2013 Mizoram

January 6th, 2014 9:56 pm by chhana

*Dam takin kumthar kan chuang kai a; mahse, reilo teah chanchin duhawm lo tak, drug overdose avanga thihna leh an thi chiah lo a nih pawhin buaipuiawm taka buainain min nang nghal. Heng thil lo hlen nachhan ber chu tunlaia khawchhak film kan tuipui em em Korean film nghawng niin a lang.

Ngona damdawi a ni a; khuh damdawi, lar tak, mitin pawn kan hre awm e, doctor prescribtion tel lo pawh a lei theih Syr. RESPIRA – D, leh zawlaidi an ruih pawlh vang a ni. He khuh damdawi hi awmna a tan te an chawh nasa a, khuh damdawi tha tak a ni. Respira – D hi damdawi chi hnih in pawlh a ni, a khuh damdawi a tak zawk chu DEXTROMETORPHAN HYDROBROMIDE a ni, a hman na tur a hman chuan damdawi tha tak a ni, a dang chu CHLORPHENERAMINE MALAETE a ni, hei chu anti-histaminic (allergy damdawi ang deuh) a ni.

Hmuh theihin a tirah a lang si lo a, mahse, a thawh chu a lo na ngang aniang. Hetia thalate lungphu chawla an thih teuh tak avang hian sorkar pawhin thuchhuah siamin naupang kum tlinglo leh school kal mek, uniform ha te tan khuh damdawi hralh a khap ta hial a ni.

Tunhnaiah hetiang harsatna nei hi mi tam tak an awm tak avangin doctor te pawhin uluk takin an zirchiang a, khuh damdawi leh zawllaidi te an lo tih pawlh thin avanga thleng a ni tlangpui.

Thil reng reng hian uchuak taka a awm tawh chuan side effect a awm thin tih hriat thar a tul khawp mai. Chuvangin, nu leh pate pawhin uluk taka kan fate kan enkawl a tul tawh hle awm e.

*Mizote Kut zinga ropui ber pawl Chapchar Kut hlim takin kan hmang a; a lawmawmin mit leh beng pawh a tlai khawp mai. Chapchar Kut hi kum dang ang lo deuhin Aizawlah ni hnih, district khawpui dangah ni khat theuh hman a ni.

Mizoram puma Chapchar Kût hmanna atan Rs. 2,714,700/- sên ral a ni a, Aizawla hmanna atan bik Rs. 20,14,700/- leh district dang pasarihah Rs. 7,00,000/- sên ral a ni. Kumina Aizawla Chapchar Kut hmanna atan hian Rs. 2,714,700/- sen ral a ni a; sumte chu head hrang hrang 26-ah sem ral a ni.

Aizawla Chapchar Kût hmanaa sum hmanna hlawm liante chu – hnam lâm entirna atan Rs. 5,10,000/-, traditional custome show atan Rs. 1,20,000/-, programme live telecast-a pek chhuah nan Rs. 1,00,000/-, sound system atan Rs. 3,00,000/-, stage siam nan Rs. 84,000/-, VIP leh official-te ei leh in atan Rs. 1,00,000/-, stage cheina leh seat remna atan Rs. 75,050/-, cultural dress atan Rs. 1,21,525/- hman a ni.

Mi thil chik mite chuan sum sanction atanga chhutin Aizawl bika hmanna vel kha thil ni theiloah an ngai. Thil reng reng kha to uchuak taka an lei hlawm a nih loh chuan a ngaihna a awmloh thu in an sawi hlawm. A ni taka, sound chung chang bik kha lo sawi ta ila; KTP leh YMA inkhawmpui lian chu Aizawl khaw pawnah ni thum/ni li hman a ni a; chhun leh zanah hman thin a ni bawk. Mahse, kut erawh hi chu ni hnih chhung, chu pawh chhunah chauh lehnghal hman a ni naa; thalai inkhawmpui naa hman aiin zu han hmang to zawk a mawle! Thil dang kha chu kan sawi seng loah ngai ta ila.

Hetih mek lai hian district danga mite hian kut hman hun chhung chu an hrethiam viau tho naa; sum thehchhuah Aizawl nena a intlhau lutuk erawh na an ti hlawm hle.
Sum hman hnem hrim hrim hi ka sawisel lo a, mahse, sum hmanna leh a sum kal ral zat a inmil loh erawh chuan kut tibawrhbangtu a ni thei. Kan kut hian tourist a hip luh phahna a nih dawn chuan tun aia tam pawh sum sen nise a hlawkin a rinawm a, mahse, sum hman leh a hmanna inmil se, sum hman tam tih ringawt a, a hmanna leh a sum hmannaa a inmil si loh chuan a a tha chuang miah lo a, mipui rilru tina tu mai mai a ni dawn a ni.

*Laipuitlang, PWD mual chhaklam Mechanical Division vel lei chu a min a, he leimin hian in 13 a ti chhia a. Mi 17 in nunna chanin mi paruk in hliam an tuar. A thlang kawngpui hi motor an hun thup thinna hmun a nih avangin two wheller tiamin motor 17 a ti chhe bawk.

Lei minna lai hi hmun himlo nia a lan avangin sorkar hotute lam paw’n chhiatna thlen tu nasa bera ngaih PWD building hi thiah turin order pawh tihfel vek a ni tawha. PWD EE ( W) leh SE ( W ) te chuan E-in-C chu CPWD manual anga he building thiat thei chu CE (Building) a nih thu November ni 20, 2012 khan an hriattir a, mahse E-in-C chuan an thurawn anga ti mai lovin, PWD kalphung lo neih tawh anga sorkar phalna an lak kual leh avangin hetiang chhiatna hi a thleng hman a ni.

Sorkar hotu lam chuan nawrna a nasa bawka he thila mawhphurtu bera ngaih Er. Vanlalduhsaka pawh an suspend nghe nghe a nih kha. Mi tamtak chuan sorkar inthlahdah vangah an puh a; thenkhat thung chuan PWD building kan puh bur mai hi ding lo pawh nise chhiatna hi a thlen tho an rin thu an sawi hlawm.

*Vaphai khaw daia Saikhumphaia bawka inkhawh foreigner ho an tam em avanga hnawksak tiin Vaphai khaw mipui te chuan a khaw nawtin an hal. An pawngpaw hal ngawtin an thinur tawngkhawng thiltih niin a lang lo a; vawi engemawzat sorkar lamah pawh an zualko tawh. Awmzia a neih theih loh avangin leh a aia tha zawk Vaphai lamin an hriat chuan miau loh avangin hetiang thil rapthlak tak hi a thleng ta a ni.

Nunau pawisawilo te an lainat awm hle a; mi pawi an sawi tih pawh inhrelo naupang ho an lainatawm zual. Tlawmngaia lo tanpui tum thahnem tak an awm a; an tuhrah seng nia ngaia tanpui tura thawkchhuak lo dang pawl an awm bawk.

Engpawhnise, he thil atang hian harh tlang ila, kan ram chhungah dan loa awm an awm em? Tam tak annih tawh phei chuan Vaphai ho anga chet a ngaih hun a thlen hma ngei hian ngaihtuahna I seng nawn teh ang u. Chakma an tam tawh a; kan ram rorelna sang berah pawh an thu ve ta vung mai. Dan ngaihna pawh kan hre tawh lo a nia; muanga kan thut lai hian kan ramah hnathawh tur tam tak a la awm si. Nakinah tia kan inthlahdah mai zawngin a la pawi dah ange.

*Thlipui na tak, a hming ‘mahasen’ an tih chuan Mizoram a nuai hrep dawn nia sawi a awm avangin nunaute an chiai nasa hle. He thlipui hi Bangladesh atanga lokalin Mizoram tan tlanga khawchhak lam pan zel tura ngaih a ni. An sawi dan tak phei chuan eng anga in nghet tha pawh nise a nuai fuh chuan a chhe vek dawna; chumi awmzia chu engmahin a dawl zo lo tihna a nih ber mai chu.

Hnathawka chhuak ho pawh an haw hmain inchhung bungrua vel pawh theih ang tawkin an ti fel hlawm. Thenkhat an in riah chhuah san an awm bawk.Tlema thlarau mi deuh ho thenkhat tawngtai na rah chhuah a ni mahna tlai lamah na vak loin minute hnih khat vel a thaw ve deuh tih loh chu na taka thawk loin min chhuahsan fel a; a lawmawm khawp mai.

*Mizoramin kum tin khel lo a kan tawrh thin leimin ram chhung hmun hrang hrangah a thleng nasa leh hle. Nunphung pawh khaihlak nasa tak a ni. A bik takin Zanlawn kawngah buaina a thleng nasa zual. He kawng hi national highway a nilo a; mahse, Sairang lam kawng a chhiat miau avangin motor lian ho pawh an kal lo theilo. Kawng a lo awngrawp tawh si, hetianga motor rit tak takin a’n rah takah chuan kawngin a tlin lo a; accident pawh an awm phah nual. Kawnpui leh a hmar lama sumo service ho pawhin an thulh phah fo reng a ni.

*Pu Lalremruata Zarkawt chuan a nupui Zohmangaihi chu rawng taka thatin Sihphir ram chhunga Aizawl khawpui bawlhhlawh paihna hmun Sakawrhmuituai tlang bulthuta dumping ground-ah a paih a; New Delhi-ah a zin san.

Pi Zohmangahi hi a bo tih report a awm tawh, chhungkhat laina ten theihtawp chhuahin an zawng a; an beidawn hnuah police ruaiin anni hian a nupui chin hriat loh a a awm lai laia a lo zin daih mai chu an ringhlel ta tlat mai. A rawn hawn dawnah Lengpui airport-ah lo changin an lo man nghal. Rei inthup thei lo in a inpuang ta.

New Delhi-ah zin a ngaih thu sawiin annu hian eng engemaw chhuanlam siamin a remchan loh thu a lo hrilh. Ani’n zin ngei a tum ruh si. Hetiang thil rapthlak tak hi a lo thleng ta a ni.

Hetianga a inpuan takah chuan ruang a paihna hmun chu police kaihhruaina hnuaiah a zan a zanin endik nghal a ni a; zan khaw thim zingah eng a tih theih loh avangin a tukah Sihphir khaw thalai sawm bawr vel chu ruang zawnnaa tanpui turin police lamin an sawm a; anni (Sihphir thalai) ho hmalaknain ruang chu hmuhchhuah a ni ta.

Hetih mek lai hian Lungdai khaw lam chu anmahni ram chhungah chhiat tawk an awm nia ngaiin kuang nen an rawn thawk chho ve bawk.

Tunhma deuh atang tawh khan Lungdai lam hian Sakawrhmuituai tlang leh a vel khi an khaw huam chhung ngei nia ngaiin Sihphir mipui te vawi duailo an lo tibuai tawh thin a; he thil hi Mizoram sorkar a boundary lam khawih tute tih dikloh avanga thil lo awm a ni. Hetah hian Lungdai khaw area anga tarlan a ni miau a; chuvangin, Lungdai lam hi pawngpaw dem ngawt chi anni chuang lo.

Tunah chhiatna rapthlak tak mai a lo thleng a; he hun hi Lungdai khaw mi[phepuite chuan Mizoram sorkar lakah helai bawr vel hi an ram chhung a nih zia tarlanna remchang tak nia an ngaih avangin mi chhiat na mah nise hetiang hian an rawn thawk chho ta mai a ni.

Lungdai ho a khaw nawtin an rawn thawk chho a nia; Sihphir lam sawm bawr vel chauh, chu pawh lungfing chin, rilru puitling pu rual an lo nih si avangin buaina a chhuak ta lo hlauh a ni. Sihphir khaw lam an in huikhawm ve meuh lahin police lam an lo inrawlh hman tawh bawk si. Buaina lian tham a thleng ta lo hlauh a ni.

Mizoramah chuan khawi khua pawh nise an khaw huam chhunga chhiat tawk an awm chuan kuang siam sakin ruang kan in tuamsak thin a ni. Hetiang bawk hian Sihphir khua pawh kuang nen an thawk chho a ni a; mahse, Lungdai lam kuang nen bawk an rawn thawhchhuah ve bawk si avangin Zarkawt lamin chalrem nan tiin anmahni kuang an chah chho ta ringawt mai a ni. Hetianga Zarkawt lamin an ti mai hi an demawm hranlo.

Sihphir khua hian an khaw hmar lam Silchar leh Bagha vel pawh nise, thih dan pangngai lo deuha thi an khaw kaltlang tur hi chu puanin an lo tuam ziah thin. Pi Zohmangaihi pawh hi an khaw kawnah pangpar leh puana tuam ngei tumin mimal leh tla32mngai pawl angin mi thahnem takin an lo hmuaka; mahse, ruang phurtu motor chu a tlan tlang tak daih avangin Zarkawt khawtlang lakah Sihphir khaw mipuite an lungawi lo hle. (Zarkawt lam miin he thuziak in lo chhiar a nih chuan inngaihtuah nawn leh rawh u)

Lungdai lamin tum tamtak Sihphir ram sah hek tumin hma an lak thin thu kan sawi tawh. Tuna an chet leh takah hian Sihphir thalaite an khaw chhunga sarthi pawh ruang an tuam theih loh phah tak avang hian an ngawi thei ta lo. An ram chin chinfel an phut a; an ram chin theu in thalai sang rual hnatlangin an thawk chhuaka; Sihphir ram chinah well come signboard an tar bawk. Mahse, hetianga an hnatlan dawn thu hi Lungdai lamin an lo hriatin force lam nen an rawn thawk chho ta mup mai. Sorkar beng a thlen phah tak hialah chuan Aizawl lam atang pawhin thahnem tak an thawk chho bawk. Ramri thlen hmaa police an din phui miau avangin Sihphir thalai in an su tlang lui a; a lehlam lehlam mi pawhin hliam tenau tuar an awm nual. Tichuan, tarlan tak angin dai chu theu in signboard chu an tar fel thei ta a ni.

*Chief Minister zahawm tak Pu Lal Thanhawla chuan a phai zinin Hindu ho ang maiin a chal a hnawihsenin bati te a chhi a; coconut a sawhkeh bawk tih kan hre theuh awm e. Zoram mipui in nasa takin kan dem a nih kha. Kan helh tih pawh a inhre ngei ang. Mahse, sim chu sawi loh, a hnawih sen leh ngata; mipui hriatah pastor-te paw’n an hnawihsen ve thu leh khualtha nih entirnaa Hindu ho in an ngaih a nih avangin a pawi tih loh thu in a la sawi zui.

A rinna kawngah Hindu a inlet ta hialah mi tam tak phei chuan an ngai hman. A rinna chungchangah chuan nia, Kristian sakhaw kalsana Hindu a a inleh mai chu a rinawm loh. Mahse, ram hruaitu lu ber a nia; ram mipuiin kan duh loh ang chuan awm loh mai awm a nih lai a ti nawn leh ngat mai hian mipui rilru a ti +/n. cwa hle. He thil duhloh zia entirnan MNF party chuan kawngzawh runpui an buatsaih hial a ni.

*A tum rukna atan LPS comedian search chu tluang taka neih a ni leh taa; he hunah hian Lalnunsanga, Kanan veng, Aizawl chu thiam bera thlan a niin a ni hian trophy leh prize money bakah Rodeo scooty, Samsung 3:16 plan solution aṭangin flat TV, RC Enterprise Whirlpool aṭangin Washing machine, LG D3 Business Enterprise aṭangin exide inverter a dawn bawk bakah mi thilphal leh duhsaktute thilpek ṭhahnem tak a dawng bawk.
He huna Chief Organiser H.Rotluanga (Mapuia) a fakawm hle. A chhan chu hranghlui fiamthu thiam tak tak ho chu mipui hmuh theih turin min pho chhuah sak hlawm a. Thangthar deuh thenkhat phei chuan an kohchhuah tam zawk phei kha chu hriat pawh an hrelo hial awm e. A bengvarthlak takzet a ni.

Hetih mek lai hian tum danga an la tih ngai loh junior comedian serch pawh neih nghal a ni a; mi thahnem tak telin naupan luat avanga tawng fiah theilo bakah tawng duh bau lo te an awm. An nawiin nuih na tur a tam khawp mai. Mahse, an naupanna anga en ngawt chi loh tam tak an awm tho a; puitling ho ai mah khan an lawm awm zawk hial nia an lan chang pawh an awm. A pumpuiah Ruben Lalhruaitluanga, Bethlehem Veng chu pakhatna a niin Rs 30,000/-, trophy mawi tak leh mi thil phalte hnen atangin thilpek thahnem tak a dawng.

*Dawr kai kan nia; zing dar sarih velah pa pakhatin chi kg. nga ngawt mai min rawn dawr pek a nih kha. A lei hnem em avanga a chhan ka zawh nak chuan chi van tur thu a sawi ta mai. Awih lo dawn ila; a lo nih tak tak si chuan kan buai dawn si, kan liah khawp pawh nei loin kan inhralh zo chu a ni ta der mai. A rang a rangin wholesale dawrah kan la leh nghal. Duhsak zual te lo chu lei tir pawh kan phal lo.

Hemi hnu lawk atang hian chi zawng an in sulpel zut zut a; to uchuak taka lei pawh engemawzat an awm hman.

Mi thenkhat chuan Mizote kan over in thil reng reng mi’n an sawi chuan finfiah hmasa loin kan bawh nghal huam huam thin niin an sawi. A dik ang. Mahse, a dik leh dik loh kan fiah chhunga thil a lo pawi hman theih ve tho avangin bawh nghal mai hi a fuh na lai a awm ve tho.

Hetianga buaina hi a lo chhuah tanna nia lang chu Bihar ah tute emaw misualin ‘Chi’ Common Salt siamna factory India ram hmun engemawzat ami chu akang chhe vek a, thla tamtak chhung chi leitur a awm dawnlo tih thu an thehdarh vang leh Cyclone Phailin vang in chi siamna hmun chhe vek anga sawi a awm vang a ni ber.

Mahse, he thil hi chu kan Zoram chhungah chauh pawh a ni lo a; Bihar state mai baka kan thenawm state Assam-ah ngei pawh nasa takin buai hman a ni. Mahse, he kan buai ni la la hian heng thu hi thuthang diklo a ni tih hriatchhuah nghal a ni. Mahse, buaina a awm tawh avangin hun engemawchen chu kan khaihlak phah a ni.

*Mizoram Assembly inthlan kum a nia; inthlan hun tura ruat chungchangah kohhran hruaitute leh political party hruaitu thawk hote leh Mizoram chief electoral officer, Ashwani Kumar chungchangah nasa taka innghirngho na a thlen phah hial. He inthlanah hian candidate mi 142 an awm a; bial tinah candidate 3.55 awm ang anni. Harsatna neuh neuh engemawzat a awma; mahse, tha taka buaina chinfel a ni. A pumpuiah Assembly seat 40 zinga seat 34 latu Indian National Congress party chuan hnehna an chang. Anni hian kum 2008 inthlan aiin seat pahnihin an la tam a; MNF, MPC leh MDF-te thawkho, Mizoram Democratic Alliance (MDA)-in seat 6 an la a; party dang leh independent candidate-te’n seat lak an nei lo thung.

Tun tum inthlanah hian kum danga la tih ngai loh, thlan tur hrelo ho in vote an thlak ve tho theihna dan None of The Above chu hman a niin hetah hian vote engemawzat a tla nghe nghe.Voter-verified paper audit trail (VVPAT) hman a ni bawk. VVPAT system hmang hian EVM-a vote thlaktu chuan a vote thlak chu a dik ngei tih a finfiahna turin, a serial number, candidate a vote leh a symbol lanna chu paper-in a rawn print a, voter hian a lo endik thei a ni.

Sorkar lai, INC hian MLA ni lai tun ṭum inthlana tling zo ta lo mi panga an nei a; chungte chu – Aizawl North-II, Aizawl West-I, Aizawl West-II, Aizawl West-III, Tuikum, Saiha te an ni. Minister ni lai zingah, Finance minister leh MPCC treasurer H.Liansailova, PHE minister S.Hiato te an tla a; NLUP Implementing Board chairman R.Selṭhuama te an tla bawk.

MNF-in kum 2008-a an seat lak an hloh vek a; mahse seat dang panga – Tuikum, Saiha, Aizawl West-I, Aizawl West-II leh Aizawl West-III te an lak bakah, MPC nena an thawhhona, MDA angin Aizawl North-II an la bawk. Kum 2008 inthlana MLA pahnih nei, ZNP-in seat lak an nei lo a ni.

Tun ṭum inthlanah hian Tuichawng biala INC candidate, Buddha Dhan Chakma chuan vote hmu tam berin, vote 14,6
;bd26 a hmu a; vote hmu tlem ber, Hrangturzo biala Jai Maha Bharat Party candidate F..0Remkhuma chuan vote 29 a hmu.

Inhnehna sang ber chu Tuichawng bialah niin, INC candidate Buddha Dhan Chakma chuan amah hnaih bertu MDA candidate Rashik Mohan Chakma chu vote 8,726-in a hneh a; inhnehna tlem ber chu Tuikum bialah niin, MDA candidate Lalrinawma’n amah hnaih bertu INC candidate K.Lianzuala chu vote 14-in a hneh a ni. NOTA-a vote tlak tamna ber bial chu Thorang a ni a, vote 169 a tla a ni.

Tun ṭum inthlanah hian MPCC president Lal Thanhawla tih loh, party dang president-te – Zoramthanga, Lalduhoma leh Lalhmangaiha Sailo te chu an tla vek a ni. MLA la ni ngai lo tling thar mi 10 – T.Sangkunga, Lalthanliana (Aizawl North-II), Lalruatkima, Vanlalzawma, R.Vanlalvena, Lalrinawma (Tuikum), Chalrosanga Ralte, Buddha Dhan Chakma, C.Ngunlianchunga leh Dr K.Beichhua te an awm.

Hetiang hi result a nih tak avangin Chief Minister ni lai Pu Lal Thanhawla chu CM a ni leh taa; tun tum hi Pu Lal Thanhawla’n tum nga (5) Mizoram Chief Minister dinhmun a luahna tur a ni a, hemi hma hian 1984 –1986 (1st Term); 1989 –1993 (2nd Term); 1993 –1998 (3rd Term); 2008 –2013 (4th Term) inkar te khan Chief Minister dihmun hi a lo luah tawh a ni. Chief Minister Pu Lal Thanhawla hi tun Assembly in thlan tiamin, vawi 9 MLA anih na tur a ni. 2013 hma hian 1978, 1979, 1984, 1987, 1989, 1993, 2003 leh 2008 ah te khan MLA atana thlan tlin a lo ni tawh bawk a ni.

Opponion poll lak hrang hrangah Congress in heti zat hauh chu sawi loh, chiang taka an tlak ring an tam hle. Chuti lo a heti khawpa hnehna an chang thei mai hian EVM chungchangah rorel lai Congress party in rinhlelh an hlawh phah hle. Hei vang hian EVM tih chingpen theih a nih dan chhiar tur thahnem tak a awm a; hetih rual hian tih chingpen theih chu a ni nameuh mai a; mahse, ti chingpen tura tihtur a tam zia leh hautak zia *’,zachhiar tur engemawzat a awm bawk.

EVM tih chingpen theih dan chhiar tur tamtak zinga hriat hlawh ta ber chu KV Paradise neitupa Pu K.Chhawnthuama, Durtlangin SMS-a Mizoram Chief Minister a vau thu hi a ni awm e. Hetah hian EVM hmanga intitling chawpa puhna te, mi tenawm bera puhna te, Mizo zinga corrupt bera puhna te, EVM suasam tura sum tam taka DC te thama puhna te a ni a. Dik lo taka ram hruai tuma puhna thu thlalak nen lama puanzar a ni dawn tihte a ni a. “Tuartu in tam dawn mang e”, “In EVM suasamtu ho pawh an nun a risky” tia vauna te pawh a tel.

Hetiang a nih avang hian CM chuan FIR a thehlut nghal a, chumi hnuah Pu K.Chhawnthuama hi man a ni ta a ni. Zan thum police kuta a awm hnuin bail a chhuah a ni ta a ni.

*Mizorama Judaism sakhaw vuan tute chuan ramtiam Israel ram panin Mizoram an chhuahsan. Heng ho hi group thumah inthenin Usbekistan kaltlangin Israel hi an lut a ni.

Kum 1989 aṭanga kum 2006 thleng khan Mizo zingah Juda sakhaw zuitu mi 1,000 bawr vel Israel-ah an pêm tawh a; mi eng emaw zat chu January 2014-a Israel-a pêm tumin an inbuatsaih mek bawk. 1989 atangin an pem angin tarlang mah ila a kal hmasa ber chu Pu Gideon Rei (Pu Vana) a niin ani hi 1981 khan kum thum zet a lo zu awm tawh a ni. Tihian, group ang leh mimal ang te a kal zeuh zeuh in tun hi an thleng ta a ni.

Group anga an kal hnuhnung ber chu 2006 November thla khan a nia; hemi tum hian mi 207 lai an kal a ni.

March 21, 1976 khan Mizorama a vawi khatna atan Hmunpui khuaah Chief Hazan, Gideon Rei hoin Menashe Community Board conference neih a ni a, hetah hian hruaitu tharte thlan a ni.

Hemi hnu hian Juda sakhaw zuitute an pung zel a, Israel ram pan hi a khat tawkin awm thin mahse, luh belh an awm ve zel bawk avangin tunah hian thahnem tak an awm ve tawh a ni. An zirna hmunpui chu Shavei Israel tih a niin, Upper Republic-ah an hmun hi a awm. An biak in erawh chu Dawrpui Vengah a awm thung. Thingtlang khaw hrang hrangah biak in hi a awm bawk.

Hetianga pem thla ho hi ‘Bnei Menashe’ tih annia; Mizoram atanga kalte bakah Manipur atanga tlangmi thenkhatte an nia; Josefa fa pahnih te zinga a upa zawk Menashe a thlahte tihna a ni.