mi(sual).com

Sunday Special atan aw.

Kum 1908, June ni 30 khan Russia rama Lake Bikal bul Tunguska an tih ram chhungah zingkarah chuan thil engemaw nasa tak mai in a puak dur mai le. 2000sq Km bial chhunga thing leh mau zawng zawng chu a tlu mam vek tih theih a ni a. He thil puak hi Japan rama Atom bomb an thlak ai khan a let 1000 vel zet a chak a ni a. Thingkung ding tha lai pawh maktaduai 80 chuang zet chu an tlu mam pak mai a ni. Heti khawp a puak na si hi a puahna hmun hi ram pilril tuma chen lohna ram ruak anih avangin nunna chan mi pakhat chiah a awm a, ramsa erawh chu an thi hnem hle ni a sawi a ni.

He thil puak ‘Tunguska Fireball’ an tih mai hi hi a thawk na bawk aniang kan lei pumpui hi a a puak nghawr ‘shock wave’ in vawi hnih ngawt a tuam chhuak thei hial a ni. 65Km a hla ami mihrhing pawh boruak ah a vawrh kang lawp thei a, ni tam tak hnuah pawh a puah na hnu boruak eng phut mai chu Britain atang pawh in a hmuh theih hial a ni. He thil thleng hian khawvel mithiam te lu a ti hai nghal map mai..enge ni ta ang le? Atira a hmuna an endik naah chuan arsi them in lei a rawn su ni ta sela a sut na hnuhma a awm ngei tur a ni, mahse a awm bawk si lo. He thil puak chungchangah hian enge a nih tih hi ngaihdan a inanglo hle hlawm mai a. Thenkhat in arsi them in he khawvel hi a rawn su anga, lei a sut tak tak hma deuh in a puakdarh anih an rin lai in thenkhat erawh chuan UFO chesual puakdarh anih ring pawl an awm ve bawk a. Mak deuh mai chu mithiam ten eng sulhnu mah an hmu thei thin tlat lo hi a ni.

Mi thenkhat chuan khawvel dang a mi cheng Alien thlawhna kan leiah hian a rawn chesual anga a puak ta a ni ang tih ngaihdan te a lo awm ta a. Ngaihdan pakhatah chuan simeikhu, comet them kan leiah a rawn lut anga puak a ni ange, simeikhu hi vur nawi te inhlawmkhwm te a ni si a chuvang chu aniang a puahna ah hnuhuma engmah a awm loh tih chu ngaihdan pakhat a ni, mahse hetih lai hian eng simeikhu mah kan lei bul hnaiah a awm hriat a ni bawk si lo. Mithiam hrang hrang in ngaihdan hrang hrang an vawrh chhuak nuaih nuaih ta mai a, mahse enge kha thil puak kha tih a nihna tak sawi thei erawh an awm lem lo. Thenkhat chuan BLACK HOLE tereuhte in a rawn su aniang tih ring tawk an awm bawk. Mak deuh mai chu helai hmunah hian thing leh mau te hi an tlu darh vek a an thi deuh vek a, a hnu a thing rawn chawr leh te hi hmun dang ami aiin an thang chak fe tlat mai a, chu chuan mithiam te ngaihdan ah an radiation engemaw chu a awm ngei a, chumi chuan thing vel chu a effect ni in an ngai bawk. Kum 100 chuang hnuah pawh mithiam te chuan tun thlengin enge anih an la hre tak tak lo a, rinthu leh ngaihdan bak chu thu chiang a la awm thei tak tak lo a ni.

Tun thleng hian he thil puak hi mithiamte chuan an la zir chiang ta reng a, tichuan hmanni lawk khan Russian Academy Of Science ami Scientist pakhat Andrei Zolbin chuan helai thil puahna hmun vel a zir chiannaah hian arsi them ni ngei a hriat chu a hmuchhuak ta tlat mai a. He thil hi enge a nih chiah endik mek a ni a, arsi them a lo nih tak tak chuan hman atanga inhnialna tawp theilo chu tih tawp in a awm tawh dawn a ni. He thil hi arsi them a lo nih tak tak chuan a len zawng hi 60 m (200 ft) atanga 190 m (620 ft) bawr vel chu ni ngei turah an chhut bawk. Vanneihthlak deuh mai chu mihring chenna hmunah a ni lo hlauh kha a ni awm e.

Asteroids an tih mai hi arsi keh them lian ve tak planet tenau ang deuh mai an ni a, simeikhu kan tih te nen hi chuan inanglo tak an ni thung a, a lian deuh te chu ‘planetoids’ an ti ve thung thin. Heng asteroids te hi kan solar system chhungah hian an awm ve nual mai a, van thengreng universe pumpui chhungah phei hi chuan a maktaduai tel tehmeuh in an awm ni a hriat a ni. Kan lei hnaih deuh a awm te hi ‘Near-Earth asteroids’ NEA an ti a, mithiam ten an chhut dan chuan hetiang NEA hi kan lei bulhnaiah hian 500-1000 chuang vel awmin an chhut a ni. Heng Asteroids te hi mit lawnga hmuh ve mai mai theih an ni ve lova, 4Vesta an tih chiah hi amah hian thil eng a phet let(reflect) theih avangin kan lei a rawn hnaih lai chuan mit lawngin a hmuh ve theih ni in an sawi. Heng arsi them te hi a then te chuan kan ni hi an hel ve a, tin planet hel kual te pawh an awm a, van thengreng zu takah hian an thlawk kual ve reng mai a ni.

Tun kum February ni 15 zingkar khan arsi them pakhat, kan lei hel a thlawk kual chuan a thlawh kual na kawng zawh laiin enemaw avangin a keh darh thut mai a, chu a kheh them chuan a kawng chu zawh lo in a peng bo thut a, kan lei lamah rawn thlawk lut in Russia ram a Urals Mountains chung zawnah chuan a puak nghek mai a, kan khawvel hi a rawn su nghek mai a, mi 1,500 chuang in hliam an tawrh phah in chenna in 7,200 chuang a ti chhia a nih kha. Kha arsi them kha mithiam te chhut dan chuan Ton 100,000 vel a rit ni in a laia hawlh tlang a 55 ft vel a lian ni in an chhut a. A tlakna lai tak hi Chelyabinsk dil, vur in a tih khal a ni a, zau tawk tak thuk tawk- 50ft vel a thuk in a deng kuar duk mai a ni. Scientist te chuan he arsi them hi kan khawvel rawn su tawh zawng zawngah chuan a la lian ber ni in an ngai a, Apollo asteroid-2011 EO40 an tih keh them ni in an hre nghe nghe a ni. Scientist te chuan kan ni leh lei hipna in a pawh tawn nasat lutuk avanga keh darh emaw, a nih loh vek chuan arsi them dang nen an insut vang emaw a keh darh a nih an ring bawk.

Van boruak zau takah hian hetianga arsi them leng vel hi chhiar senloh takmeuh hi an leng vel nuaih nuah hi a ni ber a. Heng arsi them leh van boruak a thil leng vel awm hi NASA chuan kan lei tan a hlauhawm tur an awm em tih hi eng lai pawh hian a thlithlai reng a. Hetiang ang kan lei tana hlauhawm tur chu hi ‘Potentially Hazardous Object’ PHO an ti a, tin arsi them bik kan lei tan a hlauhawm ang chi hi PHA (Potentially Hazardous Asteroid) an ti thung a, hetiang PHA ang chi hi tunah hian kan lei tan hian 1,397 vel a awm ni in an hria a(Kan lei hnaih vak lo ami pawh hlauhawm thei engemaw zat awm theiin an ngai a), heng zing a pakhat te pawh hian kan khawvel hi rawn su ta se chhiat rupna a thleng a ni tawp mai dawn a ni. Khawmual ah kan lei hi rawn su ta se a sutna lai bawr ram kha chu a pum chhiat a ni mai dawn a, tin tuipui lamah rawn su ta se, tsunami rapthlak lutuk a siam anga, khawmualpui pumpui a tuam hlup mai dawn ni in an chhut bawk.

Hetiang hi kan khawvel dinhmun chu ni a. Heng arsi them lianpui pui mai leng vel hian kan khawvel a rawn su lo thin hi chu a mak pawh a mak khawp zawk mai a, Pathian venhimna liau liau a ni in lawmthu sawi pawh kan ba nasa viau a ni. Hman kum lawkah Nibiru, Planet-X in khawvel rawn su tur angin ‘Doomsdayer’ ho dawt thuthang thehdarh vangin khawvel a chiai a, kan ramah ngei pawh Nibiru hlau a rilru buai te pawh an awm phah hial a ni a. Khatiang dawt thu leng vang khan kan chiai vak thin a, a thalo khawp mai a, tutak a ni em, thu belh chian dawl a ni em tih finfiah lem lova pulpit tlang a lo auchhuah pui tawk lah bo lo. Mahse ka ti ve mai mai thin, Nibiru kher khan he khawvel hi rawn su lo mahse kan khawvel su chhe rup thei hi chu van thengreng zau pui maiah khian a lo tam khawp mai. He kan lei hnaihah, kan lei tana hlauhawm thei tur a scientist ten an ngaih ringawt pawh 1,379 zet chu a awm ni in an chhut a nia. Heng zinga pakhat te pawh hi an thlawhna kawng han bo hlauh in Russia ram ran su tu ang mai khan kan lei hi han su vaih teh se nang leh kei a chan, kan khawvel chan tur hi chu lirnghing rapthlak, tuifawn raptthlak, a nghawng chin ami chu nghameidum leh hmirtesen thleng a chimih vek a ni tawp mai.

Tin, in sawi zel law law teh ang, insawithaihna lam nilo in kan dinhmun chiang tak sawina zawk a ni tih kha lo hre tlang ila. Kan Bible a Thu Puan bu kan en chuan Thu Puan bung 8: 8-9 vantirhkoh pahnihna in tawtawrawt pahnihna a ham a tlang lianpui meia kang a sawi leh bung 8:10 ah vantirhkoh pathumna in tawtawrawt pathumna a ham a van atanga arsi lianpui leiah lo tla a lei hmun thum a then a hmun khat a rawn tihchhiat tur thu te kha khawvel mithiam te chhut dan pawhin thil thleng thei leh engtik ni ah emaw chuan la thleng ngei tur a ni tlat mai a. Tlangkang rapthlak ‘Super Volcano’ an tih pawh hi kan lei chhungril atang hian engtik lai pawh a thleng thei ni in km 2 bial vel a lian in lei chhungril sa lutuk mai hi rawn in phuh chuak se chu khawvel thil nung awm zawng zawng hi a tam zawk chu a chirh sa lutuk rawn phuh chhuah avang chuan kan thi anga, chumi a vanneih thilthu a ala thi bang te pawh chu chu tlangkang nasa lutuk in a mei khu a siam in ni sa rawn lut tur a dan tlat avanga khaw vawt lutuk tuar lovin an thi tho tho dawn a kan mang vek dawn tho tho ni in mithiam te chuan an chhut a ni. Chu-chhap-ah kan Bible ngei in arsi lian takin kan khawvel a la rawn sut tur thu a la sawi lang chiang ropui lehnghal. Khawilai zawnah nge a sut dawn lah kan hre der lo lehnghal.

Heng thil avang te hian kan khawvel hi la tawp thut lo in, kan Lal Isua hi lo la kal kher rih lo mahse, engemaw avangin mihring te hi kan la tawp dawn a, natna avang pawhin kan la thi dawn a, accident avang emaw lungphu chawl emaw pawh in kan thi thut thei a. Tin, chu chu thudangah pawh lo dah ta ila kan sawi tak ang khan arsi them pawh hian kan khawvel hi englai pawhin a rawn su thut thei a. Mithiamte chuan lo thlithlai reng mahse tun kumtir a Russia ram rawn su tu pawh kha kan lei boruak(atmosphere) a rawn luh hma kha chuan an lo hriat lawk eih loh tawp kha maw, ‘eh’ pah an tih hman tawp loh kha. Lo hre lawk pawh nise lo in ven ngaihna leh a lo dan na hmanrua mihring te hian kan la nei chuang hek lo, thlangra lo khum ngawt chi a ni lova, lo sepui-ruah-tuar tawp a ni mai. Film velah te arsi them kan lei rawn su tur nuclear bomb in an han bomb darh ang ten an han lantir thul, ‘Armageddon’ tih film ah te pawh Bruce Wllis te ho in an han bomb darh pek a nih kha. Khatiang khan a tak ramah chua kan khawvel thiamna hian la la pha reng reng lo a, an bomb darh mai ang tih a lo thlamuan pui ve ngawt chi a ni reng reng lo tih hriat a tha viau bawk.

Hetiang a nih avang hian eng hunah pawh thi thut thei kan ni a, chhiat rup na thil thleng thei hi a tam em em a, tin sawi tawh ang khan heng kan sawi ang chi chhiat rupna ang chi hi thleng kher lo mahse accident leh lungphu chawl pawh in thi thut thei reng kan ni a. Chuvangin khawi hmunah pawh awm ila lo thi thut pawh ni ta ila kan Lalpa Pathian tawk tur hian kan in peih em? Kan thil tih ang zel a rorel saka awm tur hian kan in peih et awt em tih hi in ngaihtuah chiang ila. Kan lo la inpeih lo hlauh te anih chuan engtiklai pawh hian inpeihlo te inpeih a hun reng zawk a ni tih hi lo hre thar leh turin he ka thu ziak tlawmte lo chhiartu zawng zawng te hi ka rawn chah nawn leh vek che u a ni e…Tawng thuchhia ni suh se tunah khan thi ta thut la i thlarau khawnge a kal ang…???

Sunday hman nuam vek ule.

Similar Posts:

• MISUAL Physicist & Astronomer chhan(Answer) atan…
• BETHLEHEM ARSI MAWLH MAI HI
• 21st May 2011-ah khawvel a tawp dawn???
• Lalpa’n Khawvel a ti mualpho leh ta..!!! Atheist te pawh a la timualpho zel ang che u..!!
• MIZORAM Flag chu hei le!

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Sunday, September 1st, 2013 at 8:27 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.