October 2013, Mizo(ram) Diary

November 5th, 2013 9:09 am by chhana

1st. Tuesday: National Voluntary Blood Donation Day a ni a, Mizoram ah chuan Aizawl leh Serchhip leh Chhiahtlangah te hman ve a ni. Mizoramah kohhran ṭhalaite leh tlawmngai pawlte’n thisen pek kan uar tial tial maia; a lawmawm khawp mai.

2nd. Wednesday: Bairabi North branch YMA kumpuan duty-te chuan police pali leh hmeichhe pakhat chuanna motor (alto lx MZ 01 9024) aṭangin sap zu um 129 an man.Motor hi duty ho te chuan Bairabi rail crossing-ah ding turin an ti a, an din duh loh avanga umzui in an man ta a ni. Motor-ah hian PHQ a duty Lalremruata (ASI), L Vohbik-a (ASI), Lalsanglura (ASI), Lalnunfela (Havilder) leh Mawii inti an chuanga a, Mawii hi chu police a ni ve lo. Bairabi N YMA chuan motor-a chuangte hi an ngaidam a, an zu erawh an pe let lo.

3rd. Thursday: Kanan leh Chawnpui inkar a Dr. R. Lalthangliana MLA In bulah Sumo, MZ 05 5812 chu a chesual a, a khalhtu, R. Lalrinpuia, kum 28, Pu R. Lalsangliana fapa, Bualpui ‘V’ tuna Kanan Veng, Aizawla awm chu a hmunah a boral. He Sumo hi Metre 40 vel a lum a, a chetsualna-ah hian R15 bike leh Scooty pakhat a hnawl tel a ni. He Sumo hi mi garage kawta dah a ni a, a siam rem tur chu a chesual ta mai a ni. Vanduaina tawka boral ta, R. Lalrinpuia hi a driver pangngai a ni lo a, Govt. T. Romana College-a 3rd yr BA zirlai a ni a, he Sumo driver hi a u a ni.

4th. Friday: Oil India Limited (NEF)-in Aizawl Civil Hospital hnena Ambulance a pek chu RKS Chairman leh Aizawl Bawrhsap, Dr. Franklin Laltinkhuma’n Aizawl Civil Hospital hotute hnenah a hlan. A inhlanna inkhawm, Health Dept. Principal Director, Dr. Lalrinliana Sailo kaihhruaiah thusawiin Bawrhsap chuan, OIL-in Mizoram Health Department mamawh thenkhat phuhrukna atana Ambulance a pe chu lawmawm a tih thu a sawi a. Tuialhthei leh lei hnuai hausakna dang zawng thin company-te hian hlawkna an hmuh zinga engemawzat chu an hnathawhna state an pe tur a ni tih sawiin, lei hnuai hausakna dap chhuah kawngah hian mimal hlawkna um-a ram zau tak tak neiten harsatna hrang hrang an thlen thin chu thil pawi tak a ni a ti bawk. He Ambulance hi changkang tak, lung enna khawl, ECG nena thuam a ni a, OIL General Manager, Pu S.K. Dutta pawhin he Ambulance hi Mizoram mipuiten tangkai taka an hman a beisei thu a sawi. OIL hian Chaltlang Community Hall sak nan cheng nuai 3/- thelh an thawh tawh a, Mizoram Student Union Inter College Football Tournament atan cheng nuai 2/- a tum sak tawh bakah Thenzawla State Badminton Championship atan cheng nuai 1/-a thawh tawh bawk a ni.

5th. Saturday: Thingsai tlangval pahnih – Lalneihkima (24) s/o J Biakchhunga Sailo leh Enok Remsangzuala (18) s/o K Lalkhumtira te chu Ṭiau lui Bungkhaw kaiah an tla hlum. Anni hian Thingsai YMA member 30 te nen Myanmar lama dah turin damlo an zawn a; Ṭiau luiah lawnglêng (vawk kuang lawng) hmangin damlo chu an kar kái a, damlo lawnga an kar lai chuan Lalneihkima leh Remsangzuala te chu hleuh kai tumin luiah chuan an zuang lut a, tui a khauh avangin an tâlbuai ta a ni.

6th. Sunday: Champhaia Environment & Forest department duty-te chuan Myanmar aṭanga sanghal sa Mizorama phurh luh eng emaw zat an man

7th. Monday: Chawngte leh a chhehvel khaw mipuite chuan power supply an neih mumal loh vang te, an khaw kawngpui chhe lutuk vang leh, BSNL chhe lutuk avang te in Chawngte Joint Action Committee huaihawtin Chawngte-ah kawng an zawh. Kawngzawhnaah hian resolution an pass a; power ṭha an mamawh thu te, power an hmuh mumal loh pawha a bill sang tak an chawi tihhniam an phût thu te, kawng siamṭhat thuai an phût thu leh BSNL chu a nih tur ang taka a nih loh chuan inla chhuak tur leh company dang koh luh an duh thute an tarlang.

8th. Tuesday: Mizoram State Health Care Society sum cheng vbc. 10/-, kum 2008-a Bajaj Allianz Life Insurance company-a dah chungchangah Court-in thutlukna a siam a, Health minister hlui, R.Tlanghmingthanga chu a thiam lohna hmuh loh avangin a chhuah zalen a ni a, thubuai tihtawp a ni. R.Tlanghmingthanga hi Bajaj Allianz-a sorkar sum dah chungchangah hian a fanu, Lianṭhuampuii mimal hlâwkna tura MSHCS committee meeting thu leh sorkar official-te thurawn kalha Health minister a nihna hmang dik lo-ah puh a ni a; Lianṭhuampuii hian cheng vbc. 10/- aṭang hian commission cheng nuai 100/- chuang a dawng tih tarlan a ni. Hetih lai hian, R.Tlanghmingthanga ukil Sam Joseph chuan, thil dik lo tia puhte chuan, MSHCS sum Bajaj Allianz-a dah avang hian sorkarin sum hloh a nei lo a, a pung cheng nuai 100/- nei zawkin, a pungte nen chuan lak chhuah vek a nih tawh thu sawiin, thubuai chu titawp turin a ngen a ni. Ukil dang, Lalramhluna chuan, Bajaj Allianz lamin cheng vbc. 10/- chu a pung vbc. 5 nen la chhuak turin sorkar a hrilh a, mahse vbc. 5/-a a pun laiin an la chhuak lo a, nuai 100/-a a pun laiin an la chhuak ta zawk niin a sawi bawk.

9th. Wednesday: Ailawng khaw naupang Zonunkima s/o Vanlaltluanga chu Lalrindawla te in bula Kawlthei kunga pìpú-a a uai laiin Lalrindawla fapa in a kaphlum. Ailawng VCP hnen aṭanga thu dawn danin, Lalrindawla hian an inah ulhbun pahnih, a mu thun sa ve vein a fehsan a, Zonunkima kah hlum a nih hnua Lalrindawla in an enfiahnaah ulhbun pahnih zinga pakhat zawk chu a mu kah ruah a ni tih hmuh a ni. Heihi a fapa kuthlei chuan a thianpa kah nan a lo hmang ta mai niin a lang. Silai mu hian Zonunkima hi a hnár kàwnah fuhin, a tukkhum lamah a tlang a ni.

10th. Thursday: Health department leh Volunteer for Com¬¬munity Mental Health (VOLCOMH) huaihawtin Vanapa Hall-ah rilru hriselna ni, World Men¬tal Health Day vawi 21-na hman a ni a, thupui chu – ‘Upate leh rilru hrisel’ (Mental health and older adults) tih a ni. World Mental Health Day hmanna inkhawmah hian Hospital & Medical Education director, Dr Lalbiakkima chu chairman niin, Health secretary, Esther Lal¬ruatkimi chu khuallian a ni. Kumina World Mental Health Day thupui hi upate lam hawi a nih angin, tuntuma Vanapa Hall-a hun hmannaah hian Aizawl leh a chhehvela Mizoram Upa Pawl member-te an tel.

11th. Friday: Police Training School, Thenzawlah 15th batch Junior Under Officer cadre course training zote thlahna inkhawm neih a ni a, DIG (SR), LH Shanliana’n a hmanpui. 15th. batch Junior Under Officer cadre course training hi July 17, 2013-ah ṭan a ni a, a tirah armed police battallion, IR battalion leh PTS, Thenzawl aṭangin mi 129 an lut a, mi pathum chu taksa lamah harsatna an neih avanga training zo thei loin, mi 126-in training an zo a ni. DIGP, LH Shanliana chuan, Mizoram police-te chu state dang nena khaikhinin an ṭha tawk tih sawiin, “Hel bei tur leh dan leh thupek kengkawh turin kan ṭha ber tawh a, inferiority complex nei loa ṭan lâk a ṭul,” a ti.

12th. Saturday: Excise & Narcotics enforcement-te leh ITI Veng VDP ṭang dun chuan ITI Vengah sap zu, McDowells No.1 rum ûm puitling 780 an man a, a neitu nia hriat H Lalbiakkima, ITI Veng leh Lalherliani, Mualpui nia insawite an man bawk.

13th. Sunday: October 8, Ningani zana ṭan, Mizoram Presbyterian Synod hnuaia inkhawmpui sang ber dawttu, Presbytery inkhawmpui chu a ṭiak. Chawhma inkhawmah kohhran upa atan tling tharte nemngheh inkhawm neih a niin, chawhnu inkhawmah Lalpa Zanriah Sakramen kilho a ni. Presbytery inkhawmpui hi Synod puipate’n hmun hrang hrangah an hmanpui a ni.

14th. Monday: Steering Committee for State Learning Achievement Survey chu SCERT committee room-ah an chairperson, SCERT director, Malsawmthangi hoin an ṭhukhawm. Meeting-ah hian, hmalakna chak zawka kalpui a nih theih nan Expert Sub-Committee din chungchang te, hmalak zelna tura survey design siamte leh district leh field-a hma latu tur ruat te, budget leh sum hman dan tur kaihhruaina dan siamte leh district-te’n field-a hma latu tur ruat chungchangte sawiho a ni. Steering Committee For State Learning Achievement Survey hi sorkar laipuia Ministry of Human Resource Development-in state sorkarin zirlai naupangte dinhmun dik tak hriat chhuahna atana hma la tura a din a ni.

15th. Tuesday: YMA General Conference vawi 68-na chu Khawbungah tan a ni ta a, a tantir zan hi palaite lawmna inkhawm a niin ‘Tuipuiral Run’ tih mawi taka sakah Conference Organising Committee Secretary, Pu C. Lalhmunsanga’n Palaite lawmna thu a sawi .

16th. Wednesday: Mizoram UPC Literature & Publication Board buatsaihin Tuikhuahtlanga an Hqrs. Conference Hall-ah chanchinbu enkawltute seminar neih a ni a, bial leh tualchhunga chanchinbu chhuah thate lawmman sem a ni. Lawmman hi Literature & Publication Board Chairman, Rev. Liansanga’n a sem a, kumin chhunga Chanchinbu chhuak zinga tha thlan chhuah 1-na chu Bungkawn PYD chanchinbu, “Moria” a ni a, Ramhlun Vengthar PYD Chanchinbu “Naioth” chu 2-na a ni a, pathumna chu Tuikual PYD chanchinbu, “PYD Kantu” a ni.

17th. Thursday: Lawngtlai District Level Standing Committee on Election chu DC’s Conference Hall ah an thukhawm a, kan hma lawk election lo awm tura thil pawimawh hrang hrangte an sawi ho. District Level Standing Committee hian Model Code of Conduct, Poster leh lehkha tar chi thil, intihhmingchhiatna lam thil, pawisa leh zu diklo taka len tir, silai khuahkhirh, zu khuahkhirh leh Cr.PC 107 na anga dan leh thupek kenkawh lam thil bakah Lawngtlai District chhunga Polling Station thlithlai ngai bik pasarih chungchang te leh phur zawka mipuiten vote an thlak theih dan tur chungchangte sawi ho a ni. Committee Chairman hi Lawngtlai District Bawrhsap, District Election Officer ni bawk Pu J. Hmingthanmawia, MCS niin Election Officer Pu V. Lalremliana chu Convener a ni a, Lawngtlai District Superintendent of Police Pu B. K Singh bakah District huam chhunga Election thila nihna pawimawh tak tak chelhtu officers te, Political Party aiawhte, tlawmngai pawl aiawhte chu memer niin tun tum Committee hi thutkhawm vawikhatna ah hian member 24 zet an kal khawm a ni.

18th. Friday: Khawdo Pawi Kut chu Ngaizawl khua-ah hlim taka hman a ni. He kut, Ngaizawl khelmuala hmanah hian Art and Culture Department Director Pu Ngurbiaka chu khuallian a ni a, thu sawiin khuallian chuan in 160 zet awmna Ngaizawl khua-in lungrual taka Khawdo kut an hmang thei chu lawmawm a tih thu sawiin, naupang te tak te atanga upa te thlenga hlim taka he kut an hmang thei chu thil chhinchhiah tlak niin a sawi a ni. He kutah hian Champhai leh a chhehvel khuate atang pawhin mi thahnem tak an tel a, vawiin khan infiamna chi hrang hrang nei a chhunzawm a ni.

19th. Saturday: Thla hlui, September ni 21-a Reiek kai, Tlawng luia tla hlum, Johny Lalremruata, kum 22 mi, Tuikual North-a Pu P.Lalremsiama fapa ruang chu hmuh a nih tak loh avangin Tuikual Kohhranin an chenna inah sunna hun an hmang. Hetah hian Pastor Lalsangbera’n thlamuanna thuchah sawiin khawhar chhungte a hnem a ni. Puan tawh angin, Johny Lalremruata ruang hi ni 7 chhung Aizawl veng hrang hrang YMA member-te leh mi thahnemngai ten an zawn hnuah mipui nawlpuiina ruang zawn chu September ni 28 khan tih tawp a ni a, hetah hian Salvation Army Surgeant Major V.L. Hruaia chuan tawngtaina hun a hmang a ni. Hemi hnu hian a chhungte leh laina te, an chhuahna Khawhai Welfare Association member te chuan an zawng zui zel a, an hmu thei ta chuang lo a ni.

20th. Sunday: Masihi Conventiion Masihi Sangati (Non Mizo tia kan hriat lar) Convention vawi 28-na 18th. Friday a tan tak chu tluang takin Sihphir Presbyterian Kohhran Biak Inah hman zawh a ni ta. He convention a speaker chu Rev. R.Lalthangvunga a nia; thupui chu ‘Isua chu kawng, thutak leh nunna’ (Joh 14:16) a ni. Speaker hian thupui hi tum nga sawiin Pathian Thlarau Thianghlim pawlna nasa takin a thleng a ni. Convention chhung hian speaker in thupui a sawi bakah bible study-te neih a nia; councelling class neih reng a ni bawk. Sihphir bialtu pastor Rev.H.Laltlanthanga’n Lalpa zanriah Sakrament a theh bawk. Tun tum convention-ah hian ringthar 47 lai an awm a ni.

21st. Monday: 1st. battalion MAP parade ground, Armed Vengah September 1, 2012 leh August 31, 2013 inkara India ram state hrang hranga police, an duty laia thite sûnna hun, Commemoration Day hman a ni. September 1, 2012 leh August 31, 2013 inkar chhungin India ram hmun hrang hrangah police duty laia thi mi 579 an awm a; Uttar Pradesh-ah duty laia thi tam berin, mi 117 an thi a, Mizoramah chuan duty laia thi an awm lo thung. Commemoration Day hi October 21, 1959-a China sipaite’n Ladakh-a police post an lak ṭuma mi pakua an kah hlum hriatrengna atan kum tin hman ṭhin a ni.

22nd. Tuesday: Mizoram district hrang hrangah thingtlang mite infiamna hmanrua atana programme duan, Panchayat Yuva Krida Aur Khel Abhiyan (PYKKA) hnuaiah inelna ṭan a ni a, infiamna chi hrang hrangah infiammi ṭhahnem tak an inel. Tuntum infiamnaah hian spoprt discipline 10 – athletics, boxing, taekwondo, wrestling, weighlifting, hockey, badminton, table tennis, judo leh football-ahte inel a ni ang.

23rd. Wednesday: Kawnpuia Awithangpa Hall-ah Kolasib District Child Protection Unit chuan naupang dikna chanvo leh humhim chungchang zirhona an buatsaih a; Kawnpuia zirna-in tin aiawh te, NGO hrang hrang aiawhte leh V/C member-te an tel. Training-ah hian Legal cum Probation Officer, C Lalnunfela’n ‘Naupang chunga pawikhawihna thleng chungchang’ tih thupui hmangin thu a sawi a, protection officer, Laltlanmawi-i’n ‘Dan hnuaia naupang dinhmun a zirtir chungchang’ leh protection officer vek C Lalzawmdiki’n khawtlang hruaituten naupang chanvo kan humhalh sak dan tur a sawi bawk. Zirhonaa tarlan anih danin, hringtu nu leh pate enkawl loha mi dangin naupang an enkawl chungchang tihfelsak theihna hmun Mizoram State Child Protection Society hnuaiah Mizoram pumah pali a awm a; chungte chu – Sunshine Society for Children, Laipuitlang; International Poor Children, Seventhday Tlang; Hmangaihte Rûn, Zemabawk leh Lairam Child Adoption Centre, Lawngtlai te a ni.

24th. Thursday: Mizoram UPC Youth Department General Board Meeting vawi-18 na chu Tuikhuahtlanga UPC General Headquarters Office conference hall-ah neih a ni. Meeting hi General PYD president, Tirhkoh Ch. Lalhmingmuana’n a kaihruai a, nakum chhunga thu leh hla kutpui buatsaih dan tur chungchang te, Penticost nia mihlim kawngzawh neih dan tur te, General PYD bultuma live crusade neih dan tur te, nakuma PYD Day puala thisen pek dan tur leh chaw ngheia tawngtai dan tur te an rel a ni. UPC Mizoram PYD hian kumina an kumpuan atan ‘Inralrinna’ tih an hmang a ni.

25th. Friday: Champhai Venglai community hall-ah zirtirtute tana question siam dan zirna, Workshop cum Consultation for Primary School Teachers on Question Settings neih a ni a; Champhai leh Khawbung leh Khawzawl RD block aṭangin primary school zirtirtu aiawhte an tel.

26th. Saturday: Aizawl Bishop, Most Rev.Stephen Rotluanga chuan Ramhlun North-a St. Thomas Church-ah deacon Emmanuel Lalropuia Ralte, CSC leh deacon Michael Vanlalruata Khawlhring, CSC-te chu Roman Catholic kohhran puithiam atan a nemnghet.

27th. Sunday: Mission Veng Presbyterian Kohhran chuan an biak inah Mizo pastor nemngheh kum 100 tlinna, centenary an lawm a; pastor centenary hriatrengna lungphek an siam chu Synod moderator, Rev. Lalramliana Pachuau-in a hawng. Mission Veng kohhran hian pastor nemngheh centenary hi chawhnu leh zanah an lawm a; chawhnu inkhawmah an pastor lo ni tawhte hnenah ngaihhlutna thilpek an hlan a, Synod moderator-in thuchah a sawi a ni. Chawhnu inkhawm banah pastor nemngheh centenary hriatrengna lungphek hawn a ni a, kohhran upa nemngheh centenary, kum 2011-a an lawm tawh hriatrengna lung an hawng bawk. Mizote zinga pastor nemngheh hmasak ber chu Pastor Chhuahkhama a ni a, October 1913-a nemngheh niin, nemngheh ni tak erawh hriat chian theih a ni lo. Pastor Chhuahkhama hi February 1949-ah a thi a, tuna Mission Veng biak-in hmunah hian phûm a ni.

28th. Monday: September 21, 2013-a Reiek kài, Tlawng luia tla hlum, Johnny Lalremruata (23) s/o Lalremsiama, Tuikual North ruang chu luia lenkhang zar mi paliin Sihhmui khaw bula Tlawng luiah an hmu. Ruang hi a chhungte hian hlawmin vui liam nghal a ni.

29th. Tuesday: Pu TBC Lalthanzama Jeep MZ-01, 2736, ama khalh ni bawk chu Sihphir quarry kawnga pêng kawia a inhêr tur a ‘back’ liam palh hlauh mai a. A chhunga chuang mi pasarih zinga pathum in hliam an tuar.

30th. Wednesday: Industrial Training Institute (ITI)-a Red Ribbon Club chuan Aizawl Civil Hospital-ah thisen unit 57 an pe a, a petute hi mipa 54 leh hmeichhia pathum an ni.

31st. Tuesday: Exise & Narcotics commissioner, Lalbiakmawia Khiangte chu supernuation pension-in a chhuak a; Exise & Narcotics commissionerate conference hall-ah amah thlahna hun hi an hmang. Exise & Narcotics deputy commisioner ni mek, Lalhmunsanga chu commissioner-ah a kaisang nghal a; asst.commissioner Ngurchungnunga Sailo chu deputy commissioner-ah a kai bawk.