1st.Sunday: Champhai Tlangsam khuaa kohhran pakhat, ‘Lalzawna pawl’ tia hriat dintu leh hun rei tak chhung hruaitu ni tawh Vanlalzawna (67) chu Greenwood Hospital-ah pneumonia vangin a thi a; a nupui Lalhmangaihi leh a fapa a kalsan.
2nd. Monday: Sericulture Minister, Dr. BD Chakma chuan Sericulture Directorate Conference Hall-ah ni 7 chhung awh tur Resources Development Programme a hawng a, he programme hi Textiles Ministry hnuaia Central Silk Board ruahman a ni a, Sericulture Department officer 20, training pek an ni. He training hawnna programme hi Sericulture Director, Pu Lalrinmawia’n a kaihruai a, Dept. Secretary, Pu Lalrinawma pawhin thu a sawi a ni.
3rd. Tuesday: Chief minister Lal Thanhawla chuan Thentlang khelmual laih thar a hawng.
4th. Wednesday: World Cancer Day a ni a, Health minister Lal Thanzara hoin Electric Veng YMA Hall-ah hman a ni. World Cancer Day hmamna inkhawm hi Hospital & Medical Education director Dr Lalbiakkima’n a kaihruai. a ni. Inkhawmah hian HME deputy director leh NCD nodal officer Dr Eric Zomawia leh oncologist Dr Jerry L Pautu ten cancer leh natna dang laka inven dan, vei awlsam dan leh a veite enkawl dante an sawi a; Health secretary Arun Goyal, principal director Dr K.Ropari leh Electric Veng MHIP president ten thu an sawi bawk.
5th. Thursday: Disaster Management & Rehabilitation (DMR) minister C.Ngunlianchunga chuan DMR directorate tualah State Disaster Response Force (SDRF)-in chhanchhuahna hmanrua a neihte a enfiah.DMR hian an pisa tualah chhanchhuahna hmanrua leh bungrua an neihte hi an pho chhuak a, chu chu minister C Ngunlianchunga’n enfiahin, an mamawh belhte leh ṭan lak zui dan turte department hotute nen an sawiho nghal.
6th. Friday: Zemabawkah pick-up MZ-01 G-7367 chu chesualin kawng thlangah metre 60 vel a lum a, Zemabawk M/S-a pawl 6 zirlai, Vanlalhmingmuanpuii (13) d/o Lalkhumtira chu damdawi-in panpui a nih laiin a thi. Motor-ah hian sikul kai tur naupang pariat an chuang a, an zinga naupang dangte pawh an hliam a, mahse na lutuk an awm lo.
7th. Saturday: Parliamentary secretary Joseph Lalhimpuia chuan Aizawl Zoological Park-a dah atan satel kg. 10-a rit a pe. Satel hi Joseph Lalhimpuia fate’n Aizawl Zoological Park curator Lalrinliana hnenah an hlan a ni.
8th. Sunday: Presbyterian Kohhran Hmeichhiate’n pastor bial hrang hranga bial inkhawmpui
6th. Friday atanga an neih chu a ṭiak. Kohhran Hmeichhe bial inkhawmpui hi Mizoram chhung leh pawna bial hrang hrangah neih a ni.
9th. Monday: Governor Dr Aziz Qureshi sawmna angin TNT naupang ṭhahnem tak chu Raj Bhavan-a lêng a, intihhlimna hun an hmang. Larsap chuan naupangte chu rimawi leh zai lamah mipuite hriat hlawh tak an nih avangin intihhlimna hun a buatsaihsak tih sawiin, “Harsatna leh buaina kara naupang rilru thianghlimte zai ngaihthlak hi a hahdamthlak hle a ni,” a ti a; inlungrualna leh sakhaw inngeih tawnna kawngah state dangte’n Mizoram aṭanga zir tur an neih thu a lo sawi.
10th. Tuesday: Aizawl Municipal Council-a councillor pasarihte’n AMC chairman paihna tur resolution, Aizawl DC hnena an thehluh avangin AMC session hall-ah sawihoa bûk a ni a; INC councillor Lalzirliana’n AMC chairman Zarzoliana rin tawk lohna motion a pu lut a; chumi hnuah member-te chu thusawina hun pek an ni a, councillor 12-in thu an sawi. Hetianga motion a luh tak avang leh member ten thu an han sawi tak taka tang hian Chairman nilai Zarzoliana hian AMC chairman a nihna aṭanga a bân thu a sawi nghal a, “Chairman ka nihna aṭangin ka inhnûkdâwk a, inbûk buai a ngai lo e,” a ti. Mahse, meeting chairman R Vanlalvena MLA chuan vote lâk a kaltlangpui a, councillor-te thusawi (voice vote) hmangin AMC chairman Zarzoliana chuan thlawptu a nei tam tâwk lo a, chairman aṭanga paih a nih thu a puang a ni.
11th. Wednesday: Champhai District Level Standing Committee chu Champhai DC Sangdingliana hoin DC conference hall-ah an ṭhukhawm a, village council inthlan lo awm tur chungchang an sawiho.
12th. Thursday: Aizawl Municipal Council (AMC) sorkar thar a piang leh ta a; AMC chairman atan CT Zakhuma chu rinawmna thu tiamtira lak luh a ni. AMC chairman leh a thawhpui turte lak luhna inkhawm hi AMC Board of Councillors Meeting Hall-ah neih a ni a, Aizawl DC Dr Franklin Laltinkhuma’n a kaihruai.Inkhawm ṭan veleh Aizawl DC chuan AMC chairman tur rawtna hun a hawng a; MPC councillor PC Lalruatsanga’n CT Zakhuma a rawt a, rawtna dang a awm loh avangin DC chuan CT Zakhuma chu AMC chairman a nih thu a puang a ni. CT Zakhuma hi AMC chairman hmasa ber niin, July 2014 khan paihthlak a ni a, tun ṭum hi a vawi hnih chairman-na a ni.
13th. Friday: Lawngtlai College Vengah LPK truck, MZ-07 1248-in Joseph Vanlalchhana (5) s/o A.Lalngailova, Lawngtlai College Veng a chíl a, ká pawh chhawn lohin a thi. Truck khalhtu hi Hualhima, Lawngtlai College Veng a ni a, police-in an man nghal a ni.
14th. Saturday: Valentines Day a ni a; hemi puala buatsaih, a thlawna thisen pek runpui chu Govt. Mizo High School Hall leh Mizoram hmun dangah te neih a ni. Valentines day pual a thisen pek hi Aizawl, Lunglei, Saiha leh Serchhipah te thisen pek runpui hi neih a ni a, a vaiin unit 598 lak a ni. Thisen hi Aizawlah unit 418, Lungleiah 116, Saihaah 48 leh Serchhipah 17 lak a ni.
15th. Sunday: Kolosib-ah nausen piang hlim chhar a ni. Nausen hi Pu Kaikhawliana te kawtkai-ah tu-in emaw a dah a, nausen tap thawm hria-in an va chhuah chuan an kawngka pui bulah nausen puana tuam hi an va hmu ta a ni. Nausen hi a laihrui hnangin a intawn-a nausen tuamna puan pawh hi an kawmthlangte puan pho a nih thu Pu Kaikhawliana chuan a sawi. Kolosib civil hospital-ah kalpuia enkawl mek a ni a, he nausen hi mi pa, kg 2 leh gram 250-a rit a ni a, a hriselna a țha tih doctor-te chuan an sawi.
16th. Monday: Aizawl district-a Village Council Electoral Rolls 2015 chu DC Dr Franklin Laltinkhuma’n a pisaah a tlangzarh.Heta a land an chuan voter 71,014 an awm a, 35,292 chu mipa niin, 35,722 chu hmeichhia an ni. Vote tamna ber Sihphir V/C-ah chuan voter 2,793 an awm a, vote tlemna ber Chhanchhuahna Khawpuiah voter 100 an awm.
17th. Tuesday: Samaritan Society of Mizoram chuan I&PR Auditorium, Aizawlah an kum 25-na, silver jubilee an lawm a, Health minister Lal Thanzara’n a hmanpui. Samaritan Society of Mizoram hi January 15, 1990-a din a ni a, ruihhlo ngai leh HIV veite enkawl hna an thawk a ni.
18th. Wednesday: Tuivamita oxygen thunna bun thar, P.Zalena Oxygen Plant chu Health principal director Dr K.Ropari’n a hawng. P.Zalena Oxygen Plant aṭang hian ni khatah oxygen bur lian (6.5 cubic) 250 an thun khat hman a ni.
19th. Thursday: Agriculture department chuan Serchhip district chhunga NLUP hnuaia oil palm leh fu chîn thlangtu chhungkaw 180 hnenah ṭanpuina sum an sem.
20th. Friday: Doordarshan Kendra, Aizawl chuan an programme chu zan dar 9 thleng an tichhuak ṭhin tawh dawn. DDK Aizawl programme pawhsei hi chief minister Lal Thanhawla’n DDK studio-ah a hawng.
21st. Saturday: Lawngtlai Council Veng khawtlang chuan Lai Autonomous District Council-ah Pathian hnena lawmthu sawina leh sual thupha chawina hun an hmang a, an veng chhunga kohhran pawl hrang hrangte an tel.
22nd. Sunday: Mizoram Baptist Kohhran chuan Education Sunday an hmang a, thupui chu ‘Zirna hmanga ênna’ tih a ni. BCM hian kum tin February thlaa Pathianni hnuhnung berah Education Sunday an hmang ṭhin a ni.
23rd. Monday: Health Services department chuan Health directorate conference hall-ah Mizoram Film Development Society-te pualin Revised National TB Control Programme (RNTCP) chungchang zirhona an nei.
24th. Tuesday: Mizoram State Planning Board Vice Chairman, Pu H.Liansailova hoin Sectoral Surveilance chu a tum khatna atan NLUP Conference Hall-ah an thu khawm. Sectoral Surveillance hian a tum ber chu Mizoram sum leh pai dinhmunin hma a sawn theih nana sector hrang hrangte tan lak dan thlir let a ni. An thut khawmna-ah hian sum leh pai thawh chhuah kawnga Sector tin hnathawh leh Department hrang hrangten ram hmasawnna tura hna an thawh dante thlir ho a ni.
25th. Wednesday: MNF party chuan ram pum huap (Lawngtlaiah chuan atanga Central YLA-in tiam chin awm lova bandh thil dangah a huaihawt avangin avangin a hranpaain an nei ve lo thung.) Total Bandh sorkar-in sang taka chhiah a lak te, buhfai man a tihsan te, thisen sawngbawlna man a lak te, tui hman man leh eng chhit man a tihsan te, Biak In leh Thlanmual chhiah lak a tum te, kum 15 atana kawng chhiah a lak te, damlo inenkawlna bill tam tak a hrensak nia an sawite duh loh lantir nante an huaihawt. Bandh hi darkar 12 chhung neih tura ruahman a ni na a; mipuiin an thlawp that avangin a hun hmaa tih tawp a ni.
26th. Thursday: State Advisory Committee on Disaster Management chu Chairman Pu C.Ngunlianchunga, Minister of State, Disaster Management & Rehabilitation, etc. hovin ama office chamber ah an thukhawm.
27th. Friday: Commissioner of Taxes Lalthangliana Varte, MICE principal Dohmingthanga leh ICDS state programme officer PL Liandinga-te chu superannaution pension-in an chhuak.
28th. Saturday: Mizoram Governor chuan Ram Danpui Article 316 (1) in thuneihna a pek angin Mizoram Public Service Commission (MPSC) Chairman atan MPSC Member ni lai mek Pu Andrew Lalherliana chu a ruat.
Similar Posts:
- February 2017, Mizo(ram) Diary
- Mizoram gets 17 ambulances
- Health Care Si-kim
- December 2010 Mizo(ram) Diary
- June 2009, Mizoram Diary
March 24th, 2015 at 9:58 am
A tha lutuk e.
Report this comment