Awm mai mai!

March 31st, 2014 4:07 pm by Henry Vangchhia

Tun hma (han ti ve ngawt ila) kan tlangval ve lai chuan “O.M.M (awm mai mai),” intih kan ching a, zahna chang kan hre lem hlei lo va. Kulikawn kawngpui kam a dawr kawtah kan thu tlar put thin. Thu ho mai mai kan sawi a, a thenin lehkha an deng a, a then lahin tape recorder rawn puchhuak-in music kan ngaithla ring thei thin hle. In lamah eng vak kan ti peih lo va, chaw lah kan heh em em lawi si. Thuamhnaw nei tam vaklo tan erawh chhungte insuk nghah ngawt a theih lo va, mahni thuamhnaw kan su fai a, istiri-in kan nawt ro a, kan khu rum rum mai thin a ni.

Chhungte khan high school kan kal thleng mai khan admission leh tul reng reng min tih sak loh pawhin min pui vek thin awm e. Admission tih fel lamah pawh han lungkham vak kan neilo, chhungteah kan innghat mai a, a lo nuam thin ham ham khawp mai kan hahdam bawk si. Sikul chawlh a awm lahin kan duh duh kan ti a, sava kan veh loh leh tawlailir kan khalh a, Tlangnuam atangin chak fe fe-in kan lim thla a, chhungte rawngbawlna tur tel (cooking oil) ru chhuak thei thei khan tawlailir kha an nei chak tha a ni mai lehnghal a, entawn tur kan nei chaurau ve teh e!

Kan thanglian ve zel a lohtheihlovin mahni a intodelh a lo ngai chho zual zel a, kan tih than loh leh tum en pawh a kan en thin loh thil a nih vangin remchang apiangah chhungte kan la pur zel tho va. Mahni liau liau a tih kha huphurh takte-in kan huphurh thin niin ka hria.

Kan chhungte khan mawhphurhna min lo pe lo lutuk mah mah niin ka hre thin a, aia u zawkte lah chuan naupang kan nih vangin engmah thudik fumfe min hrilh duh ngai hek lo. A chang leh “Naupang chhia mai mai” min la tih san zui. Kan lian ve zel a, mahniin khawvel thil kan inzir chho va, kan taksa-in a than pui ang zelin mahniin kan indap chho ve a, hnathawhna chang lah kan hrelo, mahni in chhungah lah tih tur dap kan peih hek lo. Chhungten engemaw ti tur a min tih chang lahin tum burin emaw kan ti a, kan ti tha peih lo fo bawk.

Tun hnu a ka ngaihtuah hian, “khatiang a kan awm mai mai khan hun a lo rei thin zia leh nun thleng mai a nin rum rum chang kha a van tam ve thin tak e aw,” ka ti ta a ni. Engmah kan ti peih tak tak mang si lo, a tam zawkte lah chu kan nu leh pate khan lehkha zir bak thil dang min zirtir vak hek lo, chhungte zar a chapo ve ngawt te kha an va tam tak em. Kum tling tawh chin ngat hi chuan hna zahawm chu taihmak leh rinawmna siam a nih kan hriat hi a pawimawh khawpin ka hria. Entirnan, PWD lam a officer-te kha tinge miin fiamthu thawhnan an hman ruk tet tet thin kan tih chuan, an hna pawimawh em em mahse officer tam tak corrupt thin vangin hna zahawm lo va ngaih a ni ta tlangpui thinin, tun hma kha chuan PWD officer chin chu eiru tur a ngaih an ni nghal deuh tawp zel a nih kha.

Kan hnachelhin min ti zahawm lo va, kan rinawmna leh kan taihmakna chuan kan hna a ti zahawm thin zawk a ni; hun-in a hril mai thin. Chuvangin, eng hna pawh hi hna zahawmah kan siam thei tih inhriain thawh hreh nei lo vin, a tul leh kan hna hmuh ang ang thawk ila I awm mai mai lo vang u.

Similar Posts:

Recent Posts:

21 Responses to “Awm mai mai!”

  1. 1
    sheldon Says:

    I ziak tha hle mai. Kan hna kha min tizahawm tu nilovin kan hna kan kenkawh dan kha a pawimawh zawk chiang ani. Tunah hi chuan Mizo te pawh hi kan nun hi kan hmang thiam tawh in ka hria. Hunawl em em hi mi pangngai chin hi chuan an/kan nei tawhlo ania. Kan hun hi a khat tawh khawp hlawmin ka hria.

    Report this comment

  2. 2
    H.Vangchhia Says:

    sheldon, i ti lawmawmin i thil sawi chhiar a nuam e :) hairehai

    2nd :P

    Report this comment

  3. 3
    Awmtea Leo Khiangte Says:

    Post tha tak a ni.

    Report this comment

  4. 4
    filaxis Says:

    Tha hle mai..Mizote hi kan fingin kan taima sawt hle mai tih hi ka rilrua lo awm ve thin a ni..O.M.M kan tlem tual tual ang. A khaiha hnathawh lai laia ka kawmen chu O.M.M pakhat chu ka ni reng mai!! :-)

    Report this comment

  5. 5
    H.Vangchhia Says:

    filaxis leh midang comment-te chuan ngaih a van titha vele. Harh chian a hun tawh reng a ni. hairehai (Y) :)

    Report this comment

  6. 6
    Candelas Says:

    Hei zet chu Mizo thalai te tana rahbi pawimawh tak a va ni em !!
    OMM chhung hian hunin min nghak si lo
    I ziak tha takzet a ni e.Hairehai

    Report this comment

  7. 7
    H.Vangchhia Says:

    Candelas #6 hairehai. Nick dang zawk hmang vel weinch :P

    Report this comment

  8. 8
    chhana Says:

    Thu hlimawm tak i ziak e. A tawpa fuihna lah a tha.

    Report this comment

  9. 9
    H.Vangchhia Says:

    chhana #8 ka lawm e (Y) hairehai :)

    Report this comment

  10. 10
    caribou Says:

    Awm mai mai hi hmasawnna kawng daltu ni mah se, awm mai mai hi chu a hahdamthlak fu thung. Ka hna hi rinawm takin thawk pawh ni ila, ka zahawm phah pawhin ka hre chuang lo ve.

    Report this comment

  11. 11
    H.Vangchhia Says:

    caribou #10 i hna kha hna zahawm ber zing a ka ngaih a ni. Naktuk a awm zel tur siamtu i ni tlat. (Y)

    Report this comment

  12. 12
    caribou Says:

    Ekhai aaaaaaaa….. duha eiru thei, duh lohva eiru lo thei dinhmuna ding pha chin lo hi chuan ngaihsan an hlawh vak ngai lo asin.

    Report this comment

  13. 13
    H.Vangchhia Says:

    #12 a ngaisangtu leh a ngaihsana chu an inang reng mai law’ng maw?

    Report this comment

  14. 14
    XaiA Says:

    A ziak tha thei a nia..experince lah a ngah… ;-)

    Report this comment

  15. 15
    H.Vangchhia Says:

    Xaia#14 hairehai (Y) :)

    Report this comment

  16. 16
    Mr.Chhurbura Says:

    luh a va khat ve ooooo… a ngaihawm hle mai a

    Report this comment

  17. 17
    H.Vangchhia Says:

    Mr. Chhurbura, i rial rei vang vang hle mai. :) hairehai :D

    Report this comment

  18. 18
    hltau Says:

    A tha khawp mai, nie fate tirh loh lutuk hi chu han tir deuh ila, an tum bur tan tawh der mai. Thu tha tawi tak ani i rawn tar lan hi.

    Report this comment

  19. 19
    H.Vangchhia Says:

    htlau #18 (Y) rawn post ve ru khai :)

    Report this comment

  20. 20
    Dr Mahminga Sailo Says:

    Tunlai chu Pu HV-a post a tha thei ngei mai a.. (Y)

    Kar hmasa Pathian ni inkhawm paw’n Pu Sangliana’n a sawi chhuak tak e. Zoram hmun tam takah thalai pawna chhuak han bia ila. “Khawnge i kal dawn?” tiha an chhanna tam zawk chu, “Ka tei mai mai” tih a ni tlat!

    Report this comment

  21. 21
    H.Vangchhia Says:

    #20 2nd para (Y) a dik ang. “Tih tur ka hre lo va ka awm mai mai, lo leng rawh,” tih ang te pawh :(

    Report this comment

Leave a Reply

You must be logged in to post a comment.