January 2015, Mizo(ram) Diary

February 16th, 2015 4:45 pm by chhana

1st. Thursday: DDK Regional News Unit Aizawl chuan tlai dar 3:00pm ah chanchin thar langsar zual (Headline news) a puang tan leh ta a, heti hian DDK Aizawl chuan nitin news bulletin pathum, 3:00 pm, 5:00 pm leh 6:30 pm ah te a puang chhuak ta a ni. DDK Regional News Unit hian District tin leh Sub-Division hrang hrangah te reporter thahnem tak a nei mek a, chanchin thar ber ber nitin a puang chhuak mek a ni.

2nd. Friday: Buangpui, Serchhip district-a Zomawia in a kâng a, bungrua chuh hman lohin a kang ral.

3rd. Saturday: Kanan Veng leh Dinthar Veng inkalpawhna tur kawng chu veng pahnih branch YMA-te inremna angin laih tlang a ni. A harsa zual lai chu JCB hmanga thawh a ni bawk.

4th. Sunday: Synod Mission Board chuan Bethlehem Kohhran Biak Ina inkhawm buatsaihah Missionary 141 a tir chhuak. Synod Executive Secretary, Mission changtu, Rev. PC Pachhunga kaihhruai, he inkhawmah hian Synod Moderator, Rev. Lalrinmawia’n heng rawngbawltute tirh chhuahna thuchah a sawi a, an hna thawh tur chu Pathian hna a nih avangin a thlarau pawlna nena thawh tum tur leh, ring lo miten Pathian-in a chhandam tih an hriat theihna tura thahnemngai taka chanchintha hril turin a chah a, buaina leh hun harsa an tawh pawha Pathian a innghata, sut tlang tum turin a fuih a ni. Tun tumah hian Minister 18 leh Missionary 123 tirh chhuah an ni a, Missionary tirh chhuah zinga 73 hi hmeichhia an ni a, 50 chu mipa an ni.

5th. Monday: Kumina Mizoram sorkar pisa kai ni hmasa ber a ni a, pisa kai erawh chu ni dang angin an la tam lo a ni. Pisa tam zawkah chuan thawktuten inhlan tharna hun an hmang a, kum kal ta chhunga Pathian awmpuina avanga lawmthu sawiin, kumin kum tluana an hna-a malsawmna dilin an inhlan a ni.

6th. Tuesday: Kolasib DC Conference Hall ah Republic Day 2015 hman dan tur rel in Pu Jitender Yadav, Deputy Commissioner hova thut khawm a ni. An remruat dan tlangpuiah chuan Tumpui field ah hmangin, zing dar 10 ah khuallian in hnam puanzar a pawtpharh ang a, Parade Contingent te chibai buk chhangin thu chah a sawi nghal ang. Chawhnu dar 12:30 ah sawm bik te pualin VIP At Home, DC Bangla ah nei a ni ang a. Heng bakah hian Home hrang hrang ah thilpek sem a ni bawk ang.

7th. Wednesday: Advocate Michael Zothankhuma s/o P.Rohmingthanga, Chaltlang chu Guwahati High Court judge atan Guwahati-ah Gauhati High Court chief justice, Justice Shreedhar Rao-in rinawmna thu tiamtirin a la lut. Mizo zinga High Court judge pahnihna (A hmasa ber chu T.Vaiphei) a ni a, Gauhati High Court Nagaland Bench-ah station judge-in a awm ang.

8th. Thursday: December 31, 2014 zan aṭanga bo, Lalnunmawia, Zarkawt chu Falkland Veng hnuaia World Bank kawngpui thlangah thia chhar a ni. Ruang hi kawngpui thlangah kawngpui aṭanga ft. 150 vela hlaah nu pakhat vawk chaw zawngin a hmu a, mi dangte a hriattir hnuah, police-te hriattir leh nghal a ni. Lalnunmawia hi HDFC Bank-a deputy manager hna thawk lai a ni.

9th. Friday: Dr Aziz Qureshi chu Raj Bhavan-ah Gauhati High Court judge Michael Zothankhuma’n Mizoram Governor ni turin rinawmna thu tiamtirin a la lut. Governor lak luhna inkhawm hi chief secretary Lalmalsawma’n a kaihruai a, chief minister Lal Thanhawla, speaker, minister te, MLA-te leh sorkar mi pawimawh eng emaw zat an tel. Dr Aziz Qureshi hi February 3, 1940-ah Bhopal-ah a piang a, Political Science, Arabic leh Urdu Literature-ahte M.A a zo vek a, LL.B., Ph.D (Political Science) a nih bakah, Aligarh Muslim University-in doctorate degree a hlan bawk.

10th. Saturday: C.Vanlalmuana, East Lungdar in chu bungraw chuh hman lohin a kâng ral. In kan ṭan laiin inah awm an awm lo avangin a kan chhan hriat a ni lo.

11th. Sunday: Missionary Day a ni a, Mizoram Baptist Kohhrante chuan uar takin an hmang a; thupui chu ‘Chanchin ṭha malsawmna leh Mizo mipuite’ tih a ni. Kumina Missionary Day hi Pathianni a nih avangin, BCM tualchhung kohhran ṭhenkhat chuan nimin khan Missionary Day lawmna ruai an ṭheh a ni.

12th. Monday: Mizoram People Forum (MPF) chuan Synod Office-ah president mawhphurhna inhlanna inkhawm an hmang. MPF president kal chhuak, Rev. K Lalhmuchhuaka’n president thar tur, Synod moderator, Rev. Lalrinmawia hnenah mawhphurhna a hlan a ni. MPF president hi an pawl danin a sawi angin, Synod moderator apiangin an chelh ṭhin a, Rev. Lalrinmawia hi MPF president 10-na a ni.

13th. Tuesday: Sangau khaw mipuite chuan kum danga an lo tih ṭhin tawh angin, Sangaua Blue Mountain H/S tualah sual thupha chawina leh inhlan tharna hun an hmang a, mi sang khat chuang an tel. Tawngṭaihona hun hi Sangau Joint V/C Association, Sangau Kohhran Joint Committee leh NGO hrang hrangte huaihawt a ni.

14th. Wednesday: Mizorama district khawpui hrang hrangah ‘Kuthnathawktute Ni’ hman a ni a, he hun hmanpui tur hian sorkar hotute chuan hmun hrang hranga insem darhin an hmanpui.

15th. Thursday: Zu zawrh theihna leh khuahkhirhna dan thar, Mizoram Liquor (Prohibition and Control) Act chu hman tan a ni taa; mahse, a kaihhnawih thil ṭulte peihfel vek a la nih loh avangin zu zawrh nghal erawh a ni lo.

16th. Friday: Vortesanga (65), Ṭhuampui chu Zemabawkah thia hmuh a ni a, a taksaah hliam hmuh a ni lo. Vortesanga hi BP sang nei thin anih avangin hemi avanga thi nia ngaih a ni.

17th. Saturday: Mizoram Law Commission chairman, John Siamkunga, MLA chuan a bial chhunga South Vanlaiphai community hall sak thar a hawng. Hall hi BADP sum cheng nuai 15/- sênga sak a ni.

18th. Sunday: Mizo hockey star ropui, Zomuana chu Dhaka, Bangladesh-ah a thi. Bangladesh tana hockey khel thiam hmingthang hi Bangladesh lamah chuan ‘Jumman Lusai’ (Zomuana Lusei) tiin an ko mai ṭhin a, World Hockey XI-a an lo thlan tawh ngat a ni. Zomuana thih thu hi Bangladesh chanchinbu¬ah an tarlang nasa hle a, “The most celebrated national hockey star Jumman Lusai who has been kept under life-support at Bangabandhu Sheikh Mujib Medical University (BSMMU), finally passed away,” tiin chanchinbu pakhat chuan a ziak a; Bangladesh-a hockey player ropui ber ang hiala ngaih a ni.

19th. Monday: Mizoram pumah naupang kum nga hnuai lamte hnenah zenghri danna (polio vaccine) pek ṭan a ni. Polio vaccine pek rûnpui hi Aizawl Civil Hospital auditorium-ah Health minister Lal Thanzara’n a hawng. Zenghri ûm bo beihpui hi India ramah sorkar laipui hmalaknain kum 1995-ah thlak ṭan a ni a, Mizoramah chuan kum khatah vawi hnih neih ṭhin a niin a vawi hnihna chu 23rd. Feb. a neih tura ruahman a ni. Kumina zenghri venna beihpui thlak chu India ram hmun dangah chuan January 18-ah ṭan a ni a, Pathianni a nih avangin Mizoramah chuan vawiinah an hmang ṭan a ni.

20th. Tuesday: Lawngtlai District Anti Tobacco Squad chuan Lawngtlai khawpuiah COTPA dan bawhchhia an awm leh awm loh an enfiah a, phal lohna hmuna mei zu mi 15 an man a, pawisa an chawitir nghal.

21st. Wednesday: Horticulture officer-te’n an directorate conference hall-ah meeting an nei a; he hun hmanpuitu Horticulture minister PC Lalthanliana chuan, sorkar laipui aṭanga sum hmuhte state budget-ah dah luh a nih tâk avangin sum hman kawngah uluk lehzuala kal a ṭul thu a sawi.

22nd.Thursday: MNF party chuan chhan hrang hrang avangin Aizawl leh Mizoram district khawpui tin bakah, khaw dang ṭhenkhatah ‘Mipui thlavâng hauhna kawngzawh’ an huaihawt a, Mizo mipuite thlawp a hlawh hle.

23rd.Friday: State Level Cooperative Society leh institution hrang hrang aiawhte chuan Apex Bank head office-ah Co-operative Apex Bank tihhmasawn dan tur an sawiho.

24th. Saturday: Lawngtlai District Anti-Tobacco Squad chuan Lawngtlai khawpuia Chawngte pêng leh chawhmeh bazarpuiah COTPA dan bawhchhia an awm leh awm loh an vâi a, phal lohna hmuna mei zu mi 32 an man. Mei zu an mante hi dan angin pawisa an chawitir nghal zel a, an mante pawisa chawi tling khawm chu Rs. 2070/- a ni.

25th. Sunday: January 23 zana ṭan, KṬP bial conference chu Mizoram chhung leh pawna pastor bial hrang hrangah chhunzawm a nih hnuin a ṭiak. KṬP bial conference-ah hian bial huap leh ram pum huapa rawngbawlna thil pawimawhte an rél a ni.

26th. Monday: India Republic Day vawi 66-na chu ram pumah ropui taka lawm a ni a, Mizoramah pawh khawpui hrang hrangah lawm a ni. Aizawlah chuan Lammualah Governor Dr. Aziz Qureshi hoin hman a ni a; Larsap chuan Mizoram sorkar hmalakna leh hlawhtlinna hrang hrangte a sawi. Lammuala Republic Day lawmnaah hian chief minister Lal Thanhawla, minister te, parliamentary secretary te, MLA te, sorkar officer lian te, zirlaite leh mipui ṭhahnem tak an tel a; parade contingent ti ṭhate leh Republic Day puala hockey tournament-a champion leh pahnihnate hnenah Larsap chuan lawmman a hlan a ni.

27th. Tuesday: Mizoram state bird, Vavu nu leh a pa chu Environment & Forest minister Lalrinmawia Ralte-in Aizawl Zoological Park-ah a chhuah. Vavu hi Panova, Chhinga Veng-te chhungkuain Aizawl Zoological Park-a dah turin Environment & Forest department an pe a ni.Tun tuma mi tel lo hian Aizawl Sahuanah Vavu paruk a awm sa a, inthlah pung turin breeding centre-ah dah a nih avangin mipui hmuh theih tura dah chhuah an ni lo. Tun tuma an chhuak tâkte erawh hi chu mipuiin an en theih tura dah a ni.Aizawl Zoological Park-ah hian ramsa 212 a awm a, a enkawlna atan kum 2013-14 chhung khan Rs. 1,60,53,300/- sên a ni. Ramsa awm zingah hian a mang hlauhawm bik (mammal) 22 leh tui leh khawmual chêng kawp thei (reptile) 42 an awm.

28th. Wednesday: Mizoram sorkara minister hlui Nirupam Chakma chuan Chakma District Congress Committee president hnenah CDCC adviser a nihna leh Congress party aṭanga a bânna lehkha a thehlut. Nirupam Chakma hian a bânna lehkhaah hian Congress party a chhuahsan chhan a tarlang lo.

29th. Thursday: Chief Minister Pu Lal Thanhawla chuan Bawngkawn brigade- ah J.Thankima College building sakna tur lungphum a phum. Lungphum phumna inkhawm kaihruaitu College Principal Pu Ramhmangaiha Ralte chuan college hi kum 1992 ah private college anga din anih thu a sawi a.Kum 1995 ah J.Thankima hian college hi rawn sponsor (bultum) in a hming chawi a; J.Thankima college anih tak thu a sawi a. ‘Kum 2002 ah deficit ah hlangkaiin, kum 2007 October ni 11 ah Durtlanga Lalhmingthanga college nen inchhunfinin sorkar college ah hlankai leh a ni’ a ti a. Mizoram University ah permanent affiliation a in register ani bawk a. College tur hi chhawng nga tur niin bul tan nan DoNER in Rs.28/- lakhs chuang a rawn pe a ni.

30th. Friday: National Cleanliness Day a ni a; he hun hmang hian Mizoram chhunga hmun hrang hrangah ‘Fai hnatlang rûnpui’ neih a ni.

31st. Saturday: Mizoram Prayer Network buatsaihin Synod Conference Centre-ah nilengin Mizoram tana chaw ngheia ṭawngṭaihona hun buatsaih a ni a, mi 150 vel an tel. Ṭawngṭai beihpui thlakah hian ṭawngṭai thupui siamsa point 30-te chu hlawm ngaah ṭhenin, ṭum nga an ṭawngṭai rual a ni.