YMA GENERAL CONFERENCE HMANG TURIN KHAWBUNG-AH LO ZIN VE TA CHE

October 14th, 2013 3:00 pm by vlchinzah

Khawbung awmna I hre lo anih pawn, Zoram pum huap pawh a tawngkam lar “ Khawbung ala ti ta deuh deuh.” tih tawngkam hi chu I hre tawh ngei turah I ngai phawt teh ang. He tawngkam avang ngawt hian Khawbung hi hla viau turah I ngai ngawt anih pawn I dem awm hran love! Amaherawhchu ahlat hmel em vanga kal loh phah nan hman I tum anih chuan iti sual hle thei tih erawh I hriat loh ka hlau khawp mai.

ENGVANGIN NGE ILO KAL ANG ?: Zofate hian tuna kan chenna Mizoram kan luah tan khan khawi lai hmunah nge kan inbenbel hmasak tih I hria em? Kan pi leh pu te sulhnu awmkhawmna hmun pui Mizo Cultural Centre ti hiala sawi thin Tuipuiral ram hi politician tawngkam takin ‘Mizo inih chuan hmuh ngei hi I bat ah ngaiin Tuipuiral ram hi rawn hmuin, rawn tem tum phawt mai teh.’ YMA khawmpui lian thleng turin kan thiam leh finna zawng zawng nen kan inbuatsaih ve map map ani tih hi min hriat pui la. Mizo I ni a Zo takin mikhual che kan lo tum e.

Zohnathlak inpumkhatna vei mi I nih chuan Khawbung leh achheh velah hian Hman inpumkhatna chu I hmuh ngei ka ring tlat. Zoram hmun dang ang thovin Zohnahthlak hnam hrang hrang he lai hmunah hian kan cheng za a; Duhlian tawng thiamlo tan pawh hmun a awm a, Paihte tawng chauh hmanna khua pawh a awm asin! Amaherawhchu Zoram hmun dang ang lo takin Zo hnahthlak hnam hrang hrang cheng mah ila Autonomous kher kan ngiat ve ngai lova, Zoram inhma asawn phawt chuan kan hmasawnnaah kan ngai tlang a; Chibing tih tawng kam hi kan hmang ve ngailo.

Aihniara tuan ran ziate, Buizova zaithiam ziate, Pawngvina thinchhiat ziate, Chawngfianga leh Liarchhiari thlengin I hre awm e. Anni ho hian Khawbung leh a chheh velah hian Zofate khawpui hmasa Selesih(Zawlsei) leh Dungtlang hmunah tual an lo chai za tawh thin a, an sulhnu leh an tualchaina te hi rawn hmuin tual rawn chai turin ka duh sak che ani.

Hun I nei turah ngai ila, Mizo Lal hmingthang Lallula hmunhlui Zopui tlang pawh darkar chanve lekah I chuan thei mahna. Khawchhak I fang ta sa sa Zofate thinlunga dai tawh lo tur Pi pute sulhnu hrang hrang Fiara Tui,Thasiama seno neihna,Lamsialpuk, Lamthuamthum, Kungawrhi Puk etc te pawh fan man hla tak ani ngei ang. Chawngtinlerhi Puan bangtu Murpui te pawh Tan tlang leh Lurh tlang inkarah I hmu mai thei asin.

I ZAWH TUR KAWNG CHU:
Khawbung hi Zofate luah chin Zoram Map i en chuan Zoram (Mizoram ni lo) lai li takah a awm a ni tih I hmu ang. Khawbung hi Mizoram khawchhak Myanmar leh India inrina Tiau lui atang hla lo te a awm niin Tuipuiral Block thut hmun ani. Aizawl atang hian kawng pahnih zawhin a thlen theih a. Khawchhak tlangdung a awm te tan chuan Aizawl- Champhai kawng rawn zawhin Champhai atang chhimchhak lamah I rawn in her anga, Champhai zawl hring dup I rawn pel anga, Chhim lam rawn pan zelin Kan pi leh pu ten thlang an rawn tlakna hmasa Tuipuiral ram chu Khaunglengah I rawn chuang chhuak ang. Tuipuiral ram I rawn thlen hian Zo khawsang boruak nuam tak chuan I hahna leh chauhna te chu alo chhawk zang khai ngei che han beisei phawt ila, I rawn kalna ahlat deuh vanga ila chau deuh anih pawn Chawngfianga tualchaina Chhingzawl thlir a, an sawi hmangaihna kur puitu Lianchhiari Lunglen tlang i chuan meuh chuan I hah damna I hmu ngei ang. Lianchhiari te khua Dungtlang atang hian hahdam takin Khawbung chu darkar chanve pawh tling lovah I rawn thleng tawh mai dawn ani. Champhai atang hian 72 km a niin kawng chhiat deuh vangin darkar 4:30 vel I rawn thang turah i ngai chhin teh ang.

Khawchhak tlang dung nilo tan chuan Serchhip lama rawn kal a tih chi viauin a rinawm. Aizawl- Khawbung hi he kawng atang hian KM 210 I rawn tlan hunah I rawn thleng thei ang. Hmuifáng Tláng cham ruih kal tlangin, Sailam-ah khawchhak lam hawiin Serchhip I rawn chuang chhhuak anga; National Highway 54 Keitum thleng I rawn zawh hnuah Tuichang lui kanin khawchhak lamah Tuichangral I rawn lut ang. Tichuan léngngha te duatna hmun Varhva lui dung zuiin E.Lungdâr i rawn kal tlang ang a; Mizo Lal hmingthang Kairuma khua Biate I rawn pelh hnuah Tuipuiral hming put chhan Khawchhak Tuipui I rawn kan anga Pipute thlang thlakna hmasa Tuipuiral ram I rawn lut tih I hre thei tawh ang. Khawchhak Tuipui atang darkar chanve I rawn tlan leh chuan Bible hming koh Sasaw kûng – Chhura ruál ruál mawi taka lo ding ngaw khup te chuan ngawi rengin an lo hmuãk ang che a; Khawtlang nun siam tha tur I nih hre rengin Chawlhtuinungzu aiah Zotui thiang vawt tak Rengchal hrâm ri rél rél leh thlifím thaw heuh heuh karah khawvêla i tuihâlna chhâwk ngei turin kan lo chhawp sak ache. He kawng atanga lokal i nih chuan Keitum atang darkar 4-5 vel I rawn thang a ngai turah ngai I la Aizawl atang chuan darkar 8 vel kalkawngah I rawn hmang ang.

HEI ERAWH MIN HRIATSAK LA : Khawvel ropuina leh mawina aiin Zonunmawi hi keini tan chuan ahlu ber a, he Zonunmawi hi kan hma theh leh kan hmachhuan ber ani reng fo ang. Zoram hmun dang angin Palai kan lo hmuah danah leh hmun hma kan lo buatsaih dan ten a zir lovin; changkang pawh iti lo mai thei. Amaherawhchu Tlawmngaihna, Rinawmna leh Dikna te kan nuna vawn reng tumin he YMA General Conference hi lo hmachhawn kan tum tlat ani .
Inthlan kum anih angin YMA zahawmna tibawrh banga, mahni sahmin tih puar tuma bei chiam kan awm palh hi kan hlau hle.Hun kal tawh inthlanna boruak chhia mi sawi kan lo ral hriat ve tawh thin a; mahse heng kan thu hriat te hi YMA leh Zonunzemawi nen inkalh tlat nia ngaitu kan nih avangin kan ring phal lova, a thlen tak tak thin pawh kan ring lo. YMA hi biakloh Pathian deuh tho a kan lo neih kum khua anih avangin YMA zahawmna tibawrhbang zawnga tumah che lo turin kan in ngen mawlh mawlh ani.
Khawbung kawng chhiat thu I hawn tur hi min dem phah nan hmang mai lovin Home Work tha taka min neihsak zawk turin kan ngen hram bawk ache. Kawngpui nuam taka in lokal theih nan Kan tha leh zung, thiamna leh finna zawng zawng nen hma kan la chungin kan theih tawk leh sawrkarin hma min laksak theih chin chu I rawn kal hunah I chiang turah ngai ila. Kawngchhiat vanga Khawbung kal hreh phah nan a hmang mai lovin ilo kal leh huna kawng nuam leh tha a hahdam taka ilo thlen theih nan mawhphurhna lian tak I nei ve tih min hriatpui reng dawn nia.

6 Responses to “YMA GENERAL CONFERENCE HMANG TURIN KHAWBUNG-AH LO ZIN VE TA CHE”

1
Nirvana Says:
October 14th, 2013 at 4:17 pm
Ka peih awkawng lo mai, ka lawm e. Young Menacing Association 8YMA) ah pawh ka tel lo.

Report this comment
2
chhana Says:
October 14th, 2013 at 6:03 pm
Rawn kal ka tum tehlul nen ka remchang ta tlat lo mai. Nuam leh hlim takin in hmang (bik) dawn nia.

Report this comment
3
Dr Mahminga Sailo Says:
October 15th, 2013 at 9:03 am
Sawmna ngaihnobei tak a nih hi le..
Khawchhak lam hi ka ka zin meuh lo a, kal a chakawm ngei mai..

Report this comment
4
Phivawk Says:
October 15th, 2013 at 10:17 am
Khawbung hi Mizoram chhunga ka khaw hmuh chakte zinga mi a ni hrim hrim. Kal ve chakawm khawp mai.

Report this comment
5
Lalhnam Rinzova Khawlhring Says:
October 15th, 2013 at 1:53 pm
Khawbung a nihna avangin ka kal châk! Mahse, YMA a nihna vang chuan ka phur lem lo.

Report this comment
6
century child Says:
October 15th, 2013 at 4:43 pm
Khawbung ala ti ta deuh2, hihi.
Tak2 a kal a chakawm hle mai, nuam deuh khan le

Report this comment