mi(sual).com

KAN THIANPA THUCHAH HNUHNUNG
**************************************

90s tir lam chho kha a ni a, khatih hunlai kha chuan kan la tal na ve bat bat hlawm khawp mai a. Uangpui chang suh ila Aizawl velah kha chuan bike te kha a nei hmasa pawl tak kan nih ve avangin a chet pawh kan che na in a vah lah kan vak tam nangiang reng a. Ruihtheihthil lam ni se a tih pawh kan ti nasa khawp mai bawk a. Kan phak ang tawk kha chuan kan khawvel hmuh phak chin kha chu kan chen ve thin kha a ni a. A bik takin bike khan kan tlankual hnem em em a, a ‘tuitling bar’ lam kan kal nitin a, chutah Lunglei, Champhai, Kolasib lam te leh khawi khua khua emaw a kal a lan deuh kha chuan kan kal leh tawp mai a. Silchar, Shillong tih te hi kan thleng thla zung zung mai thin. Pawisak em em lah a awm hek lo.

Hetianga kan tal deuh bawrh bawrh lai hian veng pakhata kan thianpa pakhat chu a bike chuan zankhat chu a accident ta hlauh mai a, thih ngam in nikhaw hrelovin damdawiinah a awm ta a. A chhungte leh thian hovin kan awmpui laih laih mai a, kan in tlaivar chhawk a, eng ni lo mah ila min thlamuan pui ve hle mai a. Harhchhuak mumal mang lova ni 3 zet hnuah chuan a rawn harh chhuak ve hlawl mai a. A tha chhuak mai dawn emaw kan ti tawh a, keini a thiante ho phei chu in lamah kan haw darh rih a. Kei pawh inah ka haw a, chaw te ei in ka inbual fai a, ka mu hahchawl ang chu ka ti ve a. Mut pawh ka la mu chawl hman meuh lo tih chuan kan phone chu a rawn ri a. Ka nu in a lo la a, keimah min biak duh avangin ka nu chuan min rawn kova. Phone ka va lak chuan ka thianpa nu chuan mangang aw deuh mai hian “Hmaa, hei in thianpa hi a thalo leh tlat mai a lam a lam che u a in rawn kal thei ang em?” a rawn ti a. Kei chuan, “Thei e, thiante dang kan hrilh kual ange…” tih pah chuan phone chu ka dah a, kan thiante a phone theih theih chu ka phone kual nghal a. Tichuan ka insiam sawk sawk a damdawiin lam pan chuan ka tlan phei leh ta nghal a, kan thianpa pakhat hi ka sawm kual nghal bawk a.

Damdawiin kan va thlen chuan kan thianpa mutna kum bulah chuan puan hi a lo in zar kual pap mai a, a bulah chuan a chhungte leh nurse ho te, leh tu tute emaw hi an lo awm deuh laih laih a, tap ri vawng vawng thawm kan hriat atang chuan kan thianpa chu dam in kan va hmu hman ta lo tih chu tu hrilh ngai lovin kan chiang khawp mai a. Kan lut ve ta thova. Kan lut chiah chu a nu chuan kan hmel a hmu chu min rawn pan a min kuah a a tap ta hawm hawm mai a…sawi tur a vang duh kher mai.

Damdawiin lam a tihtur ang ang te an tihfel hnuah chuan an veng chhung lam atanga rawn kal te nen kan thianpa ruang chu an in lamah kan zui phei ve ta a. Kan thian dangte pawh an rawn thlen belh ve zel a, kan ngui nghiai hlawm mai a. Inlampang chu an lo singsa fel vek tawh a an veng mi an lawm awm deuh laih laih bawk a. A chhung leh khatte bakah kan thianho chuan ruang chu kan kil ve laih mai a. Kan thianho chu han en reng reng pawh a han fel hmel zawk zawk kan awm lo, bengbeh maksak deuh deuh leh lumeh dan maksak deuh deuh nen kan thu ther fur mai a, midang awm ve te chuan min en duh hle in kei phei chuan ka hre nghe nghe a, a nuam duhlo angreng khawp mai a.

Chutah thenawm khawvengte an in khat chuan an rawn lut khawm ta maw tih ah kan thianpa nu chu rawn ding chhuakin an chhiat tawh dan te, a tawp thlenga an thil tawn te chu tawi fel takin a rawn sawi ta a. Kan thianho in kan buaipui na chungchanga a lawmthu te an sawi lang tel hlauh chuan min ti tlangnel ve sawt nghe nghe a. Hemi tuma a thusawi hi a ni tun thleng a ka rilru a la cham reng thin chu. An chanchin te tawi kim taka a sawi hnuah an fapa kan thianpa khatia a rawn harhchhuah a tha leh mai tura kan ngai in kan hawsan hlan khan a nu chu Kristian hlabu a lo dil a. An lo kawl remchan mai si loh avangin nurse duty ho ta an va hawh sak a. Chutah Kristian hlabu No 397 ‘Ka Chhandamtu Chu Tawk Turin’ tih kha a keu tir a, a nu chu a lo chhiarchhuah tir a, chutah a nu hnenah chuan, “Ka nu, tunah hian ka kalsan tawh dawn che u a, min rawn ngaihtuah reng reng lo ula. Tunhma in khatiang khan lo nung thin mah ila tunah chuan Lal Isua ka nei tawh a chuvangin ka kalna turah hian ka chiang em em a, thih pawh ka hreh reng reng lo, mahse kutruak mai a Lal Isua ka tawk tur eawrh hi chuan min ti huphurh ve a ni mai, a zahthlak dawn em a ni, ka thainte pawh kha i lo hrilh ve ngei ngei dawn nia…” tih chu kan thianpa thuchah hnuhnung chu a lo ni ta a ni.

Ka Chhandamtu chu tawk turin,
Kut ruakin ka kal ang maw?
Ni khat mah a rawng bawl lovin,
Enge ka pek tak ang aw.

Ka Chhandamtu chu tawk turin,
Kut ruakin ka kal ang maw?
Thlarau pakhat mah hruai lovin,
Ka tawk dawn ka Chhandamtu.

Thih chu htrehin ka lungngai lo,
Chhandamtu’n min hruai vangin;
Mahse ruaka ka tawk tur hian,
Min ti hreh in ka lungngai.

Kum ral ta zawng zawng te kha aw!
koh kir leh theih ni sela.
Ko kirin Chhandamtu hnenah
Lawm takin ka pe tawh ang.

Ringtu zawngte u, tho ula,
Ni a la en chhung hianin:
Thihin a nan hma che u hian,
Thlarau bo tan thawk rawh u.

*He hla ‘Ka Chhandamtu Chu Tawk Turin’ tih, a Sap tawnga ‘Must I Go Empty Handed’ tih hi journalist pakhat Charles Carroll Luther-a lay evangelist ni bawk, kum 1886 a Baptist minister atana an ruat tak in Rev. A.G. Upham-an tlangval pakhat thi tur, a thih dawn hma thlakhat vel lek a piangthar in Pathian a chhandamna a chan avanga a lawmna leh a thlamuanna te, chutih laia kut ruak mai a Pathian tawh chu a huphurh ziah leh atana rawngbawl nan a hun a lo hmang miah lo a inchhiar zia thu vel a sawia hriat atanga kum 1877-a a phuah kha a ni a. Mizo tawng hian mawi tak mai in Dr.Lalhuta Sailo in a rawn let chhuak ve thung a ni.

Thih dawn a pianthar te kan ti a, a dik a tha tho mai a, mahse kan that lai hun a piangthar lova, Pathian rawng bawl lo leh thlarau bo pakhatmah hruai lo hian kan Lalpa hi tawk dawn ta ila zah nachang kan hre ve tho angem? Lal Isuan amah ringtute tih tura tuk chu Chanchin tha hril a thlarau bo chhandama a hnena hruai a ni tlat mai a. Damchhung hun tam zawk kohhran leh thalaiah te a a rawngbawltu inti chung si hian kan thi anga Vanram hi kan han kai ve anga, Vanram kawngkharah hian Pu Petera te ho hian, “Nang hun rei tak rawngbawltu i ni ve tawh bawk a thlarau bo engzat nge i rawn hruai?” hi min lo ti vei nulh anga, ‘ih…ih…ih’ ti chung hian tukhum thak lo pui hi kan hiat kan hiat mai ang tih chu a hlauhawm viau mai a. Kei pawh hi, “Nangpawh Hmaa, Chawlhni apiangin Pathianthu lam hawi hi i ziak ve ziah a, ka phak tawkin rawng ka bawl ve e i inti a, thlarau bo engzat chiah nge i rawn hruai luh ve a?” tih hi min lo zawt khut roh ang tih ka hlau khawp mai. Naupangchhia deuhin han ngaihtuah ta ila, Vanramah hian mahni thlarau bo chhanchhuah theuh te hi kan pawlte/kan hote ni dawn ta se rawngbawltu inti tamtak hi pawlte/hote nei mang lo hi kan awm fur mai ang em? Ni khat mah a rawng bawl lo leh thlarau bo pakhat mah hruai lo hian chatuana nun kan neih theihna tura kan tana kraws lera a nun rawn hlantu kan Chhandamtu hi kan tawk ngam ang em tih hi ngun takin inngaihtuah chiang tlang ila a tha awm e.

BigDaddy Hmahmatea

Kulikawn

Similar Posts:

• Theih ni se..
• Azai-a (Chabetkaia) kan chan ta
• City Bus- a kan nungchang hi..
• Ka diary manto tak mai chu, episode 4 (Zira is back…) (To be continue chhunzawmna…)
• Ka Zak ve thin Part-1

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, March 30th, 2014 at 9:54 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.