Hmangaih leh duh ber mai nen daitam a tlai nitla tur han thlir liam vawng vawng mai chu ava han nuam ber mai em. Hei hi em ni an sawi ‘Damlai pialral’ an tih thin chu ! Ka hmangaih chu ka tangah bei vawng vawngin; haw huna chhungte thinur hmaisen tur pawh a dawn phal lo. Lungchim taka phun sep sepin, “Duhlai, Khuanu samsuih an tih hi a awm tak tak anih ngai chuan keini hi kan ni ngei ang tiraw” tiin a lairil duhawmna chu min hmuhtir a. A hmel atang chuan kei ai a hmangaih leh duh a neilo tih hi ka hre chiang em em a ni. Ka hmangaih ka enchim loh, nang nen hian Khuanu samsuih chu kan ni chiang alawm.
Aw, zan hlimawm, Aw, zan duhawm… hlimna min va han pe nasa tehlul em, hei mai hi duhtawk lo in famkimna ram chu min thlen law law ta che. “Ka duhlai, nang nen hian thihna chauh lo chuan min then suh se, a hun tur pawh a hnai tawh e, chutih hunah chuan nang nen hian runhmunah lengdun in pumkhat kan ni tawh ang, tudang ngailo ten hmangaih par kan tlan dun dawn nia” ti a ka hrilh lai a hlim tih hriat em em a ka Chuailopari nui hmel chu ka dam chhung hian theihnghilh leh thei in ka inring lo.
Mahse maw.., mahse maw.., ka sawi ngamlo.., sawilo thei ka ni bawk si lo. Ava han rapthlak tahlul em. Natna khum a ka Chuailopari mu bem mai chu ka en ngamlo.., mahse, enlo thei ka ni bawk si lo. Chuailopar pawh a chuai thei alo nih hi. Engtin nge maw ka tih tak ang aw… puitu ka va han ngai tehlul em. Ka Chuailoparmawi a chuai zo ta. A heh sen vam hiam thin te chu alo dâng ta bei a, a bahsam tle siau thinte pawhin an mawina an hloh zo ta.
Ka hmangaih chuan a ban tha chaklo tak chuan min han ban tawk tawk a, aw tham tiaka rawn tawng chhuak in, “Duhlai, kalsan che hi ka va han hreh tak em, mahse ka tuar zo tawh si lo, famkhua ka lawi hun chuan e, i fawhna thin ka hmuiah ngei hian fawp chungin min han thlahliam dawn nia aw…”
Aw.. ka Chuailopari biahthu min hlan dan chu ava han dang ta em.. A awchhuak chu ka bengah hian a ri nawn awn awn a, ka chhingmit a luaithli lo hnam chu ka dang zo mawlh lo. “Ka duhlai, thlaphang reng reng mah ta che, Khuanu’n kan chungah zah angai ang a, nang nen hian min thenhrang reng reng lovang” ti a ka hnemna awka pawh chuan a chunga thihna thlazar lo thleng mek chu a dangkir zo chuang si lo. Ka Chuailopari chuan thei leh thei lo a min nuih ver ver chungin min han pawt hnai tawk tawk a, duhthawh taka ka fawhna thin a hmuiah chuan dim te in ka zuk fawp vawng vawng a, chutih lai chuan amit min chhin san ta.
Aw.., he lei a ka lo piang ve kher kher hi ava han pawi tak em. Ka Chuailopari’n famkhua min lawi san ta. Ka tan hian dam chhan tur a awm ta lo. Thil engkim mai hi ka tan hian a chuai zo va, ka nunna ngei pawh hi, bel, a letling zawnga hun ang mai in a ruak zo ta. Engah nge maw ka nausen lai khan ka nu leh pa te khan min lo uphlum mai loh le aw.., anih loh pawhin ka zan mute hi tho leh tawh lo in ka Chuailopari kha zui ve law law ila ka va han ti em. Khuanu samsuih pawh hi a phelh leh theih alo nih hi. Khuanu pawh hian min va han suih nghet lo em em ve le.
Ka duhlai ka enchim loh Chuailoparmawi, fanau maltluan chawi a nui dun tur khan min tiam ani lawm ni, engatinge heti mai a famkhua min lawi san leh tak si le.., i zûn ngaia damchhung hun hmang tur hi min dâwn lo em ni,, kan sul i hnu ka fan chang hian Thinlai ah i thar leh thin ka Duhlai ka enchim loh Chuailoparmawi.
October 9th, 2013 at 8:34 pm
A leng duhawm vawng vawng mang e! RIP
Report this comment
October 9th, 2013 at 8:41 pm
Khai aw, a va runthlak ve le..
Report this comment
October 10th, 2013 at 7:48 am
Chhiar dawn ang.
Report this comment
October 10th, 2013 at 11:48 am
Lung a va kuai hnap hnap ve! Thihna himzawngmkan ngam loh doral a ni tlat rih si a le. Nakinah Chatuan khua vartir tura kan Lalpa a lo kal hunah thihna reng reng awm tawh lohnaah min la hruai dawn a lawm. Tah chuan lungduh kal tawh te nan kan intawk khawm leh ang a, lei hlimna aia nasa hlimna chuai tawh lo tur kan chang tawh ang a, chutah meuh chuan i Chuailopari pawhin a hming pu zo takin chatuanin chuai lovin a par tak tak tawh dawn a sin!
Report this comment
October 12th, 2013 at 1:52 pm
classic raih mai…..chhiar a nuam e…
Report this comment