mi(sual).com

I chhiar tur hi khua emaw hnam bik emaw hmuhsitna leh nuihzatna thu a ni lova, Zoram buai lai chanchin kha a hlimawm lam a awm lo lulai em mai a. A hlimawm zawnga thlir tumna a ni. Chutih rualin khatih hunlaia ‘nationalism’ buaipuitu zinga tamtakte pawh kha an thil buaipuiah khan an chiang vek bik lo hle tih a hriat theih mahna!

“Mahni-lo-maha kan dinhmun a that tawh nak laia, tun ataka Zoram Independence lo ngen ve te chu, zawh loh nghawngkawl a hrawk rek zawnga bah ang mai pawh a ni lo, ‘Pialtlepa liluh tum ang a ni’”(Zoram Politic Lumlet Dan, 2nd Edition, p-197) tia Pu A. Thanglura te ho an huk dum dum hnu, March ni hnih 1966 atanga Rambuai (Disturbed Area) a puan kan nih tak pawh khan Ngaizawl khua hian Zoram-in Zalenna a sual tih an lo hre ve lo ni ngei tur a ni. Pu C. Lalpara thuziah Buailai Boruak , Rambuai Lai leh Kei, tih lehkhabu Mizoram Upa Pawl chhuah atang hian rambuai laia Ngaizawl khaw chanchin ilo ngaithla teh ang u.

IN HNEH AWM DER SI LOVAH: Zan khat chu zanriah eikhamah a thim hle tawh tihah khan Champhai Keifang tlang sipai camp kha a alh ta hluah hluah mai a, sipai ho tih kan palh mai a nih an ring a. Khawzawl sipai camp-ah lah chuan silai a ri reng mai bawk si a, chan an kap a nih te an la ring ta mai mai a. An khaw chhehvela an han vahchhuah nak a lai chuan an khaw thenawmte lah chu ramhnuai mi (MNF Volunteer) chaw pein an lo phili buai hle tawh mai si nen, an ni buai thuhla engmah lo hre ve lem lo chuan thil awmzia an han zawt chiang ve ta a. Mizoram-in Independence a sual ani tih an han hriat chuan, an han ring lo laileng khawp a, ‘In hneh awm der mai si lo va, do duh suh u,’ te an tihsan mai mai a.

ENG DENCE PAWH SUAL ANG HMIANG: March ni 15 a lo thlen meuh chuan leh! Ngaizawl khua chu lo hal tur chungchangah an buai hle a. An chhehvel khuate ramri veng turin an hrilh a. An khaw thenawmte lah chuan, ‘Lo hal a sawi theih loh, kan ramin independence kan sual a nih hi, engmah rawn sawi tawh suh u,’ an lo tihsan mai si a. Ngaizawl VCP Pu Ngulhenthanga chuan, “ Eng dence pawh sual ang hmiang, chaw ei loin kan awm thei dawn em ni? Keini chuan independence aiin, hlo thlawh theih loh kan hlau zawk. Ramri chinah meilam sat chhuak vel ila, I hal mai ang u’’ a tih leh an khaw mipui chuan an ngam chiah si lo: A tawp a tawpah chuan nasa taka an inhnial hnuah hal chu an ti thlu ta nge nge a ni.

Ngaizawl khuaah hian India sipai an kal ve fo thin a, mahse sipaiin mipui an hmuh danah ‘politician’ hmel an awm lo nge ni, Mizo theuh mah ni ila, tawng hrang (Paite) an hman vang pawh a ni ang. Tin, an vanneih ve hrim hrim vangte pawh a ni thei bawk ang chu. Ngaizawl khua an han thlen chuan rin aiin an tha viau zel mai a. An khaw roreltute tan pawh a hahdam thlak em em thin a ni.

LAL PAHNIH RAWNGBAWL A NGAI TA SI: Tumkhat chu Ramhnuai lam mi an hotu pakhat a hote hruaiin Ngaizawl a han thleng a. Khua a curfew a, mipui a khawm a. Thu a sawi ta a, “ MNF pawl chauh Mizoram-ah an awm thei a, Party dang reng reng awm phal a ni lo, MNF hi in zawm tur a ni. In zawm duh loh chuan in duhna lam lamah kan dah ang che u” tiin. Mipui chuan, “ Duh ta lo ila, engtin nge min tih ang. Khawiah nge min dah ang?” an ti a. MNF hruaitupa chuan, “A harsa hleinem. Feet 6 a thuk leh feet 3 a zauah a ni mai a lawm. Tunah a duh leh duhlo VOTE kan la ang. MNF zawm duh zawngin in ban dinglam phar rawh u le!” a ti ta mai si a le. “An duh vang pawh ni loin, an hlauh vang zawkin mipui chuan an ban dinglam chu an phar suau mai a ni” tiin an khaw zirtirtu Pu Theua chuan a sawi.

A sawi zel danin, “A khaw pum mai chuan MNF supporter a nih loh theih ta si lova. MNF lam tang an ni zo ta vek mai a ni”. Tichuan, MNF lamin puakphurah an chhawr ta zel a. Tin, India sipai lam pawhin an chhawr bawk si a. A lehlam lehlam chuan hnial ngam a ni bawk si lo. Lal pahnih rawngbawlin an buai tawn ta chhen mai a ni.

TUIBUR CHUANG AN NEI BIK LO: Vawikhat chu Khawzawl Camp O.C. chuan Ngaizawl VCP hnenah tuibur a dil mauh mai a. An VCP chuan, ‘ka han zawng a nge’ a ti a. A kal ta a, a va hmu lem hlei lova. A hmuh loh thu pawh chu a hrilh lem lova. An ngawi liam ta mai a.
An lo kal leh tum chuan O.C. chuan, “Ka tuibur zawntir che kha i hmu ta em?’ tiin a zawt a. VCP chuan eng danga chhang ta lem lo chuan, “A ni tak ka pu, ka han zawng ngial thin a, tuibur chuang a lo awm reng reng hleinem maw le,” a ti theuh mai a. An O.C. pawh chuan tihngaihna hre hek lo. A ngawihsan ve ta mai mai bawk a.

NGAIZAWLAH CURFEW A THEIH VE LOH: Vawikhat leh pawh, Aizawl atangin helicopter-in paratrooper sipai a rawn thlak a. Chung sipai ho chuan Ngaizawl chu an awmchilh ta a. VCP hnenah chuan, “Zan dar 5 atanga zing dar 6 thleng curfew a ni ang, tiin ka pu tlangau tir rawh” an ti a. An VCP chuan, “E ka pu, keini chu curfew ve theih kan ni lo, zan lamah hi kan in kawmkhawmna hun neihchhun a ni a, zu te kan inho duh thin a. Curfew a theih ve loh, Ramhnuai mi in hlau a nih chuan keiman kawtchhuah tinah tlangvalho ka duty tir mai ang, hlau reng reng suh, hetah nangni hoin awm bawksi chuan ramhnuai mi chu an lokal lo reng reng ang” a ti ve tlat mai a. Sipai ho pawh chuan an curfew ta lem hlei lo va.

MOVEMENT PERMIT A HLAWMIN: Vawi khat chu, “Pem hruai tur an awm a, a thei apiang kal tur a ni” tiin tlangau a lo au a. An kal ta hlawm a. Chumi ni chuan Assam Rifles ho Ngaizawlah an lo lut teuh mai a. Tlaia pem hruaiho an lo thlen chuan sipaiho chuan VC Permit an neih leh neih loh an lo zawt zel a. Tuman an nei si lo. An hotupa chuan a dahhran tir zel a. A khungkhawm ta teuh mai a. An VCP hnenah chuan, “Khua atanga kal chhuak tur reng reng VC Permit an keng zel tur a ni tih order pawh i hmu si a. Enga tinge permit i pek loh?” tiin an zawt a. Pu Ngulhena chuan, “A thei apiang kal tur ka ti mai si a, a kal zat tur pawh hre hek lo i le. Chubakah, a hlawmin lehkha pakhatah ka siamsak mai a ni. A mal mala ka pek chuan ka lehkhapuan pawhin a daih dawn lo a ni” tiin a chhang a. Sipai hotupa pawh chuan, “A nih tak chu” tiin a mi mante chu a chhuah leh ta vek mai a ni.

NGAIZAWLAH MNF AN LUT: Vawikhat leh pawh, Ngaizawlah MNF mi 8 an lut a. An zinga pahnih chuan silai an pu a, a dang zawng chuan tiang lian tawk tak am hawl bawk a. VCP hnenah chuan chaw an dil ta a, chi an dil, bel an dil leh a, vaihlozial nen, an kal ta a. Chu thu chu Khawzawl Camp O.C. Second Lieutenant Mukharji-a chuan a lo hria a. Ngaizawl-ah han kalin investigation a han la a. MNF ho lo kal thu sipai camp-a a report loh chhan chu point a hmangin an VC te chu a chhuahchhal ta a. VC te chuan, “Mi 8 lek chu India sorkar pui meuh chuan a er lawng chu kan ti mai a. Tin, chubakah, kan rawn report dawn tih an hriat chuan min vaw nek anga, an tlanbo leh daih si anga, nangnin in rawn man hman dawn chuang si lo” tiin an chhang a. Camp O.C. tihngaihna dang hre lo pheng chuan, “ A nih leh tunhnuah chuan an kal liam hnuah in rawn report mai dawn nia” a ti ngawt mai a ni.

Kum 1968 kum bul lam, Ngaizawl khaw chhehvela khuate an khawm deuh vek tawh hnuah, a hnuhnung berah Ngaizawl khua chu Khawzawl-ah khawm a ni ve ta a ni. Mahse Khawzawl thleng chu in 20 emaw lo liam anni lo ang. A hmaa za nufa khua ni thin kha, in 70 zet chu tiau ral an kai a mahse Burma sawrkarin tiaukamah a rawn hnawhthlak leh avangin Hnahlan-ah te awmhmun an khuar hlen ta. In 60 dawn lai erawh chu Burma lamah bawk an chho leh ta a ni. Kum 1972 a Mizoram U.T. a nih khan in 10 emaw lek chuan an khaw hluiah hian an han inbawk leh ta a ni.

A sei deuh tawh avangin Pu Chawngzuala ziak, ‘Ka Hringnun ZinKawng, 1st Edition‘ phek 23 a mi hian khar tum tawh mai ang aw.

‘Vawikhat pawh ramhnuai lam Parliament Speaker Pu Vanhela leh a hote Ngaizawl khuaah hian zankhat an riak a, chu chu misualin Khawzawl vai sipaite hnenah an lo zuk report a. Pu Vanhela te kal liam leh tawh hnuah Jamadar hovin vai sipai chu an han kal a. Ngaizawl VCP hnenah chuan, “Enga tinge i khuaah Speaker a riak a, i rawn report vat loh, nangmah man i duh em ni, ramhnuai lam sipai an lokal chuan report vat tur kan ti si a.” Jamadar chuan a han ti a. Ngaizawl VCP chuan a en ang he haw a, “E ka pu, sipai an inti leng leng lo, Sipikal a inti tlat a lawm,” a ti ve mauh mai a. Tih ngaihna an hre lo hle awm a sin.’

‘Kan Ram buai chungchangah khan Mizo mipui zawng zawng ngaihdan chu a inang vek thei lo tih hriat a ni. Mahse, Mizoram leh Hnamin Zalenna kan sual a, Pathian min siam leh hnama min din ang ngeinn kan pianpui dikna chanvo chu humhim turin kan bei a ni. M.N.F. rammute khan a takin Zalenna kan sual a; a takin nunna kan hlan a; a takin Zofa mipuite pawhin kan tuar bawk’ (R. Zamawia, Zofate Zinkawngah- Zalenna Mei a Mit Tur a Ni Lo, 2nd Edition, P-944)

Similar Posts:

• Chengrang chawi lai ni-te
• Lal Huaisen Zakapa
• Thuampui burning…
• Saikumphai chungchang hi enge in ngaih ve dan le?
• Pre-Hmuifang MI

Recent Posts:

• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL
• President Trump ka hmuhdan (amah thlawptu lam atangin)

This entry was posted on Saturday, July 27th, 2013 at 6:12 am and is filed under Books, Event, HAHAHA, Mizoram, Politics. You can follow any responses to this entry through the RSS 2.0 feed. You can leave a response, or trackback from your own site.