mi(sual).com

1st. Sunday: Border Security Force (BSF) 42nd. battalion chuan Airfield Venga an battalion headquarters-ah an dincham vawi 48-na an lawm a, DM&R minister Nihar Kanti Chakma-in a hmanpui. BSF-te hi ram tana hnathawktu ropui, a bikin ramri bula an thawhrim avanga India ram hi him a ni. Mizoram pawh Bangladesh leh Myanmar nena inri a nih avangin BSF-te’n ram venhim hna an thawk nasa hle bawk. BSF kum 48-na lawmnaah hian deputy accountant general Hatinlal Suantak bakah, BSF hotute leh CRPF hotute pawh an tel. 42 Bn. BSF hi September 1, 1965-ah Jalandhar, Punjab-a din a ni.

2nd. Monday: Synod Committee Room-ah Central YMA hruaitute leh Mizoram Kohhran Hruaitu Committee (MKHC) hruaitute an inkâwm a, tunlaia YMA-in Phunchawng, Rangvamual, Airfield, Tuirial leh Tuikhurhlu-a ruihhlo an do chungchang an sawiho. Inkawmhona hi CYMA hruaitute rawtna anga neih a ni a; MKHC hruaitute chuan, YMA-in ruihhlo an do chu ṭha an ti a, ṭawingṭainaah pawh an dilsak ṭhin thu an sawi a, ruihhlo do kawngah tha thlah loin YMA chu kal zel se an duh a, fimkhur taka kal turin an chah a ni. Central YMA hruaitute hi president T.Sangkunga’n a ho a, MKHC lam chu an chairman, Rev. Lalramliana Pachuau, Synod Moderator-in a ho a ni.

3rd. Tuesday: Ṭawipui North khuaa pitar pakhat, Lianengi (70) leh a fapa Vanlalbela (46) leh a tupa Chhakchhuakthanga (12)-te chu an inah thi hmuh an ni. Lianengi te inah hian zing dar 7 vel khan mi kal an tum a, tukverh inhawng aṭangin an bih a, ruang an hmu a ni. He thil thleng hi an hriat velah Lunglei Police Station an hriattirin, Lunglei police-te chu endik turin Addl. SP, Stephen Lalrinawma leh OC, Zonghinga te an kal nghal a ni. Vanlalbela hian Hmawngbu khuaah nupui neiin an khawsa a, tun hnai khan a fapa nen a nute hi an tlawh a ni. He thil thleng rapthlak tak hi Lianengi chenpui a fapa, Lalramzauva nupui neih ngiat thiltih a ni a; a u Vanlalbela hian rem a tih theih loh avangin an inkar boruak a chhe hle a; Lalramzaua hian remchang zawngin a riakchhuak a; zanlaiah hetiang thil hi a ti ta mai a ni. A tum dan tak chuan a u chauh hi kutthlak tum a ni a, midangin thawm an lo neih ve si avang leh an sawi chhuak ngei dawna a hriat avangin midang hi a that tel ve ta a ni.

4th. Wednesday: Mizoram Chief Minister Pu Lal Thanhawla’n cheng 158.33 lakhs. senga sak HPC Office Lunglei Chanmari a mi chu a hawng. HPC Office Lunglei hi kum 1990-ah Mizoram Sawrkarin a din a, Office mumal neilo a, mimal in luah hawh a hun engemaw chen a kal hnuah kum 2008 – 2008 atang khan HPC Building sa tur hian bultan ni in sum pawh dahhran tan a ni. Sept. 2010-ah sak tan a ni in, May 2013 khan zawh fel a ni. Pawisa hman zah chu cheng 153.33 lakhs.a ni. He building hi chhawng nga a sak a ni.

5th. Thursday: Parliamentary secretary, Lal Thanzara chuan Selesih Veterinary farm-ah ar vulh leh zuara eizawngte’n awlsam leh hlawk zawka ar an sawngbawl theihna tur Mini Poultry Processing Plant a sem. Mini Poultry Processing Plant hi Rs. 2,81,365/- man niin, darkar hnih chhungin ar 500 aia tlem lo puah thei tura duan a ni a; district tin aṭanga thlan bik mi 18 hnenah sem a ni.

6th. Friday: David Lallawmawma lehkhabu ziah, ‘Nunkawng hruaitu’ (Naupang Thawnthu) tih chu MJA vice president, Vanlalrema Vantawl-in a tlangzarh. He lehkhabuah hian thawnthu 34 a awm a, Rs. 80/- man a ni.

7th. Saturday: Tuichang Bial mipuite chuan an bialtu MLA leh Minister ni bawk Pu Lalrinliana Sailo Chawimawina hun Zaingen YMA Community Hall, Khawzawl ah an nei. He Chaimawina Inkhawmah hian Health minister Lalrinliana Sailo chuan finna leh ropuinaah chuan ‘MNF ka cho lo a, hnathawh that leh corrupt lohah ka cho a, dikna tan zel turin thil diklo hi ka haichhuak chhunzawm zel dawn a ni,’ a ti. Pu Lalrinliana Sailo chawimawina inkhawm Khawzawl Zaingen YMA Hall-a neihah hian Health Minister chuan dawta MNF-in an puh lai boruak rit takin a delh lai tawngtaisak tute avangin zan mut theihloh a neih ngai loh thu sawiin lawmawm a tih thu a sawi. Damdawi kheha inhnamhnoih nia an puhna chungchangah a tir chuan a ngaih serious loh thu a sawi a. Amaherohchu, bandh neiha, office hial dang tura ruahmanna an siam takah chuan a ngaihthutak thu sawiin na a tih takzet thu a sawi bawk. Health Minister hi TT Zothansanga MLA leh MPYCC President C Lalawmpuii bakah party hruaitu thahnem takin an tawiawm a ni.

8th. Sunday: Hlimen tlangval pahnih, thiandun Mosia (34) leh Chhuana (27) te chu sapuiin a um avangin an chiai hle. Anni pahnih hi Hlimen leh Tlangnuam ram inrina Hlimen ram lam, Phunchawngzawl rama an thianpa Chungnunga te ramriak zuk tlawh pahin ram an kal a. An hawn kawngah kawngchhak lama pangbal hmunah chuan sa rum thawm an hre ta a, thawm rawn chhuahna lai chu pangbal hmun a nih avangin sanghal a nih rinna an nei a, thawm rawn chhuahna lai vel chu sairawkherhin an han perh pawp pawp a, rinloh tak maiin an mahni lam panin chu ramsa chu a rawn ri thla ta buan buan mai a ni. Khua a thima chu ramsa chu enge a nih an hre mai thei lo. Zan khawthim hnuaiah baklengin an tlan chhe ta a ni. Mosia leh Chhuana te thiandun chu a chang leh awihpangah an han lum thul a. Chu sapui lah chuan an hnung lawkah thawm rawn neiin a rawn um zel mai si. Thlam kumina sak thar, la tha tak mai an hmu hlauh a; a chhungah lutin chu pawh chu nasa takin a rawn rikrap a ni. Hetatang hian khaw lam biain an lo thlen hma in sapui hi a inthiarfihlim hlauh a ni. He sapui hi a chethmangah sakei ni ngeiin an ring a; tih nat tak tak tum lo in a rikrap mai mai niin an ring bawk.

9th. Monday: Mizo Zirlai Pawl (MZP) General Hqrs. Office building thar, MZP Pisa Pui, Treasury Square a Education Department office bula mi, cheng nuai zasawmkua leh singkhat (Rs.190.1 lakhs) senga sak chu Chief Minister Pu Lal Thanhawla chuan a hawng. MZP Pisa Pui hmun (ram) hi January ni 7, 2004 khan sorkarin a pe a, kum 25 chhung an hmang hawh thei (Lease) dawn a ni. A building sakna tur hian DoNER Ministry ah Post Matric Students’ Boys Hostel hminga DPR thehlutin, a sakna senso tur Rs.190.1 lakhs DoNER chuan a rawn sanction a. A sak hna hi 2nd April 2011 tanin 2nd Octobeer 2012 khan sak zawh a ni. Mizopa chhiarin chhawng sarih a sang a ni a, Office bakah Hall, canteen, hahchawlhna room, parking leh basement te a awm a ni.

10th. Tuesday: Health Minister, Pu Lalrinliana Sailo-in ruihhlo tawlhru thin, Rampanmawia a thurualpui nia an sawi chu thil tha lo rau rau-ah thil tha lo lawt lak nia sawiin, ruihhlo tawlh ruknaa inhnamhnawih reng chunga zak map lo-a a dinhmun a la chelh zui zel chu Mizo mipuite a zah lohzia tilangtu nia MNF party-in an ngaih avangin Mizoram khawpui hrang hranga darkar 12 awh Total Bandh an huaihawt chu buaina awm lo-in mipuiin an thlawp that avangin a hun hmain tihtawp a ni.

11th. Wednesday: Chief Minister Pu Lal Thanhawla kaihhruaina hnuaiah Council of Ministers chuan Chief Secretary Conference Room-ah meeting an nei a, zan dar 8 pelh thleng an thukhawm a ni. Cabinet Meeting-ah hian sawiho tur ziaka agenda 30 chhawpchhuah a ni a, ziahlan loh engemawzah sawiho bawk a ni. Meeting-a Council of Minister ten an sawiho hnua an remtih leh an pawm te chu : The Mizoram Motor Vehicles (Taxation) Act, 1996 clause 2 of para 9 siam that rawtna te, Village Council member-te lawmman tihpun rawtna te, Trade & Commerce Department-a Assistant Engineer post khat leh Junior /engineer post khat siam rawtna te, Soil & Water Conservation department hnuaia Deputy Director (Programme) chu Joint Director (Work & Monitoring) posta hlankai te, SCERT Special Edication Cell hnuaia Lecturer post pali (4) siam te, Directorate of School Education Statistical Cell tih chakna tura Muster Roll Skill II anga Data Entry Operator post pakhat siam te, Kamalanagar college leh Mizoram Law college provincialise tura rawtna te, UGC Regulations, 2010 Mizoram College te a hman ve rawtna te, UD&PA hnuaia Assistant Engineer post pahnih (2) siam te, Lunglei district tana District Urban Development Officer post pakhat Pay Band 3 GP 6,600/- siam te, The Aizawl Municipal Council Licensing (First Amendment) Regulations 2013 siam that rawtna te, The Mizoram Entertainment Tax Rules,2013 te,The Draft Money Circulation Scheme (Banning) (Mizoram) Rules, 2013 te, Lunglei ah Accounts and Treasuries hnuaia Joint Director office hawn te, Mizoram sorkar hnuaia contract employees post 17 tana DA 20% of Basic pay pek rawtna te, Mizoram college of Nursing tana post 14 hnawhkhah dilna te, Mizoram sorkar sum dinhmun ziaawm huna Minimum wages rate a variable dearness allowance leh 25% of wages telh te, Draft Mizoram Unorganised Workars’ Social Security Rules, 2013 te, Draft Mizoram Inter State Migrant Workmen (Regulations of Employment and Conditions of Services)(Amendment) Rules, 2013 te, Aizawl leh Lunglei Judicial District a Fast Tract Courta Judge post hnih (2) siam te, The Mizoram State Training Policy, 2013 te, tih belh ngai tihbelha Mizoram Engineering Service Rules, 2013 leh Mizoram Engineering Service (Competitive Examination) Regulations, 2013 te, Pu K. Lalchhunga, IPS (Rtd), Commissioner of Inquiry lawmman fix that te, Draft Mizoram Food & Civil Supplies (Amenment) Service Rules, 2013 te, Pualreng Wildlife Sanctuary chungchanga final notification siam te, Inspector of Policete hnena ration leh Leave Compensatory Allowance hnuhkir tawh chu pek let leh te, Dy SP (DSB) post pakhat chu Director General, Mizoram Home Guard a hlankai remtih a ni bawk a, MPS Senior Administrative Grade post pakhat DIG (Armed Branch)a duty posta (Functional) a siam remtih a ni bawkin, Taxation Department tih changtlunna turin Saiha, Serchhip, Lawngtlai leh Mamit Zone tan Assistant Commissioner post pali (4) siam remtih a ni bawk.

12th. Thursday: Salvation Army Territorial SAY Council vawi 155-na chu THQ Board Room-ah neih a ni a, TSAY General Council, thla leh tawp lama Lunglei Bazar Corps-a neih dan tur an thlir ho bakah inbuatsaihna zel dante an sawiho a, SAY Dan bu thar hman mek pawh an en ho bawk. Hengte bakah hian nakkuma SAY Congress neih tura inbuatsaih dan pawh an thlir ho a, nakkuma SAY Zirlaibu tur, siam peih tawh pawh an ennawn bawk.

13th. Friday: Ruihhlo-a sumdawng ni-a sawi, Rampanmawia’n Electric Venga In a lei chu Electric Veng Branch YMA-in an kalh sak. Electric Veng YMA Secretary, Vanremsanga hnen atanga thu dawn danin, kumin kum tira an lo puan tawh angin, YMA kumpuan, ram leh hnam humhalh bawhzuina chi khat atan an veng chhungah hnam dang leh ram dang mi, dan lo-a awmte bakah ruihhlo-a sumdawngte’n In leh In hmun an lei an remti lo a, tun laia damdawi tawlh ru-a sumdawng ni-a an hriat, Rampanmawia’n an venga In a lei chu an thu chhuak nen a inkalh avangin an kalhsak ta a ni.

14th. Saturday: Champhai police-te chuan Zokhawthar kawnga Hringlang tlang pêng bulah ramhnuaia thuhrûk pseudoephedrine mûm 15,22,550 chu motor-a hlân an tum mek laiin an man. Damdawi hi Myanmar lama phurh luh an tum nia hriat a ni a, motor khalhtu, Lalhmingthanga (38) s/o Chhunthanga, Champhai Vengthlang pawh man a ni. Motor, Tata Winger DL1-YC 4028 erawh chu ruihhlo phurh nan hman a la nih loh avangin man a ni lo. Damdawi hi Champhai-a an hralhna anga chhûtin, Rs. 1,21,80,400 hû vela ngaih a ni.

15th. Sunday: Rev. C. Lalrampara (80), Aizawl Venglai chu Pneumonia natnain a boral. Rev. C. Lalrampara hi July 11, 1933-ah Baktawng khuaah a piang a. A pa chu Upa Kapliana Chhakchhuak, Baktawng khuaa Presbyterian kohhran dintu zinga mi a ni a, a nu chu Thuamliani Vanchhawng, Bible Women a ni. An unau hi 6, mipa 3 leh hmeichhia 3 an ni a, ani hi a naupang ber dawttu a ni. Sept. 10, 1933-ah Baktawng Biak Inah Pastor Nikhama kutah baptisma a chang a ni. 1954-ah Zaikungi, Upa Tunga fanu nen Pastor Kawlkhuma, Raldan (Thentlang) kutah an innei a. Fa 9, mipa 5 leh hmeichhia 4 an nei. Pahnih tih loh chu an la dam kim a ni. Kum 1970 Synod Inkhawmpui, Mission Venga neihah Pastor atana nemnghah a ni a, hmun hrang hrangah rawngbawla a awm kual hnuin kum 1995-ah Pension-in a chhuak ta a ni (Kum 1993-a chhuak tur a ni a, a service extend anih avangin 1995-ah a chhuak ta a ni).

16th. Monday: Pu LT Zothankhuma (61) h/o C.Thangzuali Aizawl Zotlang chu Greenwood hospital ah a boral. Pu Zothana hi LAD-ah Jt. Director niin 2002 khan a pension a ni. Pa tlawmngai thei leh Pathian ringtu tha tak a ni a; sap tawng atangin hla engemawzat letling bawkin heng zinga thalai hla lar tak “Tawpna nia ka hringnun hi a ral hunin” tih hi a lehlin a ni bawk. Pu Zothana hian a nupui Pi Thangzuali bakah a fate pali a kalsan.

17th. Tuesday: Comprehensive Rubber Based Settlement Project buatsaihna turin, Trivandrum, Kerala-a addl. rubber production commissioner (rtd.), KG Mohanan leh Mizoram sorkara Soil & Water Conservation department chuan Memorandum of Understanding (MoU) an ziak. MoU ang chuan, inremna siam aṭanga thla thum chhungin project chu peihfel tura duan a ni a, DPR buatsaih fel veleh a funding source tur zawn nghal a ni ang a, a ṭul dan angin World Bank ṭanpuina pawh beisei a ni. Kum tin ram hectare 2,500 vela bul ṭan chhoin, kum 20 chhungin hectare 50,000 tih zawh vek tum a ni a; MIRSAC hmangin Mizoram chhunga ṭhelrêt chìn theihna tur hmun zau zawng buatsaih (mapping) mek a ni.

18th. Wednesday: Minister, JH Roṭhuama chuan Champhai Zotlanga sports stadium sak tur lungphùm a phúm. Lung phûmna inkhawm hi Mangkhaia Hall-ah neih a ni. Minister JH Roṭhuama chuan, Champhai chu infiamna lamah an duai loh thu sawiin, “Sorkarin hetiang hmun min pe leh a ruangám a lang ṭan te, a hmunin a lo zir leh zelte hi a lawmawm hle,” a ti a; stadium sakna tur atana ram petute hnenah lawm thu a sawi. Stadium sakna atan hian cheng nuai 2238.69/- ruahman a ni a, football ground, athletics tihna tur hmun, weightlifting hall, gallery mi 1,500 lenna tur leh infiamna atana thil pawimawhte awm tura ruahman a ni.

19th. Thursday: Home minister, R Lalzirliana chuan Kulikawn Fire Station a hawng. Fire station hawnna inkhawm hi Fire & Emergency Service director, C Laldina’n a kaihruai a; Home minister chuan, fire station thar chu Aizawl chhim tlangdung tan malsawmna a nih ngei a beisei thu leh fire station dah a nih theih nana Kulikawn khawtlang hruaitute hmalakna fakawm a tih thu a sawi. Bialtu MLA, Lt.Col. ZS Zuala, parliamentary secretary pawhin thu sawiin, Aizawl chhim tlangdunga fire station dah a ni ta chu lawmawm a tih thu sawiin, “Khawtlang mipuite kan thla a muang sawt a ni,” a ti. Kulikawn Fire Station hi LAD building-ah dah rih a ni a; a hmun nghet atana Kulikawna in sak mek chu peih fel a nih hnuah sawn a ni ang. Fire station-ah hian nizan aṭang duty an awm ṭan nghal a, an telephone no. chu 2312000 a ni.

20th. Friday: Zaithiam Saizikpuii Sailo chu chhul (Cervix) cancer natna vangin Grace Nursing Home, Aizawl ah a boral. Saizikpuii Sailo hi Saipuia Sailo leh Chhuansangi te fa pali zinga a upa ber niin July ni 9, 1975-ah a piang a. A naupan tet atanga zai lama tui niin, kum 10 a nih kum 1985-ah mipui hma ah a zai tan a. Pawl 4 a zirlaiin Lt. Governor Trophy, Primary School Solo Intihsiak-ah sap hla ‘Amazing Grace’ sa in pakhatna a ni a. Pawl 7 a nihin Middle School naupangte puala zai intihsiakah tel lehin sap hla ‘where no one stands alone’ hmanga pakhatna niin Governor Trophy a la leh a. Art & Culture department hnuaia Institute of Music and Fine Arts buatsaih, Mizoram open solo competition-ah senior section-ah pakhatna a ni tawh bawk. Radio artist a ni a, album pathum – ‘Kros kalkawng‘; ‘Thianghlimna Kros’ leh ‘Alabasta Bawm’ te a tichhuak tawh a. ‘Thianghlimna Kros’ hi Lelte Weekly chuan ‘album of the year’ ah a thlang nghe nghe a ni. Bial zaipawla hun engemawchen a tel hnuah kum 1996 atangin Mizoram Synod Choir-ah a tel a, a hun hmang zo lovin Celebrant Singers a zawm a, khawvel hmun hrang hrangah zaia rawngbawlin hun a hmang zui a. Kum 1998-ah Mizoramah lo haw lehin The Leprosy Mission Choir ah tel chhovin a term a hman zawh hnu ah TBZ Zaipawl-ah a tel zui leh a, TBZ zaipawl-a member ni chung leh Khatla North Presbyterian Kohhran Sunday School-a Senior department zirtirtu ni chungin a khawvel zinkawng a zawh tawp ta a ni. Nitin eizawnna lamah chuan kum 1997 atangin Legal Metrology department-ah LDC hna thawk a tan a. A hun tawp thlengin he hna hi a chelh a ni.

21st. Saturday: Johny C Lalremruata (23) s/o C Lalremsiama, Tuikual North chu Tlawng luia Reiek kaiah a tlahlum. Johny C Lalremruata te hi Anthurium Festival-ah an kal a, an haw lam chu an ṭhianhoin Tlawng luiah an chêng a, a ṭhianpa pakhat nen tuiah hian an tla a ni. Tlawng leia awm Lalbiaksanga Sailo, Kanan Veng chuan tuiin mihring a lên a hmuh veleh lui lam pan nghalin, Johny-a ṭhianpa chu a chhan chhuak a, Johny-a erawh a chhan hman ta lo a ni.

22nd. Sunday: Synod Moderator Rev. Lalramliana Pachuau chuan chawhnuah Electric Vengthlang Kohhran hun hmangin zanah Electric Veng Kohhranah hun a hmang thung.

23rd. Monday: DoNER minister, Paban Singh Ghatowar chuan Aibawk Water Supply Scheme siamna tur lungphùm leh Aizawl Zotlangah Mara Students Hostel sakna tur lungphùm te a phúm.

24th. Tuesday: Mau hmanga eizawnna leh sumdawnna tihmasawn tura NLUP hnuaia hma lakna leh National Bamboo Development Mission hnuaia Forest department hnathawhte thlir ho va, awmze nei zawka chhunzawm zel dan tur ngaihtuahin Chief Secretary, Pi L.Tochhong hovin National Bamboo Mission Dy.Director General, Pu Sanjay Kumar leh NLUP Implementing Board hotute, Environment & Forest department hotute leh Bamboo Development Agency hotute chu Chief Secretary Conference Hall-ah an thu khawm a, Mizoram-in ramhnuai hausakna a ngah ber, rua leh mau-te chu ram sum hnar pawimawh ber pakhata siam tura NLUP hnuaia hnathawh mekte leh hemi atana sum mamawhte chu an thlir ho.

25th. Wednesday: I & PR Auditorium-ah Art & Culture leh All Mizoram Women Federation (AMWF) buatsaihin “National Seminar on Gender Equality” neih a ni a, Art & Culture Secretary, Pu C. Thatkunga’n a hmanpui. He Seminar hi North Eastern Zone Cultural Centre-in a sponsor a ni a. He Seminar ah hian Mizoram leh Nagaland-a Political Platform a hmeichhia te dinhmun leh hlankai an tulna te, hmeichhiate’n ei leh bar zawnna kawnga an thawhlawk dan te, Bible a hmeichhe dinhmun a sawi dan te leh Khasi leh Garo a hmeichhiate dinhmun te zirho a ni.

26th. Thuesday: Parliamentary secretary, S Laldingliana chuan a bial chhung, Lunglawn, Lungleia RMSA sum hmanga Liantawna High School building sak thar a hawng. Sikul sak nan hian Rs. 18,33,775/- hman a ni. S.Laldingliana chuan, a bial chhung hmun pakuaah RMSA aṭanga sikul building sak a nih tawh thu leh hmun dangah pawh hmalak mek a nih thu a sawi a, “Sorkarin zirna kawnga kan mamawh zawng zawng min tumsak mek zel a, zirlaite hian hei hi chonaah kan ngai tur a ni. Pass ringawt tum loin, thiamna dik tak nei turin ṭan i la thar ang u,” a ti. S.Laldingliana hian Liantawna H/S tan hian table tennis board thar a pe a ni.

27th. Friday: Pawlrang khua-a thian dun (Pu Ngurbanglova leh Pu Lalduhkima) lo vat chu savawmin a bei thut a, mahse a tihnat hma-in savawm hi an sat hliam hman a; chuvangin, a insaseng zawkah a tang ta a ni. An lo vat hi an bul hnaiah savawm pa leh a pui no hruai an lo awm a, savawm hian Pu Ngurbanglova hi a bei thut a, bawh thlu nghalin a awmah sehin a ham bawk a, a hmai leh nghawng a seh hma-in a thianpa, Pu Lalduhkima hian savawm chu a hmuiah a sat a, savawm hi a insaseng ta a ni.

28th. Saturday: September 21, Inrinnia Reiek kai Tlawng luia tla hlum, Johnny Lalremruata (22), Tuikual North chu Mizo dana ni sarih chhung zawn a nih hnuah, hmuh a nih loh avangin a tlakna bul Tlawng lui kamah a náwlpuia zawn khârna inkhawm neih a ni. Inkhawm hi Central YMA assistant secretary, RL Rindika’n kaihruaiin, Salvation Army sergeant major, VL Hruaia’n hunserh a hmang a; Johnny Lalremruata pa, P.Lalremsiama leh Tuikual North branch YMA president, CVL Rinchhana ten thu an sawi.

29th. Sunday: Mizo rawlthar panga ngawt an telna, AFC Under-19 Championship qualifiers khel tur India team te chu Qatar panin an chhuak. AFC Under-19 Championship qualifiers-ah India hi Group A-ah awmin Qatar, Uzbekistan, Turkmenistan leh Nepal-te nen an awm a; October 4-ah a thlengtu Qatar an hmachhawn hmasa ber ang a, chumi zawhah Nepal (October 6), Uzbekistan (October 10) leh Turkmenistan (October 12) nen an inkhel zui leh ang.

30th. Monday: Mizoram aṭanga Bru (Tuikuk) raltlan, Tripura refugee camp-a awmte chu anmahni duhthuin Mizoramah an rawn kîr a, tun tuma rawn lette hi chhungkaw 80 chuang niin, Central sorkar, Mizoram sorkar leh Tripura sorkar ruahmannain Mizoramah an lut a ni. Mizorama Bru kîrte hi Tripura police-te venhimna hnuaiah harsatna awm loin state ramri thleng an rawn kal a, Mizoram chinah Mizoram police-te’n lo veng ve thungin, facilitation pahnih – Kanhmun leh Zomuantlangah hruai an ni. Facilitation pahnihah hian field officer atan ruat, Zawlnuam BDO, Lalnundika leh West Phaileng BDO, MH James te leh anmahni puitute’n an lo endik a ni. Kanhmun leh Zomuantlangah hian Bru-te chu India khua leh tui dik tak an nih leh nih loh enfiah a ni a, khua leh tui dik takte chu free ration card pek nghal zel an ni. Chhungkaw 80 chuangte hi Mamit district-a Chuhvel, Damdiai, Damparengpui, Kananthar, Kanhmun, Kolalian, Nalzawl, New Eden, Phaizau, suarhliap, Thaidawr, Tuipuibari, Tuirum leh Zomuantlangah te dah an ni.

Similar Posts:

• Hlimen-ah Khelmual?
• Sorkar website
• Mizoram Sorkar 6th pay ruahman i belchiang teh ang
• Do we need more Babus ?
• Sawrkar-in MCON RR siam zo nghal!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, October 16th, 2013 at 8:19 pm and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.