hle ang.

Mahni leh mahni inthunun thei mi chu, vanneihna kawtchhuahah a ding reng tawh a, mahni inthunun thei lo mi erawh chu, Buaina tui chawi turin lui kamah a ding reng tawh bawk a ni.

 Ei leh bar lamah hian chintawk neih a tha. Mahni hrawk hma ringawt ngaihtuah a, insum lo mite hmel hmuh hi hrehawm ka ti. Tumna a awm phawt chuan a insum theih. Kei pawh ka tum avangin mei ka zu lova, zu ka in lova, kuhvakhawr ka ei lova, sahdah ka hmuam bawk na hek lo, ka lei ka hmuam a, ka duh tawk mai a ni.

Tin, vei nei rinrena awm hi a hahthlak a ni, hmelmate lawmah a lo tla bawk vei nen. Chuvangin i ngaimawh thilte chu i rilruah pai duh suh. Hling te takte pawh kan pai peih lo ang bawk hian, mi hmaizahna nei miah lovin tichhuak zel rawh. Chu chu engthawlna bul a ni. Nupui pasal thuah erawh hi chuan, fimkhur hle ang che.”

Ka pu-thingserh a ka ngaih ber in, lehkha a fuihna min rawn thawn kha tha eltiang mahsela, lehkha zir tha duh lo leh zu in chung pawh a, pawl sawn thei ve tho nih duhna khan min bual a tlat mai a; chuvangin, Pathianin “Talent” min pek ve te pawh zak lek lovin ka hmang tha duh lo thin a ni.

Zirna lama bahlahna nei lem lova, Zoram lama ka lo zuan chhuah ve hnu lahin, zu in nachang chu ka la hre zui ta zel a, ka thanlenpui a ni ber awm e! Mipui vantlangin, “Zu in lo mi a ni” an tih te zinga tel pha ve a, “Pulpita Lemchang Hote” chet dan anga chet ve erawh hi chu, a tumin ka la tum chhin ve hlawl lo thung a ni.

Sawi leh sawi hnu, “Poison pawh nisela, zu rim a nam ther ther phawt chuan a in hnial lovang” tih turte leh zelin, inthlanpui (General election) a lo thlen dawn veleh a, “Pathian Thu ka sawi e,” an han ti ve ziah mai phei hi chu, ka lo zak zawkin ka hmul deuh thum thum hian ka hre bawk thin a ni.

Zahbosal deuh maia an chet ngam avang hian, thlangtu mipuite hi, “Bum harh theih lohvah” an ngai chhiava pawh a ni mai thei a; nimahsela, an inti lelo hle zawk niin ka hria. Ka rin dan phei chuan, kutze ral raih khawpin pulpit hi lo zut hlawm teh ta reng mahsela, “Chatuan Nunna” hi chu an chang pha ngut lo mai thei bawk a ni.

Amah Pu Thanga Hauhnar, Pi Lalsangpuii pa in, “Chung Pathian Bible a thuam a lian, a tang zarah keini chhung kan fu kim, a tu tak Thangvansang kai ang maw ?” a tih ang kha a ni a, “Chhandamna Pialral Zopui” han thleng pha turte hi chu, hriat harsa tak kan ni. Nimahsela keia lo ngaih ve dan erawh hi chu a mawlmangin, a samkhai ang reng khawp mai.

Vanram kawngkhar bula kan din tlat hun chuan, Mithianghlim Petera hnenah, “Heng mite hi chu ka thuamphur Daju ho an ni a; chuvangin ka rualinVanramah i luh tir phal ve dawn lawm ni ? ti a ka ngen pui hlawm phawt chuan, an lut ve thei mai ta ve ang.

Ani taka, Pathian thu mi bum nan leh sumdawn nana zaklo basaka hman ching hote ber hi, han runral duhna ka neih tlat avangin ka pu Vanchhunga’n zuk leh hmuam lam chungchanga infuihna tha tawp khawk, “Thurochhiah” ang hrima ziak a min rawn thawn pawh kha kum tam tak chhung ka lo hlamchhiah hman tawh nghe nghe a ni.

Chutih nak alai chuan, zulin a zui ta deuh aniange tih mai turin, tunhma lama Political field a ka sangawizawnpui Pu Lalthangliana Sailo lahin America ram atangin lehkha ni 21 January 1982 khan min rawn thawn khiah mai a. Chu lehkhathawna thu benglut zual bika ka ngaihte phei chu Mizo tawnga ka lehkhabu ziak leh chhuah hmasak ber, ZORAM POLITIC LUMLET DAN (Belkeh phuar khawm Tui pai theilo) tihah khan ka rawn chhuah tawh a; in lo chhiar nual hlawmin ka ring.

Tunah hian Pu Lalthangliana min rawn fuihna thu tha tawk tak, mahse zawm harsa ka tih deuh mai chu he lehkhabua a bung leh chang pakhat han tlangkawm nan hian, a then a zar chu ka rawn zep tel ve leh a ni :- “Tin, nang pawh Politic lamah aw han neih leh deuh tawh la. I tihdan thin pangngaiin, huaisen leh frank taka i ngaihdan Zoram chungchang i puandarh ve a tul leh tawhin ka hria, I thiamna leh experience te a duhawm a, ngawi bo mai mai tur i la ni rih lova, amaherawhchu Political field a chhuah leh i duh chuan thil tih tur i nei tlatin ka hria. Ngamtlak takin kan sawi anga; ka ngaihdan chuan ‘Piantharna’ pakhat ila hmabak a ni. Chu chu Zo No nen chuan Mizoramah i duh angin i thleng thui thei lovang tih ka hlauhpui deuh che. Chuvangin, “Born again Zu nghei” i nih angai tlatin ka hria.

Chutilo chu, hmanlai kan naupan laiin Hmeichhe Tirhkohte kha hla an phuah a, “A dinglamin Thlarau Thianghlim a dil e, a veilam ‘Zang humna, zang humna’” an tih ang kha a an theih viau ang. Politic thu tha tak tak sawi mah ila, kan kut lehlama Zu No kan ken chhung chuan, tunlai tak phei chuan mipui hruai an harsa viauvin ka ring”

CHHANNA : I ngaihdan chu a tlangpuiin ka thlawp khawp mai. Ani tak a, hemite pahnih chanvo rui leh inhuphurh ve ve te hian Zoram mipuite hi tunah lek phei chuan an ti chiaiin an ti ralmuang lo hle zawng anih hi le. Zep nak emaw, vawiin ni thleng pawh a Politic lamah leh thildangah pawh min finchhuah tura ka la biakrawn ngai loh mite an ni a. Chuvangin, mipui vantlang chu sawi loh, kei ngei pawh hian an pahnihah hian pawm zawk tur ka hre lo. Thum ka vawr ngawt loh chuan, “Sipai bang ka bo map mai” tih ang kha ka dinhmun chu a ni.

Tin, ‘Public Debate – Show Down’ nei se i tih hi rawtna tha tak chu a ni teh meuh mai a. Amaherawhchu, Pu Thena hi tactic hrang hrang lo zir tawh leh Army Officer mizia leh nungchang tarpui thak pawh nimahsela, Pu Laldenga te ang pa hmuithemthiam, a awmsa bun ang hawk hawk a duhthu sam thei leh a duh hun hun a, vantlang hma a Tuikhawl (Water tap) ang maia mittui ti dir thei mai han ep tur hi chuan a la tuai lu deuhin, hliam a tuar nasa lutuk ang tih ka hlauh pui a ni. Chu lovah, anni pahnih inserhkhaih leh chemhar dan hi a namen lo ta em a, vantlang hma a inchalsiribub tir chu sawi loh Vanram lam kawng zawh tur pawh hian an chhuak rual duh ngut angemaw chu le ?

Engpawhnisela, tunah hian anmahni pahnih inkhawhkarna hian Zofate tan thil tha engmah a rawn thlen lo. Chu a hnek chuan, kan tanrual loh zia hi hriain, thiam takin leh fing takin thuneitute chuan kan karah hem an thlak a; an duhthusama keimahni leh keimahni kan inchin chhuah hnuah, “Thua a tawp e Lumam,” tiin kan ram chu hlamchhiahin a awm ta a ni. Chutih nak alai chuan Pu Thena a che tan dawn chauh a ni, tunah pawh Mizoramah Army an lut nasa tawh mai lo ti tawk lah bo lo.

Hetiang hi kan deldul dan leh hnamdang han zah tlak kan nih lohzia tarlangtu leh min mualphotu anih avangin amah upa tawng takin, “ Arpuia lungchhia, Nghara lunglawmna” tih bak chu han sawi tur ka nei rih lo. A hril hai thlakin a zahthlak lutuk. Amaherawh chu tuna thil lo thlengte hi keini Zofate tan chuan inzirna tha tak leh malsawmna thuruk pawh a lo ni mai thei a, chuvangin “Ka rin chu sual thliin nuai mahse, a chuai chuang lovang,” tih bawk kha ka thlang nawn leh the ang.

A tawp berah chuan ngai the, piantharna chungchanga “Born again – Zu nghei” tia min rawn duhsakna zet erawh hi chu, mangchhiat tuma tawngvaih nan pawh a ka la hman ngai loh anih avangin pawm har ka ti a ni. Dan naranin, zu in mite hi an depde lovin, mi rilru tluangtlam tha tak hi an ni chawk a. Ram leh hnam humhalh leh mipuite thlavang han hauhna lamah lek phei hi chuan zu in mite nge nge hian, “Thlarau Thianghlim Pawlna” nen hian min thlamuan thei zawkin ka la ngai deuh tlat a sin.

Engle khaw le, kan oram Tlanghrileng hlauhawm bera ka ngaih (Pathian Thu sumdawn nan leh mibum nana hmang a, a hleihluak a Zu dona) te khian nep lam a pan hma loh chuan, Zoram Political Field a chhuah leh hi ka tum rih lo. Chu lovah, mi alai a mipui dawr thiam lo pawl tak nia ka inhriat bakah, kei aia mifel leh taima tak tak an tam mai a. Chuvangin Vankalsial anga han rawl bo rih hi tihmakmawhah ka ngai a ni. Amaherawh chu, khawiah pawh awm ila, “Thudik tan thiltha ti” tih hi, thupuia vuanin, ka ‘Phaihnah hriam’ hlar ang.

( Chhunzawm tur…. A sei ti pawl kan awm thin )

Similar Posts:

• Zu han in tak loh tawp mai hi chu -III !
• Zu han in tak loh tawp mai hi chu -II !
• Mimal holam
• Job Card endik hna hian kori a tu lo ang?
• Zu Hi Engvanga Do Nge Kan Nih ?

Recent Posts:

• YMA
• Hringnun thim lam
• Mithianghlim-te Inpâwlkhawm {Sunday Pual}
• C.P. Road
• Thalai ni si:

This entry was posted on Friday, May 10th, 2013 at 6:06 am and is filed under Copy Paste, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.