mi(sual).com

Vanglaini 29, 2013 ah khan Trade & Commerce Minister Pu Lalrinliana Sailo leh Sagaing Region (Myanmar), Chief Minister U Thar Aye te (Minister tawiawmtu Pu Vanlalngaihsaka MCS, Lalzirliana Director, T&C, etc, te pawh an lang) te pahnih NE India-Myanmar Regional Business Conclave, Monywa, 28-29 May, 2013 a mi thlalak a rawn lang a. He Sagaing Business Summit a tel T&C Minister, Pu Lalrinliana Sailo thusawi Mizoram leh Myanmar insumdawn tawnna tur kawngpui siam mek, Zokhawthar-Rih-Tiddim, Lawngtlai-Zorinpui-Sittwee-te chung chang pawh ‘The Telegraph’ June 3, 2013 ah  tarlan a ni. Soviet Union a lo tlukchhiat hnu a tang a India in ngaihtuahna thar ‘Look East’ Policy mumal tak a lo neih tak hnu hian USA leh Europe lam hawi zawng vek a sumdawnna kum kha lehchen a lo kalpui thin chu tun ah hian khawchhak lam hawi zawng in boruak a in singsa chho mup mup mai a nih hi.

Look East Policy a tan lei lam a inkalpawhna kawngpui pawimawhber tur chu Moreh, Manipur leh Zokhawthar, Zorinpui te hi an la ni dawn. Tin, boruak lam ah pawh Gauhati Airport chu hman kum lawk khan International Airport a siam a nih tawh bakah, Imphal leh Agartala Airport pawh International Airport a upgrade na tur in India Sawrkar in Rs 160 crores zet seng in hma a la chho mup mup a, Imphal International Airport phei hi chu July, 2013 ah chuan hawn hman tum a ni. Heng Airport-2 te a Air Trafic Control Tower siamna tur hian Rs 10 crores ve ve pek fel tawh an ni bawk. Tripura phei hi chu inkalpawhna kawngpui nei ve lo an ni chung hian an lo chuh chak awm hle mai. Engpawhnise, kan Minister leh helam Department pawhin tan an la nasa hle tih ‘Zokhawthar’ ‘Zorinpui’ tih vel chanchin kan hriat fo dan a tang pawh hian a lang e. A thahnem ngaihawm lah tak a.

Look East Policy hlawhtlinna tur atana hmalakna Business Conclave a tel tur hian Manipur State aiawh in Chief Minister, Ibobi Singh leh a mah tawiawmtu mi-45 zet an fehchhuak a. Myanmar  leh Manipur inkar a thawhhona leh inthianthatna tur atan Ibobi Singh hian Business Conclave neih lai June 1, khan Imphal a awm Shija Hospital a thawk ten Monywa khua a hmui leh dangkak te tan a thlawna inentirna ‘Free Clinic’ an buatsaih chu Sagaing Region Chief Minister U Thar Aye nen an tlawh a, hemi ni hian mi-87 zet a thlawn a zai an ni. Free Clinic dang thla-3 vel hnu ah buatsaih a nih leh tur thu leh a senso zawng zawng pawh Manipur Sawrkar in a tum vek tur thu Chief Minister, Ibobi Singh hian a sawi bakah Monywa khua ah hian Damdawiin sakna tur ram Acre 50 Myanmar Sawrkar in a pek theih chuan Damdawiin India in a sak sak tur thu leh Damdawiin chu Medical College, mi-100 zirlai awm theihna tur in siam a ni nghal bawk ang a, Myanmar zirlai-75 leh NE zirlai-25 tan chhawr theih a ni ang (Vanglaini 3.6.2013).

Aw le, hetiang khawpa Ibobi Singh kaihhruai Manipur Sawrkar in Myanmar sawrkar leh mipuite lak a that chhuah leh tlaktlum a tum viau lai hian, keini Mizorama chengte pawh hian eng emaw chu tihtur kan nei ve dawn lawm ni? Tunhnai lawkah Pu Sangzela Tlau, Pu Vanneihtluanga te leh Mizo Academy of Letters a kan mi chhuanvawrten Myanmar an han tlawh a, khilama kan thisen zawmpui, kan Mizo unaute zinga an thiltawn leh hmuh bakah tun hmalama an chanchin kan lo hriatloh tam tak chu hriat leh hmuhtheih in kan sitting room ah min rawn chhawpchhuahsak a. Sawrkar puihna tel miahlo (beisei tur pawh a awm lo, an beisei lo bawk) a Tahan Bazar kang an dinthat leh dante, favai a power siamchhuah, sum thawhkhawm in khawl mawlte lei a luite khuap in zan a chhit tur eng an siamchhuahte leh an khawsak phung hrim hrim te chu en an nuam hle mai. Keini tan chuan kan Mizo pui, ‘eng a?’ kan tihpui theihte leh a chhehvel Tiddim, Falam, Halkha, etc a chengte pawh ‘Chhura leh Naa’ thawnthu, etc. nei kan thisen zawmpui USA, Singapore, Australia, etc ah te chuan Krismas, Chapchar Kut, etc lungrual leh hlim tak a Mizo hming a thiltihna a hun hmangho thin te tho an ni. Vanglaini May 29 ah chuan USA a Mizo ten May 25-26 ah Indianapolis a Chapchar Kut hmang a mi-700 chuang zet Zofate kut hmang in an fuankhawm thu a lo lang. Heng pungkhawm hote hi Myanmar leh India, etc a cheng zofate tho an nih hmel. Tunhmalam deuh 1980’s chho vel a USA a zin pha, mimal leh ZEF zaipawl te khan Maryland, Washington DC vel ah Mizo chhungkua an awm ve nual thu te Rochunga Pudaite in ah chaw an ei leh Mizo chawhmeh diktak an hmeh thu te kan lo ngaithla thin a nih kha. Amaherawhchu, tunhnai mai a kan boruak leh thil thleng te ngun tak a han ngaihtuah hian chhak leh thlang a cheng Zofate inkar ah eng emaw inhriatthiam tawklohna awm palh thei dawn dawn in a lang tlat. A bik in thlang lam a cheng, inpui nghaktu zofate hian mawhphurhna kan kovah a innghatlian hle tih kan hriat nawn fo a tul tak zet zet a ni. Business Conclave a tel Manipur Chief Minister, Ibobi Singh hian Myanmar lam ah kei ang in ngaihngam leh luangmuang tak a lunghahna tur a chipuite a nei ve ang em aw? tih ka ngaihtuah.  Nakin lawk ah chuan tun a Kolkata, Europe, US etc lam kan hawi thup ang mai hian khawchhak ni chhuahna ram, thlahtubul, u leh naute awmna lam ram hi kan la hawi ngei dawn ni in a lang mek si a.

1961 khan India leh China hi nasa tak in an lo indo tawh a, he Indona ah hian India chu chanchhe zawk ah tang in a mualpho hle. Tunhnai te ah India leh China ramri chung chang ah an in ngur leh deuh a, tlem ah tlem ah eng em a thleng lo hlauh, inremna tak tak pawh awm chuang lemlo in sipaite ramri a tang an tawlh hla tawn hrut ve ve ngawt a. Hetih mek lai hian Prime Minister, Manmohan Singh chu, Idia tlawh a rawn zin Chinese Premier, Li Keqiang haw hnu lawk ah Japan (China nen a ramri buai tunhnai a nei mek) leh Thailand te tlawh in a zin chhuak a. May 30, khan a rawn haw kawng ah Thailand PM Ms. Yingluck Shinawatra nen ‘TriLateral Highway Project’, Moreh (India) – Mandalay, Yangon (Myanmar) – Mae Sot (Thailand) kawngpui km-3,200 a thui chu kum-2016 siam zawh tur in thu an thlung. He kawngpui siamna a tan India in Myanmar hnen a 500 Dollar (Million) a puktir hmang in kawngpui thar nasa tak a siam mek a ni. India Prime Minister zin hi China mit a tikham hle a sawi a ni.

Awle, hetiang hi tunlai thil awmdan a nih si a vang leh kan thenawmten nasa tak a tan an lak lai hian Zofa, chhak leh thlanga chengte hian boruak tha siamna tur in engtin nge hma kan lak ve ang? Cultural & Music Festival te Sawrkar tan tih a remloh pawh in YMA, MZP/MSU, MZI, etc te hian huaihawt thei se, Aizawl leh Tahan, etc ah hlim tak in hmang mup mup mai ila. Myanmar lam unaute pawh hetiang lam ah hian lo bengvar ve ta bawk se. Hetihlai hian, misual, awmhmun nghet nei lo, ram, khua leh nu leh pa erawh nei ve si ang chi te hi hrem leh man an nih theih nan dan kengkawhtute tanpuina ah tangrual hlauh thung i la. A chi a chi leh hnam leh ram ang a in vaihma mai lo in. Tu tu te emaw grenade zuar man vang emaw, zu leh ruihhlo zuar mansak ang chi ah te pawh a chi leh kuang, ram leh khua ang te a i tawngpawng puh ngawt lo in. Thil a fuhloh palh vek vek zawng in, unau leh thisen zawmpui ngei ni si, In hmelmak leh huat laklawh palh tawh vek vek chu North-South Korea te buai dan te hi a ril duh em mai. Hawh u, kan tunlai hun tawn hi nguntak leh bengsik a in ngaihtuah tlang in eng emaw tak chu i ti teh ang u.

Similar Posts:

• Lirnghing
• Aizawlah Manipur hel pahnih man
• Kaladan project thuthlung
• Responding to the Rising Rupee
• Hei le Kolodyne Multi Modal Transport Project chu!

Recent Posts:

• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!

This entry was posted on Friday, June 7th, 2013 at 7:07 am and is filed under Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.