November 2016, Mizo(ram)Diary

December 26th, 2016 11:17 am by chhana

1st. Tuesday: Aizawl Municipal Corporation-a councillor 12-te chu India ram khawpui hrang hranga tualchhung sorkar (municipal) rorel dan zir tur leh an hnathawh dante zir turin Aizawl aṭangin an chhuak. AMC councillor-te study tour-a kalte hi deputy mayor Lalringliana’n a ho a ni.

2nd. Wednesday: SBI digital branch thar, ‘sbiINTOUCH’ tia vuah, Chanmari, Aizawla mi chu chief Minister Lal Thanhawla’n a hawng. sbiINTOUCH hi khawl changkang ber ber hmanga thuam a ni a, independent (mahnia inrêlbâwl) branch a nih ang leh digital branch a nih angin hnathawk pawh mi pahnih chauh dah a ni.

3rd. Thursday: Haulawng khua chuan an khuaa Zokhuma Memorial Field-ah an khaw kum 100 tlin an lawm a, minister Zodintluanga leh PC Lalthanliana ten an hmanpui.Tun dinhmunah Haulawng khuaah hian in 527 ah mihring 2229 an cheng mek a ni.

4th. Friday: Association of PHE Officers chuan officer pangate kaisan lawmna hun, Water Treatment Plant Site, Dihmunzawlah an hmang a; PHE minister Zodintluanga’n hmanpuiin, officer-te fuihna thu a sawi.PHE engineer kaisangte hi – Lalmuanzova (chief engineer aṭangin engineer-in-chief-ah), C Lallunghnema (SE aṭangin CE-ah), Zodinthari (EE aṭangin SE-ah), Lalzuimawii (SDO aṭangin EE-ah) leh, C Zothantluanga (SDO aṭangin EE-ah)-te an ni.

5th. Saturday: Lalenkawli (20) s/o Chuakunga, Kolasib Salem Veng chu Rengtetlanga bawlhhlawh paihna bul kawng thlangah thia chhar a ni.Lalenkawli hi November 3 tlai aṭangin chin hriat loa a bo a ni.

6th. Sunday: Khawvel Sunday School Ni a ni a, Mizoram Presbyterian Kohhran chuan puitling lamah Pu Mûka chanchin an zir a, naupang lamin CT Studd-a chanchin an zir thung.Khawvel Sunday School Ni hi United States-a Tabernacle Presbyterian Kohhrana mi, Dr George W.Bailey-a rawt chhuah nia sawi a ni a, kum 1907-a World’s Sunday School Association Convention, Rome-a neihah leh kum 1910-a Washington Convention-a an sawihona May 22, 1910 aṭangin hman ṭan a ni.

7th. Monday: Pachhunga University College-a Department of Statistics leh Sampling and Official Statistics Unit, Indian Statistical Institute, Kolkata ṭangkawp chuan PUC-ah ‘4th Workshop on Official Statistics in North Eastern States’ tih hmangin zirhona an buatsaih a, Higher & Technical Education minister R.Romawia’n a hmanpui.

8th. Tuesday: Kolasib College-a Schedule Tribe hmeichhe zirlaite tana hostel sak thar, ‘Kumtluang Hostel’ chu chief minister Lal Thanhawla’n a hawng. Chief Minister chuan, hostel neite chu sorkar dan zawm vek tura beisei an nih thu a sawi. Hostel building hi chawng li a ni a; dormitory, a enkawltu awmna, chowkidar awmna, common room, multipurpose hall, lehkha zirna, eirawngbawlna choka leh chaw einate a awm.

9th. Wednesday: Black money leh pawisa lem tam lutuk tih ziaawm theih nan Central sorkar chuan Rs 500/- leh Rs 1,000/- note-te chu a ti thi. Hetih rual hian Rs 500/- leh Rs 2,000/- note thar te tih chhuah nghal ni.

10th. Thursday: Mizoram Government AdHoc Aided High School Teachers Association (MIGAHTA) chuan Chanmari YMA Hall-ah Special Conference an hmang a, chief minister Lal Thanhawla’n a hmanpui. Special Conference-ah hian resolution pathum – chatlak loa hlawh an lak theih vanga Mizoram sorkar chunga lawmthu sawina te, tuna an hlawh lak mek basic pay leh half allowance chu full alowance anga pe tura sorkar ngenna leh, an damloha medical reimbursement bill phalsak ve tura sorkar ngennate an pass a ni.

11th. Friday: Mizoram tlawha rawn zin, Union Railways minister Suresh Prabhakar Prabhu leh minister of state for Railways Rajen Gohain te chuan Governor Lt.Gen. Nirbhay Sharma leh chief minister Lal Thanhawla an kâwm a; thil pawimawh hrang hrang an sawipui.

12th. Saturday: Chhinga Veng, Dawrpui, Electric Veng, Saron Veng leh Zarkawt branch YMA-te thawhhona, YMA Joint Duty-te chuan ruihhlo October 4 leh November 11 inkara an mante chu Dawrpui School kawtah an hâl a; hei hi ṭum hnih ruihhlo an hâl ralna a ni.

13th. Sunday: Centrar sorkar in tunhnaia pawisa note lian a tih thih avangin bank lam thawkte an buai hlea; hei vang hian nilengin duty pangngai angin hna an thawk.

14th. Monday: Sairang police-te chuan an thudawn bawhzuiin Mualkhangah gas khawih chingpen tum lai Zaikunga (38) s/o Zanawka, Teiliangmura, Tripura chu nangchingin, an man a, thubuai an siamsak.

15th. Tuesday: Mizorama a hmasa ber turin Urban Development & Poverty Alleviation (UDPA) department chuan internet hmangin e-office an kalpui ṭan dawn a, UDPA minister Zodintluanga pisaah a hawng. UDPA Minister chuan, paper chhah pui pui kenkual a ngai tawh dawn lo tih a sawi. UDPA department hian e-Office Lite a hmang dawn a, hmangtu (user) 250 an awm thei dawn a, department-ah user 76 leh Secretariat-ah 15 awmin, user 91 an awm ang.

16th. Wednesday: Mizoram University-a Mizo department chuan,Vanapa Hall-ah Lalzuithanga kutchhuakte zirhona, ‘National seminar on Creative Writings in commemorate the birth centenary of Lalzuithanga’ tih an buatsaih a; Art & Culture director R.Hmingthanzuala’n a hmanpui. Lalzuithanga hi kum 1916-ah a piang a, kumin hi a kum 100-na a ni. Lalzuithanga chuan thawnthu (novel) pariat leh lemchan thawnthu leh hla eng emaw zat a phuah a, a manuscript hmuh zawh loh pariat a awm bawk.

17th. Thursday: PRISM office-ah Mizoram Peoples Conference (MPC), Zoram Decentralisation Front (ZDF), Zoram Exodus Movement (ZEM) leh PRISM hruaitute’n joint meeting an nei a, kum 2018-a Assembly inthlanpuiah candidate neih an rél.

18th. Friday: Mizoram police-a CID (Crime) hnuaia Special Narcotics police-te chuan Ch. Chhunga Truck Terminal, Rangvamualah Sumneihngula (43) leh a nupui Nomenthluaii (42)-te hnen aṭangin heroin hawng 15 an man a, heroin an man hi tualchhunga hralhna ang chuan Rs. 7,50,000/- hû a ni.

19th. Saturday: Information & Public Relations department leh Mizoram Art Development Society (MADS)-te chuan, Annual Art Exhibition khârna leh high school leh middle school tana ‘On The Spot Painting Competition’ an buatsaiha tiṭhate hnenah lawmman an sem a, minister Lalsawta’n a hmanpui. On The Spot Painting Competition-ah hian high school section-ah zirlai 25 leh middle school section-ah zirlai 39 an tel a; certificate bakah pakhatnain Rs. 5,000/-, pahnihnain Rs. 3,000/- leh pathumnain Rs. 2,000/- an dawng a ni.

20th. Sunday: Mizoram Synod hnuaia Campus Ministry chuan Kolasib Diakkawn kohhranah hun an hmang a; He hun hi Diakkawn kohhran hnuaia Kristian Chhungkaw Comtt. bultuma hman niin, thupui atana thlan ‘Zirna leh Moral Reform’ tih chu Rev Lalchungnunga, Director in fiah leh ngaihnawm takin a sawi.

21st. Monday: Meizûk sim hnua vaihlo dona kawnga hma latu pawl, Tobacco Quitters of Mizoram (TQM) chuan Aizawl Press Club-ah an pawl din champha vawi thumna an lawm a, Health minister Lal Thanzara’n a hmanpui.

22nd. Tuesday: Chalfilh bialtu MLA Dr. Ngurdingliana chuan a bial chhung Phullenah leh Suangpuilawnah NLUP a sem. Dr. Ngurdingliana chuan, “NLUP-ah hian cheng vbc. 288/- leh NEDP-ah vbc. 250/- kan dah a, hei aia tam hi nakkumah kan dah leh dawn. NLUP hlawhtlinpuitute chu NEDP hmangin kan tanpui chhunzawm zel dawn a ni,” a ti.

23rd. Wednesday: Mizo scientist kan tih mai, India rama civil mite chawimawina sang Padma Shree dawng tawh leh Central YMA president hlui, C.Rokhuma (100) h/o Lalrinthangi, Mission Vengthlang chu a thi.

24th. Thursday: Art & Culture department leh Central YMA-in Lammuala ni hnih awh hnam lâm intihsiakna, 12th. Chief Minister’s Running Trophy in YMA Cultural Dance Competition 2016 chu khar a ni a, chief minister Lal Thanhawla’n lawmmante a sem. Lâm pathuma tiṭha ber chu Ramthar North Branch YMA an ni. CM’s Running Trophy in YMA Cultural Dance Competition-ah hian tel turin YMA branch 56-in hming pe mah se, branch 38 chiah an lám thei a, chu’ng zinga branch pali chu Aizawl páwn aṭanga tel an ni. YMA branch-te chu Cheraw (Kântluang), Chawnglaizawn leh Tlanglâmte hmangin an intihsiak. CM Running Trophy in YMA Cultural Dance Competition hi kum 1993-ah nei ṭan a ni a, kum kar thlakin neih ṭhin a ni.

25th. Friday: Kohhran Hmeichhe Ni a ni a, Presbyterian Kohhran Hmeichhiate’n bial leh kohhran mal huapin an hmang. Kohhran Hmeichhe Ni hi kum 1997-ah hman ṭan a ni a, November thlaa Zirtawpni hnuhnung berah hman ṭhin a ni.

26th. Saturday: Aizawl SP hnuaia District Special Branch (DSB) chuan Chanmari, Aizawlah Metamphitamine mûm 10,021 leh a neitua puh David Vanlaltluanga (38), Chanmari, Aizawl nia insawi an man. DSB hian Meth hi Chanmari-Chaltlang road-a motor chhunga a leitu tur hnena an inhlan chhawng tur nangchingin an man a ni.

27th. Sunday: Mizoram Baptist Kohhran ni pawimawh, ‘Rualbanlote Ni’ a ni a, he ni pual hian Baptist tualchhung kohhran tinah chawhma inkhawmah hun hman a ni. Rualbanlote Ni thupui chu ‘Miin i chunga an tiha i duh tur ang apiang chu, mi chungah pawh ti ve rawh u’ tih a ni.

28th. Monday: MNF ṭhalaite chuan Mizo Hnam Rûn kawtah Lunglei DC Lalzarmawii’n November 25, 2016-a circular a chhuah copy an hâl. Hetih lai hian, Lunglei DC chuan circular thar chhuahin, November 25-a circular a lo chhuah tawh chu sût (cancel) a nih thu a tarlang. Lunglei DC circular hâlnaah hian MNYF president K.Vanlalvena chuan, “Kan sorkar hrawn mek hi sipai sorkar ang maia mipuite zalenna rapbet zawnga thupek déngkháwng tak tak chhuah chíng sorkar a ni,” a ti a; “Circular hi nimin zinga chhuah a ni a, November 26, 2016, Inrinnia chhuah angin an back date a ni,” a ti bawk.

29th. Tuesday: F.Lalhmangaiha, Hualngohmun chuan sakramen uain thlitna khawl a siam chhuah chu Synod Conferencesex Hall-ah Synod moderator Rev. H Lalrinmawia’n Pathian hnenah hlanin a tlangzarh. Sakramen uain thlitna khawl hi kawlphetha hmang lo, kuta khawih ngai a ni a; ṭum khatah second 5 vel chhungin sakramen tray pakhata no awm zawng zawng (no 30) chu a rualin a thli khat thei a ni.

30th. Wednesday: Aizawla awm 39 Assam Rifles chuan, Scorpio MZ-01 M-1563 aṭangin pawisa tam tham tak leh motor khalhtu Sawmthanga (48) s/o Thangkeia leh motor-a chuang Stephan Kama (21) s/o Thangkepa, Bawngkawn Lunglei road-a cheng nia insawite an man.