mi(sual).com

Zu chungchang thu bawk chu han chhunzawm leh ta ila, naupang tualchai rual ka la nih lai khan ka pa khan  heti hian zu hi a sawi mawi thin a. “Ruh nei hlei lo, hrawka tui si hi chu, sim ka tum lo” a ti hulhual mai a ni. A sawi mawi dan leh thil han fak vel dan pawh a lo thiam nameuh mai; chuvangin kei pawh hian ka pa tui tih zawng tawh phawt kha chu tih ve turah ngaiin, ka ti ve nghal zel ta mai a, ka lo chhun fuh fak hle zawng a lo ni.

Ka nu lah khan zu a sa awl lo mai bawk a, rum tawk el awla zufang a sak apiang phei kha chuan, puar nalh khawpin ka hawp bawrh bawrh thin a ni. Chutiang chu tette atanga ka lo chin dan anih tlat avangin, “Zubel bul atanga seilian,” min lo ti tawk pawh an awm ta ve ang; nimahsela thudik lem harsa tak chu a ni na vang vangin ka ngaizam thei tho mai.

Uisa thung erawh hi chu ka thisen hian a ngam ve hlawl loh avangin han ei enah pawh ka en thei lovin, ka ngai lo law law a ni. Chuvangin a tui leh a phak dan pawh ka la hre ve lova, dawt ngaihna pawh ka hre bawk nahek lo. Kum 50 the meuh zu lo in tawh tan erawh hi chuan zankhat thil thu a zu in han sim tak thut mai zet erawh hi chu a awlai lovin, a mi nghawng pawh a na salh salh teh reng mai.

A hlimchhawn lai phei kha chuan ka ra a so a. Mu leh mal pawh nei fumfe lo khawpa ka tal ka tal mai bakah, mit deuh sulha awm chang nei te hian ka la inhre deuh cheu bawk a. Sawi ta zel ila, zu ka in tawh loh hnua ka inlamrel dan leh ka ngaih that loh deuh dan hi chu a mak ang reng khawp mai. Ka hapuite hi an nghing ta deuh vek emaw tiin hlauhthawnna ka neih bakah, lung pawng hi a zing vel chek chuk mai bawk a. Chuvang chuan rilru hahdam hian ka la awm hlei thei meuh rih lo chu a ni.

Ka taksa bung hrang hrang te lah hi a kham deuh them thum in, ka pang khawi lai lai emaw te phei hi chu meiling a han deh hlawk ang mai hian awm chang a nei bawk a. Kangthai kan ang mai hian min ti phu zawkin, a sa vel huai huai mai bawk a ni. Zep thu lah awm hek suh, ka tilmute pawh hi an bichhek zo ta vek emaw ti hian ka kun lap mai bawk a. Chutih nak alai chuan an thenawm pa, a mal a telhawng-pa ang mai a lo chawr ngawk lah hi, tunhma lam anga lo hawkdak ve peih tawh lovin, a nungchang hi a tha hlum dawn mai leh ta nghal a, a mak khawp mai.

Chuvangin, amah Kison Roy Babu (Khasi), hmanlai a Mizoram Sawrkar hna a lo thawh khan, “Ka nau maw, mak hle mai,” tih tawngkam hi a thusawi apianga a telh ve deuh ziah mai pawh kha, ka hriatchhuah phah leh ta hial a ni. Chubakah, tunah chuan keimah ngei pawh hi, “Kaih zangthala pa che che,” an lo tih chu ka lo ni ve ta hian ka inngai deuh ta bawk a ni.

A enga pawh chu lo ni ta sela, Chemtatrawta thawnthu a, “Kaikuang, engatinge a tilah I cheh mai ni?” tia an zawh lai a, Kaikuang tan ngaihna hre ve tawh lo phengin, “A hun ka ti ve hrim hrim,” a ti e tih thu, Pu Lalruaia Zadeng, nuihza siam pawh thiam ve zet mai khan a lo belhchhah tawh ang deuh bawkin, kha leh chen zu lo in chur chur tawhin, ka han sim ve hmiah takna chhan hi chu, “A hun ka ti ve hrim hrim” a ni ber mai.

Ani tak a, zu in mite hian kan hriat tlan theuh angin, han ruih deuh chhelhchhawlh tawh hi chuan pawisak a tlemin, khawvel hi ka ta ber emaw ti a han inchhek deuh hi a awlin, a nuam thei nameuh mai a, mahse ngaihdan lelo leh pawnlang taka han inhampuar duhna mai mai a ni. Chubakah a nawm chhung pawh hi hun rei lo te a la ni leh ta nghal bawk a ni.

Hemi zul zawng hian Arab ho pawhin wine chungchangah thawnthu pakhat an lo zuk nei ve tlat a. An sawi dan chuan, grape thei tiak an phunsawn tirhin tuikang lai a ni kher bawk a, a thang mawh hle mai a; chuvangin Arawn (peacock) an man a, a nghawngah an zai a, tichuan a thi chu tui aiah an hmang ta a ni. Reilote-ah grape kung chu a rawn chawr no ta a, nimahsela tui a la khamkhawp loh cheu avangin Sakeibaknei hrawkah an zai leh a, a thi chu an thil phunah chuan an leih leh ta a. Chutichung pawh chuan a la tawk loh cheu avangin Vawk lian tawk tak an man leh a,  a hrawkah bawk zai lehin grape kung bulah chuan an leih nawn leh ta poh a. Chutah zet erawh chuan grape kung chu a lo puitling ta hluai mai a, grape rah hmin tha leh thlum tui tak tak atangte chuan zu tha elkhen mai te hi an siam chhuak  zur zur ta mai a ni.

Tin, heti hi a ni a, a tobulin a zir bawk a, mi tupawhin, hai deuh chhelhchhawlh khawp a an han intulh hi chuan, Arawn anga mawi leh langsar leh ropui angin an han inngai hmasaber phawt a. Chumi hnuah an han invoh zui zel phei hi chuan an bul hnaiah an duh loh zawng mite lo awm ve te phei kha chu Sakeibaknei iangin an rumthaih duh nghal tawh mai a ni. Chumi hnu leh tawh a, aloaluakchhuak a la hap zui leh hlawp hlawp phei chuan an mizia kha zeldin phak loh khawpin a lo hniam tawh a, a tawpah phei chuan Vawk ang maia tal pawl leh che tawm tawhin, an mahni chetlatna hmunah ngei khan leichhuah hluiin an thusawp nuaih tawh mai nia hriat a ni.

Hetiang hi thil thleng thei anih avangin chaw eitui nan a han lem hlek chingmite lehintih hahdam deuh nana han tauh hmak duh ziah te pawh hian an hriat ve a tul hle in ka hria. Chuti lova, lu lam leh mawng lam pawh hre hrang mang lo khawp a zuin kan duh chhung chu, “Hmelma laka Ostrich sava tlanchhiain a lu chauh lang lova han chawlh zawkna hmun a hmuh hman phawt hi chuan, him ta luaah a inngai a,” an tih ang mai hi kan ni ve dawn a; mahse a him chuang hauh lo a ni.

(Chhunzawm tur…………….)

Similar Posts:

• Zawlaidi- Kan zu hming thar tur chu!
• Smokie concert chu….
• Hnahlan to become largest grape producer
• Zawlaidi-a ka ngaihdan leh a hriate ngaihdan
• “Grape tui sawrna” lo awm rawh se

Recent Posts:

• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan
• KOHHRAN PAWL HRANG HRANG LEH AN DINHMUN TLANGPUI
• Setana’n Evi A Thlêm Dân {Sunday Pual}

This entry was posted on Monday, May 20th, 2013 at 9:00 am and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.