Nikodema Hi Tunge?
Lal Isua’n Nikodema a Interview-na hi mimal inbiakna a ni satliah mai lova. He inkawmna hian ‘Mihringin Pathian a hmuh/hriat dan leh Pathianin mihring a hmuh/hriat dan’ chiang takin a hailang a ni. Nikodema chungchang hi Bible-ah a inziak tlêm hle a, a inziak chhun erawh a pawimawh ngang thung. Nikodema hming hi Bible-ah vawi 5 a chuang a, a chanchin leh thiltih hrang hrang lanna erawh vawi 3 chiah a ni thung (cf. John 3:1,4,9,7:50,19:39). Nikodema tih hi Grk.nik-od’-ay-mos (eng.nicodemus) aţanga lâk a ni a, “mipuite ngamtu” (conqueror of the people or victorious among his people) tihna a ni. Bible-a a chanchin kan hmuh leh history aţanga alan danin Pharisai, Sanhedrin member, thiltithei leh hausa tak a ni (cf. John 3:1,10, 19:39). Nikodema chanchin hian ‘Pharisai zawng zawng hi adera nung an ni vek kher lo’ tih a tarlang nghal awm e (pharisees were not as a whole so hypocritical as people think).
Zanah Kher Kher Isua Hmu Turin A Kal?!
Nikodema’n zanah kher kher Lal Isua hmu tura a kal hi thil mak a ni a, zawhna a ti tam hle. A chhan ber chu, Judate ngaihdanah chuan Setana’n zanah nasa takin hna a thawk ţhin niin an ngai a, hemi avang hian Juda Rabbi-te hi zanah an chhuak-vak thiang lo tluk a ni. Hetichung si a, a zan zan-a Isua hmu tura Nikodema a kal tlat hian, thu sawi pui a tum hi a pawimawh tawk tih a tarlang nghal a ni. (1). Scholar ţhenkhat chuan, Nikodeman zan kher kher a chuhna chhan hi Judate leh a Pharisai ţhiante hriat a hlauh vang niin an ngai a, (2). Ţhenkhat thung chuan, a thil hriat duh-te hi hun duh rei chi a ni a, chhunah hun a nei lova, Lal Isua pawhin chhunah chuan mimal kawmna hun a nei lo tih a hria a, zan reh hi a rawn chuh niin alang, an ti ve thung. A dik ber kan hre lova, mahse, a pawmawm ve ve khawp mai!
Zawhna leh Chhanna INTULO Chu…!!!
Nikodema thil hriat duh ber hi a Zawhna aţang hian a chiang hle a, “Rabbi, Pathian hnen ata Zirtirtua lo kal i ni tih ka hria; Pathian an chunga a awm loh chuan heng thilmak i tih ang hi tuman an ti thei lo vang” (3:2). Nikodema hian Lal Isua thilmak tih (miracles)-te a lo hria a, Zawlnei ropui leh thiltithei tak a ni ngei tih a pawm hmiah a (a Juda-puite ngaihdan pawh a ni tel a ni tih alang). Zawlnei ropui nia a hriat chu kawm chian a châk a, hriat-chian lehzual a duh tih alang.
Mahse, Lal Isua hian Nikodema hriat duh, rilru leh a tum (inquiry & reasoning & motives) chu chhang ta lovin, a Subject a thlak sak hmiah! Nikodema mamawh ber leh damchhan zawk Chhanna (unexpected answer to his most eternal spiritual needs) chu a hlui ta zawk a ni! Lal Isua chuan, “Tih tak meuhvin, tih tak meuhvin ka hrilh a che, mi tupawh an pian thar loh chuan Pathian ram an hmu thei lo vang” (3:3) tiin, Nikodema Damchhan leh a Mamawh ber chu Pianthar a ni tih a hrilh ta a ni. Nikodema hian mak a ti êm êm a, a tum loh khanah a chhuak tih a hria a, a buai nghal map tih a hnu-a a zawhna-te hian a tichiang.
Tui-ah Leh Thlarauva A Pian Loh Chuan…
Lal Isua’n “Piantharna” thu a sawi hi Grk.gennêthê anôthen a ni a, hei hian ‘Piang-nawn’ or ‘Chunglam aţanga piang’ (born again or born from above) tihna a kawk a. Miin Lal Isua ring a, Lal leh Chhandamtu-a a pawm veleh, chumi chu Pathian faa chhiar niin, Thilsiamthar (new creation) a lo ni ta a ni (cf. 2Kor.5:17; 1Pet. 2:2). Thim aţanga ênga chhuahna (an emergence from darkness to light) ang pawhin a sawi theih bawk (1Pet.2:9). A Greek ţawng hi chuan ‘Chunglam aţanga tih-danglamna leh hriatpuina’ (Grk.anṑthen, new birth & recognition from above, cf. 3:31, 19:11,23, Jak.1:17, 3:15,17) hi sawi a tum ber niin alang.
Nikodema hian Lal Isua thusawi “Piantharna” thu hi a hrethiam lo ni lovin, a tan chuan thil mak tawp, thil theih loh hulhual ang a nih avanga mak ti a ni zawk. Nikodema (Judate tiamin) ngaihdan chuan, Abrahama thlah Israel mi nih leh, Pharisai nih leh Judate serh leh sang zawm chu Vanram chahbi-ah a ngai hmiah a. Mahse, Lal Isua hian, nihna (Abrahama thlah Juda-mi nihna) te, dinhmun (pharisai nih) te leh thiltih-ţhat (serh leh sang zawm) ringawtin Vanram a kaitir dawn lo tih chiang takin a sawi a ni.
Nikodema hian Lal Isua sawitum hi a man chiang lutuk. Chunglam Pathian hriatpui tlak nih a duh tak tak chuan, Gentile mi, Juda Saphun chunga Judaten an thil beisei ang chiah chiah kha Nikodema hian a tih ve a ngai dawn ta tlat mai! Miin Juda Saphun nih a duh chuan, chumi chu an bualfai phawt a, thawmhnaw thar an hak-tir a, Juda serh leh sang, dân leh hrai zawng zawng zawm turin an lawm lut ta ţhin a ni. Chuvangin, mak a ti lutuk a, har a ti-tawp-khawk a, “Engtin nge mi a tar hnu-in a nu pum-ah vawi 2 lut-in a pian leh theih ang?” a ti hial a ni. Gentile mi-in Juda sa a rawn phun chuan, Juda sakhaw serh leh sang leh culture zawng zawng za-a-za zawm vek turin an phut a. Hetiang chiah hian, Nikodema hian Vanram a beisei chuan Tui-ah leh Thlarauvah a Pianthar a ngai a ni. Eng thil nge Nikodema hian har a tih êm êm chu ni ta ang le?
I Piangthar Tawh Em?
Pathian fapa mal, Isua Krista, Messiah kan sual tlanna atana Kross-a thi kha rin a, sual sim a, a duhzawng tih chhunzawm kha Tuiah leh Thlarauva Piantharna chu a ni ta! (John 3:1-18, 8:37-44). He Pathian Chatuan thiltum leh ruahmanna hi Nikodema pawh hian a hrethiam lova, pawm harsa a ti êm êm a ni. A tawi zawngin, Lal Isua chu Pathian tirh Zawlnei ropui tak, tuemaw ang chuan a hmu a. Mahse, Messiah, Judate beisei leh Khawvel Chhandamtu tur anih thu a hriat erawhchu… a pawm thei ngang lova, a ngaihdan lo neih tawh kha thlak harsa a ti ngang mai a, ‘nu pumchhunga vawi 2 lut nawn a, piang leh tur ang’ hialin pawm harsa a ti a ni.
Tui-a piang tih hian Tuia Baptisma channa (baptism with water) a kawk a. He Tui Baptisma hian, Lal Isua Thihna leh Thawhlehna Pawmna leh Ţawmpuina, Lal Isua Thuawih bawih-a inpek luhna a entir (Rom 6). Sipaiten an Hotute hmaa “A ţul chuan ka nu leh ka pa pawh ka kâp ang” tia Rinawmna thu an tiam ang kha a laimu a ni. Tui Baptisma hi Vanram kaina a ni lova, Sual Sim Entirna, Lal Isua Ringtu Nihna Lantirna, Nemnghehna leh Lal Isua Thihna leh Thawhlehna Ţawmpuina leh Inpek Pumhlumna Entirna a ni (cf. Mk.1:4-5, Lk.3:1-21, Joh.1:26, 4:1-2). Juda Saphun tan chuan Tuia Bualfaina (baptisma) kha Sual leh Bawlhlawhna laka Silfaina leh Juda-mi nihnaa Thianghlimna Kailawn hmasa ber (cleansing from impurity of idolatry and the first step in a practice of a holy living) a ni. Lal Isua ringtute tan pawh, Tui Baptisma hi Sual sim Entirna leh Thianghlimna Nun Kailawn hmasaber kan zawh ţanna a ni ve a ni. Tui Baptisma kan chan khan, mi zawng zawngin Pathian fa ka nihna, Lal Isua Zuitu ka nihna, Lal Isua chu ka Hotu leh ka Lal (Master & Lord) atan ka thlang tih min hrethei (recognize) ta a. Lal Isua tuarna leh ropuina ka ţawmpui ve zel tawh dawn tih entirna atan mite mit-hmuhah, an hmuh-theih-in Kohhran dân zawmin Tui Baptisma ka chang a ni.
Thlarauva piang tih hian thilhluite (ngaihtuahna & thiltih sualte) chin ral a, sual sim a, kan rinna tifamkimtu leh siamtu Lal Isua chunga rinna nghah hmiah a (2Kor.5:15-21, Gal.6:15, etc.), Chunglam aţanga Pathian Hriatpuina leh Thlarauva siamtharlehna (repentance & spiritual regeneration) chan a kawk a. Lal Isua ringtu chu Pathian fa a ni a, thilţha ti tura thilsiam thar a nih tawh avangin Thlarau Thianghlim hruaitheih-a a awm zel a ţul bawk (Rom 8:14). Pathianin a fa a nihzia Chhinchhiahna atan Zakhamna Thlarau a pe nghal a (Eph.1:14). Chuvangin, he Interview-a Nikodema hnena Lal Isua Conclusion chu, he Chatuan Nunna hlu tak hi chang tur hian mihring thiamna, finna, remhriatna, tumna, nihna, dinhmun, serh leh sang zawm leh tih-theihna a tawk lova, Sual sim a, Lal Isuaa rinna nghah a, Lal Isua rinawm tak zui tura Inpek a ngai a. Chu pawh chu Thlarau Thianghlim ţanpuina leh hnathawh kaltlang chauhva tih-hlawhtlin theih a ni (3:6-8, 16, 36; 4:14, 36; 5:24, 39; 6:27, 40, 47, 54, 68; 10:28; 12:25, 50; 17:2).
Tuiah leh Thlarauvah i Piangthar tawh em?
Similar Posts:
- Isua hi Pathian a ni
- Pharisai
- Pathian Chhandamna Ropui Hi
- THAWHLEHNAA TIHNUN KA LO NI TA
- Lal Isua Leh Amen! {Sunday Pual}
August 11th, 2013 at 2:38 pm
Inkhawm bana chhiar nen a in mawi hle mai. Ka lawm e.
Report this comment
August 11th, 2013 at 4:54 pm
Report this comment
August 11th, 2013 at 6:02 pm
Dr John, a lawmawm takzet e. Nikodema hi ngaihsanna ka nei tlat mai a, huaisen tak maia a hriatthiam loh zawt tura Lal Isua ava pan ngam hi a ropui ka ti chutih rualin, Pathian ram hmu turin a pianthar tak thu kan hre lo erawh a lungchhiatthlak hle bawk.
Post siam hi thil namai a ni lo, Thupui neia in request pheichu a inthlahrunawm mahse hei post tha tak leh hriatfiah nuam takin i rawn buatsaiha a lawmawm hle a ni. Mi taima leh ziah talent dawng tha tak i niin ka hria. (I thusawi erawh ka la ngaithla lo tlat haha)
Pu Pka pawh a rawn daklut bawk a. Zawhbelh a inthlahrunawm chung chungin zawhna ka’n nei lawk mai.
“Pathian ram an hmu thei lo vang” tih hi.Lal Isua hian he thu hi a ngai pawimawh takzet a nih ka ring a -tih tak meuhin, tih tak meuhin ( Truly, truly) a hmandanah hian.”Hmu” leh “Lut” hi thuhmun a ni tihna em ni le?
Report this comment
August 11th, 2013 at 6:26 pm
Ka va mi(sual) lo rei tawh em aw! Lung a leng ngang a ni ang, zanin tlai chu ka rawn vak lut leh e Silent reader ni leh turin. Post chu a that angai reng ala ni e, a bikin Sunday pual. Post bengvar thlak tak a ni e
Report this comment
August 12th, 2013 at 8:19 am
Post pawh kan chhiar kim hman lo chu a ni ber e. Kan buai viau hi chuan kan dam tihna a nia, lawm phawt mai ila.
Dr John sermon hi chu belhchian a dawl thin. Han chhiar ila kan hriat tlem leh zir tlem zia ka in hrechhuak thin. A ziak tupa in a uluk leh a hlutna ang hi kan chhawr phaklo zawk ani e.
Tukchhuah nuam vek u le
Report this comment
August 12th, 2013 at 1:20 pm
#1 chhana kei pawh ka lawm e
#2 Pu PK-a chu i va ti-tha bik ve, Pathianin Malsawm che-u Rawhse
#4 Hotunu_pasal ka lawm e
#5 sheldon ka lawm ngei mai
#3 Athana Chhangte, i ZAWHNA hi a ţha thei hle mai. A sei lutuk hlauvin ka lo telh ta lova, i rawn hmu ta tho si a! Ka’n belh-chhah leh ngawt mai ang e, Pu PK-a leh midangte pawhin min lo Tanpui bawk ula, ka lawm ngawt ang –
1. Bible Scholar tam zawk daih chuan, Lal Isua nen-a an inbiak hnu hian Nikodema hi a Piangthar chiang hle tih a thiltih vawi 2 hian a ti-chiang a ni an ti tlat thung!!!
(i).Lal Isua chungchang an rel laiin, a Ţhian-te tihdik loh sawi chhuakin, anmahni kalh zawngin thu a sawi ngam. Nikodema hi a huaisen hle. Engang pawhin thudik sawi mahsela awmzia a nei dawn lo tih a hrechiang ang tih a rin theih. Heti chung pawh-a Lal Isua Thiamchanna thu ala sawichhuak hrâm hian awmzia a nei a, ‘Lal Isua Zuitu zinga pakhat ka ni tawh e’ tia a inpuanna tluk a ni e, an ti hial!! (John 7:50),
(ii). Lal Isua thih hnu-in, Hlau miah lovin, a ruang lâknaah a rawn tel ngam a, Lal Isua ruang hnawih tur Murra (rimtui hâl tur) and Aloe (ruang hnawih tur), man tam tawk (Buk 50, Grk. Litras hekaton/ pounds 75) a rawn keng tel bawk.) He damdawi hi tawih theih lohna leh rimtui man to tak a ni a, kg 30-34 vel turah an ngai a, ama tana a inlei ngat nia ngaih a ni bawk (John 19:39). Lal Isua ruang lâknaa a rawn kal ngam mai bakah, ama inphumna tur atana a khek a rawn ken phal dan aţang hian ‘Isua tana insenso leh thih a ngam’ tih hi a chiang hle a ni, an ti!!
2. Lal Isuan Pathian ram (Kingdom of God) chungchang a sawinaa “Lut” (enter) leh “Hmu” (see) a hmang hi, Bible scholar ţhenkhat chuan “a ţawngkam hi thil thuhmun sawina a ni a, danglam vakna a awm love” an ti a. Mahse, Bible scholar tam zawk thung chuan, Lal Isua ngeiin, Ţawngkam Hran a hman tlat avang hian Pawimawhna thûk tak nei ngeiin an ring a, hetiang hian an chhui:-
(i). “Lut” (Grk.eiselthein) hian taksa (mahni) ngeia Vanrama luh (physical appearance) sawi a tum a. Entirnan, miin Passport & Visa nen-a ramdanga a taksa (physical body) ngeia danin a phal ang taka a lut (enter) ang hi Lal Isua’n sawi a tum a ni e, an ti.
(ii). “Hmu”(Grk.idein) thung hian, Vanram kan luh huna kan rilru leh ngaituahna (mind & feeling) min khawih dan tur lam a sawi niin an ngai bawk. Vanram kan luh hunah chuan, mitdel ang maia thim-mup hmuna kal ang ni lovin, thil mawi leh ţha chungchuang mit ngeiin kan hmu ang a, kan rilru a hlimin a lawm em em dawn a ni.
(iii). Scholar ţhenkhat phei chuan, an sawi uar leh hlek a. “Lut” leh “Hmu” hian, Vanram kal thei turte qualitification a sawi tel niin an ngai hial a. Vanram kal turte hi Fiahna Kaltlang a ngai a, chutah chuan, kan Thiltih Engkim (open & secret) kha Video ang hian Mit-a hmuh theih tur leh, Benga Hriat theih tur ngeiin an Replay dawn a, chuta tlingte chauh chu Vanram-ah hian an ‘Luh’ leh Vanram ropui tak chu an ‘Hmuh’ phalsak an ni dawn a ni. Hei vang hian, helai thil thleng tur hi Lal Isua’n hre rengin “Vanram Lut leh Hmu” tih ţawngkam hi a hmang ta niin an ngai a ni.
Report this comment
August 12th, 2013 at 3:53 pm
6
puih hran leh chuan a ngai lo ve. Nikodema kha Vanramah kan hmu chiang ngawt ang, a hlauhawm lai ber hunin Lal Isua tan a ding ngam em mai. Hmu leh lut chuan danglamna an nei ngei mai, mahse dinhmun danglam leh inthlau tak chu anni lo tawp ang. Thil thuhmun deuh reng sawi dan hrang deuh mai mai a ni ang. Pathian ram hmu tih hi chu Vanrama lut thei ngei ngei tur chiangsa, ti pawhin sawi ta ila a dik tho bawk ang chu.
Report this comment
August 12th, 2013 at 4:44 pm
Dr John nge nge, post tha thei thin thak thak e
Athana Chhangte zawhna hi a tha hle mai. Pathian thu a chhiar liam mai mai lova, ngun takin a ngaihtuah zui thin tih a chiang.
I zawhna chu Dr John hian a rawn chhang tha leh khawp bawk mai – professor nge nge. Thianpa PK-a lahin tawifiah lutukin a rawn tuihnih leh a. Ani chu tiang hi a thiam riau
.. a ngaihawm hle bawk 
Rawn lan ve takah chuan tlem kan belh ve teh ang.. kan sawibuai em lo ang chu maw.
‘Hmu’ tih hi Pu John-a sawi ang khian tawngbul lamah chuan idein/eido a ni a. Mit pahniha thil kan hmuh sawina lam ai mahin hrefiah/hmufiah tihna lam a ni [to discern clearly]. Mita thil va hmuh sawinan chuan Grikah hian thumal hrang hrang a awm nual mai (eg. blepo, theaomai,theoreo,skopeo).
A awmzia ni ta chu piangthar lo tan Pathian ram (chungchang) hi hriatfiah/hmuhfiah/man thiam theih a ni lo tihna a ni e. Pk-a sawi ang hian a thumal chu danglam mahse Isua’n a hmandanah erawh danglamna tehchiam a awm lo. Miin Pathian ram a hmuhfiah chuan a lut ngei dawn bawk a, a hmufiah lo tan chuan luh pawh a khirn viau ta ve ang.
Tawi mawl tak chuan, Isua Krista thihna leh thawhlehna nun changtu tan lo chuan Pathian Lalram hmuhfiah/hriatthiam theih a ni lova, luh theih a ni hek lo tihna a ni mai awm e.
Report this comment
August 16th, 2013 at 9:02 am
Tuia piang, pianna hian tuisik baptisma a kawkin kei chu ka hre lo. Johana3: 18 thleng han chhiar hian.
Tin, Rome 6 hian tuisik baptisma a kawk lo bawk, Krista ringtute chu tui nilo, a hming mai pawh nilo, amah Krista ngeiin a, a thihnaa min baptis na lam zawk a ni. Rom 5 atanga han chhiar zawm zat phei chuan a chiang khawp mai. Tuisik baptisma hi ringtu ka nive e, alanga mawia tih lanna mai zawk a ni.
Report this comment
August 16th, 2013 at 9:08 am
“Dan zawmtu i nih chuan serhtan chu a sawt tak zet a ni; Dan bawhchhetu i nih erawh chuan i serhtan chu tan loh ang mai a lo ni tawh.” (Rom 2:25).
“Chuvangin serhtan loh miin Dan thu ruatte a vawn chuan a serhtan loh chu tan anga ngaih a ni dawn lo em ni?” (Rom 2:26).
“Tin, mahni pianziaa serhtan lohin Dan chu a zawm kim chuan, nang, lehkha thu leh serhtan Dan nei sia Dan bawhchhetu, a sawisel dawn lo che em ni?” (Rom 2:27).
“A lang maia Juda mi ni chu Juda mi tak a ni lo a; alanga tisa maia serhtan chu serhtan tak a ni bawk hek lo.” (Rom 2:28).
“Amaherawhchu alang mai ni loa Juda mi ni chu, Juda mi tak a ni; tin, serhtan tak chu, rilru lama tan a ni, lehkha thu maiah ni loin, thlarauvah a ni; chu mi chuan mihring fak a hlawh lo a, Pathian fak a hlawh zawk a ni.” (Rom 2:29).
Report this comment
August 18th, 2013 at 2:49 am
Internet hman theih lohna hmunah ni 5 chuang ka awm a. Ka zawhbelhna Dr John, Pu Pkfanai leh donald ten in rawn chhanna ka hmu chu ka lawm hle mai.In ka thlen zing dar 3 ah, ka internet bawm ka hawnga ka chhiar nghal e.
Report this comment