KA HMING HNAISAILO

March 21st, 2015 1:31 am by Manuni Pachuau

Ka maimitchhing vâng vâng a, chutah ka thil kênlai chu ka zuk en a, ka thaw hak a. Ka thianpa ka phone a, a rawn thleng chho var a. Midang an rawn luh neuh neuh avang chuan sawi tum pawh sawi thei ta lawk lo chuan ti ti dang kan han vawrh leh rih a. An chhuak pheuh pheuh a, kan pahnih chauh a kan awm hnu chuan thil awmdan ka sawi zung zung a, Damdawi In lamah kan tlan thla a; Doctor in ngun tak min check hnu chuan a chiang ta, ‘Ka rai ani’. Ka nui lova, ka tap hek lova, ka thianpa chuan ”I lawm lo vem ni?” min ti a, ‘Lawm ee’ zawitein ka chhang a.

In ka thlen veleh ka phone ka ban nghal a, number pakhat ka hmetchhuak a, thil awmdan chu a indawt tê tê in ka sawi a,hlauthawng ru tak hian ‘Engtinnge kan tih ang?’chutah lehlam ami chuan “Nupui ka nei dawn hnai tihna a ni mai alawm”. Chutah zet zawng hlim takin ka nui thei ta. Hmeichhe tan chuan chu hun tluka hun nuam leh hlimawm chu avang teh asin.Ka hlim vêng vêng a, kan hmalam hun atana beiseina sang tak nen chu mi zan chuan tui takin ka mu a.

Aizawl lam pana zin kawngthui zet kan zawhlai te chuan duhthusam tinreng nen chau tak si, hlim tak si in ka chuang a. Amah nen kan inhmuh hun chuan ka pum khawih pahin “Naute I pa ka nih hi hi aw” tih pahin min kuah anga, keiin hlim takin ka lo kuah let ve anga, ti in. Khawsik tlun hlawk hlawk chungin in ka thleng a,chutah ka nu chu phur takin palai te chuan eng ro nge an rêl thluk tak tih ka zawt vat a. Chutah ban deuh tak a kan nu min chhanna chuan min va barakhaih chiang êm! Ka lungphu chu a chawl duk a, nilo! engkim kha a chawl thuap zawk ani . Ka beisei loh lutukin thil a thleng ta ! Tichuan, ka mang lamah pawh ka la mangphan ngai loh, ka chan turah pawh ka la ruat chhin ngai reng reng loh in, kei chu hmeichhe tana mualphona leh hmingchhiatna tawpkhawk, hming a zawnga hming hnaisailo ber mai chu ka damchhung atan, ka hming an sawi apiang a ri tel kumkhua tawh tur in ka lo pu ta.

Rai lah chu ka’n haw na laileng khawp a, damni hmel reng ka hmu manglo. Zan khat chu rilru hah zet hian khumah mu in ka inngaituah vang vang a, chutah chuan ka tihsual lian ber mai ka hrechhuak ta! Kha inngaihzawnna ah khan Pathian ka lo telh reng reng hleinem maw le! Ka ngaihzawngah khan ka engkim ka nghat a, ka rinna zawng zawng nen lam. Zipori’n Mosia hnenah “I Pathian bia la, keiin nang ka be thung ang che anga” a tih changchawi khan ka awm ani ber e, chu tak chu ka tihsual chu a ni ta, ngaihngam taka ka ngaihzawng kut ka chelh lai chu min phelhsakin, mualphona leh hmingchhiatna tawp hmangin alamah ahnuhin min hnuk ta. Dem tur dang ka neilo, Pathian hnena thu tiam a, bawhchhe lehtu chu keimah ka ni. Chutah zet chuan sawi tur dang ka hre ta lo “Lalpa, min ngaidam rawh” tih mai loh chu.

Ka pum lah chu thup rual lohvin a puar lian telh telh a, nitin mai hian vawiin chu tu takin min zawt leh ang maw! tih ngaihtuah chungin huphurh takin ka chhuak thin. Ka hming an sawi rik rual a, adawt chiah a thumal dang ri tel thin te, hnung lama min sawizuina te leh ka inkhawm ve changa “a zah pawh a zak lo reuh ka ti” ti-a min sawizuina te chu bengchhut ngawn san sen pawh ani lo. Zak e! ka zak ve tehmeuh mai,zah vanga khuk ral theih chu ni se, ka khu ral zing chêm chêm ngawt ang.Mi zingah nui mah ila, mut hmunah erawh mittui nen ka mu fo thin. Mahse,ka tihsual siamthat lehna hun pek ka nih chu alo thlawna pindan up bo pui tur a tan chuan a pamhmai ka ti a, zak hmaisen awp awp chung pawhin ka naute nena kan hmalam hun atan khawvel ka hmachhawn angai tih ka inhrilh nawn fo thin.

Ka pum ka khawih a, thlamuang taka achhunga insiam mek ka naute chu ka ngaihtuah apiangin,hmangaihna ah ka luangliam nawn leh thin! Ka nunna in a tawrh mai hlau va paih mai tura min khawngaihtu te’n thu min rawn pawh a ka nunna aia ka thlan a ni a. Beidawnna tinrengin min hual lai pawh a ka chakna ani a, ka damchhan tur ani tawh si a. Kei leh ka naute hian Pathian hnenah lawmthu sawi kan va ba nasa em! Hmangaihna in min kiansan ngai si lova.Tichuan, tunah zet zawng, mi sawisep leh kawhzuina te chu, ka kut ngeia ka naute pawm ka nghahhlelhna nen chuan tehkhin thamah pawh ka ruat phal ta meuh lo..

Ka hmalam hun tur te ka han thlir changni hian,
Manganna, hreawm tur ka ngaihtuah a,
Kal ngaihna hrelo hian aw ka lo buaive êm êm a;
A remruat ka tan alo tawk reng si.