Engtizia Nge?
Lal Isua, Pathian Fapa thihna chhan hi tihpalh emaw tihdik loh (Judate rorelna dik loh) avanga thleng ta a ni satliah mai lova, Pathian chatuan thiltum hlen chhuahna leh Pathian hnathawh dik tak lo thleng a ni ber zawk. Adama sualna chuan khawvela thil siam zawng zawng chungah thihna a rawn thlen a, Lal Isua thihna chuan thihna chu a hneh a, thiltisualtute hnenah nunna a rawn pe leh ta a ni. Paula chuan hetiang hian a rawn sawi fiah a, “Isua chu kan sualte avangin mantirin a awm a, thiam kan channa turin kaihthawhin a awm bawk a” tiin (Rom 4:25). A Greek ţawng dik tak lehlin chuan hetiang hian a ni – Ani chu kan sualna te avangin thihna hnenah pek a ni a, thiam kan chan theih nan nunna nei tura kaihthawh a ni.
Lal Isua kan aia a thihna chuan khawvela min tibuai ţhintu thiltihtheihna chi hrang hrang-te chu a rawn hneh (tlawm) vek a. Lal Isua thihna chuan Pathian nen inremna min siamsak a (Rom 5:10), tisa sualna awm chu thiam loh a chantir a (Rom 8:3-4), Pathian hmaah thianghlim, hmelhem lo, leh sawiselbo niin min siam a (Kol.1:22), kan sualnate min ngaihdam bawk a ni. (Kol.1:13, 14 ).
A Ni Thei Dawn Emaw Ni Le?
Lal Isua thihna chhan hre lo leh pawm lotute tan chuan an awih thei lo reng a. Chuvangin, an tan chuan thu âtthlak a lo ni a (1Cor. 1:22-25), kumthum chhunga a lo hruai ama Zirtirte ngei pawh kha, Lal Isua ber a thih avangin an beidawng êm êm a, “Keini’n Israel-te tlantu tur kha a nih kan beisei tehlul nen” tiin (LK.24:21) an beidawn thu an sawi nghe nghe a nih kha. A ni reng lah taka, Pathian Fapa meuh nisi, a thilsiam mihring-te kuta a han thi ta tlat mai chu! Greek mite tan chuan hriatthiam a harin, pawm ngaihna a awm lo reng a ni. An hun laiah chuan Greek mite aia finna (philosophy) lama sang zawk tur khawvelah tumah an awm lo. ‘Pathian fapaa inchhâl Isua Krista chu, Pathian a nih tak zet chuan a thi thei lovang a, khawvela mihringah pawh a lo chang (incarnate) lo vang’ tih chu an ngaihdan a ni bur mai!
Greek Miten An Awih Lohna Chhan
Greek mite chuan thil zawng zawng hi sualah an ngai vek a (all matter is evil). Chuvangin, Sual leh Pathian chu eng tikawng mahin a inkawp-rem thei lo va. Pathian pawhin englai mahin Sual a pawm thei ngai lova, Sual pawhin Pathian a hnaih thei lo niin an ngai a ni. Greek mifing Celcus chuan hetiang hian a sawi nghe nghe a, “Pathian chu ţhatnaa khat, mawinaa khat leh hlimnaa khat a ni a, Mihringa lo chang tur hian heng zawng zawngte hi a inthlâk vek a ngai a. Ţha aţangin sualah, mawi aţangin chhe berah, hlim aţangin hlim lovah, ţha ber aţangin ţha lo ber han nih chu Pathianin engtikah mah a pawm thei ngai lo vang” tiin.
Chuvangin, Greek mite ngaihdanah chuan, mihringte chhandam kan nih theihna tur hian Pathian mihringa a lo chan (incarnate) hi a ţul lova, khenbeh lek phei chu (Kross-a thihna) thil theih loh hulhualah an ngai a. Misualte tan leh misualte aiawh-a Pathian a thi phei chu an tan chuan thu âtthlâk lutuk a ni ta a ni. Hei tak hi keini Lal Isua neitute tana chiang leh hlu êm êm si chu a ni. “Kross thu chu boral mêk te tan chuan âtna a ni a, keini chhandam mêk te tan erawh chuan, Pathian thiltihtheihna a ni zawk e” (1Cor.1:18). Pathian Fapa mihringa alo channa te, misualte aia a thihna te, thiam kan chan theihna tura kaihthawha a awm te hi Pathian hnathawh liau liau vek a ni.
Pathian A Thi Tlat! Chhan Ţha Tak A Nei
Lal Isua chu a thi ta! A thi chiang khawp mai! A thih hnu-a, phum a nih dan pawh hi Chanchin Ţha bu 4 ten chiang takin an ziak vek a (Mt.27:57-61, Mk.15:42-47, Lk.23:50-56, Jn.19:38-42), Tirhkohte thuhrilhnaah pawh an sawi uar hle bawk (1 Cor.15: 3-5, Tirh.13:26-31 ). Lal Isua thih thu an record vek na chhan nia lang chu Pathian fapa, Isua Krista misualte chhandam tura khawvela lo kal hi misualte chhandam turin a thi ngei a ni tih tichiang turin a ni (Mk.15:44-45, Jn.19:33). Pathian fapa Lal Isua meuh thihna a nih avangin a mak a, a ropui a, a hlu êm êm a, Fakna Hla siamtu chuan Lal Isua thihna hmun, a tlâng tak ngial pawh chu a ngaihlu êm êm a, hmuhsit a phal lova, ti hian a lo auchhuahpui hial nghe nghe a ni!
Aw, Tlâng mawi Kalvari,
Miten Hmusit mah se,
Tlâng dang zawng zawng aiin,
Kei zawng ka ngaina hle,
Aw Hlimna Tlâng, aw Hmun Thianghlim,
Pathian thisen a luanna chu…
(KHB No. 179)
{{::Excerpted From the Book “Apostolte Thurin” (2002), pp.101-102::}}
Similar Posts:
- Beiseina siamtu thawhlehna
- Tunlai ka mutmawh hnarmawh.
- Isua hi Pathian a ni
- A hmun leh a hun (Sunday Pual)
- Pathian Chhandamna Ropui Hi
July 28th, 2013 at 6:24 am
A tha h1e mai.
Report this comment
July 28th, 2013 at 8:05 am
Tunlaiah Fb lamah, “Pathian hi a thi thei lo” tia tan khawh leh, Isua Pathianna hnawl zirtirna a rawn inlar nasa sawt hle. Keini tan he “Thi theilo thihna” leh ‘Amahah leilung a vir muah muah laia, chu leilung ngeia a siamtu an han zalh te, Kraws kan han belchiang tak tak a, chu thingkawkalh satliah, Leiah leh Vanah pawh thi tlak lo, khaikana awm, misual turu zual bik anchhedawngte chauh thihna tur hmuna ‘Ropuina Lal’ min hmangaih vanga intitlawm a, tlawm taka a han thi duh mai hi, a makin a ril lutuk a, “Ka hlawkna ber ka ngainep a, Chapo uanna ka ngaitlawm a” ka lo ti ve zawk hi ani si a. Good Post
Report this comment
July 28th, 2013 at 12:59 pm
Pa leh Fapa leh Thlarauthianghlim hi,
mi hrang thiau ang a kan in zir tir fo na hian, Isua Pathian na pawm a ti har sa hle a nih hmel. Pa chu chung nung ber leh thu neih na zawng zawng nei tu. Fapa e rawh Pa thu lo va eng mah ti ngam lo, ti thei lo ang ah a ngaih theih tlat reng a ni. Tin, mi hring ah phei chuan, Fapa ai-in
Pa in, thu neih na kawng eng kim ah a neih zawk hi. Chu vang in, Fapa chu
Pa ai-in a hnuai hnung zawk a, Pathian fam kim a nih na pawm a ti har sa ta thin a ni. Thlarauthianghlim phei chu, Pathian PA chhiah hlawh,
PA tirh kah ang a ngaih kawih a awl duh khawp mai. Trinity kan hrilh fiah dan a dik tawk thin loh a vang in,
Pu Pka sawi ang khi an tam phah a ni ber awm e.
Report this comment
July 28th, 2013 at 1:55 pm
Gud post,.Khawvel mihringte chhandamna thu hi a ropui. Mahse ka hriat belh leh chak chu chhandamna dawngtute lam tihve tur lam hi a ni. Ngaihdan chu a inang lo maithei, Ngaidan mumal zawk kan neih theih nan post thar nghak leh phawt mai ang.
Taka, ka request kha a chhuak har ta hle mai. Ka luh loh tum hian i lo tichhuak tut ange?
Report this comment
July 28th, 2013 at 2:44 pm
“Adama sualna avangin khawvel thil siam zawng zawng chungah thihna a thleng” tih hi i uar lutuk deuh em aw ? ka ti deuh a, kei chuan ka hrethiam reng a, a bawplawka la a, hnial duh tlat pawl/thin hi an awm thin si a, ka’n ti deuh va, ka chhiar chhuah hma in ka rawn sawi lawk a ni e.
Report this comment
July 28th, 2013 at 2:54 pm
Ka chhiar chhuaka tha ka ti lutuk,ziak lam ah hian ka thiam ve silova, chhiar lam hi chu nuam ka ti viau a nia, Post tha tak a ni e.
Report this comment
July 28th, 2013 at 4:46 pm
Sarmon tha tak chhiar tur chawlh ni a
min rawn hlui thin a vang in, a lawm awm thin khawp mai. Post tha tak chhiar nuam tak a ni e.
Report this comment
July 28th, 2013 at 6:14 pm
A van tha thin tak em!
Report this comment
July 28th, 2013 at 7:41 pm
#1 chhana, thanks
#2 Pu PK, ka lawm e. A lo va remchang tak ve! FB lamah an lo ti nasa tih ka lo hre hlei nem, ava tih-zia ve…
#3 & 7 Sihtea, a dik khawp mai, kan fimkhur tlan chu a tha
#4 Athana, thanks. I Request kha Next Sunday-ah ka lo tum tawh ang e. Ka Nau Lr-a Request nen rawn tih hram ka tum ang. Kan Pu a zin a, a aiawh a ngai a, ka buai em a, ka lo ti hman ngang lo alawm le, ngaidam ngaidam …
#5 & 6 Mr.Taurus, thanks. Ni e, uar lutuk hi thil hlauhawm a ni. Ka lo uar lutuk a nih chuan min hrethiam dawn nia. Ka han uar tak viau na chhan chu, Pathian ngeiin, Adama hnenah, “Lei hi nangmah avangin anchhe dawngin a awm ta!” a ti a (Gen.3:17). Heta ‘Anchhedawng’ a tih hian a sawitum ber chu ’tisa leh thlarau thihna’ a ni.
#8 Awmtea thanks
Report this comment
July 28th, 2013 at 8:59 pm
Ka hlawkpui hle mai
Report this comment