(He thu hi Pi Hmingthanzami ziak a ni a. Tha ka tih em avangin ka rawn post a ni e. Lo chhiar ve ngei teh u)
Mizorama mipui tam berin Politics kan hriatthiam dan chu- thuneihna leh lalna inchuh (Sorkar siam) hi a ni. Politician kan tih zinga tam tak pawh hian chu chu an ngaihdan niin a lang. Engti zawng pawha thuneihna chan hi an tum ber a ni. Chumi atana a chaw chaha kan hman ber chu Development a ni a. Policy kan insiam that siak a; policy tha neih aimaha kan la ngaihpawimawh zawk chu, ‘Engin nge mipui hip ber ang?’ tih hi a ni. Congress-in NLUP an sem a, party dangte chuan sawisel reng chungin a aia tam sem dan an duang chhuak thap mai a ni. Hnam leh Ram erawh chu kan agenda-ah hian a tel pha lo em em a. Opposition an nih laiin mipui te rilru thawi nan vei awm tak te chuan an insawi thin a, a tak takah erawh chuan kan thinlungah veina a awm pha lo a ni. Hei leh chen kan thenawm nena kan ramri kan ngaihthah theih danah hian chu chu a chiang reng mai a ni.
State ramri chungchanga kan sorkar ten an duh ber chu- an sorkar laia buaina a thlen loh hram hi a ni. Thil eng emaw lo alh chhuak hlek a awm chuan official te tlantir vat vat a, hmehmih vat vat, remna siam thuai thuai leh thil a pangngai anga dah theih hram (status quo maintain) kha an tum leh duh ber a ni. Mizo mipui te thinlung erawh chu a dam chuang miah lo a ni. MNF hunlaiin Vairengte daiah MZP-in Zorun an sa a, zankhat pawh a riah hmain Mizoram sorkarin a thiahsak leh nghal a ni. Politics in a tum, HNAM HIMNA leh ZAHAWMNA te chu an tihchhan a nih hmel loh. ‘Kan lal chhung hi chuan buai rih lo e,’ tih chiah an ngaihtuah a ni. Tunhnai Congress hunah pawh hian kan buai chinfel dan chu kan hmuh theuh a ni- official te tlantir vat vat a, a ngai anga awm tura ‘remna’ siam vat vat kha a ni mai.
Politics kan hriatdan hi lal khelh a nih tlat avangin heng party te kutah hian kan hnam hi a him lo a ni. Mi hnam hruaitute leh kan hnam hruaitute inan lohzia entirna pakhat chauh han sawi ila- 1995 velah khan Arunachalah Chakma leh Hajong te hnawhchhuah tumin Student Movement a chhuak chiam a. A lo chhuahna chhan chu Election Commission-in Electoral Roll-a thun tura a tih vang a ni. (Chakma refugee te hi kan hriat theuh angin 1964 vela Arunachalah hian lut an ni a, tun thleng hian roll-ah an la thun ve lo a ni). Hetihlaia an State-a thuneitu chu Congress sorkar, Gegong Apanga hote an ni. Anni chuan Student te kha an vuain an man ve lo a ni maithei. Sorkarin a tih zawk chu- Electoral Roll-a Chakma te thun ai chuan Election hi kan Boycott ang, Kan nihna an zawng zawng, MLA leh Minister te, bakah, Central lam nena an inzawmna zawng zawng, an party nihna thlengin, kan bansan ang, an ti a. Chumai bakah, MLA hote kha Delhi-ah kalin Boat Club-ah nawrhna an zuk nei a ni. ‘Election Commission-in thun rawh u, a ti alawm’ tih vanga State pawna pemchhuak Tuikuk te kan umzui a, E Roll-a kan thun hram te nen chuan ram leh hnam chu a inhim hleih ngawt ang le. Hetiang mite kuta kan ram leh hnam hi dah zel thei kan ni em?
Mi thenkhat chuan Hmasawnna ‘Development’ hi Politics ni berah kan ngai niin a lang. Hmasawnna chak hi thil engkim chinfelnaah kan ngai niin a lang. Hei vang hi a ni ang, Central fatlum tih te chu inzawrhna tha takah kan hmang thin a ni. Amaherawhchu hmansawnna ringawt hi Politics a ni lo tih kan hriat a pawimawh leh khawp mai. Ram thenkhat, hnam thenkhat, ram hmasawnnain a nekchep em em te, ram hausa, a ram leilungfate rethei em em si te pawh sawi tur kan hria ang. Kan hmasawnna hi mi tlemte vanneihna leh a tam zawk te ‘hlawhfa’ maia min siamtu tur a ni thei a. Kan hnam nihna leh kan hnam nunphung min hlohtir vek theitu a nihna lai te pawh a awm thei a ni. RAM NUAM leh HNAM ZAHAWMA min siamtu atan Development hi chu a pawimawh. Amah lawng lawng hi chu Politics ber a ni lo tih kan hriat a ngai.
Chutichuan, kan ram politics-ah hian ‘change’ a ngai a ni kan tih hian, ‘Anni aiin kan tha zawk ang, Corruptionah kan fihim zawk ang, sum kan hailut hnem thei zawk ang’ tih mai ni lo deuh, politics lungphum- Ram leh Hnama innghat Politics, engkim aia Ram leh Hnam dah hmasakna- HNAM DINCHHUAHNA, HNAM HIMNA, HNAM ZAHAWMNA HI A TUM A NI TUR A NI. Thildang zawng zawng hi chu a pahnihna vek a ni. Ram leh Hnam tan hian ‘Vision’ kan nei a: RAM NUAM, RAM ZALEN, RAM THIANGHLIM. HNAM CHAK, HNAM HIM, HNAM ZAHAWM nih hi kan tum a ni a. Chumi ram thleng tur chuan tih tur(Mission) kan nei zawk a ni. A tobul fuh tawh lo, a nihna tur ang tak ni tawh lo kan politics hi chu, mitharin rilru thar nen siamthat tumin bei bei mah ila, puan mawih tawh, puanthem thara bel ang chauh a ni ang. Chu ai chuan, bul tanna dika bul tan that leh hi a ngai a ni.
BJP a rawn len chhoh tirh khan, Aiyodhya-a Ram Temple sak (Ram Janmabhoomi) kha thupui bera an rawn neih leh India mipuiten kan lo hmelhriat tanna a ni. Hindu party-ah ngaih loh theih an ni lo. Politics hi a tobulah a dik loh chuan a ler lamah dik kan beisei ringawt thei lo. Zirtirtu te hi hnam siamtu an ni kan ti thin a; zirtirtu kan lak dawn erawh chuan a thiam thiam ai chuan, Ruling Block President fapa te kha lak an ngai tlat thin a. Sorkar sikul Primary levelah te chuan, khawpuiah phei chuan zirlai tur pawh kan inhmu ta mang lo a nih hi. Sawi tur tam tak awm mahsela, sawifiah kan tum ber chu Politics innghahna lungphum dik leh dik lo hian a kal zelna tur kawng hi a hril nghal a, thil engkim mai inthlunkhawmna chu politics hi a ni, tih hi a ni.
HNAM LUNGPHUM
Mizo thalai, kum 20-40 inkar kan thih nasatzia hi kan vei theuhin ka ring. A na, a pawi, an uiawm mai ni lovin, ‘Reproductive age’ an ni a, politics takin hnam tan a pawi hle a ni. Mihring awmphung pangngai a nih loh avangin a chhan pawh kan ngaihtuah thin ngei ang a; puh tur tam tak pawh kan hre ngei ang. Chung thil tam tak zinga pakhatah chuan- a bulpui ber zawk pawh a ni maithei- Innghahna bulbal nei lo hnam kan nih vang hi a ni ngei ang. Innghahna bulbal neilo hnam han intih chu na kan ti maithei, mahse a dik tlat si.
Innghahna-Culture: Hindu te chuan an sakhua leh an culture hi kum sangbi teh meuh lo inphun nghet tawh an ni a. Hnam hnuaihnung ber atanga chi tha ber, rethei ber atanga hausa ber khuan an nunphung kawng tinrengah khuan, eng hun leh eng hmunah pawh enge an tih tur an hria a ni. Sakhaw biak dan, chhungkua, khawtlang engkim maia an tih tur kha ramri kham fel sa vek an nei a ni. Keni hi chuan tuna kan rama kan inbenbel pawh hi kum sangbi khat pawh a la ni lo a. Hnam nunphung (Culture) innghahna ber pakhat kan sakhua, Christianity kan vawnna chu kum za awrha upa chauh a la ni a. India ramah kan awm a, nunphung leh khawsakna, hmasawnna kawng tinrengah khawthlangho kan entawn a. Transitional period-ah kan la awm a ni tih entirna tha tak an sawi thin chu kan inneih danah hian a ni. Kan Mizo danin man leh mual kan inhlan a, sap tihdanin kawrfual leh veil nen, Kristian serh leh sang danin biak inah kut kan insuih a. Inthen nikhuaah te Mizo dan kan hmang leh a. A duh chuan India dan nena chawhpawlhin India Christian Marriage Act an hmang bawk a. He entirna atang hian hnam nun ngelnghet kan la nei lo tih hi a chiang hle a ni.
Innghahna-Hnam: Mi hnam te chuan innghahna tlak, thlamuanpui tham hnam an nei. Israel te leh American te hi lo en ta ila, khawvel khawilaiah pawh awm sela an sorkarin thlen phak loh a nei lo. An sorkar ropuina leh chakna zawng zawng kha mimal pakhat nunna phenah khan a awm a ni. Keini chuan kan sorkar kan en a, hnam himna leh damna chungchangah chuan thlamuanpui tur kan hmu lo a ni. Kan hnam lah chu Mizoram chhung ringawt kan en phei chuan kan tlem em em a, thlamuanpui tham kan ni hlawl lo. Vairengte kan pel a, kan ti em em a; kan ram chhugah pawh hian kan thlamuang chuangin a lang lo. Trade licence, relkawng, state boundary, International boundary, tourism, ILP- min tithlamuangtu aiin min tithlaphang rutu an ni a. Hnam lian, hnam chak, hnam ngelnghet chu ni ila hetiang hian kan dawih bik lovang. Hnam insuihkhawm kan sawi hian, hnam dinchhuahna atana a pawimawh ang chiahin mimal hian kan behchhan tur leh thlamuanpui tur hnam hi kan mamawh a ni. Mizoram chauh kan ngaihtuah thin avanga hnam tlem hi kan ni a. Kan chipui Myanmar, Chin Hills, Bangladesh leh India ram State hrang hranga awmte nen hian kan inpumkhata kan inunau hi kan hnam tan leh mimal tin tan hian a pawimawh em em a ni. Hnam hi identity min petu a ni si a
Innghahna-Sum leh Pai: Economics stability hi rilru ngelnghet leh thlamuanna min petu tur a ni bawk a. Mahse kan ram dinhmun kan en chuan- siam chhuah nei lo, thar chhuah nei lo, kan ni a. ‘Nil’ der em chu a ni lo ang chu, buh ei tur pawh thlahnih daih chu kan thar ve niin kan hotuten an sawi. Bawng, vawk, ar, sangha kan lalut a; thlai engkim, vawkchaw dawl leh vai anthur thlenga lalut hnam kan ni a. Heihi ram leilung kan neih loh vang emaw, buh bal that theih lohna thlaler ram te ni ila chuan hriatthiam theih pawh a ni ang. Mahse chutiang chu a ni loa, ram leilung kan nei a, thei leh thlai engkim a that duhzia kan hria a ni. Lo neih hahthlakzia, ram tih chereuna a nihzia, buh chin hlawklohzia hi kum sawmthum panga vel kan sawi tawh a. He kum sawmthum panga chhung hian buh hi kan la thar tam phah miah lo a, thlahnih tla reng kha kan la thar a ni! Kum sawmthum sawmli liam ta atang khan, mi tam berina kan eizawnna loneih chuan hma a la sawn miah lo tihna a ni a. Chu chu thalaitena kan innghahna kan nu leh pa te dinhmun chu a ni. Thlamuanna min petu tur economics stability kan nei lo. Thalaiten hna hmu turin eng party emaw belh fuh ngaiin kan hria a, a belfuh ve lo tan chuan beisei bo hlauh a ni a. Thawhrim ai chuan party belh fuh a hlawk zawk a; kan inkaihhruai dan dik loh avangin kan rilru a no em em bawk. Tichuan, sau takin han sawi ta ila- innghahna bulbal nei lo kan nih vangin kan thalaite nun hi a tlolo a ni. Hei vang ringawt pawh hian bultanna dika kan politics hi kan tan leh a ngai a ni.
Food Security– chungchang hi han sawi zui hlek ila-khawvel hian eitur a tharchhuah tlem chuan keini chang ni lovin khawvel hi a buai thei dawn a ni a. Eitur man hi a san chuan ram rethei te, hnam rethei te, mirethei te hi a tuar hmasatu kan ni leh dawn a ni. Khawvel sik leh sa inthlak danglam zel avang hian- tuilian vang emaw, khawkheng vang emaw pawhin tuna buh leh bal tharchhuaktu ram te hian thar lo ta se…emaw, indo vang emaw, harsatna dang vang te pawhin eitur hi kan ramah hian lo lut lo ta sela, eitur thar chhuahna tur ram tha tak nei hian, kan ram kan cheibawl loh vang chauhin tampui mitthi kan lo tuar ve ringawt dawn a ni. He ram tha tak min petu Pathian chu a zahawm ngawt ang le! Kan Bible chuan, ‘Lal pawh thlawhhma ring mi a ni’ tih kha min lo ziah sak diam tawh a ni. Kan thlaichi, local variety te hi i vawnghim ang u. Chi chhuah ve thei tawh lo, hybrid te hi innghahna chi a ni lo. Changkha rah dawng no nalh em em mai, han chhumhan a DDT nam huam mai te in ei fuh ve tawh ngai em? Kan hriselna thlenga khawih pawi thei hi kan la lut vak vak a ni maithei a ni. Kan mamawh khawp chauh hi chu kan ramah hian i thar ve ang u. Chutiang tur chuan a nawlpuia lo kan neih pawh a ngai lovang, a tuimi ten lo an nei ang a, sorkar erawh chuan ram leilung chu eitlak turin a cheibawl mai dawn a ni. Heihi hnam politics-ah chuan ‘basic needs- food, shelter, clothing’ kan tih ang deuha telve tlata ka ngaih a ni a, thildang tih daltu tur ni lovin.
HNAM RILRU
Pawl hrang hrangah te, kohhran hrang hrangah te, party hrang hrangah te awm darh thin mah ila, kan zavaia min la phuarkhawmtu chu kan hnam tanna rilru hi a ni. Hnam thil a nih tawh phawt chuan kan pawl hrang nihna rilru te dahthain kan tangrual thap thei thin. Hetiang hi ni mah ila mi tam tak chuan he hnam thuthlung kengtu party hi awm tawh chuangin kan hmu lova, MNF leh Indian National Congress-a awm hi a danglamna pawh awmin kan hre tawh lo; chuvanga Congress leh MNF leh ZNP, MPC tea awm darh mai mai kan ni a. Pawl tinah hian hnam rilrupu thahnem tak hi an awm vek a. A tam ber phei chu MNF a la awm te an ni nghe nghein ka ring. A that vang emaw, mahni hlawkna tur vang emaw lam pawh ngaihtuah lova, hnama rinawmnaa ngaia MNF a la awm tlat te pawh hi tam tak an awm a ni. Hengte hian NLUP dawn ve te chu an duh loh vang pawh niloin, hnama rinawmnaa an ngaih avanga NLUP te pawh lo hnawl ngam te an ni ve a ni. An hotute aia hnama rinawm hi an tam mai. Chutihlai chuan kum 10 an lo sorkar tawh chhunga an party zia leh an hotute ziaah hnam thuthlung kengtu zia erawhchu hmuh tur a awm tawh chuang lo. Hetihlai hian hnam rilrupute hi mi rethei leh harsa te chauh an ni lova, mihausa te pawhin hnam hmangaihna hi an nei nasa hlei hlei thei ve tho. Mihausa ram zau tak tak nei te pawh hian, hnam tan a nih chuan an ram te hi an surrender duai duai thei em em ang.
Chuvang chuan a la beidawnthlak loha, hnam rilrupute hi kan la inpawtkhawm thei a, thil kan la thlak danglam thei a ni. Politics dik lo avanga thil chhe tawh siam tha leh tur chuan politics dik a ngai a. He hnam rilru atang chauh lo hi chuan kan inpawtkhawm thei tawh lo thung ang. Hnam hmangaihna rilru chauh hi kan politics siamthatnana kan ingnghahna awmchhun ani. Chuvang chuan hnam rilrupute hi kan intelkhawm ngei ngei hi a tul a ni. Tunah hian bul kan tan erawh chu a ngai a. Tunah hian bul kan tan lo a nih chuan nakin lawkah chuan hnamrilrupu te hi chharkhawm tur pawh kan awm lovang tih a hlauhawm. Politics hi sumdawnna emaw kan tih vek hunah chuan bul tha hi tan ngaihna a awm tawh lo ang a. Hnam hian boral lam a pan tihna a ni ang. A la theih lai hian kan tih a ngai a, kan la theih lai hian tih a ngai bawk. Tuna keiniho hian engmah ti lo ta ila, ‘ka theihlaia engmah ka lo tih loh vangin hei hi a thleng a ni’ ‘ka theihtawp tal ka lo chhuah loh vang a ni’ kan la tih hun hi a thleng lovang tih hi a sawi theih loh. “Keini hi kan ngawih renga khawvar kan nghah mai chuan, hremna kan tawk mai ang…”
ENGVANGIN NGE TUNAH KEINI HIAN
Ram hi Lalpa ta a ni a. “Roreltu hi Pathian ruat a ni” tih ringtute kan ni a. Roreltu hi Pathian ruat a nih chuan, a rorelsak mipui te chungah chauh ni lovin, a ruattu Pathian chungah pawh mawh a phur bawk a ni. Hemi rilru nena ram rawngbawltu, Pathian tihmi, ama mimal nuna Pathian be pawp leh Pathianin a hruai theih mi ram hruaitu kan mamawh a ni.
Pathianin hnam hi a hruai dawn a nih chuan, a hruai theih mi mihringin hnam a hruai a ngai a ni. “Roreltu an sual chuan Pathianin mipuite a hrem thin” kan ti awlsam leh mai thin a. Mahse, “Roreltu an sual chuan mipuite an tlu thin.” tih hi kan sawi dan tur ni zawk awm tak a ni. Israel te chanchina kan hmuh chian em em chu, lal a that chuan mipui ten Pathian lam an hawi a, lal a that loh erawh chuan mipuite kha an tlu mai a ni. Pathianin Mosia hmangin, thilmak tam tak nen Israel fate Aigupta ram atangin a hruaichhuak a. Thlakhat leh a chanve vel an kal hnuah, Mosian Dan laa ni sawmli sinai tlanga a thangsan hlanin, Arona hoin sebawngno lem an lo be hman der a ni. Solomona fapa Rehoboama lal laiin, lal Jeroboama khan Israel hnam sawm te a hruai hran khan, “Jerusalema Pathian be tura an kal thin chuan Davida chhungte lakah an lung a leng leh ang’ tih a hlauh avangin sebawngno lem pahnih a siam a. ‘Heihi in pathian, Aigupta ram ata hruaichhuaktu che u kha a ni’ a ti a, mipui chuan an be mai a ni. Chutiang zelin lal a sual chuan mipuiten an bawhchhia a, lal sual pali panga hnuah lal tha pakhat rawn chhuak sela, mipuite kha Pathian lam a hawitir leh thei mai zel a ni.
Khang hunlai khan Puithiam te, Zawlnei te pawh an awm reng tho; Pathian thu an tlangaupuiin vaukhanna thu te pawh an chhakchhuak reng tho a ni. Mahse lal khan a pawm miau loh chuan an sawtpui vak lo niin a lang. Zawlnei te leh Puithiamte ngaihnepna lam ni lovin, Pathian khan hnam kha chu lal leh roreltute hmang khan a hruai niin a lang tlat a ni. Chuvang chuan Pathian tihmi mihring hi hruaituah kan neih a ngai a ni.
Hruaitu hi kan zawng a, kan dap rilru a; kan van a ni. Hruaitu tur tha hi chu nei ila, tiin mi tam tak hi hruaitu tha zui tur chuan kan inkau a ni; mahse kan duh leh kan beisei ang hi kan hmu mai si lo a. Kan nghak a, kan thlir a, mahse nghahchhuah tur a awm leh awm loh pawh hi kan hre chiah lo. Thil kan duh chuan, mi thil kan dil chuan a dawnthleng lam kan lo buatsaih ve phawt te pawh hi a tul thin a. A dawnthleng tur hi lo buatsaih phawt mai ila, Pathian hnenah kan dil ang a, Pathianin min pe mai ang tih hi i ring ang u. Party politics ah hian Pathian a inrawlh ka ring lo, hnam politics-ah hi chuan Pathian a inrawlh thin a ni. Tuna kan ram leh hnam dinhmunah hian Pathian hi a inrawlh a ngai takzet a. Pathian lam kan hawi a, Pathianin min tihdam kan ngai a ni, a nih loh chuan kan boral thei takngial dawn.
Kan zawlnei ten an lo sawi thin, ‘thim thuahhnih’ tih te, ‘zoram khawvar’ tih te mi tam takin an buaipui a. Hengte hi a lo thleng ngei dawn pawh a ni ang; thuthluanga lo nghah thlen mai chi chu a ni lo. Kan hmalam huntawng tur chu engpawh nise kan lo inbuatsaih lawk hi a ngai tho tho mai, a zawlnei thu ngaihtuah miah lo pawhin. Kan hnam leh ram hi thangtharte tan kan kan lo buatsaih lawk a ni a. An tawn tawn tawng tura thlir liam mai tur kan ni dawn em mi? Tun hunah hian Zoram veitu tam tak an awm a. Mi tam tak hi kan ram leh hnam tana tawngtai hi an awm reng a, hruaitu min pe tura dil pawl pawh hi an awm reng bawk a ni. Pathianin kan mamawh tak hruaitu tur chu min pe mai ang tih hi i ring ang u. Kan dil a, a dawhthleng lo siam mai hi kan tih tur a ni e.
Ziaktu-Hmingthanzami 26 Jan 2015
Similar Posts:
- Zoram politics ah I ram lo thleng rawh se!
- Party Politics tel lo Politics meeting boruak sang hle
- Politics- Pathian thil nge khawvel thil.
- Mizoram kan Kohhran leh Politics
- ENGTIKAH NGE NIANG? TUTE NGE BUL TAN ANG?
January 31st, 2015 at 3:35 am
ka chhiarchhuak e..a va tha teh reng em!!!!”Ram hi Lalpa ta a ni a. “Roreltu hi Pathian ruat a ni” tih ringtute kan ni a. Roreltu hi Pathian ruat a nih chuan, a rorelsak mipui te chungah chauh ni lovin, a ruattu Pathian chungah pawh mawh a phur bawk a ni. Hemi rilru nena ram rawngbawltu, Pathian tihmi, ama mimal nuna Pathian be pawp leh Pathianin a hruai theih mi ram hruaitu kan mamawh a ni.
Pathianin hnam hi a hruai dawn a nih chuan, a hruai theih mi mihringin hnam a hruai a ngai a ni. “Roreltu an sual chuan Pathianin mipuite a hrem thin” kan ti awlsam leh mai thin a. Mahse, “Roreltu an sual chuan mipuite an tlu thin.” tih hi kan sawi dan tur ni zawk awm tak a ni. Israel te chanchina kan hmuh chian em em chu, lal a that chuan mipui ten Pathian lam an hawi a, lal a that loh erawh chuan mipuite kha an tlu mai a ni”
Report this comment
February 1st, 2015 at 7:38 am
A tha hle mai
Report this comment
February 4th, 2015 at 7:11 pm
A ziaktu nen chuan kan hmuh dan a inang hle mai. Hetiang em em hi ni zel lo se a duhawm khawp mai.
Report this comment
February 5th, 2015 at 9:38 am
A tha thlap thlap khop mai.
“Ka ram ah chuan Kristian na ai in Political Party a pawimawh zawk a, dik na ai in sum hmuh theih na a poimooh zawk…” a rawn ziak chiang hle mai aaaa!!
Report this comment
February 5th, 2015 at 7:25 pm
He thu hi mi tam zawkna Facebook lamah chhuah a ni tawh em? A la ni lo a nih chuan chhiartu an tam zawk beiseina avang in va copy paste mai ka va chak ve…..
Report this comment
February 14th, 2015 at 9:19 pm
A tha khawp mai.
Report this comment